tulunews

ಮೀನ್‌ದ ಲಾರಿಲೆನ ಮಿತ್ತ್ 604 ಕೇಸ್ : 3.02 ಲಕ್ಷ ರೂ. ದಂಡ ವಸೂಲ್

Nov 4, 2026

ಕುಡ್ಲ : ಮೀನ್ ಸಾಗಾಟ ಮಲ್ಪುನ ಲಾರಿಲೆರ್ದ್ ಮಾರ್ಗದ ಮಿತ್ತ್ ಗಲೀಜಿ ನೀರ್ ಬೂರುನೆರ್ದಾವರ ಸಾರ್ವಜನಿಕೆರೆಗ್ ಮಸ್ತ್ ಸಮಸ್ಯೆ ಆವೊಂದಿತ್ತಿನೆನ್ ಸೀರಿಯಸ್ ಆದ್ ದೆತೊನ್ನ ಪೊಲೀಸ್ ಇಲಾಖೆ ಈ ವರ್ಷಡ್ ಇದಮುಟ್ಟ 604 ಕೇಸ್ ದಾಖಲ್ ಮಲ್ತ್‌ದ್ ಒಟ್ಟು 3,02,000 ರೂ. ದಂಡ ವಸೂಲಿ ಮಲ್ದ್ಂಡ್ ಪಂಡ್‌ದ್ ಪೊಲೀಸ್ ಆಯುಕ್ತೆರ್ ಸುಧೀರ್ ಕುಮಾರ್ ರೆಡ್ಡಿ ತೆರಿಪಾದೆರ್.
ಕರಿನ ವರ್ಷಗ್ ತೂಂಡ ಈ ಸರ್ತಿ ಶೇ. 30 ಗುಲ ಎಚ್ಚ ಕೇಸ್ ದಾಖಲ್ ಆತ್ಂಡ್. ಮೀನ್ ಸಾಗಣೆ ಮಲ್ಪುನ ಪೊರ್ತುಡು ಗಾಡಿರ್ದ್ ನೀರ್ ದೊರಿಯಂದಿಲೆಕ ತಡೆಪರೆ ಪೊಲೀಸೆರ್ ನಿರಂತರ ತಪಾಸಣೆ ಮಲ್ತೊಂದುಲ್ಲೆರ್. ಕೆಲವು ಮಾರ್ಗೊಡು ಇಂಚಿನ ಗಾಡಿಲೆನ ಸಂಚಾರಗ್ ನಿರ್ಬಂಧ ಪಾಡ್ದಿನ ಬಗೆಟ್ಟ್ ಪಲವೆಲೆನ್ ಪಾಡ್ದೆರ್.

ಅ.23 ಕ್ಕ್ “ಬನ” ತುಳು ಪಿಚ್ಚರ್ ಬುಡುಗಡೆ

Oct 22, 2026

ಕುಡ್ಲ : ಈಶಿ ಪ್ರೊಡಕ್ಷನ್ ಲಾಂಛನೊಡು, ಮನೋಹರ್ ರೈ ವೈಪಾಲ ನಿರ್ಮಾಣೊಡು ನಿತಿನ್ ರೈ ಕುಕ್ಕುವಳ್ಳಿ ನುಳಿಯಾಲು ಮೆರೆನ ನಿರ್ದೇಶನೊಡು ತಯಾರಾಯಿನ “ಬನ” ತುಳು ಸಿನೆಮಾ ಅ. 23 ಸುಕ್ರವಾರ ಕರಾವಳಿ ಜಿಲ್ಲೆಡ್ ರಿಲೀಸ್ ಆವರೆ ಉಂಡು ಪಂಡ್‌ದ್ ಸಿನೆಮಾದ ನಿರ್ಮಾಪಕೆರ್ ಮನೋಹರ್ ರೈ ಬೊಕ್ಕ ನಿರ್ದೇಶಕೆರ್ ನಿತಿನ್ ರೈ ಕುಕ್ಕುವಳ್ಳಿ ಪತ್ರಿಕಾಗೋಷ್ಠಿಡ್ ತೆರಿಪಾಯೆರ್.
”ಬನ” ಸಿನೆಮಾ ಕುಡ್ಲ, ಸುರತ್ಕಲ್, ಪಡುಬಿದ್ರೆ, ಉಡುಪಿ, ಮಣಿಪಾಲ, ಕಾರ್ಕಳ, ದೇರಳಕಟ್ಟೆ, ಪುತ್ತೂರು, ಸುಳ್ಯ, ಬೆಳ್ತಂಗಡಿ ಬೊಕ್ಕ ಬೇತೆ ಬೇತೆ ಜಾಗೆಡ್ ಬಿಡುಗಡೆ ಆಪುಂಡು. ಸಿನೆಮಾದ ಪ್ರೀಮಿಯರ್ ಶೋ ತೂಯಿನ ಪ್ರೇಕ್ಷಕೆರ್ ಮಸ್ತ್ ಖುಷಿ ಪಟ್‌ದೆರ್.
ಈ ಪಿಚ್ಚರ್‌ಡ್ ಖ್ಯಾತ ಪತ್ರಕರ್ತೆರ್ ಜಯಪ್ರಕಾಶ್ ಶೆಟ್ಟಿ ಬೊಕ್ಕ ರಾಷ್ಟ್ರ ಪ್ರಶಸ್ತಿ ಪುರಸ್ಕೃತೆ ರೂಪಾ ವರ್ಕಾಡಿ ಪ್ರಮುಖ ಪಾತ್ರೊಡು ನಟಿಸಾದೆರ್. ಜಯಪ್ರಕಾಶ್ ಶೆಟ್ಟಿ ಮೆರೆನ ಖಡಕ್ ಡೈಲಾಗ್‌ ಸಿನೆಮಾದ ಹೈಲೈಟ್ ಆತ್‌ಂಡ್.
ಹೀರೊ ನಿಹಾಲ್ ರೈ, ಹೀರೊಯಿನ್ ಕೃತಿ ಶ್ರೀನಿವಾಸ್ ಪೂಜಾರಿ ಸಿನೆಮಾರಂಗೊಗು ಪೊಸತಾದ್ ಪಾದಾರ್ಪಣೆ ಮಲ್ತ್‌ದೆರ್. ಶರತ್ ಆಳ್ವ, ಪ್ರಿಯಾ ಶೆಟ್ಟಿ, ವಿಜಯಹರಿ ರೈ, ವಿಕಾಸ್ ಪುತ್ರನ್, ನಿಜರೂಪ ಶೆಟ್ಟಿ, ಸವಿತಾ ಅಂಚನ್, ಧನ್ಯ ಪೂಜಾರಿ, ಪ್ರವೀಣ್ ಕೊಡಕ್ಕಲ್ ಸೇರ್ದ್ ಮಸ್ತಗ ಕಲಾವಿದೆರ್ ಅಣಬಿನಯ ಮಲ್ದೆರ್. ಅರುಣ್ ರೈ ಪುತ್ತೂರು ಛಾಯಾಗ್ರಹಣ ಮಲ್ತ್‌ದ್, ನವೀನ್ ನೇರಳ್ತೊಡಿ ಎಡಿಟಿಂಗ್ ಮಲ್ತ್‌ದೆರ್. ಖ್ಯಾತ ಸಂಗೀತ ನಿರ್ದೇಶಕೆರ್ ಜಯಕಾರ್ತಿ ಮೆರೆನ ಸಂಗೀತ ಈ ಚಿತ್ರೊಗು ಉಂಡು.
”ಬನ” ಸಿನೆಮಾದ ಮಿತ್ತ್ ಪ್ರೇಕ್ಷಕರೆಗ್ ಮಸ್ತ್ ಕುತೂಹಲ ಉಂಡು. “ಬನ” ಸಿನೆಮಾದ ಟ್ರೇಲರ್ ತೂಯಿನ ಪ್ರೇಕ್ಷಕೆರ್ ಎಡ್ಡೆ ಅಭಿಪ್ರಾಯ ಕೊರ್ತೆರ್ ಸುರು. ಎಡ್ಡೆ ಕಥೆ-ಚಿತ್ರಕಥೆ ಇತ್ತಿನ ಈ ಸಿನೆಮಾಡ್ ಸಮಾಜೊಗು ಎಡ್ಡೆ ಸಂದೇಶದೊಟ್ಟುಗು ತಮಾಷೆ, ಮೋಕೆ, ಕೋಪ, ಸೆಂಟಿಮೆಂಟ್ ಮಾತಾ ಉಂಡು. ಪ್ರೇಕ್ಷಕರೆಗ್ ಇಷ್ಟ ಆಪಿನ ಲೆಕ್ಕೊಡೇ ಸಿನೆಮಾನ್ ಮಲ್ತ್‌ದ್ ಕೊರ್ತೊ ಪಂಡ್‌ದ್ ಸಿನೆಮಾದ ನಿರ್ದೇಶಕೆರ್ ಪಂಡೆರ್.
ಪತ್ರಿಕಾಗೋಷ್ಠಿಡ್ ಜಯಪ್ರಕಾಶ್ ಶೆಟ್ಟಿ ಉಪ್ಪಳ, ಅರುಣ್ ರೈ ಪುತ್ತೂರು, ಕೃತಿ ಶ್ರೀನಿವಾಸ್ ಪೂಜಾರಿ, ನಿಹಾಲ್ ರೈ, ಸಬಿತಾ ಅಂಚನ್, ಭವ್ಯಶ್ರೀ ಪೂಜಾರಿ ಪಾಲ್ ಪಡೆದಿತ್ತೆರ್.

ಆಕ್ಷನ್, ಥ್ರಿಲ್ಲರ್, ಸಸ್ಪೆನ್ಸ್, ರೋಮ್ಯಾನ್ಸ್!

”ಬನ” ಸಿನೆಮಾದ ಟ್ರೇಲರ್ ಮಾತೆರೆಡಲ ಪೊಸ ಕುತೂಹಲ ಬೊಕ್ಕ ನಿರೀಕ್ಷೆನ್ ಪುಟ್ಟಾದ್ಂಡ್. ಕಾಡ್‌ಡ್ ತಿಕಿನ ಬಾಲೆದೊಟ್ಟುಗು ಇತ್ತಿನಕುಲು ಏರ್, ಇಲ್ಲ ಎದುರು ಉಚ್ಚು ದಾಯೆ ಪ್ರತ್ಯಕ್ಷ ಆಂಡ್, ಬನೊಕ್ಕು ಹಾಳು ಮಲ್ತಿನಕುಲೆಗ್ ಕಾಟ ಕೊರಿಯರೆ ನಾಗರಾಜೆ ಬತ್ತೆನಾ… ಇಂಚಿನ ಜಾಸ್ತಿ ಪ್ರಶ್ನೆದೊಟ್ಟುಗು, ಈ ಸಿನೆಮಾಡ್ ಆಕ್ಷನ್, ಥ್ರಿಲ್ಲರ್, ಸಸ್ಪೆನ್ಸ್, ರೋಮ್ಯಾನ್ಸ್ ಮಾತಾ ಉಂಡು. ಅತ್ತಂದೆ “ನಮ್ಮ ಮಣ್ಣ್‌ದ ಕಥೆ” ಪನ್ಪಿನ ಟ್ಯಾಗ್‌ಲೈನ್, ತುಳುನಾಡ್ದ ಸಂಸ್ಕೃತಿನ್ ತೋಜಾಪುನೆನ್ “ಬನ” ಸಿನೆಮಾ ಸ್ಪಷ್ಟಪಡಿಸಾವುಂಡು ಪಂದ್ ತೆರಿಪಾಯೆರ್.

ದ.ಕ. ಜಿಲ್ಲೆ ‘ಮಂಗಳೂರು’ ಆದ್ ನಾಮಕರಣ: ಸರಕಾರೊಡ್ದು ಅಧಿಸೂಚನೆ

Oct 14, 2026

ಸಲಹೆ, ಅಭಿಪ್ರಾಯ ಸಂದಾಯ ಮಲ್ಪರೆ 30 ದಿನೊತ ಅವಕಾಶ

ಕುಡ್ಲ : ದ.ಕ. ಜಿಲ್ಲೆನ್ ‘ಮಂಗಳೂರು ಜಿಲ್ಲೆ’ ಪಂಡ್‌ದ್ ಪಿರ ನಾಮಕರಣ ಮನ್ಪುನ ಬಗೆಟ್ಟ್ ಸಾರ್ವಜನಿಕೆರೆಡ್ದ್ ಸಲಹೆ, ಅಭಿಪ್ರಾಯ ಪಟ್ಟೊನರೆ ಕರ್ನಾಟಕ ರಾಜ್ಯ ಸರಕಾರ ಅಧಿಸೂಚನೆ (ರಾಜ್ಯಪತ್ರ) ಕಡಪಾದ್ಂಡ್.
ಸಾರ್ವಜನಿಕೆರೆನ ಬೇಡಿಕೆ ಬೊಕ್ಕ ಆಡಳಿತಾತ್ಮಕ ಅನುಕೂಲನ್ ಗಣನೆಗ್ ದೆತೊಂದ್ ಸರಕಾರ ‘ಮಂಗಳೂರು ಜಿಲ್ಲೆ’ ಪಂದ್ ಪುದರ್ ಬದಲ್ ಮಲ್ಪರೆ ಉದ್ದೇಶ ದೀತ್ಂಡ್. ಈ ಬಗೆಟ್ ಸಾರ್ವಜನಿಕೆರೆಡ್ದ್ ಸಲಹೆ ಅಭಿಪ್ರಾಯೊಲೆನ್ ಸ್ವೀಕಾರ ಮಲ್ಪರೆ 30 ದಿನತ್ತ ಕಾಲಾವಕಾಶ ಕೊರ್ತುಂಡು.
ಅ.1ಕ್ ಸರಕಾರ, ಈ ಅಧಿಸೂಚನೆ ಕಡಪಾದ್ಂಡ್. ಈ ರಾಜ್ಯಪತ್ರ ಪ್ರಕಟ ಆಯಿನ ದಿನರ್ದ್ 30 ದಿನೊತ ಉಲಯಿ ಸಾರ್ವಜನಿಕೆರ್ ಅಭಿಪ್ರಾಯ, ಸಲಹೆಲೆನ್ ಲಿಖಿತ ರೂಪೊಡು ಅತ್ತಂಡ ಇ-ಮೇಲ್ ಮುಖಾಂತರ ಮುಖ್ಯಮಂತ್ರಿಲೆನ ಸಚಿವಾಲಯ, ಕೊಠಡಿ ಸಂಖ್ಯೆ 235, 2ನೇ ಮಹಡಿ, ವಿಧಾನಸೌಧ, ಬೆಂಗಳೂರು, ಇಮೇಲ್ cm.kar@nic.inಗ್, ಅತ್ತಂಡ ಸರಕಾರೊದ ಅಪರ ಕಾರ್ಯದರ್ಶಿ, ಕಂದಾಯ ಇಲಾಖೆ, ಕೊಠಡಿ ಸಂಖ್ಯೆ 711, 7ನೇ ಮಹಡಿ, ಬಹುಮಹಡಿ ಕಟ್ಟಡ, ಡಾ.ಬಿ.ಆರ್.ಅಂಬೇಡ್ಕರ್ ವೀದಿ, ಬೆಂಗಳೂರು, ಇಮೇಲ್ prs.revenue@gmail.comಗ್, ಅತ್ತ್‌ಡ ಜಿಲ್ಲಾಧಿಕಾರಿ, ದ.ಕ. ಜಿಲ್ಲೆ, ಪ್ರಜಾಸೌಧ, ದ.ಕ. ಜಿಲ್ಲಾಡಳಿತ ಕೇಂದ್ರ, ಜಿಲ್ಲಾಧಿಕಾರಿಲೆ ಕಾರ್ಯಾಲಯ, ಪಡೀಲ್ ಮಂಗಳೂರು- ಇಮೇಲ್ dc.mnglr@gmail.comಗ್ ಸಲ್ಲಿಕೆ ಮಲ್ಪೊಲಿ ಪಂದ್ ಅಧಿಸೂಚನೆಡ್ ತೆರಿಪಾದೆರ್.

Kateel ಊರ್ದ ಸುದ್ದಿ Regional News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News ವಿದ್ಯೆಗ್ ಸಂಬಂದ ಪಟ್ಟಿನ ಮಾಹಿತಿ | Education Information

ಕಲ್ಪಾಯಿನ ಗುರುಕ್ಲೆನ ತ್ಯಾಗೊಗು ತರೆ ತಗ್ಗಾದ್‌, ಸಾದಗೊದಂಚಿ ಪಜ್ಜೆ ದೀಲೆ: ವಿವೇಕ್ ಆಳ್ವ

Aug 13, 2026

ಕಟೀಲ್ ಕಾಲೇಜಿಡ್ ಪ್ರತಿಭಾ ಪುರಸ್ಕಾರ ಬೊಕ್ಕ ಬೇತೆ ಬೇತೆ ಸಂಘದ ಉದಿಪನ

ಕಟೀಲ್ : ಕಲ್ಪಾಯಿನ ಗುರುಕ್ಲೆನ್ ಏಪಲಾ ಮರಪಂದೆ, ಅಕ್ಲೆನ ತ್ಯಾಗೊಗು ತರೆ ತಗ್ಗಾದ್ ಗೌರವ ಕೊರ್ಪುನ ಒರುಟು ಜೋಕುಲು ಶ್ರೇಯಸ್ಸ್ ಪಡೆಯೊಡು. ಶ್ರಮ ಏಪಲಾ ಮುಖ್ಯ. ಅವು ಕಲ್ಪುನೆಟ್ , ಬೆನ್ಪುನ ಬೇಲೆ ಆವಡ್ ಇಂಚ ಮಾತಾ ವಿಚಾರಡ್ಲಾ ಶ್ರಮ ಸಾದಗೊದಂಚಿ ಲೆತೊಂದು ಪೋಪುಂಡು. ಸ್ವಚ್ಛ ಪರಿಸರಗ್ ನಮ್ಮ ಮನಸ್ ಕೆನೊಡು. ಗ್ರಾಮೀಣ ಕ್ಷೇತ್ರ ಆಂಡಲಾ , ಕಟೀಲಿನಂಚಿನ ಪುಣ್ಯ ಕ್ಷೇತ್ರಡ್ ಕಲ್ಪುನ ಜೋಕುಲು ಸಾದಗೊ ಮಲ್ಪುನವು ಪುಗಾರ್ತೆದ ವಿಚಾರ ಪಂದ್ ಆಳ್ವಾಸ್ ಶಿಕ್ಷಣ ಸಂಸ್ಥೆದ ವಿವೇಕ್ ಆಳ್ವ ಪಂಡೆರ್ .
ಆರ್ ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನ ಸಮೂಹ ಶಿಕ್ಷಣ ಸಂಸ್ಥೆಲೆನ ಶೈಕ್ಷಣಿಕ ಬೊಕ್ಕ ಕ್ರೀಡಾ ಸಾಧಕ ಜೋಕುಲೆಗ್ ಪ್ರತಿಭಾ ಪುರಸ್ಕಾರ ಕೊರ್ದು ಪಾತೆರಿಯೆರ್.
ಯಾನ್ ನಬೊಂದು ಬತ್ತಿನ ಕ್ಷೇತ್ರ ಕಟೀಲ್ ಇಂಚಿನ ಕ್ಷೇತ್ರದ ಸಾಲೆಡ್ ಕಲ್ಪುನ ಜೋಕುಲು ಪುಣ್ಯಾತ್ಮೇರ್ ಈ ಜೋಕುಲು ಕ್ಷೇತ್ರಗ್ ಕೀರ್ತಿ ಕನವೊಡು. ಗ್ರಾಮೀಣ ಭಾಗದ ಕನ್ನಡ ಮಾಧ್ಯಮ ಸಾಲೆದ ಜೋಕುಲೆನ ಕ್ರಿಯಾಶೀಲತೆ, ಉಮೇದ್ ಯಾನ್ ಏಪಲಾ ತೂಪೆ. ಈ ಉಮೇದ್ ಏಪಲಾ ಇಪ್ಪಡ್ ಪಂದ್ ವಿವೇಕ್ ಆಳ್ವ ಪಂಡೆರ್ .
ರಾಜ್ಯ ಬೊಕ್ಕ ರಾಷ್ಟ್ರಮಟ್ಟಡ್ ಸಾಧನೆ ಮಲ್ತಿನ ಕ್ರೀಡಾಪಟುಲೆನ್ ದೈಹಿಕ ಶಿಕ್ಷಣ ನಿವೃತ್ತ ಶಿಕ್ಷಕ ಸುಂದರ ಪೂಜಾರಿ ಗೌರವ ಮಲ್ತೆರ್ .
ಪದವೀಪೂರ್ವ ಕಾಲೇಜಿದ ಪಠ್ಯಪೂರಕ ಸಂಘದ ಚಟುವಟಿಕೆಲೆನ್ ಉದಿಪನ ಮಲ್ತಿನ ಕಿನ್ನಿಗೋಳಿ ಪಟ್ಟಣ ಪಂಚಾಯತ್ ಗುರ್ಕಾರ್ಲು ಗುರುರಾಜ ಮಲ್ಲಿಗೆಯಂಗಡಿ ಪಾತೆರ್ದ್ ಪ್ಲಾಸ್ಟಿಕ್ ಗಳಸುನ ಕಮ್ಮಿ ಮಲ್ಪುನ ಒರುಟು ಎಡ್ಡೆ ಕೊಡುಗೆ ಕೊರಿಯರೆ ಜೋಕುಲು ವಿದ್ಯಾರ್ಥಿಗಳು ದುಂಬು ಬರೊಡು ಪಂಡೆರ್.
ಈ ಪೊರ್ತುಡು
ಕಟೀಲ್ ದೇವಲ್ಯದ ಆಡಳಿತ ಮಂಡಳಿ ಗುರ್ಕಾರ್ಲು ಕೊಡೆತ್ತೂರುಗುತ್ತು ಸನತ್‌ಕುಮಾರ ಶೆಟ್ಟಿ, ಅರ್ಚಕೆರ್ ಶ್ರೀಹರಿನಾರಾಯಣದಾಸ ಆಸ್ರಣ್ಣ, ಬಿಪಿನ್‌ಚಂದ್ರ ಶೆಟ್ಟಿ, ಹಳೆ ವಿದ್ಯಾರ್ಥಿ ಸಂಘದ ಲೋಕಯ್ಯ ಸಾಲ್ಯಾನ್, ಶಿಕ್ಷಣ ಸಂಸ್ಥೆದ ಮುಖ್ಯಸ್ಥರಾಯಿನ ದಯಾನಂದ ಮಾಡ, ಡಾ. ವಿಜಯ್ ವಿ., ಕುಸುಮಾವತಿ, ರಾಜಶೇಖರ್, ಗಿರೀಶ್ ತಂತ್ರಿ, ಚಂದ್ರಶೇಖರ ಭಟ್, ಸರೋಜಿನಿ ಉಪಸ್ಥಿತರಿತ್ತೆರ್.
ಎಎಸ್‌ಎಲ್‌ಸಿ, ಪಿಯುಸಿಡ್ ವಿಶಿಷ್ಟ ಶ್ರೇಣಿಡ್ ಪಾಸ್ ಆಯಿನ 150 ಜಾಸ್ತಿ ಜೋಕುಲೆಗ್ 6,30,500 ರೂಪಾಯಿ ಶೈಕ್ಷಣಿಕ ಬೊಕ್ಕ ಕ್ರೀಡಾ ಸಾಧಕೆರೆಗ್ ವಿದ್ಯಾರ್ಥಿ ವೇತನವಾದ್ ಕೊರಿಯೆರ್. ಮೊಕುಲೆಗ್ ದೇವೆರೆನ ಶೇಷವಸ್ತ್ರ, ಅಂಬಲೇಜ್ಯೋ , ಪ್ರಶಸ್ತಿ ಪತ್ರ ಕೊರ್ದು ಗೌರವ ಮಲ್ತೆರ್ .
ಉಪನ್ಯಾಸಕಿ ಶೈಲಜಾ ಸಭೆ ಸುದಾರಿಕೆ ಮಲ್ತೆರ್ . ಉಪಪ್ರಾಚಾರ‍್ಯ ರಾಜಶೇಖರ್ ಎದ್ಕೊಂಡೆರ್ . ಉಪನ್ಯಾಸಕಿ ಕವಿತಾ, ವಾದಿರಾಜ್, ಬಬಿತಾ, ಶ್ರುತಿ, ಅನಿಲ್, ಪರಮೇಶ್ವರ್, ತನುಜಾ, ಶ್ವೇತಾ ಶೆಟ್ಟಿ ಸಾಧಕೆರೆನ ಪಟ್ಟಿ ಓದಿಯೆರ್.

ಊರ್ದ ಸುದ್ದಿ Regional News ಕಾರ್ಲದ ಸುದ್ದಿ Karkala News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಫ್ಲ್ಯಾಶ್ ನ್ಯೂಸ್ / ರಪಕ್ಕ ಸುದ್ದಿ | Flash News ರಪಕ್ಕ ಸುದ್ದಿ Flash News

ಕಾರ್ಕಳ ಯೂತ್ ಬಿಲ್ಲವ ಸಂಘಟನೆಗ್ ಶರತ್ ಬೈಲಡ್ಕ ಅಧ್ಯಕ್ಷೆರಾದ್ ಆಯ್ಕೆ

Jul 3, 2026

ಕಾರ್ಲ : ಯೂತ್ ಬಿಲ್ಲವ ಕಾರ್ಕಳ ಸಂಘಟನೆದ ಪೊಸ ಅಧ್ಯಕ್ಷೆರಾದ್ ಪೆರ್ವಾಜೆ ಪತ್ತೊಂಜಿಕಟ್ಟೆ ಶರತ್ ಬೈಲಡ್ಕ ಆಯ್ಕೆ ಆತೆರ್.
ಪ್ರಧಾನ ಕಾರ್ಯದರ್ಶಿಯಾದ್ ಅಭಿಲಾಷ್ ಕೋಟ್ಯಾನ್ ತೆಳ್ಳಾರ್, ಗೌರವಾಧ್ಯಕ್ಷೆರಾದ್ ಭಾಸ್ಕರ್ ಎಸ್.ಕೋಟ್ಯಾನ್ ಬೊಕ್ಕ ಪ್ರಮಲ್‌ಕುಮಾರ್, ಉಪಾಧ್ಯಕ್ಷೆರಾದ್ ರವಿರಾಜ್ ಪೂಜಾರಿ ಬೊಕ್ಕ ಸುಧೀರ್ ಪೂಜಾರಿ, ಜತೆ ಕಾರ್ಯದರ್ಶಿಯಾದ್ ಶ್ರವಣ್ ಅಂಚನ್, ಕೋಶಾಧಿಕಾರಿಯಾದ್ ಸುಜಿತ್ ನಿಟ್ಟೆ , ಸಂಘಟನಾ ಕಾರ್ಯದರ್ಶಿಯಾದ್ ಶ್ರೀನಿವಾಸ್ ಪೂಜಾರಿ ಯರ್ಲಪಾಡಿ, ಕ್ರೀಡಾ ಕಾರ್ಯದರ್ಶಿಯಾದ್ ಜಗದೀಶ್ ಪೂಜಾರಿ ಮಿಯ್ಯಾರು, ಸಾಂಸ್ಕೃತಿಕ ಕಾರ್ಯದರ್ಶಿಯಾದ್ ರಕ್ಷಿತ್ ಮುಂಡ್ಲಿ, ಕಾರ್ಯಕಾರಿ ಸಮಿತಿ ಸದಸ್ಯೆರಾದ್ ಕಾರ್ತಿಕ್ ಸುವರ್ಣ, ವಿಶಾಲ್ ಸಾಲಿಯಾನ್, ರವೀಂದ್ರ ಪೂಜಾರಿ ಶಿರ್ಲಾಲು, ಕರುಣಾಕರ ಪೂಜಾರಿ, ಶ್ರೇಯಸ್ ಪೂಜಾರಿ ಬೊಕ್ಕ ಸುದೇಶ್ ನಿಟ್ಟೆ ಆಯ್ಕೆ ಆತೆರ್.

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ಬೊಂಬೈ ಬಂಟರ ಸಂಘದ ಒತ್ತು ಗುರ್ಕಾರೆ ಆದ್ ಆಯ್ಕೆ ಆಯಿನ ಮಹೇಶ್ ಶೆಟ್ರೆಗ್ ಮಾನಾದಿಗೆ

Dec 4, 2023

ಪೊವಾಯಿ ಪರಿಸರೊಡು ಇತ್ತೊಂದು ಪೊವಾಯಿ ಕನ್ನಡ ಸೇವಾ ಸಂಘದ ಗೌರವ ಅಧ್ಯಕ್ಷೆರ್ ಆದ್ ಸೇವೆ ಮಲ್ಪುನ ಮಹೇಶ್ ಶೆಟ್ರ್ ಬೊಂಬೈದ ಮಲ್ಲ ಸಂಸ್ಥೆ ಬಂಟರ ಸಂಘದ ಒತ್ತು ಗುರ್ಕಾರೆ ಆದ್ ಆಯ್ಕೆ ಆಯಿನ ಈ ಪೊರ್ತುಡು ಕನ್ನಡ ಸೇವಾ ಸಂಘ ಪೊವಾಯಿ ದ ಪರವಾದ್ ಮಾನಾದಿಗೆ ಮಲ್ತೆರ್.

ಈ ಪೊರ್ತುಡು ಪಾತೆರಿನ ಕನ್ನಡ ಸಂಘದ ಮಾಜಿ ಗುರ್ಕಾರೆ ಡಿ.ಕೆ.ಶೆಟ್ರ್, ಈರ್ ಮಲ್ಪುನ ಸಮಾಜ ಸೇವೆ, ಪಾಪದ ಜೋಕ್ಲೆನ ಶಿಕ್ಷಣ ಅಂಚೆನೇ ಬಡಪತ್ತ್ ಉಪ್ಪುನ ಸಮಾಜದ ಮಾತಾ ವರ್ಗದ ಪೊಣ್ಣು ಜೋಕುಲೆನ ಮದಿಮೆಗ್ ಬೆರಿಸಾಯ ಕೊರ್ಪಿನ, ಈರ್ ಬಂಟರ ಸಂಘದ ದುಂಬುದ ಗುರ್ಕಾರೆ ಆವೊಡು ಪನ್ಪಿನ ಎನ್ಕೆಲೆನ ಆಸೆ. ಅಂಚೆನೆ ಈರ್ ಮುಟ್ಟಿನ ಪೂರಾ ಬಂಗಾರ್ ಆವಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್. ಸಂಘದ ಗುರ್ಕಾರೆ ಸಂದೇಶ್ ಆರ್ ಶೆಟ್ಟಿ ಮೂಡು ಬೆಳ್ಳೆ, ಕೋಶಾಧಿಕಾರಿ ಜಗನ್ನಾಥ ಎ ಶೆಟ್ಟಿ ಐಐಟಿ, ಸಲಹೆಗಾರೆರ್ನ ಸಮಿತಿದ ಸದಸ್ಯೆರಾಯಿನ ದಿವಾಕರ್ ಎಂ ಶೆಟ್ಟಿ, ರಮೇಶ್ ಡಿ ರೈ , ಜಗನ್ನಾಥ ಕೆ ಶೆಟ್ಟಿ ಎಣ್ಣೆಹೊಳೆ, ಪ್ರವೀಣ್ ಯನ್ ಶೆಟ್ಟಿ, ಸದಾಶಿವ ಶೆಟ್ಟಿ ಬಂಟ್ವಾಳ, ಪ್ರಶಾಂತಿ ಡಿ ಶೆಟ್ಟಿ, ಮಹಿಳಾ ವಿಭಾಗದ ಗುರ್ಕಾರ್ದಿ ಸುಗುಣ ಕೆ ಶೆಟ್ಟಿ. ಜತೆ ಕಾರ್ಯದರ್ಶಿ ಪ್ರಮೀಳಾ ಡಿ ಶೆಟ್ಟಿ, ಶೋಭಾ ರಮೇಶ್ ರೈ, ಶೈಲಾ ಸುಭಾಷ್ ಶೆಟ್ಟಿ, ಸವಿತಾ ಕೆ ಶೆಟ್ಟಿ, ಶಕುಂತಲಾ ಪಿ ಶೆಟ್ಟಿ , ಕುಶಲ ಎ ಬಂಗೇರ ಮೊಕುಲು ಮಾತೆರ್ಲ ಮಹೇಶ್ ಶೆಟ್ರೆಗ್ ಎಡ್ಡೆಪ್ಪು ಬಯಕಿಯೆರ್.

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಪುತ್ತೂರ್ದ ಸುದ್ದಿ | Puttur News

ಕರಾವಳಿ ಸೇವಾ ಮಾಣಿಕ್ಯ ಸೇವಾ ಸಂಸ್ಥೆರ್ದ್ “ಈ ಕೊರ್ನ ರಂಗ್ ದ ಬಾಸೆಲು” ತುಳು ಆಲ್ಬಮ್ ಸಾಂಗ್ ಬುಡುಗಡೆ

Aug 28, 2023

ಕರಾವಳಿ ಸೇವಾ ಮಾಣಿಕ್ಯ ಸೇವಾ ಸಂಸ್ಥೆ (ರಿ.) ಕುಡ್ಲ ಅರ್ಪಣೆ ಮಲ್ಪುನ ಈ ಕೊರ್ನ ರಂಗ್ ದ ಬಾಸೆಲು ಪನ್ಪಿನ ತುಳು ಆಲ್ಬಮ್ ಸಾಂಗ್ ನ್ ಶ್ರೀಮಂತ ರಾಜಗುಳಿಗ ಕ್ಷೇತ್ರ ಬಂದಲೆದ ಧರ್ಮದರ್ಶಿ ಸತೀಶ್ ಬಂದಲೆ ಮೇರ್ ಬುಡುಗಡೆ ಮಲ್ತೆರ್.

ಈ ಪೊರ್ತುಡು ಕರಾವಳಿ ಮಾಣಿಕ್ಯ ಸೇವಾ ಸಂಸ್ಥೆದ ಪದಾಧಿಕಾರಿಲು, ಬೊಕ್ಕ ರಂಗ್ ದ ಬಾಸೆಲು ಆಲ್ಬಮ್ ಸಾಂಗ್ ಕೂಟದ ಸದಸ್ಯೆರ್ ಇತ್ತೆರ್.

ಬೊಕ್ಕ ಈ ಸಾಂಗ್ ದ ಬಗೆಟ್ಟ್ ಕ್ಷೇತ್ರದ ಧರ್ಮದರ್ಶಿ ಸತೀಶ್ ಬಂದಲೆ ಮೇರ್ ಎಡ್ಡೆ ಮದಿಪು ಪಂಡೆರ್. ಕರಾವಳಿ ಸೇವಾ ಮಾಣಿಕ್ಯದ ಪ್ರಮುಖೆರ್ ನಟರಾಜ್ ಪಚ್ಚನಾಡಿ ಮೇರ್ ಎಡ್ಡೆಪ್ಪು ಬಯಕಿಯೆರ್.

ಈ ಆಲ್ಬಮ್ ಸಾಂಗ್ ಕಡೆಶೀವಾಲಯ ಯೂಟ್ಯೂಬ್ ಚಾನಲ್ ಡ್ ಬುಡುಗಡೆ ಆಪುಂಡು. ನೆಟ್ಟ್ ಸುಕೇಶ್ ಜಿ ಅಂಚನ್ ತೋಡಾರ್, ಪವಿತ್ರ ಅಂಚನ್ ರಾಮಕುಂಜ, ಬೊಕ್ಕ ಅಶ್ವಥ್ ಸಂಘಬೆಟ್ಟು, ಜೆಪಿ ಕೊರಿಂಗೆಟ್ಟು, ಜಯಂತ್ ಕುಕ್ಕೇಡಿ, ಸುಕ್ಷಿತಾ ಬಂಗೇರ ರಾಯಿ ಮೊಕುಲು ಅಭಿನಯ ಮಲ್ದೆರ್.

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ತುಳುನಾಡ್ ದ ಆಚರಣೆಲು ನಿಜ ಜೀವನಡ್ ಇಪ್ಪೊಡು: ವಸಂತ ದೇವಾಡಿಗ

Aug 15, 2023

ಹಳೆಯಂಗಡಿ: ತುಳುನಾಡ್ ದ ತಿಂಗೊಲ್ಡ್ ಆಟಿ ಮಸ್ತ್ ಕಷ್ಟದ ಕಾಲ. ಆ ಕಾಲದ ಆಚರಣೆಲು ಇತ್ತೆಲ ಉಂಡು. ಅಂಚಿನ ಆಚರಣೆಲು ಚಾವಡಿಡ್ ಮಾತ್ರ ಸೀಮಿತ ಆವಂದೆ, ನಿಜ ಜೀವನಡ್ಲಾ ಇಪ್ಪೊಡು ಪಂದ್ ಯಕ್ಷಲಹರಿ ಕಿನ್ನಿಗೋಳಿದ ಸದಸ್ಯೆರ್, ಕಲ್ಲಮುಂಡ್ಕೂರುದ ನಿವೃತ್ತ ಪ್ರಾಧ್ಯಾಪಕೆರ್ ವಸಂತ ದೇವಾಡಿಗ ಪಂಜ ಮೇರ್ ಪಂಡೆರ್.

ಮೇರ್ ದೇವಾಡಿಗ ಸಮಾಜ ಸೇವಾ ಸಂಘ (ರಿ.) ಪಾವಂಜೆದ ಮುತಾಲಿಕೆಡ್, ದೇವಾಡಿಗ ಯುವ ವೇದಿಕೆ ಪಾವಂಜೆ ಬೊಕ್ಕ ದೇವಾಡಿಗ ಸೇವಾ ಟ್ರಸ್ಟ್ (ರಿ.) ಪಾವಂಜೆದ ಒಟ್ಟುಸೇರಿಗೆಡ್, ದೇವಾಡಿಗ ಮಹಿಳಾ ವೇದಿಕೆ ಪಾವಂಜೆ ನೆತ್ತ ದುಂಬಾತ್ತಿಗೆಡ್ ನಡತಿನ ಆಟಿಡೊಂಜಿ ಐತಾರ ಲೇಸ್ ನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.

ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಸದಸ್ಯೆರ್ ಬೆನೆಟ್ ಜಿ.ಅಮ್ಮಣ್ಣ ಮೇರ್ ಪಾತೆರ್ದ್, ಆಟಿ ಆಚರಣೆಲು ಬೊಕ್ಕ ಗಿಡಮೂಲಿಕೆದ ಬಗೆಟ್ಟ್ ಇಸೇಸ ಪೊಲಬು ಕೊರಿಯೆರ್.

ಶ್ರೀ ವಿದ್ಯಾವಿನಾಯಕ ಯುವಕ ಮಂಡಲದ ಮಾಜಿ ಅಧ್ಯಕ್ಷೆರ್ ಸುಧಾಕರ ಆರ್.ಅಮೀನ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್.

ದೇವಾಡಿಗ ಮಹಿಳಾ ವೇದಿಕೆದ ಪ್ರಧಾನ ಕಾರ್ಯದರ್ಶಿ ಮಂಜುಳಾ ಶುಭ್ರತ್ ಲೇಸ್ ದ ಗುರ್ಕಾರ್ಮೆನ್ ಒಯಿಸೊಂದು ಪಾತೆರ್ದ್, ಆಟಿದ ಅಟಿಲ್ ನ್ ತಯಾರ್ ಮಲ್ತಿನ ಪೊಂಜೋವ್ ನಕ್ಲೆಗ್ ಅಭಿನಂದನೆ ಸಂದಾಯೆರ್.

ದೇವೆರೆ ಎಂಕ್ 25 ಕೋಟಿ ಲಾಟ್ರಿ ಬರ್ರೆ ಬಲ್ಲಿತ್ತ್ಂಡ್ ಪಂಡೆರ್ ಕೇರಳದ ರಿಕ್ಷಾ ಡೈವರ್!

Sep 24, 2022

ತಿರುವನಂತಪುರ: ಕೇರಳ ಸರ್ಕಾರದ ಈ ವರ್ಷದ ಓಣಂ ಲಕ್ಕಿ ಬಂಪರ್ ಲಾಟರಿ ಡ್ರಾಟ್ಟ್ ರಿಕ್ಷಾ ಡ್ರೈವರ್ , ಶ್ರೀವರಂ ದ ಅನೂಪ್ ಗ್ 25 ಕೋಟಿ ರೂ. ಲಾಟ್ರಿ ಗೆಂದ್ ದ್ ಒಂಜೆ ದಿನಟ್ ಸುದ್ದಿ ಆದಿತ್ತೆರ್. ಆಂಡ ಇತ್ತೆ ಆ ವಿಚಾರೊಡೇ ನೆಮ್ಮದಿ ಕಳೆವೊಂದು ಎಂಕ್ ಆ ಲಾಟ್ರಿ ತಿಕ್ಕರೆ ಬಲ್ಲಿತ್ತ್ಂಡ್ ಪಂದ್ ಮಂಡೆ ಬೆಚ್ಚ ಮಲ್ತೊಂದುಲ್ಲೆರ್.

“25 ಕೋಟಿ ಇನಾಮು ಎಂಕ್ ಬತ್ಂಡ್ ಪಂದ್ ವಿಷಯ ಮಾತೆರೆಗ್ಲ ಗೊತ್ತಾಯಿ ಬೊಕ್ಕ ಎನ್ನ ಮನಶಾಂತಿನ್ ಲ ಕಳೆವೊನ್ಂದೆ. ಯಾನ್ ಎನ್ನ ಸ್ವಂತ ಇಲ್ಲಲ್ ಕುಲ್ಲೆರೆ ಅವಂದಿನ ಪರಿಸ್ಥಿತಿ ಬತ್ಂಡ್. ದಾಯೆ ಪಂಡ ಲಾಟ್ರಿ ಬತ್ತಿನ ಸುದ್ದಿ ಕೇನ್ದ್ ಇಲ್ಲಡೆ ಸುಮಾರ್ ಜನ ಬತ್ತ್ ದ್ ಇತ್ತೆರ್. ಕಾಸ್ ದ ನೆರವುಲ ಕೇನೊಂದ್ ಉಲ್ಲೆರ್. ಯಾನ್ ಇತ್ತೆ ಬದಲಾತೆ, ಎಂಕ್ ಲಾಟ್ರಿ ಗೆಲ್ಪುನ ಇತ್ತಿನ ಮಾತ ಮನಶಾಂತಿ ಕಳೆವೊಂದೆ, ಪಂದ್ ರಿಕ್ಷಾ ಡ್ರೈವರ್ ಅನೂಪ್ ಆರ್ನ ಬೇನೆನ್ ಪನೊಂದೆರ್.
ತಿರುವನಂತಪುರಡ್ ಶ್ರೀವರಂದ ಅನೂಪ್(30ವರ್ಷ) ರಿಕ್ಷಾ ಬುಡುಪುನರ್, 25 ಕೋಟಿ ರೂ. ಬಂಪರ್ ಇನಾಮ್ ಗೆಂದ್ ದೆರ್. ತೆರಿಗೆ ಬೊಕ್ಕ ಕಮಿಷನ್ ಕರಿತ್ಂದ್ 15.75 ಕೋಟಿ ರೂ. ದೆತ್ತೊನಿಯೆರೆ ಉಲ್ಲೆರ್. ಅನೂಪ್ ಅರ್ ಬೊಡೆದಿ, ಜೋಕುಲ್ ಬೊಕ್ಕ ಅಮ್ಮನ ಒಟ್ಟಿಗೆ ಇಪ್ಪುನೆ.

“ಆಂಡ ಎನ್ ಇತ್ತೆ ನಿಜವಾದ್ ಲ ದಾದ ಎನ್ನಿವೆ ಪಂಡ ಎನ್ ಆ ಬಂಪರ್ ಇನಾಮ್ ನ ಗೆಲ್ಪೆರೆ ಬಲ್ಲಿ ಇತ್ತ್ಂಡ್ . ಇನಾಮ್ ಗೆಲ್ತ್ಂದ್ ಒಂಜಿ ರಡ್ ದಿನ ಎನ್ ಮತೆರ್ ನೊಟ್ಟಿಗೆಲ ಖುಷಿಟ್, ಪುದರ್ ಪೂಯೆ. ಆಂಡ ಇತ್ತೆ ಎಂಕ್ ಅಪಾಯಗ್ ಸಾದಿ ಮಲ್ತ್ ಕೊರಿಲೆಕ ಆತ್ಂಡ್. ಎಂಕ್ ಪಿದಯಿ ಪೊಯೆರೆ ಆವೊಂದು ಇಜ್ಜಿ. ಎನನ್ ತೂಯಿನ ಅಪಗನೇ ಜನಕುಲು ಸಕಾಯ ಮಲ್ಪುಲೆ ಪಂದ್ ಮೇಲ್ಗ್ ಬುರ್ವೆರ್ ಪಂದ್ ಅನೂಪ್ ಪನ್ನನೆನ್ ವರದಿ ಪತ್ಂಡ್.

ಬಂಪರ್ ಇನಾಮ್ ದ ಕಾಸ್ ಎಂಕ್ ನನ ತಿಕ್ಕೊಂಡತೆ ಪಂದ್ ಅನೂಪ್ ಸಾಮಾಜಿಕ ಜಾಲತಾಣಡ್ ಜನಕುಲೆಗ್ ವಿಷಯ ತೆರಿಪಾದೆರ್. ಯಾನ್ ಇತ್ತೆ ಈ ಕಾಸ್ ನ ದಾದ ಮಲ್ಪೊಡು ಪಂದೆ ಗೊತ್ತವೊಂದ್ ಇಜ್ಜಿ. ಈ ಬಗೆಟ್ ಎಂಕ್ ಬತ್ತಿನ ಮತ ಕಾಸ್ ನ್ಲಾ 2 ವರ್ಷ ಮುಟ ಬ್ಯಾಂಕ್ ಡ್ ದೀಪೆ. ಎಂಕ್ ಆ ಇನಾಮ್ ದ ಕಾಸ್ ಬರಿಯೆರೆ ಬಲ್ಲಿ ಇತ್ತ್ಂಡ್ ಪಂದ್ ಎನ್ನಿವೆ. ಎಂಕ್ ಕಮ್ಮಿ ಕಾಸ್ ಬತ್ಂದ್ ಡ ಎಡ್ಡೆ ಇತ್ಂಡ್ ಪಂದ್ ಅನೂಪ್ ಪಂತೆರ್.
ಎಂಕ್ ಮಸ್ತ್ ಮುಟ್ಟ ಇತ್ತಿನ ಕೆಲವು ದೋಸ್ತಿನಕುಲ್ ಶತ್ರುಲು ಅಪುನ ಅಡೆ ಮುಟ ಬತ್ ದೆರ್. ಎನನ್ ನಾಡೊಂದು ಸುಮಾರ್ ಜನ ಬರ್ಪುನೆರ್ದ್ ಅವೆರ ಎನ್ನ ಕಯಿತ್ತಲ್ ಇಲ್ಲ ದಕುಲ್ ಸಮೇತ ಎನ್ನ ಮಿತ್ ಬೆಚ್ಚ ಆತೆರ್. ಯಾನ್ ಮಾಸ್ಕ್ ಪಡ್ಂದ್ ಪಿದಯಿ ಪೋಂಡಲ, ಎನ್ನ ಸುತ್ತ ಜನಕುಲ್ ಗುಂಪು ಸೇರ್ವೆರ್. ನೆರ್ದ್ ಅವೆರ ಎನ್ನ ಮನಸ್ ದ ಶಾಂತಿ ಪುರ ಅಲ್ ಅದ್ ಪೋತ್ಂಡ್ ಪಂದ್ ಅನೂಪ್ ಬೇಜಾರ್ ಅತೆರ್ಂದ್ ವರದಿ ತೆರಿಪದ್ಂಡ್.

ಸೆ.25 : ತಜಿಪದ ಬಿರುವೆರ್ ಕೆಸರ್ದ್ ಕಂಡ ಗೊಬ್ಬುದ ಕೂಟ 2022

Sep 24, 2022

ಬಾಕಿಮಾರ್ : ಬ್ರಹ್ಮ ಶ್ರೀ ನಾರಾಯಣ ಗುರು ಸೇವಾ ಸಮಿತಿ (ರಿ.) ಸಜೀಪಮೂಡ ಬೊಕ್ಕ ಮಹಿಳಾ ಸಮಿತಿ ಬೊಕ್ಕ ಉಪಸಮಿತಿಲೆನ ಸಹಕಾರೊಡ್ , ತಜಿಪದ ಬಿರುವೆರೆ ಒಟ್ಟು ಸೇರಿಗೆಡ್ ತಜಿಪದ ಬಿರುವೆರ್ ಕೆಸರ್ದ್ ಕಂಡ ಗೊಬ್ಬುದಕೂಟ 2022 ಸೆ. 25 ಐತಾರದಾನಿ ಕಾಂಜಿಲ‌ ಬಿರ್ವೆರೆ ಗುರ್ಕೆರೆ ಇಲ್ಲದ ಬಾಕಿಮಾರ್ ಕಂಡಡ್ ನಡಪರೆ ಉಂಡು.

ಈ ಕಾರ್ಯಕ್ರಮ ಬೊಲ್ಪುಗ್ 7.45ಕ್ಕ್ ಬ್ರಹ್ಮಶ್ರೀ ನಾರಾಯಣ ಗುರು ಜ್ಞಾನಮಂದಿರಡ್ ಗುರುಕುಲೆಗ್ ಪೂಜೆ ಮಲ್ತ್ ದ್ ಗುರುವರ್ಯನ ಆಶೀರ್ವಾದ ದೆತ್ತೊಂದು ಗಾಡಿದ ಒಟ್ಟಿಗೆ ಕಾಂಜಿಲದ ಕಂಡಗ್ ಪೊಪುನೆ.
ಅಂಚನೆ ಊರ್ದ ಪರವೂರ್ದ ಮಲ್ಲ ಬಿನ್ನೆರೆನ ಒಟ್ಟುಗು ಕಾಂಡೆ 8.45ಕ್ಕ್ ಗೊಬ್ಬುಕೂಟದ ಉದಿಪನ ಆವರೆ ಉಂಡು. ಬೊಕ್ಕ 10.30ಕ್ಕ್ ಚಾ,ತಿಂಡಿ, ಮಧ್ಯಾಹ್ನ 1 ಕ್ಕ್ ವನಸ್ ಬೊಕ್ಕ ಬಯ್ಯಗ್ 4 ಗಂಟೆಗ್ ತಿಂಡಿ, ಅಂಚನೆ 5 ಗಂಟೆಗ್ ಮುಗಿತಲದ ಲೇಸ್ ನಡಪರೆ ಉಂಡು. ಗೊಬ್ಬುದ ಕೂಟ ಕೆಸರ್ ಕಂಡಗ್ ಸರಿಯಾದ್ 6 ಭಾಗ ಮಲ್ತ್ ದ್ ತುಳುನಾಡ್ ದ ಸುಮಾರ್ ಗೊಬ್ಬುಲ್ ನಡಪುಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

tulunews

ಮೀನ್‌ದ ಲಾರಿಲೆನ ಮಿತ್ತ್ 604 ಕೇಸ್ : 3.02 ಲಕ್ಷ ರೂ. ದಂಡ ವಸೂಲ್

ಅ.23 ಕ್ಕ್ “ಬನ” ತುಳು ಪಿಚ್ಚರ್ ಬುಡುಗಡೆ

ದ.ಕ. ಜಿಲ್ಲೆ ‘ಮಂಗಳೂರು’ ಆದ್ ನಾಮಕರಣ: ಸರಕಾರೊಡ್ದು ಅಧಿಸೂಚನೆ

ಸಲಹೆ, ಅಭಿಪ್ರಾಯ ಸಂದಾಯ ಮಲ್ಪರೆ 30 ದಿನೊತ ಅವಕಾಶ

ಕಲ್ಪಾಯಿನ ಗುರುಕ್ಲೆನ ತ್ಯಾಗೊಗು ತರೆ ತಗ್ಗಾದ್‌, ಸಾದಗೊದಂಚಿ ಪಜ್ಜೆ ದೀಲೆ: ವಿವೇಕ್ ಆಳ್ವ

ಕಟೀಲ್ ಕಾಲೇಜಿಡ್ ಪ್ರತಿಭಾ ಪುರಸ್ಕಾರ ಬೊಕ್ಕ ಬೇತೆ ಬೇತೆ ಸಂಘದ ಉದಿಪನ

ಕಾರ್ಕಳ ಯೂತ್ ಬಿಲ್ಲವ ಸಂಘಟನೆಗ್ ಶರತ್ ಬೈಲಡ್ಕ ಅಧ್ಯಕ್ಷೆರಾದ್ ಆಯ್ಕೆ

ಬೊಂಬೈ ಬಂಟರ ಸಂಘದ ಒತ್ತು ಗುರ್ಕಾರೆ ಆದ್ ಆಯ್ಕೆ ಆಯಿನ ಮಹೇಶ್ ಶೆಟ್ರೆಗ್ ಮಾನಾದಿಗೆ

ಕರಾವಳಿ ಸೇವಾ ಮಾಣಿಕ್ಯ ಸೇವಾ ಸಂಸ್ಥೆರ್ದ್ “ಈ ಕೊರ್ನ ರಂಗ್ ದ ಬಾಸೆಲು” ತುಳು ಆಲ್ಬಮ್ ಸಾಂಗ್ ಬುಡುಗಡೆ

ತುಳುನಾಡ್ ದ ಆಚರಣೆಲು ನಿಜ ಜೀವನಡ್ ಇಪ್ಪೊಡು: ವಸಂತ ದೇವಾಡಿಗ

ದೇವೆರೆ ಎಂಕ್ 25 ಕೋಟಿ ಲಾಟ್ರಿ ಬರ್ರೆ ಬಲ್ಲಿತ್ತ್ಂಡ್ ಪಂಡೆರ್ ಕೇರಳದ ರಿಕ್ಷಾ ಡೈವರ್!

ಸೆ.25 : ತಜಿಪದ ಬಿರುವೆರ್ ಕೆಸರ್ದ್ ಕಂಡ ಗೊಬ್ಬುದ ಕೂಟ 2022

You Missed

ಬಸ್‌ತ ಚಾರ್ಜ್‌ಲ ಎಚ್ಚಾಂಡ್!

ಮೀನ್‌ದ ಲಾರಿಲೆನ ಮಿತ್ತ್ 604 ಕೇಸ್ : 3.02 ಲಕ್ಷ ರೂ. ದಂಡ ವಸೂಲ್

ಜೈ ತುಲುನಾಡ್ ಬೆಂಗಳೂರು(ರಿ.) ಮುತಾಲಿಕೆಡ್ ತುಳು ಲಿಪಿ ಪರೀಕ್ಷೆ

ಕ್ಯಾಲಿಫೋರ್ನಿಯಾ (ಅಮೆರಿಕ) ತುಳುವ ಮಹಾಸಭೆತ್ತ ಅಧ್ಯಕ್ಷೆರ್ ಅನಿತಾ ನಾಯಕ್