ಪಡ್ಡೆದ್ರ : ಹಳೆಯಂಗಡಿಡ್ ಪ್ರಧಾನ ಕಚೇರಿ ಉಪ್ಪುನ, ಕಡಿಮೆ ಅವಧಿಡೇ ಪುಗರ್ತೆ ಪಡೆಯಿನ ಪ್ರಿಯದರ್ಶಿನಿ ಸಹಕಾರ ಸಂಘದ ಪಡ್ಡೆದ್ರ (ಪಡುಬಿದ್ರಿ) ಶಾಖೆ ಆಗಸ್ಟ್ 29 ಸೋಮಾರ ಕಾಂಡೆ 11 ಗಂಟೆಗ್ ಶ್ರೀ ಮಹಾಗಣೇಶ್ ಕಾಂಪ್ಲೆಕ್ಸ್ ದ 1ನೇ ಮಾಳಿಗೆಡ್ ಉದಿಪನ ಆಂಡ್. ಮಾಜಿ ಮಂತ್ರಿಲು, ಪ್ರಿಯದರ್ಶನಿ ಸೊಸೈಟಿ ದ ಮಾರ್ಗದರ್ಶಕೆರ್ ಅಭಯಚಂದ್ರ ಜೈನ್ ಶಾಖೆ ಉದಿಪನ ಮಲ್ತೆರ್.
ಈ ಪೊರ್ತುಡು ಪಾತೆರಿನ ಆರ್, ಪ್ರಿಯದರ್ಶಿನಿ ಸಹಕಾರಿ ಸಂಘದ ಅಧ್ಯಕ್ಷೆರ್ ವಸಂತ ಬೆರ್ನಾಡ್ ಬೊಕ್ಕ ಅರೆನ ಕೂಟದಕುಲು ಅಂಚೆನೆ ಸಿಬ್ಬಂದಿಲೆನ ಪರಿಶ್ರಮ ಬೊಕ್ಕ ಗ್ರಾಹಕೆರ್ನ ಬೆರಿಬಲರ್ದಾತ್ರ ಕಾಲಿ 15 ತಿಂಗೊಲ್ದ ಅವಧಿಡ್ ಸೊಸೈಟಿ ಎಡ್ಡೆ ಸಾಧನೆ ಮಲ್ತ್ ದ್ ಪಡ್ಡೆದ್ರ ಶಾಖೆ ಉದಿಪನ ಆವರೆ ಸಾಧ್ಯ ಆಂಡ್. ಅಂಚೆನೆ ಆಯಿನಾತ್ ಬೇಗ ಕಾರ್ಲ, ಬೆದ್ರಡ್ ಲಾ ಶಾಖೆಲು ಉದಿಪನ ಆದ್ ರಾಜ್ಯೊಡು ನೂದೆರ್ದ್ ಲ ಎಚ್ಚಿನ ಶಾಖೆಲು ಉದಿಪನ ಆವಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.
ಭದ್ರತಾ ಕೋಣೆ ಉದಿಪನ ಮಲ್ತ್ ದ್ ಪಾತೆರಿನ ಮಾಜಿ ಸಚಿವೆರ್ ವಿನಯ ಕುಮಾರ್ ಸೊರಕೆ, ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆ ಮಲ್ಲ ಮಲ್ಲ ಬ್ಯಾಂಕ್ ಲೆನ ಜಿಲ್ಲೆ ಪನ್ಪಿನ ಪುಗರ್ತೆ ಇತ್ತ್ಂಡ್. ಟಿಎಂಎ ಪೈ, ಹಾಜಿ ಅಬ್ದುಲ್ಲಾ, ಮುಲ್ಕಿ ಸುಂದರರಾಮ್ ಶೆಟ್ರೆನಂಚಿನ ಗಣ್ಯೆರ್ ಸುರು ಮಲ್ದಿನ ಬ್ಯಾಂಕುಲು ಇತ್ತೆ ವಿಲೀನ ಆತಿನವು ಭಾರಿ ಬೇಜಾರ್ದ ಸಂಗತಿ. ಆಂಡ ಸಹಕಾರಿ ಸಂಘೊಲು ಇತ್ತೆ ಬಡವೆರೆನ ಬೇಡಿಕೆಗ್ ಸ್ಪಂದನೆ ಕೊರೊಂದಿತ್ತಿನವು ಕುಸಿತ್ತ ಸಂಗತಿ. ಕಾಪುಡುಲ ಪ್ರಿಯದರ್ಶಿನಿ ಸೊಸೈಟಿ ಶಾಖೆ ಸುರು ಆವಡ್. ಅಯಿಕ್ ಸಂಪೂರ್ಣ ಬೆರಿಬಲ ಕೊರ್ಪೆ ಪಂದ್ ಪಂಡೆರ್.
ಪ್ರಿಯದರ್ಶಿನಿ ಸ್ವಸಹಾಯ ಗುಂಪು ಉದಿಪನ ಮಲ್ತ್ ದ್ ಪಾತೆರಿನ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ, ಪ್ರಿಯದರ್ಶಿನಿ ಸೊಸೈಟಿಗ್ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆದ ಜನಕ್ಲೊನ ಬೆರಿಬಲತ್ತ ಒಟ್ಟುಗು ರಡ್ಡ್ ಜನ ಅರಸುಲೆನ ಆಶೀರ್ವಾದ ಅಂಚೆನೆ ರಡ್ಡ್ ಜಿಲ್ಲೆದ ಘಟಾನುಘಟಿ ಮಾಜಿ ಸಚಿವೆರನ ಮಾರ್ಗದರ್ಶನಲ ಉಂಡು. ಪ್ರಿಯದರ್ಶಿನಿ ಸಂಘ ದೇಶ ಇಡೀಕ್ಕ ಶಾಖೆಲೆನ್ ಮಲ್ತ್ ದ್ ಏತೋ ಜನ ನಿರುದ್ಯೋಗಿಲೆಗ್ ಉದ್ಯೋಗ ತಿಕ್ಕುಲೆಕ ಆವಡ್ ಪಂಡೆರ್.
ಮೊಬೈಲ್ ಬ್ಯಾಂಕಿಂಗ್ ಗ್ ಚಾಲನೆ ಕೊರಿನ ಒಡಿಪು ಜಿಲ್ಲಾ ಸಹಕಾರಿ ಯೂನಿಯನ್ ಅಧ್ಯಕ್ಷೆರ್ ಬಿ.ಜಯಕರ ಶೆಟ್ಟಿ ಇಂದ್ರಾಳಿ ಮೇರ್ ಪಾತೆರ್ದ್, ಒಡಿಪು ಜಿಲ್ಲೆಡ್ ಸಹಕಾರಿ ಸಂಘೊಲು ಎಡ್ಡೆ ಸಾಧನೆ ಮಲ್ತೊಂದುಂಡು. ರಾಜ್ಯೊಡು 48000 ಸಹಕಾರಿ ಸಂಘೊಲು ಉಲ್ಲ, 60000 ಕೋಟಿ ವೈವಾಟ್ ಮಲ್ತ್ ದ್ಂಡ್. ಪ್ರಿಯದರ್ಶಿನಿ ಸೊಸೈಟಿಲ ಎಡ್ಡೆ ವೈವಾಟ್ ಮಲ್ಪುನೆತ್ತ ಒಟ್ಟುಗೆ ಸಾಮಾಜಿಕ ಕಾಳಜಿಡ್ ಲ ಕೆಲಸ ಮಲ್ಪೊಡು ಪಂದ್ ಸಲಹೆ ಕೊರಿಯೆರ್.
ಪಡ್ಡೆದ್ರ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದ ಅನುವಂಶಿಕ ಮೊಕ್ತೇಸರೆರ್ ರತ್ನಾಕರ ರಾಜ್ ಅರಸು ಕಿನ್ಯಕ್ಕ ಬಲ್ಲಾಲ್ ಠೇವಣಿ ಪತ್ರ ಬುಡುಗಡೆ ಮಲ್ತ್ ದ್ , ಪ್ರಿಯದರ್ಶಿನಿ ಸಂಘ ಆಯಿನಾತ್ ಬೇಗ 100 ಕೋಟಿ ರೂ. ವೈವಾಟ್ ಮಲ್ಪಡ್ ಪಂದ್ ಸೊಸೈಟಿಗ್ ಜಾಗ್ ರ್ತೆದ ಪಾತೆರದ ಒಟ್ಟುಗು ಎಡ್ಡೆಪ್ಪುನು ಬಯಕಿಯೆರ್.
ಪಡ್ಡೆದ್ರ ಗ್ರಾಮ ಪಂಚಾಯಿತಿ ಅಧ್ಯಕ್ಷೆರ್ ರವಿ ಶೆಟ್ಟಿ ಪಾದೆಬೆಟ್ಟು ಸೇವಿಂಗ್ಸ್ ಖಾತೆದ ಪಾಸ್ ಬುಕ್ಕು ಪಟ್ಟಿಯೆರ್.
ಲೇಸ್ ದ ಗುರ್ಕಾರ್ಮೆ ಒಯಿಸ್ ದ್ ಪಾತೆರ್ನ ಮುಲ್ಕಿ ಸೀಮೆದ ಅರಸೆರ್ ದುಗ್ಗಣ್ಣ ಸಾವಂತೆರ್, ಪ್ರಿಯದರ್ಶಿನಿ ಸಂಘ ಕಾಲಿ 15 ತಿಂಗೊಲುಡು 12 ಕೋಟಿ ರೂಪಾಯಿ ಠೇವಣಿ ಒಟ್ಟು ಮಲ್ತ್ ದ್ ಎಡ್ಡೆ ಸಾಧನೆ ಮಲ್ದ್ಂಡ್. ದ.ಕ , ಒಡಿಪು ಜಿಲ್ಲೆ ಅತ್ತಾಂದೆ ಇಡೀ ರಾಜ್ಯೊಡು ಶಾಖೆಲೆನ್ ಮಲ್ಪಡ್ ಪಂದ್ ಆಶೀರ್ವಾದ ಮಲ್ತೆರ್.
ಮಲ್ಲ ಬಿನ್ನೆರಾದ್ ಕರ್ನಾಟಕ ದೈವ ಶಾಸ್ತ್ರೀಯ ಮಹಾವಿದ್ಯಾಲಯದ ಪ್ರಿನ್ಸಿಪಾಲ್ ರೇ.ಡಾ.ಹ್ಯೂಬರ್ಟ್ ಎಮ್. ವಾಟ್ಸನ್, ಪಾವಂಜೆ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನ ದ ವ್ಯವಸ್ಥಾಪನೆ ಸಮಿತಿದ ಅಧ್ಯಕ್ಷೆರ್ ಬಿ.ಸೂರ್ಯ ಕುಮಾರ್, ಪಡ್ಡೆದ್ರ ಇಮಾಯತ್ ಇಸ್ಲಾಂ ಸಂಘದ ಅಧ್ಯಕ್ಷೆರ್ ಶಬ್ಬೀರ್ ಹುಸೇನ್, ನಾದಶ್ರೀ ಕೋ ಆಪರೇಟಿವ್ ಸೊಸೈಟಿದ ಅಧ್ಯಕ್ಷೆರ್ ಶ್ರೀಧರ ದೇವಾಡಿಗ, ಮಾಜಿ ಅಧ್ಯಕ್ಷೆರ್ ಸಂಜೀವಿ ಪೂಜಾರ್ತಿ,ದಮಯಂತಿ ವಿ.ಅಮೀನ್, ಕೆಪಿಸಿಸಿ ಕೋಆರ್ಡಿನೇಟರ್ ನವೀನ್ ಚಂದ್ರ ಶೆಟ್ಟಿ, ಕಟ್ವಾಣದ ಮಾಲಕೆರ್ ಸುಧಾಕರ ದೇವಾಡಿಗ ಮತ್ತರ್ಮೆಡ್ ಕುಲ್ದಿತ್ತೆರ್.
ಪ್ರಿಯದರ್ಶಿನಿ ಸಹಕಾರ ಸಂಘದ ಅಧ್ಯಕ್ಷೆರ್ ಎಚ್. ವಸಂತ ಬೆರ್ನಾಡ್ ಪಾತೆರ್ದ್, ಸಂಘ ಪ್ರಸ್ತುತ 12 ಕೋಟಿ ಠೇವಣಿ ಒಟ್ಟು ಮಲ್ದ್ಂಡ್, ಸುರೂತ್ತ ವರ್ಸನೇ ಲಾಭೊಡು ಉಂಡು. ಕೈತಲ್ದಕ್ಲೆಗ್ ಉದ್ಯೋಗ ಕೊರ್ಪುನ ಮುಕೇನ ಸಹಕಾರ ತತ್ವನ್ ಪಾಲನೆ ಮಲ್ತ್ ದ್ ಒಡಿಪು ಬೊಕ್ಕ ದಕ್ಷಿಣ ಕನ್ನಡ ಜಿಲ್ಲೆಡ್ ಸಾಮಾಜಿಕ ಸೇವೆ ಮಲ್ಪುನ ಉದ್ದೇಶ ದೀವೊಂದ ಪಂಡೆರ್.
ಸೊಸೈಟಿದ ಉಪಾಧ್ಯಕ್ಷೆರ್ ಪ್ರತಿಭಾ ಕುಳಾಯಿ, ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಸುದರ್ಶನ್, ನಿರ್ದೇಶಕೆರಾಯಿನ ಡಾ. ಗಣೇಶ್ ಅಮೀನ್
ಸಂಕಮಾರ್, ಧನಂಜಯ ಮಟ್ಟು, ಗೌತಮ್ ಜೈನ್, ಶರತ್ ಶೆಟ್ಟಿ ಪಂಚವಟಿ, ಉಮಾನಾಥ ಜೆ. ಶೆಟ್ಟಿಗಾರ್, ಜೈ ಕೃಷ್ಣ ಕೋಟ್ಯಾನ್, ಗಣೇಶ್ ಪ್ರಸಾದ್ ದೇವಾಡಿಗ, ಧನರಾಜ್ ಕೋಟ್ಯಾನ್, ಮಿರ್ಜಾ ಅಹ್ಮದ್, ಚಿರಂಜೀವಿ ಅಂಚನ್, ಶರೀಲ್ ಅಯೊನ ಐಮನ್, ಹರೀಶ್ ಎನ್ ಪುತ್ರನ್, ನವೀನ್ ಸಾಲಿಯಾನ್ ಪಂಜ, ಸಂದೀಪ್ ಅಂಚೆನೆ ಶಾಖಾ ಪ್ರಬಂಧಕೆರಾಯಿನ ಪ್ರಜ್ಞಾಶ್ರೀ , ಸಾಹುಲ್ ಹಮೀದ್, ಕದಿಕೆ, ಶಶಿಂದ್ರ ಸಾಲ್ಯಾನ್ , ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಮೋಹನ್ ಕೋಟ್ಯಾನ್, ಯುವ ಕಾಂಗ್ರೆಸ್ ಅಧ್ಯಕ್ಷೆರ್ ಅಶೋಕ್ ಪೂಜಾರ್ ಮೊಕುಲು ಮಾತ ಲೇಸ್ ಡ್ ಪಾಲ್ ಪಡೆದಿತ್ತೆರ್.
ನಿರ್ದೇಶಕೆರಾಯಿನ ಡಾ. ಗಣೇಶ್ ಅಮೀನ್ ಸಂಕಮಾರ್ ಬಿನ್ನೆರೆನ್ ಎದ್ಕೊಂಡೆರ್. ಪ್ರಕಾಶ್ ಆಚಾರ್ಯ ಕಿನ್ನಿಗೋಳಿ ನಿರೂಪಣೆ ಮಲ್ತೆರ್. ಸಿಇಒ ಸುದರ್ಶನ್ ಸೊಲ್ಮೆ ಸಂದಾಯೆರ್.
