ಪೊರ್ಲ ತುಳು ಬಾಸೆಡ್ ಅಚ್ಚಿ ಮಲ್ದಿನ ಮದಿಮೆದ ಮೋಕೆದ ಲೆಪ್ಪೋಲೆ

ಬೆದ್ರ : ನಾರಾವಿ ಕುವೆಟ್ಟುಗುತ್ತು

ವಿನೋದಿನಿ ಹೆಗ್ಗಡ್ತಿ ಬೊಕ್ಕ ಬೆದ್ರದ ಡಾ| ಸುರೇಂದ್ರ ಕುಮಾರ್ ಹೆಗ್ಡೆ ಮೊಕುಲು ತನ್ನ ಮಗೆ ಶ್ರೇಯಸ್ ನ ಮದಿಮೆದ ಲೆಪ್ಪೋಲೆನ್ ಪೊರ್ಲ ತುಳು ಪದೊಕುಲೆಡ್ ಅಚ್ಚಿ ಮಲ್ಪಾದ್ ತುಳು ಮೋಕೆ ತೋಜಾದೆರ್.

ಅಯಿತ್ತ ಒಕ್ಕಣೆ ಇಂಚ ಉಂಡು- “ಇಲ್ಲೊರ್ಮೆ ಉರ್ಕರುನ ಗೌಜಿ ಗಮ್ಮತ್‌ದ ಗೆಲ್ಮೆನ ಕುಸಿ ನಲಿಕೆ ತೆಲಿಕೆದೊಟ್ಟ್‌ಡ್ ಗರ್ದ್ ಬಿರ್ದ್‌ದ ದಿಬ್ಬಣ ಉಡಲೊರ್ಮೆ ಪಸರುನ ಮಲ್ಲಿಗೆ ಪೂರ್ಪೊದ ಕಮ್ಮೆನ ಉಡಲುಸ್‌ಲ್ ನಿಲ್ಕೆ ಕುಸಿಕುಸಲ್‌ಡ್ ಮೈ ಇರ್ಮೆನ ಮಣ್ಣ್‌ಡ್ ನಂಬಿ ದೈವ ದೇವೆರೆನ ಬೆರಿಸಾಯೊಡ್ ಕುಟುಮ ಸಂಸಾರ ಪಿರಿಯಕುಲೆನ ಒಟ್ಟು ಸೇರಿಗೆಡ್ ತುಳುನಾಡ್‌ದ ಬೆದ್ರಡ್ ಸ್ಕೌಟ್ ಗೈಡ್ಸ್ ಕನ್ನಡ ಭವನದ ಚಾವಡಿಡ್ ಶ್ರೇಯಸ್-ಸೋನಾಲ್‌ನ ಮದಿಮೆದ ಸಿರಿಸಿಂಗಾರೊ ಪೂಪಿಂಗಾರೊದೈಸಿರದ ದೊಂಪೊಡ್ ಕೊಂಬು ವಾದ್ಯೊದ ಸ್ವರೊ ಬಾನಗೆತ್ತುನ ಪೊರ್ಲುಡ್ ಜಾರ್ದೆದ 11 ಪೋಪಿನ ಐತಾರ ಮಧ್ಯಾಹ್ನದ ಪೊರ್ತುಡು ರಡ್ಡುಡಲ್‌ಲು ಏಳ್‌ಪಜ್ಜೆ ದೀಪಿನ ಅಮುರ್ತ ಗಳಿಗೆಡ್ ಮಾತೆರ್ ಒಟ್ಟು ಸೇರ್ದ್ ಎಡ್ಡೆಪ್ಪುದ ಸೇಸೆ ಪಾಡೊಡ್ ಪಂದ್ ಬಿನ್ನಪ ಶ್ರೀಮತಿ ವಿನೋದಿನಿ ಹೆಗ್ಗಡ್ತಿ ಡಾ| ಸುರೇಂದ್ರ ಕುಮಾರ್ ಹೆಗ್ಡೆರ್..” ಇಂಚ ಬರೆತೆರ್.

ಉಂದುವೇ ನ.27 ಕ್ಕ್ ಬೆದ್ರದ ಸ್ಕೌಟ್ಸ್ ಭವನದ ಚಾವಡಿಡ್ ಶ್ರೇಯಸ್ ಬೊಕ್ಕ ಕೊಕ್ರಾಡಿ ಗಾಣದಬೆಟ್ಟು ಸರಿತಾ ಹೆಗ್ಡೆ ಬೊಕ್ಕ ಕುದ್ಮುಂಜೆ ಸುಭಾಷ್ ಚಂದ್ರ ಹೆಗ್ಡೆ ಮೊಕ್ಲೆನ ಮಗಲ್ ಸೋನಾಲ್ ನ ಮದಿಮೆ ನಿಗಂಟ್ ಆತ್ಂಡ್.

ಕನ್ನಡ , ಇಂಗ್ಲಿಷ್ ಲೆಪ್ಪೋಲೆದ ಒಟ್ಟುಗೆ ತುಳು ಲಿಪಿ ಬೊಕ್ಕ ತುಳು ಬಾಸೆಗ್ ಬಿಲೆ ಕೊರ್ಪಿನ ವಿನೋದಿನಿ ಹೆಗ್ಗಡ್ತಿ ಬೊಕ್ಕ ಡಾ.ಸುರೇಂದ್ರ ಕುಮಾರ್ ಹೆಗ್ಡೆರೆಗ್ ಅಂಚೆನೆ ಶ್ರೇಯಸ್- ಸೋನಾಲ್ ಗ್ ಟೈಮ್ಸ್‌ ಆಫ್ ಕುಡ್ಲ ಪತ್ರಿಕೆದ ಉಡಲ್ ದಿಂಜಿನ ಎಡ್ಡೆಪ್ಪುಲು.