ಬಡಗನ್ನೂರು(ಪುತ್ತೂರು): ಗೆಜ್ಜೆಗಿರಿ ದೇಯಿಬೈದೆತಿ ಕೋಟಿ-ಚೆನ್ನಯ ಮೂಲ ತಾನೊ ಶ್ರೀ ಆದಿ ಧೂಮಾವತಿ ಶ್ರೀ ದೇಯಿಬೈದೆತಿ ಕೃಪಾಪೋಷಿತ ಯಕ್ಷಗಾನ ಮಂಡಳಿ ಗೆಜ್ಜೆಗಿರಿ ನೆತ್ತ ಉದಿಪನ ಅಂಚನೆ ದೇವೆರೆನ ಸುರುತ್ತ ಸೇವೆ ಆಟ ನ.27 ತಾರೀಕ್‌ಗ್ ಕ್ಷೇತ್ರದ ವಠಾರೊಡು ಭಾರಿ ಗೌಜಿಡ್ ನಡತ್ಂಡ್.
ಸೋಲೂರು ಮಠದ ಆರ್ಯ-ಈಡಿಗ ಮಹಾಸಂಸ್ಥಾನದ ಪೀಠಾಧಿಪತಿ ಶ್ರೀ ವಿಖ್ಯಾತಾನಂದ ಸ್ವಾಮೀಜಿ ಉದಿಪನ ಮಲ್ತ್‌ದ್ ಆಶೀರ್ವಚನ ಕೊರಿಯೆರ್. ಈ ಬಗೆಟ್ ಪಾತೆರಿನ ಆರ್, ಈ ದೇಶಡ್ ಕಲೆ ಬೊಕ್ಕ ಸಂಸ್ಕೃತಿನ್ ಒರಿಪಾವುನವು ಯಕ್ಷಗಾನ. ಗೆಜ್ಜೆಗಿರಿ ದೇಯಿಬೈದೆತಿನ ಮಣ್ಣ್‌ಡ್ ಯಕ್ಷಗಾನದ ಮೇಳ ಸುರು ಆತಿನವು ಪುಣ್ಯದ ಕಜ್ಜೊ ಪಂದ್ ಪಂಡೆರ್.
ಶ್ರೀ ಕ್ಷೇತ್ರ ಧರ್ಮಸ್ಥಳದ ಡಿ. ಹರ್ಷೇಂದ್ರ ಕುಮಾರ್ ಪಾತೆರ್ದ್, ಗೆಜ್ಜೆಗಿರಿಟ್ಟ್ ಸಾನಿಧ್ಯ ಎಡ್ಡೆ ರೀತಿಡ್ ಆತಿನೆಡ್ದಾವರ ಗೆಜ್ಜೆಗಿರಿ ಮೇಳ ಸುರು ಆತಿನವು ಸಾಕ್ಷಿ. ಈ ಮೇಳದ ಮೂಲಕ ಕ್ಷೇತ್ರದ ಕಾರ್ನಿಕ, ಇತಿಹಾಸ, ವಿಶೇಷತೆ ಅವು ಪತ್ತ್ ಊರುಡು ಪಸೆರಡ್ ಪಂದ್ ಪಂಡೆರ್. ಶ್ರೀ ಕ್ಷೇತ್ರ ಕಟೀಲು ದೇವಲ್ಯದ ಅನುವಂಶಿಕ ಅರ್ಚಕೆರ್ ಸದಾನಂದ ವೆಂಕಟೇಶ್ ಅಸ್ರಣ್ಣ ಮೇರ್ ಎಡ್ಡೆಪ್ಪು ಬಯಕಿಯೆರ್.
ಶ್ರೀ ಕ್ಷೇತ್ರ ಗೆಜ್ಜೆಗಿರಿತ್ತ ಅಧ್ಯಕ್ಷೆರ್ ಪೀತಾಂಬರ ಹೆರಾಜೆ ಲೇಸ್ ದ ಗುರ್ಕಾರ್ಮೆ ಒಯಿಸ್ ದಿತ್ತೆರ್.
ಯುವ ಸಂಶೋಧಕೆರ್ ಡಾ| ಅರುಣ್ ಉಳ್ಳಾಲ್ ಧರ್ಮದ ಬಗೆಟ್ಟ್ ಭಾಷಣ ಮಲ್ತೆರ್. ಶಾಸಕೆರ್ ಉಮಾನಾಥ ಕೋಟ್ಯಾನ್, ಬಿಲ್ಲವ ಮಹಾಮಂಡಲ ಅಧ್ಯಕ್ಷೆರ್ ರಾಜಶೇಖರ ಕೋಟ್ಯಾನ್, ಅಖಿಲ ಭಾರತ ಬಿಲ್ಲವರ ಯೂನಿಯನ್‌ದ ನವೀನ್‌ಚಂದ್ರ ಡಿ. ಸುವರ್ಣ, ಗೆಜ್ಜೆಗಿರಿ ಕ್ಷೇತ್ರದ ನಿಕಟಪೂರ್ವ ಅಧ್ಯಕ್ಷೆರ್ ಜಯಂತ ನಡುಬೈಲು, ಪ್ರತಿಭಾ ಕುಳಾಯಿ, ಕುದ್ರೋಳಿ ಕ್ಷೇತ್ರದ ಕೋಶಾಧಿಕಾರಿ ಆರ್. ಪದ್ಮರಾಜ್, ದುಬೈ ಬಿಲ್ಲವಾಸ್ ಅಧ್ಯಕ್ಷೆರ್ ಪ್ರಭಾಕರ ಸುವರ್ಣ ಕರ್ನಿರೆ, ಡಾ| ಅಣ್ಣಯ್ಯ ಕುಲಾಲ್ ಉಳ್ತೂರು, ಉದ್ಯಮಿ ರಕ್ಷಿತ್ ಶಿವರಾಮ್, ಪುತ್ತೂರು ಬಿಲ್ಲವ ಸಂಘದ ಅಧ್ಯಕ್ಷೆರ್ ಸತೀಶ್ ಕೆಡೆಂಜಿ, ಯಾದವ ಕೋಟ್ಯಾನ್ ಪೆರ್ಮುದೆ, ಕಮಲಾಕ್ಷ ಪೂಜಾರಿ ಕುಡ್ಲ, ಕಂಕನಾಡಿ ಗರಡಿ ಅಧ್ಯಕ್ಷೆರ್ ಚಿತ್ತರಂಜನ್, ಸುಜೀತ್ ಬಂಗೇರ ಲೇಸ್‌ಡ್ ಇತ್ತೆರ್.
ಬೇತೆ ಬೇತೆ ಕ್ಷೇತ್ರದ ಸಾಧಕೆರೆಗ್ ಮಾನಾದಿಗೆ ನಡತ್ಂಡ್. ಮೇಳದ ವ್ಯವಸ್ಥಾಪಕೆರ್ ಪ್ರಶಾಂತ್ ಪೂಜಾರಿ ಮಸ್ಕತ್ ಪ್ರಸ್ತಾವನೆ ಮಲ್ತೆರ್. ಗೆಜ್ಜೆಗಿರಿ ಕ್ಷೇತ್ರಾಡಳಿತ ಸಮಿತಿ ಪ್ರ. ಕಾರ್ಯದರ್ಶಿ ಉಲ್ಲಾಸ್ ಕೋಟ್ಯಾನ್ ಎದ್ಕೊನಿಯೆರ್. ಕೋಶಾಧಿಕಾರಿ ದೀಪಕ್ ಕೋಟ್ಯಾನ್ ಬತ್ತಿನ ಬಿನ್ನೆರೆಗ್ ಸೊಲ್ಮೆ ಸಂದೈತ ಮಲ್ತೆರ್. ದಿನೇಶ್ ಸುವರ್ಣ ರಾಯಿ ಲೇಸ್ ಸುಧಾರಿಕೆ ಮಲ್ತೆರ್.
Editorial