ಹಳೆಯಂಗಡಿ : ಕಾಂಗ್ರೆಸ್ ಯುವ ನಾಯಕೆರ್ ರಾಹುಲ್ ಗಾಂಧಿ ಮೇರ್ನ ಮುತಾಲಿಕೆದ ಭಾರತ್ ಜೋಡೊ ಪಾದಯಾತ್ರೆ ಕರ್ನಾಟಕಡ್ ಸಂಚಾರ ಮಲ್ಪರೆ ಇತ್ತ್ ದ್ ಅಕ್ಟೋಬರ್ 8 ತಾರೀಕ್ ಗ್ ನಾಗಮಂಗಲ ಬೊಕ್ಕ ತುರುವೇಕೆರೆ ಪ್ರದೇಶಡ್ ಪಾಸ್ ಆಪಿನ ಪೊರ್ತುಡು ಮುಲ್ಕಿ – ಬೆದ್ರ ವಿಧಾನಸಭಾ ಕ್ಷೇತ್ರರ್ದ್ 500 ಕಾರ್ಯಕರ್ತೆರ್ ಪಾಲ್ ಪಡೆಯರೆ ಉಲ್ಲೆರ್ ಪಂದ್ ಕರ್ನಾಟಕ ಪ್ರದೇಶ ಕಾಂಗ್ರೆಸ್ ಸಮಿತಿದ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ ತೆರಿಪಾಯೆರ್.
ಆರ್ ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಕಚೇರಿಡ್ ಅಂಗಾರೆ ನಡತಿನ ಬ್ಲಾಕ್ ಸಮಿತಿ ಪದಾಧಿಕಾರಿಲೆನ ಸಭೆಟ್ಟ್ ಯಾತ್ರೆದ ಮಾಹಿತಿ ಕೊರ್ದು ಪಾತೆರಿಯೆರ್.
ಸಭೆಟ್ಟ್ ಪಾಲ್ ಪಡೆದಿತ್ತಿನ ಕರ್ನಾಟಕ ಸರಕಾರದ ಮಾಜಿ ಸಚಿವೆರ್ ಅಂಚೆನೆ ಕೆಪಿಸಿಸಿ ಉಪಾಧ್ಯಕ್ಷೆರ್ ಕೆ. ಅಭಯಚಂದ್ರ ಜೈನ್ ಪಾತೆರ್ದ್, ರಾಹುಲ್ ಗಾಂಧಿಯೆರ್ನ ಭಾರತ್ ಜೋಡೋ ಯಾತ್ರೆದ ಯಶಸ್ಸ್ ಬಿಜೆಪಿದಕ್ಲೆನ ನಿದ್ರೆ ಹಾಳ್ ಮಲ್ತ್ ದ್ಂಡ್. ಅಂಚಾದ್ ಪಕ್ಷದ ಕಾರ್ಯಕರ್ತೆರ್ ರಾಹುಲ್ ಗಾಂಧಿಯೆರ್ನ ಯಾತ್ರೆನ್ ಯಶಸ್ಸ್ ಮಲ್ತ್ದ್ ಪಕ್ಷ ಸಂಘಟನೆಗ್ ಆದ್ಯತೆ ಕೊರೊಡು ಪಂಡೆರ್.
ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಅಂಚೆನೆ ಕ್ಷೇತ್ರ ಉಸ್ತುವಾರಿ ಮಮತಾ ಗಟ್ಟಿ, ಭಾರತ್ ಜೋಡೊ ಯಾತ್ರೆ ಗ್ ಪೊಂಜೊವುಲುಲ ಪಾಲ್ ಪಡೆವೊಡು ಪಂಡೆರ್.
ಈ ಪೊರ್ತುಡು ಯಾತ್ರೆ ಸುರುವಾಯಿನ ಆಜಿ ದಿನ ದಕ್ಷಿಣ ಕನ್ನಡ ಜಿಲ್ಲೆದ ಕಾಂಗ್ರೆಸ್ ಸೇವಾದಳ ಪ್ರತಿನಿಧಿಯಾದ್ ಕರ್ತವ್ಯ ಪಾಲನೆ ಮಲ್ತಿನ
ಧರ್ಮಾನಂದ ಶೆಟ್ಟಿಗಾರ್ ಮೆರೆನ್ ಶಾಲ್ ಪಾಡ್ದ್ ಮಾನಾದಿಗೆ ಮಲ್ತೆರ್.
ಮತ್ತರ್ಮೆಡ್ ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಮೋಹನ್ ಕೋಟ್ಯಾನ್, ಕೆಪಿಸಿಸಿ ಕೋಆರ್ಡಿನೇಟರ್ ವಸಂತ್ ಬೆರ್ನಾಡ್, ಬ್ಲಾಕ್ ಅಲ್ಪಸಂಖ್ಯಾತೆರ್ನ ವಿಭಾಗದ ಅಧ್ಯಕ್ಷೆರ್ ಟಿ. ಎಚ್ ಮೈಯದಿ, ಕಿಲ್ಪಾಡಿ ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಲೀಲಾ, ಮುಲ್ಕಿ ಬ್ಲಾಕ್ ಯುವ ಕಾಂಗ್ರೆಸ್ ಅಧ್ಯಕ್ಷೆರ್ ಅಶೋಕ್ ಪೂಜಾರ, ನಾಯಕೆರಾಯಿನ ಯೋಗೀಶ್ ಕೋಟ್ಯಾನ್, ಸಾಹುಲ್ ಹಮೀದ್, ಬಿಜೆ ರಹೀಮ್, ಹರಿಯಪ್ಪ ಸಾಲಿಯಾನ್, ಶೈಲಾ ಸಿಕ್ವೇರಾ, ಅನಿತಾ ಡಿಸೋಜಾ, ಸುಜಾತ ಭಟ್, ದೀಪಕ್ ಪೆರ್ಮುದೆ, ಜನಾರ್ಧನ್ ಬಂಗೇರ, ಮಂಜುನಾಥ ಕಂಬಾರ, ಅಬ್ದುಲ್ ಖಾದರ್, ಅಬ್ದುಲ್ ಅಜೀಜ್ , ಕಿರಣ್ ಶೆಟ್ಟಿ , ಬಶೀರ್ ಕುಳಾಯಿ ಮೊಕುಲು ಮಾತ ಇತ್ತೆರ್.
pallavi shetty