ಬೆದ್ರ ಕೈತಲ್ ದ ಕಲ್ಲ ಮುಂಡ್ಕೂರು ಕುದ್ರಿ ಪದವು ಸವಿತಾ ಆರ್ಟ್ಸ್ದ ಸದಾಶಿವ ಪೂಜಾರಿ ಮೇರ್ ಗಣಪತಿ ಮೂರ್ತಿನ್ ಮಲ್ಪುನೆಟ್ ಭಾರಿ ಪುಗರ್ತೆ ಪಡೆತಿನಾರ್. ಮಲ್ಲ ಬೊಕ್ಕ ಎಲ್ಯ ಗಾತ್ರದ 50 ರ್ದು ಲ ಎಚ್ಚ ಗಣಪತಿ ಮೂರ್ತಿಲೆನ್ ಈ ಸರ್ತಿ ಮೇರ್ ಮಲ್ತ್ ದೆರ್. ಸದಾಶಿವ ಪೂಜಾರಿ ಮೆರೆನ ಕೈರ್ದ್ ಆವೆ ಮಣ್ಣ್ ಡ್ ಬೇತೆ ಬೇತೆ ರೂಪುದ ಮೂರ್ತಿಲು ಮೂಡ್ ದ್ ಬೈದ್ಂಡ್.
1985 ಟ್ ಎಲ್ಯ ಪ್ರಾಯಡೇ ಗಣಪತಿ ಮೂರ್ತಿನ್ ಮಲ್ಪರೆ ಸುರು ಮಲ್ತಿನ ಸದಾಶಿವ ಮೇರ್ ಇಡೇ ಮುಟ್ಟ ಸುಮಾರ್ 500 ರ್ದ್ ಎಚ್ಚ ಗಣಪತಿ ಮೂರ್ತಿಲೆಗ್ ರೂಪು ಕೊರ್ತೆರ್. ಕೈತಲ್ ಡ್ ಮಾತ್ರ ಅತ್ತಂದೆ ದೂರದ ಊರುರ್ದುಲ ಬೇಡಿಕೆ ಬರ್ಪುಂಡು. ಗಣೇಶನ ಮೂರ್ತಿದೊಟ್ಟುಗು ಶಾರದೆ, ಗೌರಿ ಅಂಚನೆ ಬೇತೆ ಬೇತೆ ಮೂರ್ತಿಲೆನ್ ಕಮ್ಮಿ ಪೊರ್ತುಡು ಮಲ್ಪುನ ಕೂಚಳಕ ಮೇರೆಡ ಉಂಡು.
ಕಲ್ಲಮುಂಡ್ಕೂರು ಚಂದು ಪೂಜಾರಿ ಬೊಕ್ಕ ಪದ್ಮಾ ದಂಪತಿಲೆನ 9 ಜೋಕುಲೆಡ್ ಕಡೆಕ್ಕ್ ಪುಟ್ಟಿನ ಮೇರ್ ಎಲ್ಯರ್ದೇ ಕಲೆಕ್ಕಾದ್ ಮಸ್ತ್ ಬೆಂತಿನಾರ್.
ತುಳು ನಾಟಕಡ್ ಸ್ತ್ರೀ ಪಾತ್ರಧಾರಿಯಾದಿತ್ತಿನ ಮೇರ್ ಛದ್ಮವೇಷ ಕಲಾವಿದೆರಾದ್ ಮಸ್ತ್ ಜನಕ್ಲೆನ ಮನನ್ ಗೆಂದಿನಾರ್. ಮೂರ್ತಿಲೆಗ್ ನೈಜತೆದ ರೂಪ ಕೊರ್ಪಿನ ಚಾಕಚಕ್ಯತೆ ಮೆರೆಡ ಉಂಡು.
ಪ್ರಚಾರದ ಬಗೆಟ್ ತರೆ ಕೊರಂದಿನ ಮೇರ್ ಪೈಂಟಿಂಗ್, ಬ್ಯಾನರ್, ಗಾಡಿದ ಪೈಂಟಿಂಗ್, ಮೂರ್ತಿಲು, ಪೂತ್ತ ಚಟ್ಟಿಲು, ಚಿತ್ರ ಚಿತ್ತಾರ ಇಂಚಿತ್ತಿನ ಚಿತ್ರನ್ ಮಲ್ಪುವೆರ್. ಮೇರ್ ಸಾರ್ವಜನಿಕವಾದ್ ತೋಜುನವ್ ಮಸ್ತ್ ಕಮ್ಮಿ. ಹಿಂದೂ ದೇವೆರ್ನ ಮೂರ್ತಿದೊಟ್ಟುಗ್ ಮೇರಿ-ಏಸು ಕ್ರಿಸ್ತನ ಮೂರ್ತಿನ್ ಲ ಮಲ್ಪುವೆರ್.
ಇಲ್ಲ್ ಮಂದಿರಗ್ ಬೊಲ್ಪು ಕೊರ್ಪಿನ ಸದಾಶಿವ ಜನಕ್ಲೆನ ಇಷ್ಟದ ದೋಸ್ತಿಯಾತೆರ್. ಹೈಸ್ಕೂಲ್ ಡ್ ಡ್ರಾಯಿಂಗ್ ಮಾಸ್ಟರ್ ಅಚ್ಚುತ ಆಚಾರ್ ಮೇರೆರ್ದ್ ಕಲ್ತಿನ ಸದಾಶಿವ ಮೇರ್ ಆಯಿಬೊಕ್ಕ ಬಿ.ಜಿ.ಎಂ ಫೈನ್ ಆರ್ಟ್ಸ್ ಡ್ 3 ವರ್ಷ ತರಬೇತಿ ಪಡೆತೆರ್.
“ಪೇಪರ್ ಎನ್ನ ಇಷ್ಟದ ಸಂಗಾತಿ. ಪತ್ರಿಕೆಲು ಯಂಕ್ ಪ್ರೋತ್ಸಾಹ ಕೊರ್ತ್ಂಡ್ ಪನ್ಪಿನ ಮೇರೆಗ್ ಇಡೇ ಮುಟ್ಟ ಒವ್ವೇ ಪ್ರಶಸ್ತಿ ಪುರಸ್ಕಾರ ತಿಕ್ಕ್ ದಿಜಿ. ಅರೆನ ಕಲೆಕ್ಕ್ ಬಿಲೆ ಬರಡ್, ಪ್ರಶಸ್ತಿ ಗೌರವ ತಿಕ್ಕಡ್ ಪನ್ಪಿನವು ಟೈಮ್ಸ್ ಆಫ್ ಕುಡ್ಲ ಪತ್ರಿಕೆದ ಸುಗಿಪು.
pallavi shetty