September 15, 2022

ತೋಕೂರು ಸ್ಪೋರ್ಟ್ಸ್ ಕ್ಲಬ್ ಮುತಾಲಿಕೆಡ್ ನಿವೃತ್ತ ಶಿಕ್ಷಕೆರೆಗ್ ಮಾನಾದಿಗೆದ ಲೇಸ್

ಭಾರತ ಸರಕಾರ ಯುವ ಕಾರ್ಯ ಬೊಕ್ಕ ಕ್ರೀಡಾ ಸಚಿವಾಲಯ, ನೆಹರು ಯುವ ಕೇಂದ್ರ ಕುಡ್ಲ, ಯುವ ಸಬಲೀಕರಣ ಬೊಕ್ಕ ಕ್ರೀಡಾ ಇಲಾಖೆ ಕುಡ್ಲ, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಕುಡ್ಲ, ಜಿಲ್ಲಾಡಳಿತ, ದಕ್ಷಿಣ ಕನ್ನಡ ಜಿಲ್ಲಾ ಪಂಚಾಯತ್, ಗ್ರಾಮ ಪಂಚಾಯತ್ ಪಡುಪಣಂಬೂರು, ತಾಲೂಕು ಬೊಕ್ಕ ಜಿಲ್ಲಾ ಯುವಜನ ಒಕ್ಕೂಟ, ದಕ್ಷಿಣ ಕನ್ನಡ ಜಿಲ್ಲೆ ಮೊಕುಲೆನ ಒಟ್ಟು ಸೇರಿಗೆಡ್ ಜಿಲ್ಲಾ, ರಾಜ್ಯ, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಅಂಚನೆ 2021ನೇ ಸಾಲ್‌ದ ದ. ಕ. ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್ (ರಿ) ತೋಕೂರು, ಹಳೆಯಂಗಡಿ ಮೊಕ್ಲೆನ ಮುತಾಲಿಕೆಡ್ ಮಾಜಿ ರಾಷ್ಟ್ರಪತಿ ಡಾ. ಸರ್ವಪಲ್ಲಿ ರಾಧಾಕೃಷ್ಣನ್ ಮೆರೆನ ಪುಟ್ಟಿನ ದಿನತ್ತ ಅಂಗವಾದ್ ಶಿಕ್ಷಕೆರ್‍ನ ದಿನಾಚರಣೆ ಸೆ. 11 ತಾರೀಕ್ ಐತಾರ ಕಾಂಡೆ ನಿವೃತ್ತ ಶಿಕ್ಷಕೆರೆಗ್ ಮಾನಾದಿಗೆ ಮಲ್ಪುನ ಲೇಸ್ ನಡತ್ಂಡ್.

ಪ್ರಾರ್ಥನೆ ಮಲ್ಪುನ ಮುಖೇನ ಮಾಜಿ ರಾಷ್ಟ್ರಪತಿ ಡಾ. ಸರ್ವಪಲ್ಲಿ ರಾಧಾಕೃಷ್ಣನ್ ಮೆರೆನ ಪಟಕ್ಕ್ ಪೂ ಪಾಡುವ ಮುಖೇನ ಲೇಸ್ ಸುರು ಆಂಡ್. ಕಾರ್ಯಕ್ರಮದ ಅಧ್ಯಕ್ಷತೆನ್ ಗೋವಿಂದ ದಾಸ ಕಾಲೇಜು ಸುರತ್ಕಲ್ ಉಂದೆತ್ತ ಉಪನ್ಯಾಸಕೆರ್ ಡಾ. ಗಣೇಶ್ ಆಚಾರ್ಯ ವಹಿಸೊಂದು ಇತ್ತೆರ್. ಅಂಚನೆ ಬಿನ್ನೆರಾದ್ ಡಾ. ರಾಮಣ್ಣ ಶೆಟ್ಟಿ ಆಂಗ್ಲ ಮಾಧ್ಯಮ ಶಾಲೆ ತಪೋವನ, ತೋಕೂರು ಮುಲ್ಪದ ಶಿಕ್ಷಕಿ ರಾಜೇಶ್ವರಿ ಚೇತನ್ ಶೆಟ್ಟಿ ಇತ್ತೆರ್.

ಸರಕಾರಿ ಮಾದರಿ ಹಿರಿಯ ಪ್ರಾಥಮಿಕ ಶಾಲೆ ಪಡುಪಣಂಬೂರು ಮುಲ್ಪದ ನಿವೃತ್ತ ಅಧ್ಯಾಪಕೆರ್ ಬಿ. ಅನಂತರಾಮ್ ರಾವ್ ಬೆಳ್ಳಾಯರು ಬೊಕ್ಕ ಮೆಡಲಿನ್ ಹಿರಿಯ ಪ್ರಾಥಮಿಕ ಶಾಲೆ, ಮುಲ್ಕಿ ಮುಲ್ಪದ ನಿವೃತ್ತ ಶಿಕ್ಷಕಿ ಕಾನ್ಸೆಪ್ಟ ಹಿಲ್ಡಾ ಡೆಸಾ ಕೆರೆಕಾಡು ಮೊಕ್ಲೆನ ಮಾನಾದಿಗೆ ಮಲ್ತೆರ್.

ಲೇಸ್‌ಡ್ ಸಂಸ್ಥೆದ ಗೌರವಾಧ್ಯಕ್ಷೆರಾಯಿನ ಮೋಹನ್ ದಾಸ್ ಬೊಕ್ಕ ಅಧ್ಯಕ್ಷೆರಾಯಿನ ಸಂತೋಷ್ ದೇವಾಡಿಗ, ಹಿರಿಯ ಪ್ರಾಥಮಿಕ ಹಿಂದುಸ್ತಾನಿ ಶಾಲೆ ತೋಕೂರು ಬೊಕ್ಕ ಅನುದಾನಿತ ಸುಬ್ರಹ್ಮಣ್ಯ ಹಿರಿಯ ಪ್ರಾಥಮಿಕ ಶಾಲೆ ತೋಕೂರು ಮುಲ್ಪದ ಮುಖ್ಯ ಶಿಕ್ಷಕೆರ್, ಸಹ ಶಿಕ್ಷಕೆರ್, ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನ ತೋಕೂರು ಮುಲ್ಪದ ವ್ಯವಸ್ಥಾಪನಾ ಸಮಿತಿ ಸದಸ್ಯೆರ್ ಯೋಗೀಶ್ ಕೋಟ್ಯಾನ್, ಗ್ರಾಮ ಪಂಚಾಯತ್ ಪಡುಪಣಂಬೂರು ಉಂದೆತ್ತ ಸದಸ್ಯೆರ್ ಸಂತೋಷ್ ಕುಮಾರ್, ಸಂಸ್ಥೆದ ಪದಾಧಿಕಾರಿಲು, ಸದಸ್ಯೆರ್, ಗ್ರಾಮಸ್ಥೆರ್ ಲೇಸ್‌ಡ್ ಪಾಲ್ ಪಡೆದಿತ್ತೆರ್.

ಪೊಂಜೊವುಲೆನ ಸದಸ್ಯೆರ್ ಆಯಿನ ಪ್ರಮೀಳಾ ದೇವಾಡಿಗ ಬೊಕ್ಕ ಉಷಾ ಶೆಟ್ಟಿ ಪ್ರಾರ್ಥನೆ ಮಲ್ತೆರ್. ಅಧ್ಯಕ್ಷೆರ್ ಆಯಿನ ಸಂತೋಷ್ ದೇವಾಡಿಗ ಎದ್ಕೊನಿಯೆರ್. ಸದಸ್ಯೆರಾಯಿನ ಮನೋಜ್ ಕತಾರ್ ಬೊಕ್ಕ ಪೊಂಜೊವುಲೆನ ಸದಸ್ಯೆ ವಾಣಿ ಮಹೇಶ್ ಸನ್ಮಾನಿತೆರೆನ ಪರಿಚಯ ಮಲ್ತೆರ್. ಸಾಂಸ್ಕೃತಿಕ ಕಾರ್ಯದರ್ಶಿ ಪ್ರಶಾಂತ್ ಕುಮಾರ್ ಬೇಕಲ್ ಬತ್ತಿನ ಬಿನ್ನೆರೆನ್ ಎದ್ಕೊನಿಯೆರ್. ಕಾರ್ಯಾಧ್ಯಕ್ಷೆರ್ ಸುರೇಶ್ ಶೆಟ್ಟಿ ಲೇಸ್ ಸುದಾರಿಕೆ ಮಲ್ತೆರ್.