September 22, 2023

ಸೆ.24: ಚಿಣ್ಣರ ಬಿಂಬ ವಿಕ್ರೋಲಿ ಶಿಬಿರದ ಸಾಂಸ್ಕೃತಿಕ ಪ್ರತಿಭಾ ಪಂತೊ

ಚಿಣ್ಣರ ಬಿಂಬ ಬೊಂಬೈ ನೆತ್ತ ವಿಕ್ರೋಲಿ ಶಿಬಿರದ ಜೋಕುಲೆನ ಸಾಂಸ್ಕೃತಿಕ ಪ್ರತಿಭಾ ಪಂತೊ ಸೆ.24 ಕ್ಕ್ ಬೊಲ್ಪುಗು ವಿಕ್ರೋಲಿ ವಿಕೇಸ್ ಸ್ಕೂಲ್ ದ ಚಾವಡಿಡ್ ನಡಪರೆ ಉಂಡು.

ಲೇಸ್ ನ್ ವಿಕ್ರೋಲಿ ಬಂಟ್ಸ್ ಸಂಘದ ಗುರ್ಕಾರೆ ಗಣೇಶ್ ಶೆಟ್ಟಿ ಉದಿಪನ ಮಲ್ಪುವೆರ್. ವಿಕ್ರೋಲಿ ಕನ್ನಡ ಸಂಘದ ಗುರ್ಕಾರೆ ಉದಯ ಶೆಟ್ಟಿ ಪೇಜಾವರ ಗುರ್ಕಾರ್ಮೆನ್ ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ ಘಾಟ್ ಕೋಪರ್ ಕನ್ನಡ ವೆಲ್ಫೇರ್ ಅಸೋಸಿಯೆಶನ್ ದ ಗುರ್ಕಾರೆ ನವೀನ್ ಇನ್ನ ಬಾಳಿಕೆ, ವಿಕ್ರೋಲಿದ ಉದ್ಯಮಿ ಬಾಬು ಶೆಟ್ಟಿ, ಉದ್ಯಮಿ ನವೀನ್ ಕರಿಯ ಶೆಟ್ಟಿ ಬೊಕ್ಕ ಕನ್ನಡ ಸಂಘದ ಸದಸ್ಯೆರ್ ಪುಷ್ಪ ನಾಯಕ್ ಪಾಲ್ ಪಡೆಯೆರೆ ಉಲ್ಲೆರ್.

ಶಿಬಿರ ಮಟ್ಟಡ್ ಚರ್ಚಾ ಪಂತೊ, ಭಾಷಣ ಪಂತೊ, ಭಾವಗೀತೆ ‘ಜಾನಪದ ಗೀತೆ, ಛದ್ಮವೇಷ ಪಂತೊ ಬೊಕ್ಕ ಪಾಲಕೆರೆಗಾದ್ ದೇಶಭಕ್ತಿ ಗೀತೆ ಪಂತೊನ್ ಆಯೋಜನೆ ಮಲ್ದೆರ್. ಈ ಪೊರ್ತುಡು ಶಿಬಿರದ ಚಿಣ್ಣರೆಗ್ ಪ್ರತಿಭಾನ್ವೇಷಣೆ ಲೇಸ್ ನಡಪರೆ ಉಂಡು. ಈ ಲೇಸ್ ಗ್ ಪರಿಸರದ ತುಳು-ಕನ್ನಡಿಗೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್ ಜೋಕುಲೆನ ಪ್ರತಿಭೆನ್ ಪ್ರೋತ್ಸಾಹ ಮಲ್ಪೆರೆ ಚಿಣ್ಣರ ಬಿಂಬದ ರೂವಾರಿ ಪ್ರಕಾಶ್ ಭಂಡಾರಿ ಬೊಕ್ಕ ಪದಾಧಿಕಾರಿಲು ಪ್ರಕಟನೆಡ್ ತೆರಿಪಾದೆರ್.

ಸೆ.30: ಸಾಂತಕ್ರೂಸ್ ಬಿಲ್ಲವ ಭವನಡ್ ಮೈತಿದಿ ನಾಟಕ

ಬೊಂಬೈ: ಕಮಲ ಕಲಾ ವೇದಿಕೆ (ರಿ.) ಅರ್ಪಣೆ ಮಲ್ಪುನ ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್ ರಚನೆ ಬೊಕ್ಕ ನಿರ್ದೇಶನದ ಮೈತಿದಿ ತುಳು ನಾಟಕ ಸೆ.30 ಸನಿಯಾರ ಸಾಂತಕ್ರೂಸ್ ಬಿಲ್ಲವ ಭವನಡ್ ನಡಪರೆ ಉಂಡು.

ಯುವ ಸಂಘಟಕೆರ್ ನವೀನ್ ಪಡು ಇನ್ನ ಮೆರೆನ ಸಂಯೋಜನೆಡ್ ಉದಿಪನ ಲೇಸ್ ನಡಪುಂಡು. ಈ ನಾಟಕಡ್ ಬೊಕ್ಕ ತುಳು ರಂಗಭೂಮಿಡ್ ಸಂಚಲನ ಮೂಡಿಸಾಯಿನ ಶಿವದೂತೆ ಗುಳಿಗೆ ಖ್ಯಾತಿದ ಕಲಾವಿದೆರಾಯಿನ ತುಳುನಾಡ ಐಸಿರಿ ರೂಪಶ್ರೀ ವರ್ಕಾಡಿ ಬೊಕ್ಕ ಚಲನಚಿತ್ರ ನಟೆ ಸ್ವರಾಜ್ ಶೆಟ್ಟಿ ಅಭಿನಯ ಮಲ್ಪೆರೆ ಉಲ್ಲೆರ್. ನೆಕ್ಕ್ ಸಂಗೀತನ್ ಎ.ಕೆ ವಿಜಯ್ (ಕೋಕಿಲಾ) ಕೊರಿಯೆರೆ ಉಲ್ಲೆರ್.

ಸಸಿಹಿತ್ಲು ಭಗವತೀ ತೀಯಾ ಸಂಘ ಬೊಂಬೈ ಮುತಾಲಿಕೆಡ್ ಶ್ರೀ ಭಗವತೀ ಕ್ಷೇತ್ರ ಮಹಾತ್ಮೆ ಆಟ

ಯಕ್ಷಗಾನ ಏಪಲ ಆಳಿ ದಾಂತಿನ ಕಲೆ: ಚಂದ್ರಹಾಸ ಪಾಲನ್

ಬೊಂಬೈ: ಸಸಿಹಿತ್ಲು ಭಗವತೀ ತೀಯಾ ಸಂಘ (ರಿ.) ಬೊಂಬೈದ ಮುತಾಲಿಕೆಡ್, ಅಜೆಕಾರ್ ಕಲಾಭಿಮಾನಿ ಬಳಗ (ರಿ.) ದ ಒಟ್ಟುಸೇರಿಗೆಡ್ ಶ್ರೀ ಸಸಿಹಿತ್ಲು ಭಗವತೀ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿದಕ್ಲೆನ ಕಲಾ ಕಾಣಿಕೆ ಶ್ರೀ ಭಗವತೀ ಕ್ಷೇತ್ರ ಮಹಾತ್ಮೆ ಪನ್ಪುನ ಯಕ್ಷಗಾನ ಇಂಚಿಪ್ಪ‌‌ ಮೀರಾರೋಡ್ ಈಸ್ಟ್ ದ ಸಾಯಿಬಾಬಾ ನಗರದ ಸೈಂಟ್ ಥಾಮಸ್ ಚರ್ಚ್ ದ ಸಭಾಗೃಹಡ್ ನಡತ್ಂಡ್.

ಈ ಪೊರ್ತುಡು ನಡತಿನ ಸಭಾ ಲೇಸ್ ಡ್ ಸಂಘದ ಗುರ್ಕಾರೆ ಚಂದ್ರಹಾಸ ಪಾಲನ್ ಪಾತೆರ್ದ್, ಆಟದ ಮುಖೇನ ನಮಕ್ ಕ್ಷೇತ್ರ ಪರಿಚಯ ಆಪಿನೆತ್ತೊ‌ಟ್ಟಿಗೆ ಆ ಕ್ಷೇತ್ರದ ಕಾರಣಿಕದ ಬಗೆಟ್ಟ್ ತೆರಿವೊನರೆ ಸಾಧ್ಯ ಆಪುಂಡು. ಯಕ್ಷಗಾನ ಪನ್ಪುನವು ಏಪಲ ಅಳಿಯಂದಿನ ಕಲೆತ್ತ ಪ್ರಕಾರ ಆತ್ಂಡ್. ಬೊಂಬೈ ಮಹಾನಗರದ ಕಲಾಭಿಮಾನಿಲು ಬೊಕ್ಕ ಕಲಾ ಪೋಷಕೆರ್ ಆಟದ ಉನ್ನತಿಗ್ ಎಚ್ಚದ ಸಹಾಕಾರನ್ ಕೊರೊಂದು ಉಲ್ಲೆರ್ ಪಂದ್ ಪಂಡೆರ್.

ಈ ಪೊರ್ತುಡು ಚಾವಡಿಡ್ ತೀಯಾ ಸಮಾಜ ಬೊಂಬೈದ ಮಾಜಿ ಗುರ್ಕಾರೆ ಚಂದ್ರಶೇಖರ್ ಬೆಳ್ಚಡ, ಶ್ರೀ ಲಕ್ಷ್ಮೀನಾರಾಯಣ ಭಜನಾ ಸಮಿತಿ ಮಿರಾರೋಡ್ ದ ಗುರ್ಕಾರೆ ಹರೀಶ್ ಪೂಜಾರಿ ಇತ್ತೆರ್.

ಶ್ರೀ ಸಸಿಹಿತ್ಲು ಭಗವತೀ ತೀಯಾ ಸಂಘ (ರಿ.) ಬೊಂಬೈದ ಮಾನಾದಿಗೆದ ಗುರ್ಕಾರೆ ಲಾಜರ್ ಟಿ.ಎಮ್ ಕೋಟ್ಯಾನ್, ಉಪಾಧ್ಯಕ್ಷೆರ್ ಆನಂದ ಜೆ ಬಂಗೇರ, ಗೌರವ ಪ್ರಧಾನ ಕಾರ್ಯದರ್ಶಿ ಸುಧಾಕರ ಟಿ ಬೆಳ್ಚಡ, ಜತೆ ಕಾರ್ಯದರ್ಶಿ ಸದಾಶಿವ ಸಾಲ್ಯಾನ್, ಕೋಶಾಧಿಕಾರಿ ರಮೇಶ್ ಬಿ ಸಾಲ್ಯಾನ್, ಜತೆ ಕೋಶಾಧಿಕಾರಿ ಮೃತ್ಯುಂಜಯ ಎಮ್ ಬೆಳ್ಚಡ, ಪೂಜಾ ಸಮಿತಿದ ಕಾರ್ಯಾಧ್ಯಕ್ಷೆರ್ ವಸಂತ್ ಕರ್ಕೇರ, ಮಹಿಳಾ ವಿಭಾಗದ ಗುರ್ಕಾರ್ದಿ ರೋಹಿಣಿ ಎಸ್ ಬಂಗೇರ, ಸರ್ವಸದಸ್ಯೆರ್ ಬೊಕ್ಕ ಶ್ರೀ ಲಕ್ಷ್ಮೀನಾರಾಯಣ ಭಜನಾ ಸಮಿತಿ ಮಿರಾರೋಡ್ ಸಹಕಾರ ಮಲ್ತೆರ್.

ಸೆ.24: ಸಾಂತಕ್ರೂಸ್ ಬಿಲ್ಲವರ ಅಸೋಸಿಯೇಶನ್ಸ್ ಆಡಿಟೋರಿಯಂಡ್ ಸ್ವರ ಕಂಠೀರವ ಲೇಸ್

ಬೊಂಬೈ: ಮಧುರತರಂಗ (ರಿ.) ಕುಡ್ಲದ ದುಂಬಾತ್ತಿಗೆಡ್ ಮಹಾರಾಷ್ಟ್ರದ ಕನ್ನಡ ಕಲಾಭಿಮಾನಿಲೆನ ಹೃದಯಸ್ಪರ್ಶಿ ನಮನದೊಟ್ಟಿಗೆ, ಜಗದೀಶ್ ಶಿವಪುರ ಮೆರೆನ ಮುತಾಲಿಕೆಡ್, 50 ನೇ ಸುವರ್ಣ ಸಂಭ್ರಮ ಸ್ವರ ಕಂಠೀರವ ಲೇಸ್ ಸೆ.24 ಐತಾರ ಬೊಂಬೈದ ಸಾಂತಕ್ರೂಸ್ ಬಿಲ್ಲವರ ಅಸೋಸಿಯೇಶನ್ಸ್ ಆಡಿಟೋರಿಯಂಡ್ ನಡಪರೆ ಉಂಡು.

ಅಂಚೆನೆ ಈ ಲೇಸ್ ದೊಟ್ಟಿಗೆ ಸ್ವರತಪಸ್ವಿ, ಕರ್ನಾಟಕ ಸ್ವರಕಂಠೀರವ, ಜ್ಯೂ.ರಾಜ್ ಕುಮಾರ್ ಪುಗರ್ತೆದ ಜಗದೀಶ್ ಶಿವಪುರ ಮೆರೆನ ಡಾ.ರಾಜ್ ನೆಂಪುಗಾದ್ ಮುಧುರ ಗೀತೆಲು ಬೊಕ್ಕ ದೀಪಿಕಾ ದಿವಾಕರ್ ಆಚಾರ್ಯ ಮೆರೆನ ನೃತ್ಯ ವೈವಿಧ್ಯತೆ ಲೇಸ್ ನಡಪರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್, ಕಲಾವಿದೆರೆಗ್ ಎಡ್ಡೆಪ್ಪು ಬಯಕೊಡು ಪಂದ್ ಮಧುರ ತರಂಗ (ರಿ.) ಕುಡ್ಲದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.