ಮುಲ್ಕಿ: ಸಮಾಜ ಸೇವೆಡ್ ಸ್ವಾರ್ಥ ಉಪ್ಪರೆ ಬಲ್ಲಿ. ಬಡಪತ್ತ್ ದಕ್ಲೆನ ಇಲ್ಲಡ್ ಮರಣ ಆಂಡ ಅಪಗ ನಮ ಮಾತೆರ್ಲ ದುಂಬು ಪೋದು ಮರಣ ದೆಪ್ಪುನ ಪೂರ ತರತ್ತ ಕೆಲಸ ಮಲ್ಪೊಡು ಪಂದ್ ಸಮಾಜ ಸೇವಕೆರ್ ಅಶೋಕ್ ಕುಮಾರ್ ಚಿತ್ರಾಪು ಮೇರ್ ತೆರಿಪಾಯೆರ್.
ಸ್ವಾಗತ್ ಹೋಟೆಲ್ ಸಭಾಂಗಣಡ್ ಅಂಗಾರೆ ನಡತಿನ ಹೊಸ ಅಂಗಣದ ತಿಂಗಳ ಬೆಳಕು ಕಾರ್ಯಕ್ರಮೊಡು ಮಾನಾದಿಗೆ ಸ್ವೀಕಾರ ದೆತೊಂದು ಆರ್ ಪಾತೆರಿಯೆರ್. ಧರ್ಮದರ್ಶಿ ಡಾ.ಹರಿಕೃಷ್ಣ ಪುನರೂರು ಲೇಸ್ ದ ಗುರ್ಕಾರ್ಮೆ ಒಯಿಸ್ ದಿತ್ತೆರ್.
ಮಲ್ಲ ಬಿನ್ನೆರಾದ್ ಮುಲ್ಕಿ ನಾಲ್ಕುಪಟ್ಣ ಮೊಗವೀರ ಸಭಾದ ಅಧ್ಯಕ್ಷೆರ್ ಸುಜಿತ್ ಎಸ್. ಸಾಲ್ಯಾನ್, ಮಯೂರಿ ಫೌಂಡೇಶನ್ ಅಧ್ಯಕ್ಷೆರ್ ಜಯ ಶೆಟ್ಟಿ, ತೋಕೂರು ಎಂಎಸ್ ಆರ್ ಎಂ ಐಟಿಐದ ಪ್ರಿನ್ಸಿಪಾಲ್ ಹರಿ ಎಚ್., ಮುಲ್ಕಿ ಜೇಸಿ ಅಧ್ಯಕ್ಷೆರ್ ಕಲ್ಲಪ್ಪ ಕಟವಳೆ, ಮುಲ್ಕಿ ಬಿಲ್ಲವ ಸಂಘದ ಅಧ್ಯಕ್ಷೆರ್ ರಮೇಶ್ ಕೊಕ್ಕರಕಲ್ ಇತ್ತೆರ್. ಹೊಸ ಅಂಗಣ ಸಂಪಾದಕೆರ್ ಡಾ.ಹರಿಶ್ಚಂದ್ರ ಸಾಲ್ಯಾನ್ ಸ್ವಾಗತ ಮಲ್ತೆರ್. ವಾಸು ಪೂಜಾರಿ ಚಿತ್ರಾಪು ದೇವೆರೆನ್ ಸುಗಿತೆರ್. ವಿಜಯಕುಮಾರ್ ಕುಬೆವೂರು ಸನ್ಮಾನ ಪತ್ರ ಓದಿಯೆರ್. ವಾಮನ ಕೋಟ್ಯಾನ್ ನಡಿಕುದ್ರು ಸೊಲ್ಮೆ ಸಂದಾಯೆರ್. ರವಿಚಂದ್ರ ನಿರೂಪಣೆ ಮಲ್ತೆರ್.
Editorial