ಕುಂಬ್ಲೆ: ತುಳು ಲಿಪಿ ಸಂಶೋಧಕೆರ್, ವಿದ್ವಾಂಸೆರ್, ಕೇರಳ ತುಳು ಅಕಾಡೆಮಿದ ಸುರುತ್ತ ಅಧ್ಯಕ್ಷೆರ್, ತುಳುರತ್ನ ಪುಂಡೂರು ವೆಂಕಟರಾಜ ಪುಣಿಂಚಿತ್ತಾಯೆರ್ (ಪುವೆಂಪು) ಮೇರ್ನ ಪುಟ್ಟುಪರ್ಬದ ಲೆಕ್ಕೊಡು ಪುವೆಂಪು ನೆಂಪು 2022 ಅಂಚನೆ ತುಳು ಲಿಪಿ ದಿನಾಚರಣೆನ್ ಬೇತೆ ಬೇತೆ ಕಾರ್ಯಕ್ರಮದೊಟ್ಟುಗ್ ಅಕ್ಟೋಬರ್ 10ಕ್ಕ್ ಅನಂತಪುರಟ್ ನಡಪಾಯರೆ ನಿರ್ಧಾರ ಮಲ್ತ್ದೆರ್.
ತುಳು ವರ್ಲ್ಡ್ ಕುಡ್ಲ ಅಂಚನೆ ಕೈತಲ್ದ ಸಂಘ ಸಂಸ್ಥೆಲೆನ ಸಾಕಾರಡ್ ಪುವೆಂಪು ಅಭಿಮಾನಿಲು ಅಟ್ಟನೆ ಮಲ್ತಿನ ಕಾರ್ಯಕ್ರಮದ ಯಶಸ್ವಿಗಾದ್ ಸ್ವಾಗತ ಸಮಿತಿನ್ ರಚನೆ ಮಲ್ತ್ದಿತ್ತ್ದ್, ಪುಣಿಂಚಿತ್ತಾಯೆರ್ನ ಸಾಹಿತ್ಯ, ಸಾಂಸ್ಕೃತಿಕ ಅಂಚನೆ ಸಂಶೋಧಾನ್ಮಕ ವಿಷಯನ್ ಅಟ್ಟನೆ ಮಲ್ಪುನವ್ ಲೇಸ್ ಧ್ಯೇಯ ಆತ್ಂಡ್.
ಈ ಬಗೆಟ್ ವಿಚಾರ ಗೋಷ್ಠಿ, ಸಾಹಿತ್ಯ ಗೋಷ್ಠಿ, ಪುವೆಂಪು ಸಮಕಾಲೀನ ಸಾಹಿತಿಲೆನ ಸಮ್ಮಿಲನ, ಪುವೆಂಪು ರಚನೆ ಮಲ್ತಿನ ನಾಟಕದ ಪ್ರದರ್ಶನ ಅಂಚನೆ ಅಭಿಮಾನಿಲೆನ ವಿಚಾರ ಮಂಡನೆ, ಪುವೆಂಪು ಸಮ್ಮಾನ್ ಇಂಚಿತ್ತಿನ ಕಾರ್ಯಕ್ರಮಲೆನ್ ನಡಪರೆ ಉಂಡು. ಈ ಸಮ್ಮೇಳನದ ಸರ್ವಾಧ್ಯಕ್ಷೆರಾದ್ ಗಲ್ಫ್ ರಾಷ್ಟ್ರದ ತುಳು ಸಂಘಟಕೆರ್, ಸಾಹಿತ್ಯ, ಸಾಂಸ್ಕೃತಿಕ ಪ್ರೋತ್ಸಾಹಕೆರ್, ಮಾರ್ಗದರ್ಶಕೆರ್ ಸರ್ವೋತ್ತಮ ಶೆಟ್ಟಿ ಅಬುಧಾಬಿ ಮೆರೆನ್ ಆಯ್ಕೆ ಮಲ್ತ್ದೆರ್ ಪಂದ್ ಸಂಘಟನಾ ಸಮಿತಿ ತೆರಿಪಾದೆರ್.
ಈ ಪಿರವು ಬದಿಯಡ್ಕಡ್ ನಡತಿನ ವಿಶ್ವ ತುಳುವೆರೆ ಆಯನೋದ ಸರ್ವಾಧ್ಯಕ್ಷೆರಾದ್ ಆಯ್ಕೆಯಾದಿತ್ತಿನ ಸರ್ವೋತ್ತಮ ಶೆಟ್ಟಿ ಮೇರ್ ಆಯಿಬೊಕ್ಕ ಯುಎಇಡ್ಲ ತುಳುವೆರೆ ಆಯನೋ ಮಲ್ಪುನ ಮುಖೇನ ತುಳು ನಾಡು ನುಡಿ ಸಂಸ್ಕೃತಿದ ಪ್ರೋತ್ಸಾಹಗ್ ಕೊಡುಗೆ ಕೊರ್ತೆರ್.
pallavi shetty