ಗೆಜ್ಜೆಗಿರಿ ನಂದನ ಬಿತ್ತಿಲ್ ಪನ್ಪುನ ಪುದರ್ ಕೇನ್ನಗ ಮೈ ರೋಮಾಂಚನ ಆಪುಂಡು. ಕ್ಷೇತ್ರದ ಇತಿಹಾಸನ್ ಕೇನ್ನಗ ಅಮರ್ ವೀರಪುರುಷೆರೆನ ಮೂಲಸ್ಥಾನ ಒವು ಪನ್ಪುನ ಪ್ರಶ್ನೆಗ್ ಉತ್ತರ ತಿಕ್ಕುಂಡು. ಅಂಚಿನ ಪುಣ್ಯ-ಪವಿತ್ರ ಭೂಮಿಡ್ ದೇಯಿ ಬೈದ್ಯೆತಿ– ಕೋಟಿ-ಚೆನ್ನಯೆರೆನ ಭವ್ಯ ಆಲಯ ನಿರ್ಮಾಣ ಆತ್ಂಡ್.
ಈ ಕ್ಷೇತ್ರದ ನಿರ್ಮಾಣ-ಬ್ರಹ್ಮಕಲಶ ಕಾರ್ಯ ಇಡೀ ತುಳುನಾಡ್ ದ ಧಾರ್ಮಿಕ ಪರಂಪರೆಡೇ ಪೊಸ ಇತಿಹಾಸ ಸೃಷ್ಟಿ ಮಲ್ದ್ಂಡ್. ಬ್ರಹ್ಮಕಲಶ ಕಾರ್ಯಗ್ ಭಕ್ತೆರೆನ ಗುಂಪೇ ಸಾಗರದ ರೀತಿಡ್ ಸೇರುಂಡು. ತುಳುನಾಡ್ ದ ಮೂಲೆ ಮೂಲೆದ ಭಕ್ತೆರೆನೊಟ್ಟಿಗೆ ಪಿದಯಿ ಜಿಲ್ಲೆ ರಾಜ್ಯಲು, ವಿದೇಶದ ಭಕ್ತೆರ್ಲ ಈ ಕ್ಷೇತ್ರಗ್ ಬತ್ ದ್ ಪುಣ್ಯ ಪುರುಷೆರೆನ ಮೂಲಸ್ಥಾನದ ವೈಭವನ್ ತೂಪೆರ್. ಏರರ್ಲಾ ನಿರೀಕ್ಷೆ ಮಲ್ಪಂದಿನಾತ್ ಭಕ್ತೆರ್ ಬತ್ತಿನವು ಪೊಸ ಇತಿಹಾಸನೇ ಬರೆತ್ಂಡ್. ಇತ್ತೆಲ ನಿತ್ಯ-ನಿರಂತರ ಕ್ಷೇತ್ರಗ್ ನೂದೆರ್ದ್ ಹೆಚ್ಚ ಸಂಖ್ಯೆಡ್ ಭಕ್ತೆರ್ ಬರ್ಪುನವು ಗೆಜ್ಜೆಗಿರಿ ಕಾರಣಿಕ ಶಕ್ತಿನ್ ಜಗತ್ತ್ ಗ್ ತೂಪಾವುಂಡು. ಏರಾಜೆ ಬರ್ಕೆ ಪನ್ಪುನ ಪುಗರ್ತೆದ ಇಲ್ಲದ ನೆಲನೇ ಗೆಜ್ಜೆಗಿರಿ ನಂದನಬಿತ್ತಿಲ್, ಸಾರ ಸಾರ ವರ್ಷಲೆನ ಇತಿಹಾಸ ಇಪ್ಪುನ ಈ ಇಲ್ಲ್ ಪಡುಮಲೆ ಅರಸು ಬಳ್ಳಾಲರೆನ ಸಂಸ್ಥಾನಡ್ ಮಹತ್ವದ ಸ್ಥಾನ ಮಾನ ಪಡೆಯಿನ ಮಣ್ಣ್ ಗುರು ಸಾಯನ ಬೈದ್ಯೆರ್ ಈ ಇಲ್ಲಲ್ ಯಜಮಾನೆರಾದ್ ಮೆರೆತೆರ್. ಸುಮಾರ್ 500 ವರ್ಷದ ಇತಿಹಾಸನ್ ಕ್ಷೇತ್ರ ಪರಿಚಯ ಮಲ್ತೊಂದು ಉಂಡು. ಮಾತೆ ದೇಯಿ ಬೈದ್ಯೆತಿಗ್ ಗುರು ಸಾಯನೆರೆನ ಪುನರ್ಜನ್ಮ ಕೊರ್ನ ನೆಲ ಗೆಜ್ಜೆಗಿರಿ ಆತ್ಂಡ್, ಕೋಟಿ– ಚೆನ್ನಯೆರೆನ ಜೀವನ ಕಥಾನಕನ್ ಈ ಪುಣ್ಯಭೂಮಿ ಭಕ್ತ ವೃಂದಗ್ ತೆರಿಪಾವುಂಡು. ತುಳುನಾಡ್ ದ ಅಮರ್ ವೀರ ಪುರುಷೆರಾದ್ ಮೆರೆಯಿನ ಕೋಟಿ- ಚೆನ್ನಯೆರೆನ ಬದ್ ಕ್ ದ ಬಹುಪಾಲ್ ನ್ ಕರಿನ ತಾಣವಾದಿಪ್ಪುನ ಗೆಜ್ಜೆಗಿರಿ ವೀರೆರೆನ ಅಪ್ಪೆ, ಮಾಮು ಇತ್ತಿನ ಕೌಟುಂಬದ ಮೂಲ ಉಂದು. ಧರ್ಮದೈವ ಧೂಮಾವತಿನ ತಾಣವಾದ್ಲಾ ಕಾರಣೀಕರ್ತೆರ್ ತೊಜಪಾವುಂಡು. ಒಟ್ಟಾರೆಯಾದ್ ಪನೊಡುದಾಂಡ ಕೋಟಿ ಚೆನ್ನಯೆರೆನ ಮೂಲಸ್ಥಾನನೇ ಆತ್ಂಡ್.
Editorial