ಕುಡ್ಲ : ತುಳು ಭಾಷಾಭಿಮಾನ ಜಾಸ್ತಿ ಆವೊಡು ಪಂದ್ ಆoಡ ಜೋಕ್ಲೆಗ್ ಐಟ್ ಉಮೇದ್ ಪುಟ್ಟಾವುನ ಅಗತ್ಯ ಉಂಡು. ಅಕಾಡೆಮಿ ತುಳು ಶಿಕ್ಷಕೆರ್ನ ಮುಖೇನ ತುಳು ಅಭಿರುಚಿನ್ ಜಾಸ್ತಿ ಮಲ್ಪುನ ಪ್ರಯತ್ನ ಮಲ್ತೊಂದು ಉಪ್ಪುನು ಶ್ಲಾಘನೀಯ, ತುಳು ಭಾಷೆ, ಸಂಸ್ಕೃತಿ, ರಂಗಕಲೆ ಸಹಿತ ಪರಂಪರೆಗ್ ಬೆರಿ ಬೊಟ್ಟುದು ಪ್ರೋತ್ಸಾಹ ಕೊರ್ಪಿನ ಅಕಾಡೆಮಿದ ಜವಬ್ದಾರಿ ಅವೆನ್ ಪ್ರಸ್ತುತ ಅಕಾಡೆಮಿದ ಸದಸ್ಯೆರ್ ಪ್ರಾಮಾಣಿಕ ಪ್ರಯತ್ನ ಮಲ್ತೊಂದು ಉಲ್ಲೆರ್ . ಪರ-ವಿರೋಧ ಸಮಾಜೊಡು ಸಹಜ ಆಂಡ ನಮ್ಮ ಬೇಲೆ ಪ್ರಾಮಾಣಿಕತೆಡ್ ಮಲ್ತುಂಡ ತಿಕ್ಕುನ ಮಾನಾದಿಗೆ ಸಮರ್ಥವಾದ್ ಮಲ್ತಿನ ತೃಪ್ತಿ ನಮಕ್ ಉಪ್ಪುಂಡು ಪಂದ್ ಕುಡ್ಲದ ಟೈಮ್ಸ್ ಆಫ್ ಕುಡ್ಲ ತುಳು ಪತ್ರಿಕೆದ ಸಂಪಾದಕೆರಾಯಿನ ಎಸ್.ಆರ್. ಬಂಡಿಮಾರ್ ಪಂಡೆರ್..
ಮೇರ್ ಉರ್ವಸ್ಟೋರ್ದ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಸಿರಿ ಚಾವಡಿಡ್ ನಡತಿನ ತುಳು ಕಲ್ಪಾದಿಲೆನ ಓದು – ಬರವುದ ಕಜ್ಜಕೊಟ್ಯ ತುಳುನು ಮೂಜನೆ ಭಾಷೆಯಾದ್ ಭೊಧನೆ ಮಲ್ತೊಂದು ಉಪ್ಪುನ ಕುಡ್ಲದ ಬೊಕ್ಕ ಒಡಿಪುದ ಶಿಕ್ಷಕೆರೆಗ್ ಶೈಕ್ಷಣಿಕ ವಿಶೇಷ ಕಜ್ಜಕೋಟ್ಯನ್ ಉದಿಪನ ಮಲ್ತ್ ಆರ್ ಪಾತೆರಿಯೆರ್.
ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾರ್ಲಾಯಿನ ದಯಾನಂದ ಜಿ. ಕತ್ತಲ್ಸಾರ್ ಮೇರ್ ಗುರ್ಕಾರ್ಮೆ ವಹಿಸ್ದಿತ್ತೆರ್.
ಮಲ್ಲ ಬಿನ್ನೆರ್ ಆದ್ ಕುಡ್ಲ ಮಹಾನಗರಪಾಲಿಕೆ ಮೇಯರ್ ಪ್ರೇಮಾನಂದ ಶೆಟ್ಟಿ ಮೇರ್ ಎಡ್ಡೆಪ್ಪುನು ಬಯಕಿಯೆರ್.
ಸಾರ್ವಜನಿಕ ಶಿಕ್ಷಣ ಇಲಾಖೆ, ಕುಡ್ಲ ದ ಉಪ ನಿರ್ದೇಶಕ ಸುಧಾಕರ್ ಕೆ. ಪಾತೆರ್ದ್ , ಶಾಲೆಡ್ ಮಂಜೂರಾಯಿನ ಹೆಚ್ಚುವರಿ ಹುದ್ದೆ ಇತ್ತುಂಡ ಮಾತ್ರ ಅತಿಥಿ ಶಿಕ್ಷಕೆರ್ನ ನೇಮಕಾತಿ ಸಾಧ್ಯ, ತುಳು ಸಂಘಟನೆಲು ಸಂಘಟಿತೇರಾದ್ ಈ ಬೇಲೆ ನ್ ಸರಕಾರದ ಮುಖೇನ ಮಲ್ತುಂಡ ಶಿಕ್ಷಕೆರೆನ್ ಕಾಡೊಂದು ಉಪ್ಪುನ ಸಮಸ್ಯೆ ಕಮ್ಮಿ ಮಲ್ಪೊಲಿ ಪಂದ್ ಪಂಡೆರ್ .
ಪದವಿ ಪೂರ್ವ ಕಾಲೇಜು ಉಪ್ಪುಂದ ಮುಲ್ಪದ ಪ್ರಾಂಶುಪಾಲೆರಾಯಿನ ಬಿ. ಯಾದವ ಬೊಕ್ಕ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ತುಳುಪೀಠ ಬೊಕ್ಕ ತುಳು ಸ್ನಾತಕೋತ್ತರ ಅಧ್ಯಯನ ವಿಭಾಗ ಕುಡ್ಲ ವಿಶ್ವವಿದ್ಯಾನಿಲಯದ ಶಿಕ್ಷಣ ಸಂಯೋಜಕೆರಾಯಿನ ಡಾ. ಮಾಧವ ಎಂ.ಕೆ ಮಲ್ಲ ಬಿನ್ನೆರ್ ಆದ್ ಪಾಲ್ ಪಡೆದಿತ್ತೆರ್.
.ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಸದಸ್ಯೆರಾಯಿನ ಸಿದ್ಧಕಟ್ಟೆ ಮಲ್ಲಿಕಾ ಶೆಟ್ಟಿ, ನಾಗೇಶ್ ಕುಲಾಲ್, ಕಲಾವತಿ ದಯಾನಂದ್, ನರೇಂದ್ರ ಕೆರೆಕಾಡು, ಚೇತಕ್ ಪೂಜಾರಿ, ಸಂತೋಷ್ ಪೂಜಾರಿ ಕಾರ್ಕಳ, ರಿಜಿಸ್ಟ್ರಾರ್ ಕವಿತಾ, ಶ್ರೀ ರಾಮಕುಂಜೇಶ್ವರ ಆಂಗ್ಲ ಮಾಧ್ಯಮ ಶಾಲೆ ರಾಮಕುಂಜ ನೆತ್ತ ಕಾರ್ಯದರ್ಶಿ ಕೆ. ಸೇಸಪ್ಪ ರೈ ಪಾಲ್ ಪಡೆದಿತ್ತೆರ್ .
ಸಿದ್ಧಕಟ್ಟೆ ಮಲ್ಲಿಕಾ ಶೆಟ್ಟಿ ಸೊಲ್ಮೆ ಸಂದೈತ ಮಲ್ತೆರ್ , ಲೇಸ್ ದ ಸದಸ್ಯ ಸಂಚಾಲಕ ಕಡಬ ದಿನೇಶ್ ರೈ ಲೇಸ್ ನಡಪಾದ್ ಕೊರಿಯೆರ್.
pallavi shetty