September 14, 2022

ಡಾ. ಉದಯ ಧರ್ಮಸ್ಥಳ ಮೆರೆಗ್ ತುಳುವೆರೆಂಕುಲು ಬೆಂಗಳೂರು ಕೂಟೊರ್ದು ಕಣ್ಣನೀರ ಪನಿ ತರ್ಪಣೆ

ಬೆಂಗ್ಲೂರು : ತುಳು ಭೀಷ್ಮೆ ದಿವಂಗತ ಡಾ. ಉದಯ ಧರ್ಮಸ್ಥಳರ ಮೆರೆಗ್ ತುಳುವೆರೆಂಕುಲು ಬೆಂಗಳೂರು ಕೂಟದಕುಲು ಇಂಚೊಗು ಭಾವಪೂರ್ಣ ಶ್ರದ್ಧಾಂಜಲಿ ಸಂದಾಯೆರ್.

ಈ ಒಂಜಿ ಭಾವಪೂರ್ಣ ಕಾರ್ಯಕ್ರಮೊಟ್ಟು ‘ತುಳುವೆರೆಂಕುಲು ಬೆಂಗಳೂರು’ ಗುರ್ಕಾರ್ಲು ವೈ. ಜಯಂತ್ ರಾವ್, ಬಾ. ರಾಮಚಂದ್ರ ಉಪಾಧ್ಯ, ತುಳು ಅಕಾಡೆಮಿ ಸದಸ್ಯೆರ್ ಕಾಂತಿ ಶೆಟ್ಟಿ, ಡಾ.ಕೆ. ಸಿ. ಬಲ್ಲಾಳ್, ಡಾ. ಕೆ. ಪಿ. ಪುತ್ತೂರಾಯ, ಪುರುಷೋತ್ತಮ ಚೇಂಡ್ಲಾ, ಮಾಧವ ಕುಲಾಲ್, ಸುಂದರ್ ರಾಜ್ ರೈ, ಅಜಿತ್ ಹೆಗ್ಡೆ, ಡಾ. ಕೆ. ಎನ್. ಅಡಿಗ, ಉಮೇಶ್ ಪೂಂಜಾ, ಆಶಾನಂದ ಕುಲಶೇಖರ, ರವೀಂದ್ರ ಕುಮಾರ್, ವಿಜಯಕುಮಾರ್ ಕುಲಶೇಖರ,ಎಸ್. ಹೆಚ್. ಹರಿದಾಸ್ ಉಪಾಧ್ಯ, ಪಿ. ಸಿ. ರಾವ್, ಚಂದ್ರಹಾಸ್. ಎಸ್, ಚಾರ್ಲ್ಸ್ ಗೋಮ್ಸ್, ಡಾ. ಶ್ರೀಲತಾ, ನಾಗರಾಜ ಉಪಾಧ್ಯಾಯ, ವಾಮನ ಬೆಂಗ್ರೆ, ಡೇವಿಡ್ ಸೋನ್ಸ್, ಮಟ್ಟಿ ರಾಮಚಂದ್ರ ರಾವ್, ಉಮೇಶ್ ಬಿ. ಕೆ., ಶ್ರೀ ಗುರುಮೂರ್ತಿ, ಶ್ರೀ ಧರ್ಮಪಾಲ್ ಹೈ ಕೋರ್ಟ್ ವಕೀಲರು, ಪದ್ಮನಾಭ ಕೊಲ್ಚಾರ್ ಅಂಚನೇ ವಿವಿಧ ಸಂಘಟನೆದ ಗನ್ಯೆರ್ ಅಪಾರ ಸಂಖ್ಯೆಡ್ ಪಾಲ್ ಪಡೆದಿತ್ತೆರ್.

ಉದಯ ಧರ್ಮಸ್ಥಳ ಸದಾ ಸ್ಫೂರ್ತಿದ ಚಿಲುಮೆ. ಸಾಮಾನ್ಯವಾದ್ ಮಾತಾ ಟಿ. ವಿ. ಚಾನಲ್ ಡ್ ಅರೆನ ಸಂವಾದ, ಚರ್ಚೆ ಪ್ರಸಾರ ಆವೊಂದಿತ್ತ್ಂಡ್. ಒವ್ವೆ ಕಡು ಸತ್ಯೊನು ಮುಚ್ಚಿ ದೀಪಿನ ಗುಣ ಅರೆಡ ಇತ್ತುಜಿ. ನೇರ ನಡೆ ನುಡಿ. ಪಂಡಿನೇನ್ ಮಲ್ತ್ ತೋಜಾವುನ ಸಮರ್ಥೆರ್. ಪ್ರಖರ ವಾಗ್ಮಿ, ಬರಹಗಾರೆ, ಹೋರಾಟಗಾರೆರಾದ್ ಬದ್ ಕ್ ದ್ ಸಾರ್ಥಕತೆ ಪಡೆಯಿನಾರ್. ಮಾತೆರ್ನಲಾ ಮನಸ್ ಡ್ ಸದಾ ಇತ್ತುದ್ ದುಂಬುದ ತುಳು ಕಜ್ಜಲೆಗ್ ಇಂಬು ಕೊರ್ಪೆರ್ಂದ್ ಸೇರ್ದಿನ ಗನ್ಯೆರ್ ಭಾವುಕೆರಾದ್ ಪಂಡೆರ್.

ಬೆಂಗಳೂರುಡು ತುಳು ಭವನ ಆಂಡನೇ, ತುಳು ರಾಜ್ಯದ ಅಧಿಕೃತ ಭಾಷೆ ಆಂಡನೇ, ತುಳು ಸಂವಿದಾನದ 8ನೇ ಪರಿಚ್ಛೇದೊಗು ಸೇರ್ಪಡೆ ಆಂಡನೇ ‘ಡಾ. ಉದಯ ಧರ್ಮಸ್ಥಳ’ ಮೆರೆನ ಆತ್ಮೊಗು ಚಿರಶಾಂತಿ ತಿಕ್ಕುಂಡುಂದು ಮಾತೆರ್ನಲಾ ಉಡಲ್ಡ್ ಅಭಿಪ್ರಾಯ ಮೂಡ್ದ್ ಬತ್ತ್ಂಡ್.

ಉದಯ ಧರ್ಮಸ್ಥಳ ರೆನ ಧರ್ಮಪತ್ನಿ ಅಂಜು ಉದಯಕುಮಾರ್, ಸುಪುತ್ರೆರ್ ಮಂಜುನಾಥ್ ಬೊಕ ಕಾರ್ತಿಕ್, ಅನೇಕ ಬಂಧುಲು ಈ ಭಾವಪೂರ್ಣ ಸಂದರ್ಬೊಡು ಹಾಜರಿತ್ತೆರ್.

ಖ್ಯಾತ ಗಾಯಕೆ ಕಡಲ್ದುಡಲ್ ಸುಧಾಕರ ಶೆಟ್ಟಿ ಗೀತ ನಮನ ಕಾರ್ಯಕ್ರಮೊನು ಹೃದಯಸ್ಪರ್ಶಿಯಾದ್ ನಡಪಾದ್ ಕೊರಿಯೆರ್. ಸಂಘಟಕೆ ಪಳ್ಳಿ ವಿಶ್ವನಾಥ ಶೆಟ್ಟಿ ಈ ಭಾವಪೂರ್ಣ ಕಾರ್ಯಕ್ರಮತ್ತ ಸುದಾರ್ಮೆ ಮಲ್ತೆರ್ .
– ವರದಿ : ಪಳ್ಳಿ ವಿಶ್ವನಾಥ ಶೆಟ್ಟಿ, ಬೆಂಗಳೂರು