ಕುಡ್ಲ: ದ.ಕ.ಜಿಲ್ಲಾ ಕಾರ್ಯನಿರತ ಪತ್ರಕರ್ತೆರೆನ ಸಂಘರ್ದ್ ಸೌಹಾರ್ದತೆನ್ ಕಾಪರೆ ಇಂಬು ಕೊರ್ಪಿನ ಪತ್ರಿಕಾ ವರದಿಗ್ ವರ್ಷಲ ಕೊರ್ಪಿನ ಬ್ರ್ಯಾಂಡ್ ಮಂಗಳೂರು ಪ್ರಶಸ್ತಿಗ್ ಹೊಸದಿಗಂತ ವರದಿಗಾರೆ ಸುರೇಶ್ ಡಿ.ಪಳ್ಳಿ ಬೊಕ್ಕ ಏಷ್ಯಾನೆಟ್ ಸುವರ್ಣ ನ್ಯೂಸ್ ವರದಿಗಾರೆ ಭರತ್ರಾಜ್ ಕೆ. ಸನಿಲ್ ಆಯ್ಕೆ ಆತೆರ್.
ಹೊಸದಿಗಂತ ಪತ್ರಿಕೆಡ್ 2022 ತ್ತ ಜೂ.13 ಕ್ಕ್ ಪ್ರಕಟ ಆಯಿನ “ಮತ್ತೆ ಒಂದಾಗಲಿ ಒಡೆದ ಮನಸ್ಸುಗಳು” ಬೊಕ್ಕ ಸುವರ್ಣ ನ್ಯೂಸ್ ಡ್ 2022ತ್ತ ಏ.19 ಕ್ಕ್ ಪ್ರಸಾರ ಆಯಿನ “ಹಿಂದೂ ಕುಶಲಕರ್ಮಿಯ ಕೈಚಳಕ, ಕೋಮು ಸೂಕ್ಷ್ಮ ಮಂಗಳೂರಿನ ಸೌಹಾರ್ದತೆಯ ಕಥೆ” ಪನ್ಪಿನ ಇಸೇಸ ವರದಿಗ್ ಈ ಪ್ರಶಸ್ತಿ ತಿಕ್ ದ್ಂಡ್ ಪಂದ್ ಸಂಘದ ಪ್ರಧಾನ ಕಾರ್ಯದರ್ಶಿ ಜಿತೇಂದ್ರ ಕುಂದೇಶ್ವರ ಪತ್ರಿಕಾ ಪ್ರಕಟಣೆಡ್ ತೆರಿಪಾದೆರ್.
ತೀರ್ಪುಗಾರೆರಾದ್ ಪತ್ರಿಕಾ ವಿಭಾಗದ ಪೆರಿಯ ಪತ್ರಕರ್ತೆ ಹಿಲರಿ ಕ್ರಾಸ್ತ, ರಂಗ ಸಾಹಿತಿ, ನ್ಯಾಯವಾದಿ ಶಶಿರಾಜ್ ಕಾವೂರು, ಕರಾವಳಿ ಲೇಖಕಿ, ವಾಚಕಿಯೆರೆನ ಸಂಘದ ಅಧ್ಯಕ್ಷೆ ಜ್ಯೋತಿ ಚೇಳ್ಯಾರು, ದೃಶ್ಯ ಮಾಧ್ಯಮ ವಿಭಾಗದ ಉಜಿರೆ ಎಸ್ಡಿಎಂ ಪತ್ರಿಕೋದ್ಯಮ ಉಪನ್ಯಾಸಕೆ ಸುನಿಲ್ ಹೆಗ್ಡೆ, ನಮ್ಮ ಕುಡ್ಲ ವಾಹಿನಿದ ಪೆರಿಯ ಪತ್ರಕರ್ತೆ ಲ್ಯಾನ್ಸಿ ಡಿಸೋಜ ಸಹಕಾರ ಮಲ್ತೆರ್.
ಜು.1 ಕ್ಕ್ ಬೊಲ್ಪುಗು 11 ಗಂಟೆಗ್ ಪತ್ರಿಕಾಭವನಡ್ ನಡಪರೆ ಇಪ್ಪುನ ಪತ್ರಿಕಾ ದಿನಾಚರಣೆದ ಪೊರ್ತುಡು
ಪೊಲೀಸ್ ಕಮಿಷನರ್ ಕುಲದೀಪ್ ಜೈನ್, ಆಕಾಶವಾಣಿ ನಿವೃತ್ತ ಅಧಿಕಾರಿ ಸದಾನಂದ ಪೆರ್ಲ ಪ್ರಶಸ್ತಿ ಪ್ರಧಾನ ಮಲ್ಪುವೆರ್.
ಪತ್ರಕರ್ತೆರೆನ ಸಂಘದ ಅಧ್ಯಕ್ಷೆರ್ ಶ್ರೀನಿವಾಸ ನಾಯಕ್ ಇಂದಾಜೆ ಈ ಲೇಸ್ ದ ಗುರ್ಕಾರ್ಮೆನ್ ಒಯಿಸೊನ್ವೆರ್. ಪ್ರೆಸ್ಕ್ಲಬ್ ದ ಅಧ್ಯಕ್ಷೆರ್ ಪಿ.ಬಿ.ಹರೀಶ್ ರೈ, ಪತ್ರಿಕಾಭವನ ಟ್ರಸ್ಟ್ದ ಅಧ್ಯಕ್ಷೆರ್ ರಾಮಕೃಷ್ಣ ಆರ್. ಈ ಲೇಸ್ ಡ್ ಪಾಲ್ ಪಡೆಯೆರೆ ಉಲ್ಲೆರ್.
ಸುರೇಶ್ ಡಿ. ಪಳ್ಳಿ ಮೆರೆನ ಪೊಲಬು:
ಮೂಲತಃ ಒಡಿಪು ಜಿಲ್ಲೆದ ಕಾರ್ಲ ತಾಲೂಕ್ ದ ಪಳ್ಳಿ ಗ್ರಾಮದಾರ್ ಆಯಿನ ಮೇರ್ ಸಮೂಹ ಸಂಹವನ ಬೊಕ್ಕ ಪತ್ರಿಕೋದ್ಯಮ- ಸ್ನಾತಕೋತ್ತರ ಪದವೀಧರೆರ್. 16 ವರ್ಷೊದಿಂಚ ಹೊಸ ದಿಗಂತ ಪತ್ರಿಕೆದ ಕುಡ್ಲ ವಿಭಾಗಡ್ ವರದಿಗಾರೆರಾದ್ ಬೇಲೆ ಮಲ್ದೆರ್. 2013ನೇ ಸಾಲ್ ದ ಪದ್ಯಾಣ ಗೋಪಾಲಕೃಷ್ಣ (ಪ.ಗೋ) ಪ್ರಶಸ್ತಿನ್ ಪಡೆತೆರ್. ಮೆರೆನ ಇಸೇಸ ವರದಿಯೊಂಜಿ ಅಖಿಲ ಭಾರತ ಮಟ್ಟದ-ಜಾಗತಿಕ ಸಮಾಜ ಕಾರ್ಯ ಸಂಸ್ಥೆ ಪ್ರಕಟಿಣೆ ಮಲ್ಪುನ ‘ಹಂಗರ್ ಪ್ರಾಜೆಕ್ಟ್’ದ ಬೂಕುಡು ಆಂಗ್ಲ ಭಾಷೆಗ್ ತರ್ಜುಮೆ ಆದ್ ಪ್ರಕಟ ಆತ್ಂಡ್.
ಭರತ್ರಾಜ್ ಸನಿಲ್ ಮೆರೆನ ಪೊಲಬು:
ಕುಂಪಲದ ಭರತ್ರಾಜ್ ಮೆರೆಗ್ ಪತ್ರಿಕೋದ್ಯಮಡ್ 14 ವರ್ಷದ ಅನುಭವ ಉಂಡು. 18ನೇ ವರ್ಷಡೇ ಜಯಕಿರಣ ಪತ್ರಿಕೆಡ್ ಪತ್ರಿಕೋದ್ಯಮ ಸುರು ಮಲ್ತ್ ದ್ ಬೊಕ್ಕ ದೂರ ಶಿಕ್ಷಣಡ್ ಬಿ.ಎ ಪತ್ರಿಕೋದ್ಯಮ ಪದವಿ ಮಲ್ದೆರ್. ಬಿಟಿವಿ ನ್ಯೂಸ್ ಜಿಲ್ಲಾ ವರದಿಗಾರೆಯಾದ್ ಬೊಕ್ಕ 2017 ರ್ದ್ ಸುವರ್ಣ ನ್ಯೂಸ್ಡ್ ಜಿಲ್ಲಾ ವರದಿಗಾರೆಯಾದ್ ಬೇಲೆ ಮಲ್ದೆರ್.
Suresh Palli, Bharathraj Sanil get ” Brand Mangalore” Prasasthi
Manglore: The award is given by the DK Working Journalists Association to to encourage maintaining harmony.
The two journalists had published respectively ” Matte ondagali Odeda Manasugalu” and ” Hindu Kushalakarmiya Kaichalaka ,Komu Suksma Mangaluruna Sowhardateya Kathe”.
pallavi shetty