ಕುಡ್ಲ ಯುನಿವರ್ಸಿಟಿಡ್ “ಶ್ರೀ ಸಂಸ್ಥಾನ ಒಡಿಯೂರು ತುಳು ಅಧ್ಯಯನ ಕೇಂದ್ರ” ಉದಿಪನ

ಕುಡ್ಲ: ಕುಡ್ಲ ವಿಶ್ವ ವಿದ್ಯಾನಿಲಯ ತುಳು ಸ್ನಾತಕೋತ್ತರ ಅಧ್ಯಯನ ವಿಭಾಗ ವಿಶ್ವವಿದ್ಯಾನಿಲಯ ಸಂಧ್ಯಾ ಕಾಲೇಜು, ಕುಡ್ಲ ಒಡಿಯೂರು ಶ್ರೀ ಗುರುದೇವದತ್ತ ಸಂಸ್ಥಾನಮ್ ಈ ಸಂಸ್ಥೆಲೆನ ಒಟ್ಟು ಸೇರಿಗೆಡ್ “ಶ್ರೀ ಸಂಸ್ಥಾನ ಒಡಿಯೂರು ತುಳು ಅಧ್ಯಯನ ಕೇಂದ್ರ” ಉದಿಪನ ಲೇಸ್ ಬೊಕ್ಕ ಕುಡ್ಲ ವಿಶ್ವವಿದ್ಯಾನಿಲಯದ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ತುಳುಪೀಠ ಪ್ರಕಟಿಸಾಯಿನ ‘ಮಂದಾರ’ ಬೊಕ್ಕ ‘ಬಂಗಾರ್ದ ಕುರಲ್ ಬೂಕುಲೆನ ಬುಡುಗಡೆ ಲೇಸ್ ಸೆ. 17 ಸುಕ್ರಾರ ಕುಡ್ಲದ ಹಂಪನಕಟ್ಟೆ ಎಂ.ಎ ತುಳು ವಿಭಾಗ, ವಿಶ್ವವಿದ್ಯಾನಿಲಯ ಸಂಧ್ಯಾ ಕಾಲೇಜ್ ಡ್ ನಡತ್oಡ್.

ಒಡಿಯೂರು ಶ್ರೀ ಗುರುದೇವದತ್ತ ಸಂಸ್ಥಾನಮ್ ದ ಪರಮಪೂಜ್ಯ ಶ್ರೀ ಶ್ರೀ ಗುರುದೇವಾನಂದ ಸ್ವಾಮೀಜಿ ಬೂಕು ಬುಡುಗಡೆ ಮಲ್ತೆರ್. ಆಯಿಬೊಕ್ಕ ಪಾತೆರಿನ ಆರ್, ಸಂಧ್ಯಾ ಕಾಲೇಜ್ ಡ್ ಬಯ್ಯದ ಪೊರ್ತುಡೆ ತುಳು ಅಧ್ಯಯನ ಕೇಂದ್ರ ಉದಿಪನ ಆಂಡ್. ತುಳು ಭಾಷೆದ ಬಗೆಕ್ ನಮ ಅವೆನ್ ಅಪ್ಪೆ ಭಾಷೆ ಪಂದ್ ಪುದರ್ ದೀಕ. ನಮಕ್ ತುಳು ಭಾಷೆ ಒರಿಪಾವುನ ಸಮಸ್ಯೆ ಉಂಡು. ಪರಪೋಕು ಪೊಸಪೋಕುದೊಟ್ಟುಗು ಎಂಚ ಒರಿಯುಂಡು ಪನ್ಪಿನವ್ ವಿಷಯ ಆಪುಂಡು. ಇನಿ ಡಾ|ಮಾಧವೆರ್ ತುಳು ಭಾಷೆದ ಮಿತ್ತ್ ಇಪ್ಪುನ ಅಭಿಮಾನನ್ ತುಳು ಅಧ್ಯಯನ ಕೇಂದ್ರ ಮುಖೇನ ಬಿರ್ಕ್ ದೆರ್. ನನ ದುಂಬುಗ್ ಭವಿಷ್ಯ ಉಂಡು ಪಂದ್ ಆಂಡ್ ಪಂದ್ ಪಂಡೆರ್.

ಕುಡ್ಲದ ಸಂಸದೆರ್ ನಳಿನ್ ಕುಮಾರ್ ಕಟೀಲ್ ಲೇಸ್ ನ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್. ಲೇಸ್ ದ ಬಗೆಟ್ ಪಾತೆರಿನ ಆರ್ ತುಳು ಸಂಸ್ಕೃತಿ, ತುಳು ಪರಂಪರೆ ಒಂಜಿ ವಿಶೇಷವಾಯಿನ ಪರಂಪರೆ. ಅಧ್ಯಯನ ಕೇಂದ್ರ ಸರ್ಕಾರ ಮಲ್ಪೊಡಾಯಿನ ಬೇಲೆ. ಅವೆನ್ ಒಡಿಯೂರು ಸ್ವಾಮಿಲು ಮಲ್ತೆರ್. ಅಂಚಾದ್ ಉಂದೊಂಜಿ ಅಭಿನಂದನೀಯ ಕಾರ್ಯ. ಧರ್ಮಸ್ಥಳ ಬೊಕ್ಕ ಒಡಿಯೂರು ಉಂದೆಕ್ಕಾದ್ ಮಾಮಲ್ಲ ಕೊಡುಗೆ ಕೊರ್ತ್oಡ್. ತುಳು ಭಾಷೆನ್ 8ನೇ ಪರಿಚ್ಛೇದಗ್ ಸೇರ್ಸಾಯರೇ ಯಂಕುಲ್ನ ಪ್ರಯತ್ನ ಮಲ್ಪುವ ಪಂದ್ ಪಂಡೆರ್.

ಕುಡ್ಲ ವಿಶ್ವವಿದ್ಯಾನಿಲಯದ ಕುಲಪತಿ ಪ್ರೊ.ಪಿ.ಎಸ್.ಯಡಪಡಿತ್ತಾಯ ಲೇಸ್ ದ ಗುರ್ಕಾರ್ಮೆ ವಹಿಸ್ ದ್ ಇತ್ತೆರ್. ಈ ಪೊರ್ತುಡು ಲೇಸ್ ಡ್ ಕನ್ನಡ ಸಾಹಿತ್ಯ ಪರಿಷತ್ ದ ಮಾಜಿ ಗುರ್ಕಾರ್ಲು ಹರಿಕೃಷ್ಣ ಪುನರೂರು, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಗುರ್ಕಾರ್ಲು ಎ.ಸಿ.ಭಂಡಾರಿ, ಕುಡ್ಲ ವಿಶ್ವವಿದ್ಯಾನಿಲಯದ ಸಿಂಡಿಕೇಟ್ ಸದಸ್ಯೆರ್ ಆಯಿನ ಮೋಹನ್ ಪಡಿವಾಳ್ , ರವೀಂದ್ರನಾಥ್ ರೈ, ಕೆ. ರಮೇಶ್, ರವಿಚಂದ್ರ ಪಿ. ಎಂ.,ಕುಡ್ಲ ವಿಶ್ವವಿದ್ಯಾನಿಲಯದ ಪ್ರಾಚಾರ್ಯೆರ್ ಡಾ. ಅನಸೂಯ ರೈ, ವಿ.ವಿ.ಸಂಧ್ಯಾ ಕಾಲೇಜ್ ದ ಪ್ರಾಂಶುಪಾಲೆರ್ ಡಾ. ಸುಭಾಷಿಣಿ ಶ್ರೀ ವತ್ಸ, ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ತುಳು ಪೀಠ ಬೊಕ್ಕ ತುಳು ಸ್ನಾತಕೋತ್ತರ ಅಧ್ಯಯನ ವಿಭಾಗದ ಸಂಯೋಜಕೆರ್ ಡಾ. ಮಾಧವ ಎಂ. ಕೆ ಲೇಸ್ ಡ್ ಪಾಲ್ ಪಡೆದಿತ್ತೆರ್.