ಡಿ.13: ಶಿರ್ವಡ್ 27 ನೇ ವರ್ಷದ ಸೂರ್ಯಚಂದ್ರ ಜೋಡು ಕರೆ ಕಂಬುಲ

ತುಳುನಾಡ್ ದ ಧಾರ್ಮಿಕ ಆಚರಣೆದ ಹಿನ್ನೆಲೆ ಇಪ್ಪುನ ಶಿರ್ವ ನಡಿಬೊಟ್ಟು ಸೂರ್ಯ-ಚಂದ್ರ ಸಂಪ್ರದಾಯಬದ್ಧ ಜೋಡು ಕರೆ ಕಂಬುಲ ಈ ಸರ್ತಿ ಡಿಸೆಂಬರ್ ತಿಂಗೊಲ್ದ 13ದಾನಿ ನಡಪರೆ ಉಂಡು.

ಎಲ್ಲೂರು ಶ್ರೀ ವಿಶ್ವೇಶ್ವರ ದೇವಲ್ಯದ ಮಾಜಿ ಆಡಳಿತ ಮೊಕ್ತೇಸರೆರ್ ಪ್ರಫುಲ್ಲ ಶೆಟ್ಟಿ ಮೇರ್ ದೀಪ ಪೊತ್ತಾದ್ ಜೋಡು ಕರೆಕ್ ಕಾಯಿ ಹಾಕುನ ಮುಖೇನ ಕಂಬುಲನ್ ಉದಿಪನ ಮಲ್ಪುವೆರ್. ಶತಮಾನಲೆರ್ದ್ ನಡತೊಂದು ಬತ್ತಿನ ಐತಿಹಾಸಿಕ ಶಿರ್ವ ಮಹತೋಭಾರ ಶ್ರೀ ವಿಷ್ಣುಮೂರ್ತಿ ದೇವಲ್ಯಡ್ ಪೂತ್ತ ಪೂಜೆ ಆದ್, ನಾಗದೇವೆರೆಗ್ ತನು ತಂಬಿಲ ಸಮರ್ಪಣೆ ಆಯಿನ ಬೊಕ್ಕ ನಡುಬೊಟ್ಟು ಚಾವಡಿದ ದೈವ ಜುಮಾದಿನ ಪೂಜೆ ಪುರಸ್ಕಾರ ಲೇಸ್ ಸುರು ಆಪುಂಡು.

ಚಾವಡಿದ ದೈವ ಜುಮಾದಿಗ್ ಪೂಜೆ ಪುರಸ್ಕಾರ ನಡತಿನ ಬೊಕ್ಕ ಬಂಟ ಕೋಲ ಮೆರವಣಿಗೆಡ್ ಕೊಂಬು, ವಾದ್ಯ ಲೆರ್ದ್ ಇಲ್ಲದ ಎರ್ಲೆನ್ ಕಂಬುಲದ ಕಲಕ್ಕ್ ಜಪುಡಾವೆರ್. ಸುಮಾರ್ ಪಿರವುದ ಕಾಲದ ಕ್ರಮದಂಚನೆ ಕಂಬುಲ ಕೂಟ ಶಿರ್ವ ನಡಿಬೊಟ್ಟು ಇಲ್ಲದ ಎರ್ಲೆದ ಬಲಿಪುದೊಟ್ಟುಗು ಕಂಬುಲ ಸುರು ಆದ್, ಶಿರ್ವ ನಂಗೆಟ್ಟು ಇಲ್ಲದ ಎರ್ಲು ಬಲಿಪುದೊಟ್ಟಿಗೆ ಕಂಬುಲ ಮುಗಿವುಂಡು. ಶಿರ್ವ ನಡಿಬೆಟ್ಟು ಕಂಬುಲಗ್ ಇಸೇಸ ಧಾರ್ಮಿಕ ಹಿನ್ನೆಲೆ ಉಂಡು. ಶಿರ್ವದ ದೈವ ದೇವೆರೆನ ಉಚ್ಚಯಡ್ ಒಂಜೆಕ್ಕೊಂಜಿ ಸಂಬಂಧ ಉಂಡು. ಸಂಪ್ರದಾಯ ಬದ್ಧವಾದ್ ಕಂಬುಲ ನಡಪುಂಡು.

ಶಿರ್ವ ನ್ಯಾರ್ಮ ಜಾರಂದಾಯ ದೈವೊಲ್ಯಡ್ ನವೆಂಬರ್ ತಿಂಗೊಲ್ಡ್ ಚೌತಿ ಬೊಕ್ಕ ಪರ್ಬದ ಸೇವೆ ಆಯಿನ ಬೊಕ್ಕ ಕಂಬುಲ ನಡಪುನವು ಮುಲ್ಪದ ರೂಢಿ. ನಡಿಬೊಟ್ಟು ಕಂಬುಲ ನಡಪಂದೆ ಶಿರ್ವ ಶ್ರೀ ವಿಷ್ಣುಮೂರ್ತಿ ದೇವಲ್ಯಡ್ ಉಚ್ಚಯದ ಕೊಡಿ ಏರ್ರೆ ಇಜ್ಜಿ. ಕಂಬುಲದ ಬೊಕ್ಕ ಉಚ್ಚಯದ ಕೊಡಿ ಏರುಂಡು. ದೇವೆರ್ನ ಕೊಡಿ ಜಾವಾಯಿನೆತ್ತ ಬೊಕ್ಕ ಬೊಕ್ಕ ಅಂಗಾರೆ ಶಿರ್ವ ಮಹಮ್ಮಾಯಿ ಮಾರಿಗುಡಿಟ್ ಮಾರಿಪೂಜೆಗ್ ದಿನ ನೆಕ್ಕಿ ಆದ್ 2 ನೇ ಅಂಗಾರೆ ಮಾರಿಪೂಜೆ ನಡಪುಂಡು. ಅಂಚನೆ ಏನಿಕಾಲೊರ್ದು ನಡತೊಂದು ಬರ್ಪುನ ಶಿರ್ವ ನಡಿಬೊಟ್ಟು ಕಂಬುಲ 1996 ಟ್ ಶಿರ್ವ ನಡಿಬೊಟ್ಟು ರಘುರಾಮ ನಾಯ್ಕ್ ಮೆರೆನ ಮುತಾಲಿಕೆಡ್ ಸೂರ್ಯ-ಚಂದ್ರ ಜೋಡು ಕೆರೆ ಕಂಬುಲವಾದ್ ಬದಲಾಂಡ್. ಬೊಕ್ಕ ಅವಿಭಜಿತ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆದ ಕಂಬುಲ ಸಮಿತಿಡ್ ಸೇರ್ಪಡೆ ಆದ್ ದಿ.ಗಂಗೆಜಾರ್ ಕುಟ್ಟಿ ಶೆಟ್ರೆನ ಗುರ್ಕಾರ್ಮೆ ಡ್ 1996ರ್ದ್ ಸೂರ್ಯ-ಚಂದ್ರ ಜೋಡು ಕರೆ ಕಂಬುಲ ಕೂಟದ ಸುರುತ ಜೋಡುಕರೆ ಕಂಬುಲ ಶಿರ್ವಡ್ ನಡತೊಂದು ಇತ್ತ್ಂಡ್.

2014 ಟ್ ಸುಪ್ರೀಂಕೋರ್ಟ್ ದ ಆದೇಶದಂಚೆನೆ ಕಂಬುಲದ ದುಂಬುನಾನಿ ಉಂತುಂಡು. ಬೊಕ್ಕ ಕಟ್ಟ್ ಕಟ್ಟಲೆದ ಪ್ರಕಾರ ಮುಗಿಯೊಂದಿತ್ತ್ಂಡ್. ಅನಾದಿ ಕಾಲರ್ದಿಂಚಿಲ ಸಂಪ್ರದಾಯಬದ್ಧವಾದ್ ನಡತೊಂದು ಇತ್ತಿನ ಶಿರ್ವ ನಡಿಬೆಟ್ಟು ಕಂಬುಲ 1996ರ್ದ್ 2014ಮುಟ್ಟ ಕಂಬುಲ ಸಮಿತಿದ ಸೂರ್ಯ-ಚಂದ್ರ ಜೋಡು ಕರೆ ಕಂಬುಲವಾದ್ ನಡತ್ಂಡ್. 2014 ನೇ ಇಸ್ವಿರ್ದ್ ಬೊಕ್ಕ ಇಡೆ ಮುಟ್ಟ ಜೋಡು ಕರೆ ಕಂಬುಲ ಸುಮಾರ್ 45-50 ಜೋಡಿ ಎರ್ಲೆನ್ ಬೊಲ್ಪುರ್ದು ಬಯ್ಯ ಮುಟ್ಟ ಪಗೆಲ್ ಮಾತ್ರ ನಡತೊಂದು ಬರೊಂದು ಉಂಡು. ಈ ಸರ್ತಿ ಜಿಲ್ಲೆದ ಕಂಬುಲ ಸಮಿತಿ ನ.5 ಕ್ಕ್ ಶಿರ್ವ ನಡಿಬೊಟ್ಟು ಕಂಬುಲಗ್ ದಿನ ನಿಗದಿ ಆದಿತ್ತ್ಂಡ್. ಬೊಕ್ಕ ಬೇತೆ ಕಾರಣಲೆರ್ದ್ ಆ ದಿನ ಕಂಬುಲ ನಡಪಯೆರೆ ಆವಂದೆ ಡಿ.13ಕ್ ದಿನ ನೆಕ್ಕಿ ಆತ್ಂಡ್. ಶಿರ್ವ ನಡಿಬೊಟ್ಟು ಇಲ್ಲದ ಯಜಮಾನೆರ್ ದಾಮೋದರ ಚೌಟ ಮೆರೆನ ಮುತಾಲಿಕೆಡ್ ವ್ಯವಸ್ಥಾಪಕೆರ್ ಶಿರ್ವ ನಡಿಬೊಟ್ಟು ಶಶಿಧರ ಹೆಗ್ಡೆ ಮೆರೆನ ಅಂಚೆನೆ ಸಕಾಯರ್ದ್ ಕಂಬುಲನ್ ಪೊರ್ಲುಡೇ ನಡಪಾವೊಂದು ಬರೊಂದು ಉಂಡು. ಅಂಚೆನೆ ಮಧಾಹ್ನ ಅನ್ನಸಂತರ್ಪಣೆ ನಡಪುಂಡು.