May 29, 2022

ಗೌಜಿಡ್ ಉದಿಪನ ಆಂಡ್ ಪಟ್ಲ ಸಂಭ್ರಮ :2022

ಕುಡ್ಲ : ಯಕ್ಷಧ್ರುವ ಪಟ್ಲ ಫೌಂಡೇಷನ್ ಟ್ರಸ್ಟ್ ಒಟ್ಟು ಸೇರಿಗೆಡ್ ‘ಯಕ್ಷಧ್ರುವ ಪಟ್ಲ ಸಂಭ್ರಮ- 2022’ ಲೇಸ್ ನ್ ಟ್ರಸ್ಟ್ ದ ಗೌರವಾಧ್ಯಕ್ಷ ಸದಾಶಿವ ಶೆಟ್ಟಿ ಕನ್ಯಾನ ಮಾರ್ಗದರ್ಶನಡ್ ಬೊಕ್ಕ ಶಶಿಧರ ಬಿ.ಶೆಟ್ಟಿ ಬರೋಡ ಮೆರ್ನ ಗುರ್ಕಾರ್ಮೆಡ್ ಇನಿ ಕಾಂಡೆ ಚೆಂಡೆ, ವಾದ್ಯೋದ ಸೊರೊಟ್ಟು ಪೇಂಟೆದ ಅಡ್ಯಾರ್ ಗಾರ್ಡನ್‌ಡ್ ಬಾರಿ ಗೌಜಿಡ್ ಉದಿಪನ ಆಂಡ್.

ಪುನೀತ್‌ರಾಜ್ ಕುಮಾರ್ ವೇದಿಕೆಡ್ ಪಟ್ಲ ಸಂಭ್ರಮ‌ ನಡತೊಂದು ಉಂಡು . ಕಾಂಡೆ 8 ಗಂಟೆಗ್ ಚೌಕಿ‌ಪೂಜೆ, ಯಕ್ಷದಿಬ್ಬಣ, ಪೂರ್ವರಂಗ, ಅಬ್ಬರತಾಳ, ಚೆಂಡೆ ಜುಗುಲ್‌ಬಂದಿ- ಸ್ಪರ್ಧಾತ್ಮಕ ಪೀಠಿಕೆ ಸ್ತ್ರೀವೇಷ ವಿಶೇಷವಾದ್ ಜನಕ್ಲೆನ ಗಮನ ಸೆಳೆಯೊಂದು ಉಂಡು.

ಇನಿ ಕಾಂಡೆ 9.45ಕ್ಕ್ ಉದಿಪನದ ಲೇಸ್ ನಡತುಂಡು . ಕೊಂಡೆವೂರು ಯೋಗಾನಂದ ಸರಸ್ವತಿ ಸ್ವಾಮೀಜಿ ಅಪ್ಪೆ ಕಟಿಲೇಶ್ವರಿನ ಪೊರ್ಲ ಮೂರ್ತಿ ದ ಎದುರು ತುಡರ್ ಅರ್ಲಾವುನ ಮುಖೇನ ಚಾಲನೆ ಕೊರಿಯೆರ್ . ಮುಂಬೈ ಹೇರಂಬ ಕೆಮಿಕಲ್ ಇಂಡಸ್ಟ್ರೀಸ್‌ನ‌ ನಿರ್ದೇಶಕ ಸದಾಶಿವ ಶೆಟ್ಟಿ ಕನ್ಯಾನ ಶುಭಾಶಂಸನೆ ಮಲ್ತೆರ್ . ಉದ್ಯಮಿ ಶಶಿಧರ ಬಿ.ಶೆಟ್ಟಿ ಬರೋಡ ಗುರ್ಕಾರ್ಮೇದ ಪಾತೆರ ಪಂಡೆರ್ . ಪಟ್ಲ ಸಂಭ್ರಮನ್ ಸಿ.ಎ. ದಿವಾಕರ ರಾವ್ ಉದಿಪನ ಮಲ್ತೆರ್ . ಆರೋಗ್ಯ ಶಿಬಿರಗ್ ಡಾ.ಕೃಷ್ಣ ಪ್ರಸಾದ್ ಕೂಡ್ಲು ಚಾಲನೆ ಕೊರಿಯೆರ್ . ಡಾ.ಎಂ. ಮೋಹನ್ ಆಳ್ವ, ಡಾ.ಸುಧಾಕರ ಶೆಟ್ಟಿ, ಕೃಷ್ಣ ಜೆ. ಪಾಲೇಮಾರ್ ಸೇರಿನಂಚ ನನಾತ್ ಜನಕುಲು ಪಾಲ್ ಈ ಪೊರ್ಲ ಲೇಸ್ ಡ್ ಪಾಲ್ ಪಡೆತೆರ್.

ಲೇಸ್ ಡ್ ಶರತ್ ಶೆಟ್ಟಿ ಪಡುಪಳ್ಳಿ ರಚನೆ ಮಲ್ತಿನ ‘ಯಕ್ಷಾಂಗಣ ಧ್ರುವತಾರೆ ಪಟ್ಲ’ ಕೃತಿ ಬುಡುಗಡೆ ಆಯೆರೆ ಉಂಡು . ‘ಧ್ರುವ ಪ್ರಭ’ ಪನ್ಪಿನ ಟ್ರಸ್ಟ್‌ದ ಸೇವಾ ಯಾನದ ಮೆಲುಕು ಕೃತಿ ಬುಡುಗಡೆ ಆಯೆರೆ ಉಂಡು . ಭಾರತೀಯ ಭೂ ಸೇನೆಡ್ ಮೇಜರ್ ಆದ್ ಪದೋನ್ನತಿ ಪಡೆಯಿನ ಭರತ್ ಶೆಟ್ರೆಗ್ ಮಾನದಿಗೆದ ಲೇಸ್ ನಡಪೆರೆ ಉಂಡು.ಬೇತೆ ಬೇತೆ ಪ್ರಶಸ್ತಿಲೆನ್ ಪಡೆಯಿನ ಕೆ.ಡಿ.ಶೆಟ್ಟಿ ದಂಪತಿ, ವಕ್ವಾಡಿ ಪ್ರವೀಣ್ ಶೆಟ್ಟಿ ದಂಪತಿ, ಕಡಂದಲೆ ಸುರೇಶ್ ಭಂಡಾರಿ ದಂಪತಿ, ಸವಣೂರು ಸೀತಾರಾಮ‌ ರೈ ದಂಪತಿಲೆಗ್ ಮಾನದಿಗೆ ಮಲ್ಪರೆ ಉಲ್ಲೆರ್.

ಬಯ್ಯಗ್ 6 ಗಂಟೆಗ್ ಸಮಾರೋಪ ಸಮಾರಂಭ ನಡಪೆರೆ ಉಂಡು , ಎಡನೀರು ಮಠದ ಸಚ್ಚಿದಾನಂದ ಭಾರತಿ ಸ್ವಾಮೀಜಿ, ಒಡಿಯೂರು ಕ್ಷೇತ್ರದ ಗುರುದೇವಾನಂದ ಸ್ವಾಮೀಜಿ ಆಶೀರ್ವಚನ ಕೊರಿಯೆರೆ ಉಲ್ಲೆರ್ . ಸಚಿವೆರಾಯಿನ ಆರಗ ಜ್ಞಾನೇಂದ್ರ, ಸುನಿಲ್‌ ಕುಮಾರ್, ಎಸ್‌.ಅಂಗಾರ, ಕೋಟ ಶ್ರೀನಿವಾಸ ಪೂಜಾರಿ, ಸಂಸದ ನಳಿನ್‌ಕುಮಾರ್ ಕಟೀಲ್‌ ಪಾಲ್ ಪಡೆಯೆರೆ ಉಲ್ಲೆರ್.