ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರಿ, ಮರೋಳಿ ಸೂರ್ಯನಾರಾಯಣ ದೇವಲ್ಯ ನನ ಸರ್ಕಾರದ ಅಧಿಕೃತ ಪ್ರವಾಸಿ ತಾಣ

ಮುಲ್ಕಿ : ಇತಿಹಾಸ ಬೊಕ್ಕ ಸೌಹಾರ್ದತೆಗ್ ಪುದಾರತಿನ ಮೂಲ್ಕಿದ ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯ ಅಂಚೆನೆ ಕುಡ್ಲ ಮರೋಳಿದ ಶ್ರೀ ಸೂರ್ಯ ನಾರಾಯಣ ದೇವಲ್ಯೊಲೆನ್ ಸರಕಾರದ ಪ್ರವಾಸೋದ್ಯಮ ಇಲಾಖೆದಡಿಟ್ ಮಲ್ಲ ಪ್ರವಾಸಿ ತಾಣವಾದ್ ಮಾನ್ಯತೆ ಕೊರ್ತುಂಡು.

ಮುಲ್ಕಿದ ಉದ್ಯಮಿ, ಶಾರದಾ ಇನ್ಫ್ರಾ ಡಿಸೈನ್ಸ್ ಇಂಡಿಯಾ ಪ್ರೈ.ಲಿ. ನೆತ್ತ ಆಡಳಿತ ನಿರ್ದೇಶಕೆರ್ ಜೀವನ್ ಕೆ. ಶೆಟ್ಟಿ ಮೇರ್ ಬಪ್ಪನಾಡ್ ದೇವಲ್ಯನ್ ಪ್ರವಾಸಿ ತಾಣವಾದ್ ಸೇರ್ಪಡೆ ಮಲ್ಪೊಡು ಪಂದ್ ಮಾಜಿ ಮುಖ್ಯಮಂತ್ರಿ ಯಡಿಯೂರಪ್ಪ ಸೇರ್ದ್ ಕೆಲವು ಪ್ರವಾಸೋದ್ಯಮ ಸಚಿವೆರೆಗ್ ಬಿನ್ನಾಪು ಸಂದಾದಿತ್ತೆರ್. ರಾಜ್ಯ ಸರ್ಕಾರ ಪೊಸತ್ತಾದ್ ಒಟ್ಟು 29 ಕ್ಷೇತ್ರಲೆನ್ ಪ್ರವಾಸೋದ್ಯಮ ತಾಣವಾದ್ ಸೇರ್ಪಡೆ ಮಲ್ದ್ಂಡ್. ಆಯಿಟ್ ಬಪ್ಪನಾಡ್ ದೇವಲ್ಯ ಬೊಕ್ಕ ಕುಡ್ಲ ಮರೋಳಿದ ಸೂರ್ಯನಾರಾಯಣ ದೇವಲ್ಯ ಸೇರ್ದ್ಂಡ್. ಬಪ್ಪನಾಡ್ ದೇವಲ್ಯನ್ ಪ್ರವಾಸಿತಾಣವಾದ್ ಸೇರ್ಪಡೆ ಮಲ್ಪುನೆಟ್ ಪ್ರಮುಖವಾದ್ ಬೆಂದಿನ ಮುಲ್ಕಿ ಜೀವನ್ ಶೆಟ್ಟಿ ಮೆರೆಗ್ ವ್ಯಾಪಕ ಪ್ರಶಂಸೆ ವ್ಯಕ್ತ ಆತ್ಂಡ್.