ಕುಡ್ಲ: ಪ್ರಧಾನ ಮಂತ್ರಿ ಆಯಿ ಬೊಕ್ಕ ನರೇಂದ್ರ ಮೋದೀಜಿ ತುಳುನಾಡ್ಗ್ ಕಾರ್ ದೀಪಿನಿ ಉಂದು ರಡ್ಡನೇ ಸರ್ತಿ. ಆಂಡ ಅರೆಗ್ ತುಳು ಮಣ್ಣ್ದ ಜನ ಬೋಡು, ತುಳು ಬಾಸೆ, ಸಂಸ್ಕೃತಿ ದಾಲ ಬೊಡ್ಚಿ ಪನ್ಪಿನ ಲೆಕ ಆತ್ಂಡ್ ಪನ್ಪಿನ ಬೆಚ್ಚದ ಪಾತೆರ ಸುಕ್ರಾರದಾನಿ ಆರ್ ಕುಡ್ಲಗ್ ಬತ್ತ್ದ್ ಪೋಯಿ ಬೊಕ್ಕ ಮಾತ ಕಡೆಟ್ಟ್ಲ ಕೇಂದ್ ಬರೊಂದುಂಡು.
ಸಂಶಯನೇ ಇಜ್ಜಿ, ಮಾನ್ಯ ಮೋದೀಜಿ ನೆರ್ದ್ದುಂಬು ತುಳುನಾಡ್ಗ್ ಬನ್ನಗ ತುಳುಟ್ಟು ಪಾತೆರ್ದಿತ್ತೆರ್. ಆಂಡ ನಳಿನ್ ಕುಮಾರ್ ಕಟೀಲ್ ರಾಜ್ಯಾಧ್ಯಕ್ಷೆರ್ ಆಯಿ ಬೊಕ್ಕ ಪ್ರಧಾನಿಲೆಡ ತುಳುಕ್ಕು ಬೋಡಾದ್ ರಡ್ಡ್ ಪಾತೆರ ಪನ್ಪಾವರೆ ಆತಿಜಿ. ಪೋಯಿ ಸರ್ತಿಲ ಕನ್ನೊಡುಡು ಪಾತೆರ್ಪಾದೆರ್. ಆಂಡ ಈ ಸರ್ತಿ ರಡ್ಡ್ ಪಾತೆರ ತುಳುಟ್ಟು ಪಾತೆರ್ಪಾರೆ ಮೊಕ್ಲೆಗ್ ಆಯಿಜಿ ಪನ್ಪಿನ ಆರೋಪಲ ತುಳುವೆರೆದ್ ಕೇಂಡ್ದ್ ಬೈದ್ಂಡ್.
ಬಿಜೆಪಿದ ಭದ್ರ ಕೋಟೆ ಪಂದ್ ಪುಗರ್ತೆ ಪಡೆದಿನ ತುಳುನಾಡ್ಗ್ ಪ್ರಧಾನಿ ಮೋದಿ ಆಂಡಲ ದಾದ ಕೊರಿಯೆರ್ ಪನ್ಪಿನ ಪ್ರಶ್ನೆಗ್ ಉತ್ತರ ಇಜ್ಜಿ. ತುಳುನಾಡ್ದ ಮಲ್ಲ ಬೇಡಿಕೆ ಆದುಪ್ಪುನ ಸಂವಿಧಾನದ ತಾನಮಾನೊ, ರಾಜ್ಯ ಬಾಸೆದ ಗೌರವ ಇಂಚಿನ ರಡ್ಡ್ ಬೇಡಿಕೆಲೆನ್ ದುಂಬು ದೀವರೆ ನಮ್ಮ ಜನಪ್ರತಿನಿಧಿನಕ್ಲೆಗ್ ಆಯಿಜಿ ಪನ್ಪಿನ ಬೇಜಾರ್ಲ ಮಸ್ತ್ ಉಂಡು.
ಅವ್ವತ್ತಾಂದೆ ನೆಂಪು ಕಾನಿಕೆ ಕೊರ್ಪಿನ ಇಚಾರೊಡ್ಲ ಆತೆ. ತುಳುನಾಡ ಸಂಸ್ಕೃತಿದ ಪ್ರತೀಕವಾದುಪ್ಪುನ ಮುಟ್ಟಾಲೆ, ಪನೊಲಿ, ಕಂಬುಲದ ನುಗ, ಬೆತ್ತ, ಯಕ್ಷಗಾನದ ಕಿರೀಟ ಇಂಚಿನ ಮಾತ ಸಾಂಪ್ರದಾಯಿಕ ವಸ್ತುಲೆನ್ ಪ್ರಧಾನಿಲೆಗ್ ನೆಂಪು ಕಾಣಿಕೆಯಾದ್ ಕೊರ್ಪೆರ್ ಪನ್ಪಿನ ಆಸೆಲ ಮಣ್ಣಾದ್ ಪೋಂಡು. ಸದ್ಯೊಗು ಪರಶುರಾಮ ದೇವೆರ್ನ ಒಂಜಿ ಮೂರ್ತಿನ್ ಕೊರಿನವು ಮಲ್ಲ ಪುಣ್ಯ ಪಂದ್ ತುಳುವೆರ್ ಪನೊಂದುಲ್ಲೆರ್.
ಎಂಚಿನನೇ ಆವಡ್ ತುಳುನಾಡ್ದ ವಿಚಾರೊಡು ಪ್ರಧಾನಿನ ಕೊಡುಗೆ ದಾದ ಪನ್ಪಿನ ವಿಚಾರೊಡು ಸಾಮಾಜಿಕ ಜಾಲತಾಣೊಡು ಪ್ರಶ್ನೊ ಮಲ್ತೊಂದೆರ್. ಅವ್ವೇತೋ ತುಳು ಸಂಘಟನೆದಕಲು ಏತೋಸರ್ತಿ ತುಳುವೆರ್ನ ಸಕ್ತಿ ದಾದ ಪಂಡ್ದ್ ಟ್ವೀಟ್ ಅಭಿಯಾನ ಮಲ್ತ್ದ್ ಸ್ವತಃ ಪ್ರಧಾನಿ ಮೋದಿಯೆರೆಗ್ ಟ್ವೀಟ್ ಮಲ್ತ್ದಿತ್ತೆರ್. ಈತಾಂಡಲ ತುಳುವೆರೆಗ್ ದಾದ ತಿಕ್ಂಡ್ ಪಂದ್ ಪ್ರಶ್ನೆ ಮಲ್ದೆರ್.
pallavi shetty