ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆ, ಕರ್ನಾಟಕ ಸರ್ಕಾರ, ಕುಡ್ಲ ಮಹಾನಗರ ಪಾಲಿಕೆ, ಸ್ವಾತಂತ್ರ್ಯ ಪೊರ್oಬಾಟಗಾರೆರ್ ಕೆದಂಬಾಡಿ ರಾಮಯ್ಯ ಗೌಡ ಸ್ಮಾರಕ ಉಸ್ತುವಾರಿ ಸಮಿತಿ (ರಿ.) ಕುಡ್ಲ, ದಕ್ಷಿಣ ಕನ್ನಡ ಮೊಕ್ಲೆನ ಮುತಾಲಿಕೆಡ್ ಕುಡ್ಲದ ಬಾವುಟಗುಡ್ಡೆ ಡ್ ಸ್ಥಾಪನೆ ಆಯರೆ ಇಪ್ಪುನ ಸ್ವಾತಂತ್ರ್ಯ ಸಮರ ವೀರೆರ್ ಕೆದಂಬಾಡಿ ರಾಮಯ್ಯ ಗೌಡ ಮೇರ್ನ ಕಂಚಿದ ಮೂರ್ತಿ ಆಗೋಸ್ಟ್ 29ಗ್ ಸೋಮಾರ ಕುಡ್ಲಗ್ ಬರಿಯರೆ ಉಂಡು.
ಈ ಬಗೆಟ್ ಪತ್ರಿಕಾಗೋಷ್ಠಿಡ್ ಕುಡ್ಲ ಮಹಾನಗರ ಪಾಲಿಕೆದ ಪ್ರೇಮಾನಂದ ಶೆಟ್ಟಿ ಪಾತೆರ್ದ್, 1837 ಟ್ 13 ದಿನತ್ತ ಕಾಲ ಕುಡ್ಲನ್ ಬ್ರಿಟಿಷೆರ್ನ ವಿರುದ್ಧ ಪೊರ್oಬಾಟ ಮಲ್ತ್ ದ್ ಬಾವುಟಗುಡ್ಡೆಡ್ ಇತ್ತಿನ ಬ್ರಿಟಿಷೆರ್ನ ಬಾವುಟನ್ ದೆತ್ತ್ ಪಾಡ್ದ್ ನಮ್ಮ ತುಳು ಮಣ್ಣ್ ದ ಕೊಡಿನ್ ಏರಾಯಿನ ಸಂಘಟನಾ ಚತುರೆ ಕೆದಂಬಾಡಿ ರಾಮಯ್ಯ ಗೌಡ ಮೆರೆನ ಕಂಚಿದ ಮೂರ್ತಿನ್ ಬಾವುಟಗುಡ್ಡೆಡ್ ಸ್ಥಾಪನೆ ಮಲ್ಪರೆ ಉಂಡು. 22 ಅಡಿ ಎತ್ತರ ಇಪ್ಪುನ ಈ ಮೂರ್ತಿಗ್ ಕರ್ನಾಟಕ ಸರಕಾರರ್ದ್ 40 ಲಕ್ಷ ಅನುದಾನ ಬೈದ್oಡ್. ಆಗೋಸ್ಟ್ 29 ಗ್ ಕುಡ್ಲದ ಪಡೀಲ್ ಡ್ ಉಂದೆನ್ ಎದ್ಕೊನಿಯರೆ ಉಲ್ಲ ಪಂದ್ ಪಂಡೆರ್.
ಕುಡ್ಲ ದಕ್ಷಿಣ ವಿಧಾನ ಸಭಾ ಕ್ಷೇತ್ರದ ಶಾಸಕೆರ್ ವೇದವ್ಯಾಸ್ ಕಾಮತ್ ಪಾತೆರ್ದ್, ಈ ಮೂರ್ತಿದ ಬೇಲೆ ಆಂಧ್ರಪ್ರದೇಶದ ವಿಜಯವಾಡಡ್ ಆದಿತ್ತ್ ದ್, ಆಗೋಸ್ಟ್ 27 ಕ್ಕ್ ಆದಿಚುಂಚನಗಿರಿ ಮಹಾಸಂಸ್ಥಾನ ಮಠಕ್ಕ್ ಪೋದು ಪರಮಪೂಜ್ಯ ಜಗದ್ಗುರು ಶ್ರೀ ಡಾ. ನಿರ್ಮಲಾನಂದನಾಥ ಸ್ವಾಮಿಲು ಆಗೋಸ್ಟ್ 28 ಗ್ ಕಾಂಡೆ ಮೂರ್ತಿನ್ ಎದ್ಕೊಂದು ಕುಡ್ಲಗ್ ಕಡಪುಡುನ ಕಾರ್ಯಗ್ ಚಾಲನೆ ಕೊರಿಯರೆ ಉಲ್ಲೆರ್. ಆ.28 ಗ್ ಬಯ್ಯಗ್ ಮಡಿಕೇರಿಗ್ ಬತ್ತ್ ದ್, 29 ಗ್ ಸಂಪಾಜೆ ಗೇಟ್ ದ ಮುಖೇನ ಕುಡ್ಲಗ್ ಬರಿಯರೆ ಉಂಡು. ಮಾತೆರ್ಲಾ ಈ ಮೂರ್ತಿನ್ ಮೋಕೆಡ್ ಎದ್ಕೊನುಲೆ ಪಂದ್ ಪಂಡೆರ್.
ಈ ಪೊರ್ತುಡು ಸ್ಮಾರಕ ಉಸ್ತುವಾರಿ ಸಮಿತಿದ ಪ್ರಧಾನ ಕಾರ್ಯದರ್ಶಿ ರಕ್ಷಿತ್ ಪುತ್ತೂರ್, ಕಿರಣ್ ಬುಡ್ಲೆಗುತ್ತು, ಗಣೇಶ್ ಕುಲಾಲ್ ಪ್ರತಿಕಾಗೋಷ್ಠಿಡ್ ಇತ್ತೆರ್.
pallavi shetty