ಹಳೆಯಂಗಡಿಡ್ ಕಿಶೋರ ಕಿಶೋರಿ ಸಂಘದ ಉದಿಪನ ಲೇಸ್

ಹಳೆಯಂಗಡಿ : ಶ್ರೀ ವಿದ್ಯಾ ವಿನಾಯಕ ರಜತ ಸೇವಾ ಟ್ರಸ್ಟ್ (ರಿ), ಹಳೆಯಂಗಡಿ ಬೊಕ್ಕ ಸುವರ್ಣ ಮಹೋತ್ಸವ ಸಮಿತಿದ ಒಟ್ಟುಸೇರಿಗೆಡ್ ನ.13 ಕ್ ಮಂಡಲದ ಪೊಸ ಕಿಶೋರ ಕಿಶೋರಿ ಸಂಘದ ಉದಿಪನ ಲೇಸ್ ಬೊಲ್ಪುಗು 10 ಗಂಟೆಗ್ ಯುವಕ ಮಂಡಲದ ಜಾವಡಿಡ್ ನಡತ್ಂಡ್.

ಲೇಸ್ ದ ಉದಿಪನನ್ ಮುಖ್ಯ ಶಿಕ್ಷಕೆರ್ ಬೊಕ್ಕ ಮಾನವ ಸಂಪನ್ಮೂಲ ಅಭಿವೃದ್ಧಿ ತರಬೇತಿದಾರೆರ್ ಫ್ರಾನ್ಸಿಸ್ ಡಿ ಕುನ್ಹ ಕುಡ್ಲ ಮೇರ್ ಮಲ್ತ್ ದ್, ಜೋಕುಲೆಗ್ ಜೋಕುಲೆನ ದಿನಾಚರಣೆದ ಎಡ್ಡೆಪ್ಪು ಬಯಕಿಯೆರ್. 10 ವರ್ಷರ್ದ್ 16 ವರ್ಷದ ಜೋಕುಲೆಗಾದ್ ನಡಪಾಯಿನ ಕಿಶೋರ-ಕಿಶೋರಿ ಸಂಘದ ರೂಪುರೇಷೆನ್ ತೆರಿಪಾಯೆರ್.

ಬೊಕ್ಕ ಜೋಕುಲೆಗ್ ಬೇತೆ ಬೇತೆ ಬಗೆತ ಗೊಬ್ಬುದ ಪಂತೊದ ಬಗೆಟ್ ಮಾಹಿತಿ ಬೊಕ್ಕ ಪ್ರಾತ್ಯಕ್ಷಿಕೆ ಕೊರಿಯೆರ್. ಲೇಸ್ ದ ಸಂಪನ್ಮೂಲ ವ್ಯಕ್ತಿ ಆದ್ ಸಾಮಾಜಿಕ ಕಾರ್ಯಕರ್ತೆರ್ ಆಯಿನ ಶಶಿಕುಮಾರ್ ಈ ಲೇಸ್ ಡ್ ಪಾಲ್ ಪಡೆದ್, ಜೋಕುಲೆ‌ನ ಒಟ್ಟಿಗೆ ಸೇರ್ದ್ ಬೇತೆ ಬೇತೆ ಕ್ರೀಡೆ ಬೊಕ್ಕ ಮನೋರಂಜನೆ ಲೇಸ್ ನಡಪಾದ್ ಕೊರಿಯೆರ್.

ಈ ಪೊರ್ತುಡು ಯುವಕ ಮಂಡಲದ ಅಧ್ಯಕ್ಷೆರ್ ಯತೀಶ್ ಕೋಟ್ಯಾನ್, ಸುವರ್ಣ ಮಹೋತ್ಸವ ಸಮಿತಿದ ಕಾರ್ಯ ಅಧ್ಯಕ್ಷೆರ್ ಬೊಕ್ಕ ಮಂಡಲದ ಪ್ರಧಾನ ಕಾರ್ಯದರ್ಶಿ ಸುಧಾಕರ ಆರ್ ಅಮೀನ್, ಸಲಹಾ ಸಮಿತಿದ ಅಧ್ಯಕ್ಷೆರ್ ಮೋಹನ್ ಬಂಗೇರ, ಟ್ರಸ್ಟ್‌ ದ ಪ್ರಧಾನ ಕಾರ್ಯದರ್ಶಿ ಸ್ಟ್ಯಾನಿ ಡಿ ಕೋಸ್ಟ, ಸುವರ್ಣ ಮಹೋತ್ಸವ ಸಮಿತಿದ ಪ್ರಧಾನ ಕಾರ್ಯದರ್ಶಿ ರಾಮದಾಸ್ ಪಾವಂಜೆ ಇತ್ತೆರ್. ಯುವತಿ ಮಂಡಲದ ಸದಸ್ಯೆರ್ ಕುಮಾರಿ ನಿರ್ಮಿತ ಬೊಕ್ಕ ಕುಮಾರಿ ಯಶಸ್ವಿನಿ ಪ್ರಾರ್ತನೆ ಮಲ್ತೆರ್.

ಯುವಕ ಮಂಡಲದ ಅಧ್ಯಕ್ಷೆರ್ ಯತೀಶ್ ಕೋಟ್ಯಾನ್ ಬಿನ್ನೆರೆನ್ ಎದ್ಕೊನಿಯೆರ್. ಸುವರ್ಣ ಮಹೋತ್ಸವ ಸಮಿತಿದ ಕಾರ್ಯಾಧ್ಯಕ್ಷೆರ್ ಸುಧಾಕರ ಆರ್ ಅಮೀನ್ ಸೊಲ್ಮೆ ಸಂದಾಯೆರ್. ಸುವರ್ಣ ಮಹೋತ್ಸವ ಸಮಿತಿದ ಪ್ರಧಾನ ಕಾರ್ಯದರ್ಶಿ ರಾಮದಾಸ್ ಪಾವಂಜೆ ಲೇಸ್ ದ ನಿರೂಪಣೆ ಮಲ್ತೆರ್.

ಸುಮಾರ್ 50 ಜೋಕುಲು ಈ ಲೇಸ್ ದ ಪ್ರಯೋಜನ ಪಡೆಯೆರ್. ಉದಿಪನ ಲೇಸ್ ದ ಬೊಕ್ಕ ಜೋಕುಲೆಗ್ ಬೇತೆ ಬೇತೆ ರೀತಿದ ಕ್ರೀಡೆ ಬೊಕ್ಕ ಮನೋರಂಜನೆ ಲೇಸ್ ಅಟ್ಟಣೆ ಮಲ್ದಿತ್ತೆರ್. ಈ ಪೊರ್ತುಡು ಜವನೆರೆನ ಬೊಕ್ಕ ಮಹಿಳಾ ಮಂಡಲದ ಸುಮಾರ್ ಸದಸ್ಯೆರ್, ಜೋಕುಲೆನ ಪೋಷಕೆರ್ ಇತ್ತ್ ದ್, ಲೇಸ್ ದ ಯಶಸ್ವಿಗ್ ಸಹಕಾರ ಮಲ್ತೆರ್.