ನಾರಾಯಣ

ಜ.26 : ನಾರಾಯಣ ಗುರುಕ್ಲೆಗ್ ಅಪಮಾನದ ವಿರುದ್ದ ಮುಲ್ಕಿ ಬೆದ್ರ ವಿಧಾನಸಭೆ ಕ್ಷೇತ್ರದ 15 ಗುರು ಮಂದಿರೊಗು ಕಾಂಗ್ರೆಸ್ ಜಾಥಾ

ಮುಲ್ಕಿ : ಗಣರಾಜ್ಯೋತ್ಸವ ಪೆರೇಡ್ ಡ್ ಬ್ರಹ್ಮಶ್ರೀ ನಾರಾಯಣ ಗುರುಕ್ಕುಲೆನ ಟ್ಯಾಬ್ಲೊನು ತಿರಸ್ಕಾರ ಮಲ್ತಿನ ಕೇಂದ್ರ ಸರಕಾರದ ವಿರುದ್ಧ ಮುಲ್ಕಿ ಬೆದ್ರ ವಿಧಾನಸಭಾ ಕ್ಷೇತ್ರದ 15 ಬಿಲ್ಲವ ಸಮಾಜ ಸೇವಾ ಸಂಘದ ಗುರು ಮಂದಿರೊಗು ಗುರುಕುಲೆನ ಟ್ಯಾಬ್ಲೊ ಸಹಿತ ಕಾಂಗ್ರೆಸ್ ವತಿರ್ದ್ ಜಾಥಾ ನಡಪರೆ ಉಂಡು.ಹಳೆಯಂಗಡಿದ ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಸಮಿತಿದ ಆಫೀಸ್ ಡ್ ಅಂಗಾರೆ ನಡತಿನ ಸುದ್ದಿಗೋಷ್ಠಿಡ್ ಯುವ ನಾಯಕೆರ್ ಮಿಥುನ್ ರೈ ಈ ವಿಷಯ ತೆರಿಪಾಯೆರ್.
ಬೆದ್ರದ ಸ್ವರಾಜ್ ಮೈದಾನಡ್ ಜ.26 ಕಾಂಡೆ 9.30 ಗಂಟೆಗ್ ಮಾಜಿ ಸಚಿವೆರ್ ಅಭಯಚಂದ್ರ ಜೈನ್ ಮೇರ್ ಜಾಥಾ ಉದಿಪನ ಮಲ್ಪುವೆರ್.

ನಾರಾಯಣ ಗುರುಕುಲೆನ ಟ್ಯಾಬ್ಲೊ ಸಹಿತ ಜಾಥಾ ಬೆದ್ರದ ಬಿಲ್ಲವ ಸಂಘರ್ದ್ ಪಾಲಡ್ಕ ಬಿಲ್ಲವ ಸಂಘ, ಬೆಳುವಾಯಿ, ಶಿರ್ತಾಡಿ, ಇರುವೈಲ್, ಕಲ್ಲಮುಂಡೇರ್,ನಿಡ್ಡೋಡಿ,ಪೆರ್ಮುದೆ ಬಿಲ್ಲವ ಸಂಘಗ್ ಭೇಟಿ ಕೊರ್ದು ಅವುಲು ವಣಸ್ ದ ವಿರಾಮ ಆಪುಂಡು.
ಅಲ್ತ್ ರ್ದ್ ಬಜ್ಪೆ ಬಿಲ್ಲವ ಸಂಘ, ಚೇಳಾರ್, ಸಸಿಹಿತ್ಲು, ಹಳೆಯಂಗಡಿ, ಎಸ್ ಕೋಡಿ, ಗುತ್ತಕಾಡು, ಕೆಎಸ್ ರಾವ್ ನಗರ ಬಿಲ್ಲವ ಸಂಘೊಲೆಗ್ ಪೋದು ಬಯ್ಯಡ್ ಮುಲ್ಕಿ ಬಿಲ್ಲವ ಸಂಘಡ್ ಜಾಥಾ ಸಮಾರೋಪ ಆವರೆ ಉಂಡು. ಅಯಿರ್ದ್ ಬೊಕ್ಕ ಕುದ್ರೋಳಿಡ್ ನಡಪುನ ಸ್ವಾಭಿಮಾನದ ನಡಿಗೆದ ಲೇಸ್ ಡ್ ಪಾಲ್ ಪಡೆವರೆ ಉಂಡು ಪಂದ್ ಮಿಥುನ್ ರೈ ಪಂಡೆರ್.
ಈ ಪೊರ್ತುಡು ಪಾತೆರಿನ ಮಾಜಿ ಸಚಿವೆರ್ ಅಭಯಚಂದ್ರ ಜೈನ್, ಕೇಂದ್ರಡ್ ಬಿಜೆಪಿ ಸರಕಾರ ನಾರಾಯಣ ಗುರುಕ್ಲೆನ ಸ್ತಬ್ಧಚಿತ್ರ ಬೊರ್ಚಿ ಪಂದ್ ಅರೆಗ್ ಅವಮಾನ ಮಲ್ದ್ಂಡ್. ಈ ವಿಚಾರೊಡು ಪ್ರಧಾನಿ ಮೋದಿಯೆರ್ ಮಧ್ಯಪ್ರವೇಶ ಮಲ್ತ್ ದ್ ಗುರುಕ್ಲೆನ ಟ್ಯಾಬ್ಲೊಗು ಅವಕಾಶ ಮಲ್ತ್ ಕೊರೊಡಿತ್ತ್ಂಡ್. ಸಂಸದೆರ್ ಮಧ್ಯಪ್ರವೇಶ ಮಲ್ಪೊಲಿತ್ತ್ಂಡ್. ಇತ್ತೆ ಅಕುಲು ಮಾತ ನಾಟಕ ಮಲ್ತೊಂದುಲ್ಲೆರ್. ಬಿಜೆಪಿದಕುಲು ಪೂರ ಕಲಾವಿದೆರ್ ಪಂದ್ ಟೀಕೆ ಮಲ್ತೆರ್.
ಸುದ್ದಿಗೋಷ್ಠಿಡ್ ಕೆಪಿಸಿಸಿ ಕೋಆರ್ಡಿನೇಟರ್ ವಸಂತ ಬೆರ್ನಾಡ್, ಹಿಂದುಳಿದ ವರ್ಗ ವಿಭಾಗದ ಪ್ರವೀಣ್ ಬೊಳ್ಳೂರು, ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಮೋಹನ್ ಕೋಟ್ಯಾನ್, ಮುಲ್ಕಿ ನಗರ ಪಂಚಾಯತ್ ಸದಸ್ಯೆರ್ ಯೋಗೀಶ್ ಕೋಟ್ಯಾನ್ , ಪ್ರಜಾಪ್ರತಿನಿಧಿ ಸಭೆತ್ತ ಅಧ್ಯಕ್ಷೆರ್ ಜನಾರ್ಧನ ಬಂಗೇರ , ಪಕ್ಷದ ವಕ್ತಾರೆರ್, ಮುಲ್ಕಿ ನಗರ ಪಂಚಾಯತ್ ಸದಸ್ಯೆರ್ ಬಾಲಚಂದ್ರ ಕಾಮತ್ ಇತ್ತೆರ್.