ಬಿರುವೆರ್ ಕಡೇಶಿವಾಲಯ ಸೇವಾ ಟ್ರಸ್ಟ್ (ರಿ.) ದ 7ನೇ ವರ್ಷದ ವಾರ್ಷಿಕ ಉಚ್ಚಯ, ಪದಗ್ರಹಣ ಲೇಸ್

ಕಲ್ಕಡ್ಕ: ಜೋಕ್ಲೆನ್ ವಿದ್ಯಾವಂತೆರಾದ್ ಮಲ್ತ್ ದ್, ನೈತಿಕ ಗುಣಮಟ್ಟನ್ ಬುಲೆಪಾದ್, ಬೇತೆ ಒವ್ವೇ ಆಸ್ತಿ ಮಲ್ತ್ ದ್ ಕೊರ್ಪುನ ಅಗತ್ಯ ಇಜ್ಜಿ ಪಂದ್ ಬೊಲ್ತೇರ್ ತಾಲೂಕು ಸಾಹಿತ್ಯ ಸಮ್ಮೇಳನದ ಗುರ್ಕಾರೆ ನಿವೃತ ಪ್ರಾಂಶುಪಾಲೆರ್ ಕೃಷ್ಣಪ್ಪ ಪಂಡೆರ್.

ಮೇರ್ ಬಂಟ್ವಾಳ ತಾಲೂಕ್ ದ ಬಿರುವೆರ್ ಕಡೇಶಿವಾಲಯ ಸೇವಾ ಟ್ರಸ್ಟ್ (ರಿ.) ದ 7ನೇ ವರ್ಷದ ವಾರ್ಷಿಕ ಉಚ್ಚಯ ಬೊಕ್ಕ ಪದಗ್ರಹಣ ಲೇಸ್ ಡ್ ಪಾತೆರಿಯೆರ್.

ಟ್ರಸ್ಟ್ ದ ಮಾನಾದಿಗೆದ ಗುರ್ಕಾರೆ ಮೋಹನ್ ಕುಮಾರ್ ಕಲ್ಲಾಜೆ ಲೇಸ್ ಉದಿಪನ ಮಲ್ತ್ ದ್ ಲೇಸ್ ದ ಗುರ್ಕಾರ್ಮೆನ್ ಒಯಿಸಿಯೆರ್ .

ಮಲ್ಲ ಬಿನ್ನೆರಾದ್ ಕಡೇಶಿವಾಲಯ ಗ್ರಾಮ ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಸುನಿಲ್ ಕುಮಾರ್ ಪಾತೆರ್ದ್, ಸ್ವಾರ್ಥ ರಹಿತ ಸೇವೆ ದೇವೆರೆನ ಸೇವೆ ಆತ್ಂಡ್. ಸಂಘಟನೆ ಇಪ್ಪುನೇ ತನ್ನ ರಕ್ಷಣೆಗ್ ಹೊರತ್ ಬೇತೆ ಅಕ್ಲೆನ್ ನಾಶ ಮಲ್ಪೆರೆ ಅತ್ತ್, ಕಡೇಶಿವಾಲಯ ಗ್ರಾಮ ಪಂಚಾಯತ್ ಗಾಂಧಿ ಗ್ರಾಮ ಪುರಸ್ಕಾರಗ್ ಪಾತ್ರರಾಯೆರೆ ಬಿರುವೆರ್ ಕಡೇಶಿವಾಲಯ ಕೊರ್ನ ಸಹಕಾರನ್ ನೆಂಪು ಮಲ್ತೆರ್.

ದಕ್ಷಿಣ ಕನ್ನಡ ಜಿಲ್ಲಾ ಶಾಮಿಯಾನ ಮಾಲಕರ ಸಂಘದ ಗುರ್ಕಾರೆ ಬಾಬು ಕೆ ವಿ ಪಾತೆರ್ದ್, ಹಿಂದು ಧರ್ಮದ ನೆಲೆಗಟ್ಟ್ ಡ್ ಜಾತಿ ಉಂತುದುಂಡು, ಪೋಷಕೆರ್ ಜೋಕ್ಲೆನ್ ವರ್ಷಗೊರ ತನ್ನ ತರವಾಡು ಇಲ್ಲಲ್ ನಡಪುನ ಲೇಸ್ ಡ್ ಪಾಲ್ ಪಡೆದ್ ನಮ್ಮ ಸಂಸ್ಕಾರ, ಸಂಸ್ಕೃತಿ ತೆರಿಪಾವುನ ಅಗತ್ಯ ಉಂಡು ಪಂದ್ ಪಂಡೆರ್.

ಈ ಪೊರ್ತುಡು ಶ್ರೀ ಕ್ಷೇತ್ರ ಗೆಜ್ಜೆಗಿರಿತ್ತ ಮಾನಾದಿಗೆದ ಗುರ್ಕಾರೆ ಜಯಂತ್ ನಡುಬೈಲ್, ಯಕ್ಷಗಾನ ಹಾಸ್ಯ ಕಲಾವಿದೆ ನಾರಾಯಣ ಉಜಿರೆ ಮೊಕ್ಲೆನ ಸಾಧನೆನ್ ಗುರುತಿಸಾದ್ ಸನ್ಮಾನ ಮಲ್ತೆರ್.

ಕೃಷಿ ಕ್ಷೇತ್ರಡ್ ಸಾಧನೆ ಮಲ್ತಿನ ಗೌರಿ ಕೆ ಬಂಗೇರ ಬಡಕಬೈಲ್, ನಾಟಿ ಪ್ರಸೂತಿ ಪ್ರವೀಣೆ ಪೂವಕ್ಕ ಕಡೆಕೋಳಿಮಜಲ್, ಕುಲಕಸುಬು ಮೂರ್ತೆಗಾರಿಕೆ ಕ್ಷೇತ್ರಡ್ ವಾಸು ಪೂಜಾರಿ ನೆತ್ತರ, ಬಂಟ್ವಾಳ ತಾಲೂಕ್ ಜೋಕ್ಲೆನ ಸಾಹಿತ್ಯ ಸಮ್ಮೇಳನ ಗುರ್ಕಾರ್ದಿ, ಕಲ್ಪಾರ್ಥಿ ಕುಮಾರಿ ಸಾನ್ವಿ ಮೊಕ್ಲೆಗ್ ಅಭಿನಂದನೆ ಸಂದಾಯೆರ್.

ಎಸ್ಎಸ್ಎಲ್ ಸಿ ಬೊಕ್ಕ ಪಿಯುಸಿ ಕ್ಲಾಸ್ ಡ್ ಅತಿ ಎಚ್ವ ಮಾರ್ಕ್ ಪಡೆಯಿನ ಬಿಲ್ಲವ ಸಮಾಜದ ಕಲ್ಪಾರ್ಥಿಲೆಗ್ ಪ್ರತಿಭಾ ಪುರಸ್ಕಾರ ಕೊರಿಯೆರ್. ಗಣ್ಯೆರೆನ ಸಮ್ಮುಖಡ್ ಶ್ರೀ ಕ್ಷೇತ್ರ ಗೆಜ್ಜೆಗಿರಿತ್ತ ಜಾತ್ರೆ ಉಚ್ಚಯದ ಲೆಪ್ಪೋಲೆನ್ ಬುಡುಗಡೆ ಮಲ್ತೆರ್.

ಸನ್ಮಾನ ಸ್ವೀಕಾರ ಮಲ್ತಿನ ಶ್ರೀ ಕ್ಷೇತ್ರ ಗೆಜ್ಜೆಗಿರಿತ್ತ ಮಾನಾದಿಗೆದ ಗುರ್ಕಾರೆ ಜಯಂತ್ ನಡುಬೈಲ್ ಪಾತೆರ್ದ್, ಬಿರುವೆರ್ ಸೇವಾ ಟ್ರಸ್ಟ್ (ರಿ.) ಕಡೇಶಿವಾಲಯ ಸೇವಾ ಲೇಸ್ ಒರಿನ ಸಂಘಟನೆಲೆಗ್ ಅನುಕರಣಿಯ ಆತ್ಂಡ್. ಸಂಘಟನೆದೊಟ್ಟಿಗೆ ಯಾನ್ಲಾ ಕೈಜೋಡಿಸಾವೆ, ಇಡೇ ಮುಟ್ಟ ಬಿರುವೆರ್ ಕಡೇಶಿವಾಲಯ ಟ್ರಸ್ಟ್ ದ ಮುಕೇನ ಶಿಕ್ಷಣದ ಮಾತ ಕರ್ಚಿ ತೂವೊಂದು ಇತ್ತಿನ ಆತ್ಮಿಕಾ ಪನ್ಪುನ ಕಲ್ಪಾರ್ಥಿಗ್ ತನ್ನ ಅಕ್ಷಯ ಕಾಲೇಜ್ ಡ್ ಧರ್ಮಾರ್ಥ ಶಿಕ್ಷಣ ಕೊರ್ಪೆ ಪಂದ್ ಪಂಡೆರ್.

ಟ್ರಸ್ಟ್ ದ ಗುರ್ಕಾರೆ ದಿನೇಶ್ ಪೂಜಾರಿ ಸುರ್ಲಾಜೆ, ಕಾರ್ಯದರ್ಶಿ ಯಶವಂತ್ ಪತ್ತು ಕೊಡಂಗೆ ಚಾವಡಿಡ್ ಪಾಲ್ ಪಡೆದಿತ್ತೆರ್. ವಿದ್ಯಾದರ ಪೂಜಾರಿ ಕಡೇಶಿವಾಲಯ ಗುರ್ಕಾರ್ಮೆನ್ ಒಯಿಸ್ ದಿತ್ತೆರ್. ಕಾರ್ಯದರ್ಶಿ ಯಶವಂತ್ ಪತ್ತು ಕೊಡಂಗೆ ಪೊಸ ಸಮಿತಿದ ಪದಗ್ರಹಣ ಮಲ್ತೆರ್. ಲೋಕನಾಥ್ ಪೂಜಾರಿ ತಿಮರಾಜೆ ಎದ್ಕೊನಿಯೆರ್. ಸಂದ್ಯಾ ವಿದ್ಯಾದರ್ ಬೊಕ್ಕ ಕೀರ್ತಿ ಸನ್ಮಾನ ಆಯಿನಕ್ಲೆನ ಸನ್ಮಾನ ಪತ್ರನ್ ಓದಿಯೆರ್. ದಿನೇಶ್ ಪೂಜಾರಿ ಸುರ್ಲಾಜೆ ಸೊಲ್ಮೆ ಸಂದಾಯೆರ್. ದೀಪಕ್ ಬೊಕ್ಕ ಭವ್ಯಶ್ರೀ ಪೂಜಾರಿ ಲೇಸ್ ದ ಸುಧಾರಿಕೆ ಮಲ್ತೆರ್.