ಮುಲ್ಕಿ : ಕರ್ನಾಟಕ ಸರಕಾರೊಗು ಮಹಾನ್ ದಾರ್ಶನಿಕೆರ್ ಅಂಚೆನೆ ಸಮಾಜ ಸುಧಾರಕೆರಾಯಿನ ಬ್ರಹ್ಮಶ್ರೀ ನಾರಾಯಣ ಗುರುಕ್ಲೆನ ಮಿತ್ತ್ ಕಣ್ಣ್ ದಾಯೆ ? ಪತ್ತನೇ ಕ್ಲಾಸ್ ದ ಪಾಠ ಪುಸ್ತಕೊರ್ದು ಅರೆನ ಜೀವನಚರಿತ್ರೆ ದೆಪ್ಪರೆ ಕಾರಣ ದಾದ ಪಂದ್ ರಾಷ್ಟ್ರೀಯ ಬಿಲ್ಲವ ಮಹಾಮಂಡಲ ಸರಕಾರೊಗು ಪ್ರಶ್ನೆ ಮಲ್ದ್ಂಡ್.
ಹಿಂದುಳಿದ ವರ್ಗದ ಉನ್ನತಿಗಾದ್, ಅಸ್ಪಶ್ಯತೆ ದೂರ ಮಲ್ಪಾದ್, ಮಾತೆರೆನ್ಲ ಶಿಕ್ಷಣೊಗು ಪ್ರೇರಣೆ ಕೊರ್ದು ಒಂಜೇ ಜಾತಿ ಒಂಜೇ ಮತ ಒರಿಯೇ ದೇವೆರ್ ಪನ್ಪಿನ ತತ್ವೊನು ಜಗತ್ತ್ ಗ್ ಪಂಡಿನ ನಾರಾಯಣ ಗುರುಕುಲೆನ ಆದರ್ಶ ಇತ್ತೆದ ಸಮಾಜೊಗುಲ ಅನ್ವಯ ಆಪುಂಡು. ಆಂಡ ರಾಜ್ಯ ಸರಕಾರ ಗುರುಕ್ಲೆನ ವಿಚಾರೊನು ಪಠ್ಯ ಪುಸ್ತಕೊರ್ದು ದೆಪ್ಪಾಯಿನವು ಸಮಸ್ತ ಬಿಲ್ಲವ ಸಮಾಜೊಗು ಅಂಚೆನೆ ಗುರುಕ್ಲೆನ ಭಕ್ತೆರೆನ ಮನಸ್ಸ್ ಗ್ ಬಾರಿ ಬೇನೆ ಮಲ್ದ್ಂಡ್. ಸರಕಾರದ ಈ ನೀತಿನ್ ಎಂಕುಲು ಖಂಡಿಸಾವ ಪಂದ್ ರಾಷ್ಟ್ರೀಯ ಬಿಲ್ಲವ ಮಹಾಮಂಡಲ ದ ಅಧ್ಯಕ್ಷೆರ್ ಡಾ.ರಾಜಶೇಖರ ಕೋಟ್ಯಾನ್ ತೆರಿಪಾಯೆರ್.
ಮುಲ್ಕಿದ ಮಹಾಮಂಡಲಡ್ ಗುರುವಾರ ನಡತಿನ ಸುದ್ದಿ ಗೋಷ್ಠಿಡ್ ಪಾತೆರಿನ ಆರ್, ಗಣರಾಜ್ಯೋತ್ಸವದ ಪೊರ್ತುಡುಲ ಕೇಂದ್ರ ಸರಕಾರ ನಾರಾಯಣ ಗುರುಕ್ಲೆನ ಟ್ಯಾಬ್ಲೊಗ್ ಅವಕಾಶ ಕೊರಂದೆ ಅವಮಾನ ಮಲ್ದ್ಂಡ್. ಇತ್ತೆ ರಾಜ್ಯ ಸರಕಾರ ಪತ್ತನೇ ಕ್ಲಾಸ್ ದ ಸಮಾಜ ವಿಜ್ಞಾನ ಪಠ್ಯ ಪುಸ್ತಕೊಡು ಶ್ರೀ ನಾರಾಯಣಗುರು ಧರ್ಮ ಪರಿಪಾಲನಾ ಯೋಗಂ ಶಿರೋನಾಮೆಡ್ ಇತ್ತಿನ ಪಾಠೊನು ದೆಪ್ಪಾದ್ಂಡ್.
ಅವೆನ್ ಪಠ್ಯಪುಸ್ತಕೊಗು ವಾಪಸ್ ಸೇರ್ಸಾವೊಡು. ಈ ವಿಚಾರೊಡು ರಡ್ಡ್ ದಿನೊಟ್ಟು ಮುಖ್ಯಮಂತ್ರಿಲೆನ್ ಭೇಟಿ ಮಲ್ತ್ ದ್ ಮನವಿ ಕೊರ್ಪ. ಒಂಜಿ ವೇಳೆ ಸರ್ಕಾರ ಗುರುಕ್ಲೆನ ಪಾಠೊನು ಪಿರ ಪಠ್ಯಪುಸ್ತಕೊಗು ಸೇರ್ಸಾಯಿಜಿಡ ಸಮಸ್ತ ಬಿಲ್ಲವೆರ್ ರಾಷ್ಟ್ರೀಯ ಮಹಾಮಂಡಲ ದ ಮುತಾಲಿಕೆಡ್ ಬಾರಿ ಮಲ್ಲ ಪ್ರತಿಭಟನೆ ಮಲ್ಪುವ ಪಂದ್ ಡಾ. ರಾಜಶೇಖರ ಕೋಟ್ಯಾನ್ ಪಂಡೆರ್.
ಸುದ್ದಿಗೋಷ್ಠಿ ಡ್ ಮಹಾಮಂಡಲದ ಗೌರವ ಪ್ರಧಾನ ಕಾರ್ಯದರ್ಶಿ ವಿಜಯಕುಮಾರ್ ಕುಬೆವೂರು, ಜಂಟಿ ಕಾರ್ಯದರ್ಶಿ ಗಂಗಾಧರ ಪೂಜಾರಿ, ಬಾಳ, ಚೇಳಾಯಿರು, ಕಾರ್ಯಕಾರಿ ಸಮಿತಿ ಸದಸ್ಯೆರಾಯಿನ ಚಂದ್ರಶೇಖರ್ ಸುವರ್ಣ ಮುಲ್ಕಿ, ತಿಮ್ಮಪ್ಪ ಕೋಟ್ಯಾನ್, ಕಟೀಲು, ಯೋಗೀಶ್ ಕೋಟ್ಯಾನ್ ಚಿತ್ರಾಪು ಇತ್ತೆರ್.
pallavi shetty