ಕೊಂಡಾಣ : ಕುಸಲ್ ನಗರ ಕೊಂಡಾಣದ. ಶ್ರೀ ಕೊರತಿ ಗುಳಿಗ ಸಾನಿಧ್ಯಡ್ ದೈವೊಲೆದ ಪ್ರತಿಷ್ಟ ಕಲಶಾಭಿಷೇಕ ಬುಕ್ಕ ಕೋಲ ಸೇವೆ. ಜ್ಯೋತಿಷಿ ಮೋಹನ್ ಮಾಯಿಪ್ಪಾಡಿ ಇಂಬೆರೆನ ಮಾರ್ಗದರ್ಶನಡ್ ಬಾರಿ ಗೌಜಿಡ್ ನಡತುಂಡು .
ಕಾಂಡೆ ಪ್ರತಿಷ್ಟೆ ಆದ್ ಮಧ್ಯಾಹ್ನ ಮಹಾ ಪೂಜೆ ಅವೆರ್ದ್ ಬೊಕ್ಕ ಅನ್ನ ಸಂತರ್ಪಣೆ ನಡತ್ಂಡ್. ರಾತ್ರೆಡ್ ದೈವೂಲೆದ ಕೋಲ ಸೇವೆಲ ನಡತ್ಂಡ್.
ಊರುದ ಪರವೂರುದ ಭಕ್ತಾದಿಲು ಈ ಪುಣ್ಯ ಕಜ್ಜಡ್ಪ ಪಾಲ್ಡೆ ಪಡೆಯೆರ್.
ಈ ಜಾಗೆಡ್ ಸರ್ವ ಧರ್ಮದ ಕುಟುಂಬೊಲು ಸುಮಾರು ವರ್ಷೂಲೆರ್ದ್ ಇಂಚ ಜೀವನ ನಡಪಾವೂಂದು ಉಲ್ಲೆರ್.
ಈ ಭಾಗದ ಜನಕುಲು
ಪನ್ಪುನ ಪ್ರಕಾರ
ಕೆಲವು ವರ್ಷೂಲೆರ್ದ್ ದುಂಬು ಅವೇತೊ ಕುಟುಂಬೊಲೆಗ್ ತೊಂದರೆದ ಮಿತ್ತ್ ತೊಂದರೆ ಬರೊಂದು ಇತ್ಂಡ್ಗೆ.
ಅಕೇರಿಗ್ ಜ್ಯೋತಿಷ್ಯದ ಮೊರೆ ಪೋದು ತನ್ನ ಕಷ್ಟೂಲೆದ ಬಗೆಟ್ ಕೇನ್ನಗ. ನಿಕ್ಲೆನ ಊರುಡು ಜಾಗೆದ ಗುಳಿಗೆ ಉಂಡು. ಆ ದೈವೊಗು ಸರಿಯಾಯಿನ ನೆಲೆ ಇಜ್ಜಿ. ದೈವೂನು ನಂಬುನನೆ ನಿಕ್ಲೆನ ಸಮಸ್ಯೆಲೆಗ್ ಮಾತಾ ಪರಿಹಾರ ಪಂದ್ ತೊಜಿದ್ ಬರೊಂದು ಇತ್ಂಡ್ಗೆ .
ಆಂಡ ದೈವೂನು ನಂಬುನಾತ್ ಅನುಕೂಲ ,ಜಾಗೆ ಆವಡ್, ಈ ಭಾಗದ ಜನಕುಲೆಗ್ ಇಜ್ಜಾಂಡ್.
ಕೆಲವು ಕುಟುಂಬ ತಿಂಗೊಲ್ದ ಸಂಕ್ರಾಂತಿಗ್ ಅಕ್ಲೆನ ಇಲ್ಲಡ್ ತಾರಾಯಿ ಆಕೊಂದು ಬುಕ್ಕ ಪತ್ತನಾಜೆಗ್ ಕೋರಿ ಕೊಯೊಂದು ಇತ್ತೆರ್ .
ಕಾಲ ಕ್ರಮೇಣ ಗುಳಿಗನ್ ಕಲ್ಲ್ ಪಾರ್ದ್ ಆಂಡಲ ನಂಬೊಡೆ ಪಂದ್ ಜಾಗೆಡ್ ದೀನ ಪ್ರಶ್ನೆಡ್ ತೊಜಿದ್ ಬತ್ತ್ಂಡ್.ಅವ್ವೆ ಪ್ರಕಾರವಾದ್ ದುಂಬುರ್ದು ಇಂಚಲ ಆ ಊರುಡು ಇತ್ತಿನ ಗಾಣದ ಸಮುದಾಯದ ಬಡ ಕುಟುಂಬ ಒಂಜ್ಜಿ ಕಲ್ಲ್ ಪಾರ್ದ್ ಅಕ್ಲೆನ ಇಲ್ಲದ ಜಾಲ್ಡ್ ಪೂ ಬಾಜೆಲ್ ದೀದ್ ನಂಬೊಂದು ಬತ್ತೆರ್.
ನಂಬಿನ ಕೆಲವೆ ಕೆಲವು ತಿಂಗೊಳುಡು ಮದಿಮೆ ಆವಂದೆ ಇತ್ತಿನ ಕೆಲವು ಪೊಣ್ಣು ಜೋಕುಲೆಗ್ ಒಂಜೆ ವರ್ಷಡ್ ಮದಿಮೆ ಆಂಡ್ಗೆ ಆ ಊರುಡು.
ವರ್ಷೂಲೆರ್ದ್ ಬೊಕ್ಕ ಊರುದಕುಲು ಪೊರಾ ಸೇರ್ದ್ ಆ ಜಾಗೆಟ್ ಪಿರ ಪ್ರಶ್ನೆ ದಿಪಾಯೆರ್.
ಅಪಗ ತೋಜಿದ್ ಬತ್ತಿನ ಪ್ರಕಾರ ಈ ಜಾಗೆಡ್ ಗುಳಿಗೆ ಮಾತ್ರ ಅತ್ ಗುಳಿಗನ ಒಟ್ಟಿಗೆ ಕೋರತಿ ದೈವೂಲ ಸೇರ್ದ್ಂಡ್ ಪಂದ್ ಗೊತ್ತಾಂಡ್.
ಆತೇ ಅತ್ತಂದೆ ಈ ದೈವೂಲೆನ್ ನಂಬೆರೆ ಜಾಗೆಲ ಮುಲ್ಪಣೆ ಇಂಚ್ಚಿತಿನ ದಿಕ್ಕ್ ಡ್ ಉಂಡು ಪಂದ್ ತೋಜಿದ್ ಬತ್ತ್ಂಡ್. ಅವ್ವೆ ಪ್ರಕಾರ ಆ ಜಾಗೆನ್ ನಾಡೊಂದು ಪೋನಗ ಒಂಜಿ ಮೂಲೆಡ್ ಒಂಜೆಕಾಲ್ ಸೆನ್ಸ್ ದಾತ್ ಏರೆಗ್ಲ ಸೇರಂದಿನಂಚಿನ ಜಾಗೆ ತಿಕ್ಕ್ಂಡ್.
ಅವೆರ್ದ್ ಬೊಕ್ಕ ಊರುದಕುಲು ಮಾತಾ ದೈವೂನು ನಂಬೊಡೆ ಪನ್ಪುನ ನಿರ್ಧಾರೊಗು ಬತ್ತೆರ್.
ಅವ್ವೆ ಪ್ರಕಾರವಾದ್ ಜ್ಯೋತಿಷಿ ಮೋಹನ್ ಮಾಯಿಪ್ಪಾಡಿ ಇಂಬೆರೆನ ಮಾರ್ಗದರ್ಶನೊಡು ಕೊರತಿ ಗುಳಿಗ ದೈವೂಲೆಗ್ ಕಟ್ಟೆ ಗುಂಡ ಕಟ್ಟಾದ.
ಬಾರಿ ಗೌಜಿಡ್ ದೈವೋಲೆಗ್ ಪ್ರತಿಷ್ಟ ಕಲಶಾಭಿಷೇಕ ಕೋಲ ಸೇವೆ ದೈವ ದೇವೆರೆನ ದಯೆಟ್ ನಡತ್ಂಡ್ ಪನ್ಪೆರ್ ಭಕ್ತಾದಿಲು.
Editorial