ಕುದ್ರೋಳಿ : ರಾಜ್ಯ ಸರ್ಕಾರ ಬಿಲ್ಲವ ಸಮಾಜೊಗು ಅಭಿವೃದ್ಧಿ ನಿಗಮ ಘೋಷಣೆ ಮಲ್ಪುನ ಬದಲ್ ಕಾಲಿ ಕೋಶ ಘೋಷಣೆ ಮಲ್ದಿನೆನ್ ಸಮಸ್ತ ಬಿಲ್ಲವ ಸಮಾಜ ತಿರಸ್ಕಾರ ಮಲ್ದ್ಂಡ್.
ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಸಭಾಂಗಣಡ್ ಅಂಗಾರೆ ನಡತಿನ ಬಿಲ್ಲವ, ಈಡಿಗ, ನಾಮಧಾರಿ ಸೇರ್ದ್ ಸಮಸ್ತ 26 ಪಂಗಡದ ಮುಖಂಡೆರ್ ನ ಸಭೆಟ್ಟ್ ಈ ನಿರ್ಣಯ ದೆತೊಂದೆರ್ ಪಂದ್ ಅಯಿರ್ದ್ ಬೊಕ್ಕ ನಡತಿನ ಸುದ್ದಿಗೋಷ್ಠಿಡ್ ಪಾತೆರಿನ ಸಮಾಜದ ಮುಖಂಡೆರ ತೆರಿಪಾಯೆರ್.
ಕುದ್ರೋಳಿ ಶ್ರೀ ಗೋಕರ್ಣ ನಾಥ ಕ್ಷೇತ್ರದ ಕೋಶಾಧಿಕಾರಿ ಪದ್ಮರಾಜ್ ಆರ್, ಪಾತೆರ್ದ್ ಬಿಲ್ಲವ, ಈಡಿಗ ಸಮಾಜದ 26 ಪಂಗಡದಕ್ಲೆನ ಪರವಾದ್ ಸರ್ಕಾರೊಗು ಕೇಂಡ್ ದಿನಿ ಬಿಲ್ಲವ ಅಭಿವೃದ್ಧಿ ನಿಗಮ ಕೊರಿಯರೆ. ಆಂಡ ಸರ್ಕಾರ ಕಾಲಿ ಬ್ರಹ್ಮಶ್ರೀ ನಾರಾಯಣ ಗುರು ಕೋಶ ಕೊರ್ದು ಸಮಾಜದ ಜನಕ್ಲೆನ್ ತಪ್ಪು ಸಾದಿಗ್ಒಯಿತೊಂದುಂಡು. ಅoಚಾದ್ ಆ ಕೋಶೊನು ಇಡಿ ಸಮುದಾಯ ತಿರಸ್ಕಾರ ಮಲ್ದ್ಂಡ್. ಆಯಿನಾತ್ ಬೇಗ ಅಭಿವೃದ್ಧಿ ನಿಗಮ ಕೊರ್ದು 500 ಕೋಟಿ ರೂ. ಅನುದಾನ ಕೊರೊಡು ಪಂದ್ ಸರ್ಕಾರೊಗು ಒತ್ತಾಯ ಮಲ್ತೆರ್.
ನಾರಾಯಣ ಗುರು ವಿಚಾರ ವೇದಿಕೆದ ರಾಜ್ಯಾಧ್ಯಕ್ಷೆರ್ ಸತ್ಯಜಿತ್ ಸುರತ್ಕಲ್ ಪಾತೆರ್ದ್,ಬಿಲ್ಲವ ಅಭಿವೃದ್ಧಿ ನಿಗಮ ಕೊರ್ಜಿಡ ಇಡೀ ಸಮಾಜದಕುಲು ಸೇರ್ದ್ ಜ.29 ಗು ಮಲ್ಲಮಟ್ಟ್ ಡ್ ಪ್ರತಿಭಟನೆದ ರೂಪೊಡು ಬಿಲ್ಲವ ಸಮಾವೇಶನ್ ಅಟ್ಟಣೆ ಮಲ್ತ್ ದ. ಒಂಜಿ ಲಕ್ಷ ಜನನ್ ಸೇರುನ ನಿರೀಕ್ಷೆ ಉಂಡು. ಅಯಿಕ್ಕ್ ಬೋಡಾಪಿನ ಸುರೂತ್ತ ಪಂತೆದ ಸಮಿತಿ ರಚನೆ ಆತ್ಂಡ್. ಸಮಾವೇಶಗ್ ಜಾಗೆ ನೆಕ್ಕಿ ಆತಿಜಿ. ಆನಿ ಬಯ್ಯಡ್ 3 ಗಂಟೆಗ್ ಪ್ರತಿಭಟನಾ ಮೆರವಣಿಗೆ ಬೊಕ್ಕ 4 ಗಂಟೆಗ್ ಸಮಾವೇಶ ನಡಪರೆ ಉಂಡು ಪಂದ್ ಪಂಡೆರ್.
ರಾಷ್ಟ್ರೀಯ ಬಿಲ್ಲವ ಮಹಾಮಂಡಲದ ಅಧ್ಯಕ್ಷೆರ್ ಡಾ|ರಾಜಶೇಖರ ಕೋಟ್ಯಾನ್ ಪಾತೆರ್ದ್, ರಾಜ್ಯ ಸರ್ಕಾರ ಮಸ್ತ್ ವರ್ಷೊರ್ದಿಂಚಿ ನಮ್ಮಸಮಾಜದ ಒವ್ವೇ ಒಂಜಿ ಬೇಡಿಕೆಗ್ ಸ್ಪಂದನೆ ಕೊರ್ತುಜಿ. ನಮಕ್ಕ್ ಈ ಸರ್ತಿ ಕೊರ್ತಿನಿ ಕೋಶ ಅತ್ತ್, ಉಂದು ನಮ್ಮ ಸಮಾಜೊಗು ಮಲ್ದಿನ ಮಲ್ಲ ಮೋಸ. ಅಂಚಾದ್ ಸರ್ಕಾರದ ವಿರುದ್ಧವಾದ್ ಸಮಾಜದ 26 ಪಂಗಡೊಲು, 244 ನಾರಾಯಣ ಗುರು ಸಂಘೊಲು, 265 ಗರೊಡಿಲು, ಕಾಂತಾಬಾರೆ ಬುದಾಬಾರೆ ಕ್ಷೇತ್ರದಕುಲು, ತೀಯಾ ಸಮಾಜ ಇಂಚ ಮಾತಾ ಪಂಗಡದಕ್ಲೆನ್ ಒಟ್ಟು ಸೇರ್ಸಾದ್ ಬಿಲ್ಲವ ಅಭಿವೃದ್ಧಿ ನಿಗಮ ಮಲ್ಪುನ ಮುಟ್ಟ ಬುಡಂದೆ ಹೋರಾಟ ಮಲ್ಪುವ ಪಂಡೆರ್.
ಸುದ್ದಿಗೋಷ್ಠಿಡ್ ಕುದ್ರೋಳಿ ಕ್ಷೇತ್ರಾಭಿವೃದ್ದಿ ಸಮಿತಿದ ದೇವೇಂದ್ರ ಪೂಜಾರಿ, ಕಟಪಾಡಿ ಶ್ರೀ ವಿಶ್ವನಾಥ ಕ್ಷೇತ್ರದ ಶಂಕರ ಪೂಜಾರಿ, ಸುರತ್ಕಲ್ ದ ಮಹಾಬಲ ಪೂಜಾರಿ ಕಡಂಬೋಡಿ, ಪುತ್ತೂರು ಬಿಲ್ಲವ ಸಂಘದ ಸತೀಶ್ ಕಡೆಂಜಿ, ಬೆಳ್ತಂಗಡಿ ಬಿಲ್ಲವ ಸಂಘದ ಸದಾನಂದ ಪೂಜಾರಿ, ಒಡಿಪು ಬಿಲ್ಲವ ಸಂಘದ ಅಚ್ಯುತ ಕಲ್ಮಾಡಿ, ದೀಪಕ್ ಕೋಟ್ಯಾನ್, ರಾಜೇಂದ್ರ ಚಿಲಿಂಬಿ, ಕಾರ್ಪೊರೇಟರ್ ಅನಿಲ್ ಕುಮಾರ್, ಲೀಲಾಕ್ಷ ಕರ್ಕೇರ, ನಿತೀಶ್ ಬೆಳ್ಳೂರು, ಮನೋಹರ್, ರವೀಂದ್ರ ಬಂಗೇರ, ಅಶೋಕ್, ರಾಜು ಪೂಜಾರಿ ಮೊಕುಲು ಮಾತ ಇತ್ತೆರ್.
pallavi shetty