ಕುಡ್ಲ : ಸ್ವಾತಂತ್ರ್ಯೊರ್ದು ದುಂಬೇ ಕಾಂಗ್ರೆಸ್ ಪಕ್ಷದ ಅಂಗ ಸಂಸ್ಥೆಯಾದ್ ಸೇವಾದಳ ವಿಭಾಗ ಕೆಲಸ ಮಲ್ತೊಂದಿತ್ತ್ ದ್, ಶಿಸ್ತು ಸಮಯ ಪಾಲನೆ, ಬದ್ಧತೆ, ಬೊಕ್ಕ ಪಕ್ಷ ನಿಷ್ಠೆ ಉಂದು ಮಾತ ಸೇವಾದಳತ್ತ ಪ್ರತೀಕವಾದುಂಡು ಪಂದ್ ದಕ್ಷಿಣ ಕನ್ನಡ ಜಿಲ್ಲಾ ಕಾಂಗ್ರೆಸ್ ಸೇವಾದಳತ್ತ ಅಧ್ಯಕ್ಷೆರ್ ಜಾಕೀಂ ಡಿಸೋಜ ತೆರಿಪಾಯೆರ್.
ಆರ್ ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಕಚೇರಿಡ್ ನಡತಿನ ಸೇವಾದಳದ ಚಿಂತನ -ಮಂಥನ ಕೂಟ ಉದಿಪನ ಮಲ್ತ್ ದ್ ಪಾತೆರಿಯೆರ್. ಮಲ್ಲ ಬಿನ್ನೆರಾದ್ ಸೇವಾ ದಳತ್ತ ರಾಜ್ಯ ತರಬೇತುದಾರೆರ್ ವಿಶ್ವನಾಥ್ ಪಾತೆರ್ದ್, ಸದ್ಯೊಡೇ ನಡಪುನ ರಾಜ್ಯಮಟ್ಟದ ತರಬೇತಿ ಕಾರ್ಯಕ್ರಮೊಟ್ಟು ಮುಲ್ಕಿ ಬ್ಲಾಕ್ ರ್ದ್ ಎಚ್ಚಿನ ಕಾರ್ಯಕರ್ತೆರ್ ಪಾಲ್ ಪಡೆವೊಡು ಪಂಡೆರ್. ಲೇಸ್ ದ ಗುರ್ಕಾರ್ಮೆ ದ ಮಣೆಟ್ಟ್ ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಮೋಹನ್ ಕೋಟ್ಯಾನ್ ಕುಲ್ದಿತ್ತೆರ್.
ಕೆಪಿಸಿಸಿ ಸದಸ್ಯೆರ್ ವಸಂತ್ ಬೆರ್ನಾಡ್ ಪಾತೆರ್ದ್, ಪ್ರತಿ ಬೂತುಡುಲ ಪಕ್ಷ ಸಂಘಟನೆ ಆವೊಡು , ಉಂದೆಕ್ಕ್ ಸೇವಾದಳ ಕಾರ್ಯಕರ್ತೆರ್ಲ ಕೈ ತಾಂಗ್ ಕೊರೊಡು ಪಂದ್ ಬಿನ್ನಾಪು ಮಲ್ತೆರ್.
ಸೇವಾದಳತ್ತ ನಾಯಕೆರಾಯಿನ ಭೀಮಶಂಕರ್ , ಧರ್ಮಾನಂದ ಶೆಟ್ಟಿಗಾರ್, ಯುವ ಕಾಂಗ್ರೆಸ್ ಅಧ್ಯಕ್ಷೆರ್ ಅಶೋಕ್ ಪೂಜಾರ್, ಮುಲ್ಕಿ ನಗರ ಪಂಚಾಯತ್ ಸದಸ್ಯೆರಾಯಿನ ಯೋಗೇಶ್ ಕೋಟ್ಯಾನ್ ಮಾಜಿ ಸದಸ್ಯ ಬಶೀರ್ ಕುಳಾಯಿ, ಅದ್ದು ಅಂಗರಗುಡ್ಡೆ, ರಜಾಕ್ ಸೂರಿಂಜೆ, ಮಹಾಬಲ ಪೂಜಾರಿ, ರಕ್ಷಿತ್ ಸುವರ್ಣ, ನವನೀತ್ ಪೈಯ್ಯೊಟ್ಟು, ಸೈಯದ್ ಸೂರಿಂಜೆ, ಪದ್ಮಿನಿ ಐಕಳ ಮೊಕುಲು ಮಾತ ಇತ್ತೆರ್.
pallavi shetty