ಬೆದ್ರದ ಸ್ವರಾಜ್ ಮೈದಾನದ ಕೈತಲ್ ಇಪ್ಪುನ ಪಿರಾಕ್ ದ ಶ್ರೀ ಆದಿಶಕ್ತಿ ಮಹಾಕಾಳಿ ದೇವಲ್ಯಡ್ ಫೆ.11 ಕ್ಕ್ ನಡಪರೆ ಇಪ್ಪುನ ಬ್ರಹ್ಮಕಲಶ ಉಚ್ಚಯದ ಲೆಕ್ಕೊಡು ಕಚೇರಿ ಉದಿಪನ ಬೊಕ್ಕ ಲೆಪ್ಪೋಲೆ ಜ.18 ಗುರುವಾರ ದೇವಲ್ಯದ ಚಾವಡಿಡ್ ನಡತ್ಂಡ್.
ಬ್ರಹ್ಮಕಲಶ ಉಚ್ಚಯ ಸಮಿತಿದ ಗುರ್ಕಾರೆ ಡಾ |ಎಂ. ಮೋಹನ ಆಳ್ವ ಮೇರ್ ಲೇಸ್ ದ ಗುರ್ಕಾರ್ಮೆನ್ ಒಯಿಸೊಂದು, ಕಚೇರಿ ಉದಿಪನ ಮಲ್ತ್ ದ್, ಲೆಪ್ಪೋಲೆ ಬುಡುಗಡೆ ಮಲ್ತೆರ್.
ಬೆದ್ರ ಸುತ್ತಮುತ್ತದ 18 ಗ್ರಾಮಗ್ ಸಂಬಂಧಪಟ್ಟಿನ ಈ ದೇವಲ್ಯ ಧಾರ್ಮಿಕ ಚಿಂತನೆದ ಶ್ರದ್ಧಾ ಕೇಂದ್ರವಾಯಿನೊಟ್ಟಿಗೆ ಶಾಸ್ತ್ರೀಯ ಚೌಕಟ್ಟ್ ದೊಟ್ಟಿಗೆ ತನ್ನ ಅಸ್ತಿತ್ವನ್ ಒರಿಪಾವೊಂದು ಬೈದ್ಂಡ್. ಕೀರ್ತಿಶೇಷೆರಾಯಿನ ಮುಂಡ್ರುದೆಗುತ್ತು ರಾಮ್ ಮೋಹನ್ ರೈ, ಅಮರನಾಥ ಶೆಟ್ಟಿ ಬೊಕ್ಕ ಪುತ್ತಿಗೆ ಗುತ್ತು ವಸಂತ ಶೆಟ್ಟಿ ಬೊಕ್ಕ ಪ್ರಮುಖೆರ್ ಈ ದೇವಲ್ಯಗ್ ಕೊರ್ನ ಕೊಡುಗೆ ಮೆಚ್ಚೊಡಾಯಿನವು, ಅಂಚೆನೆ ಮಾತೆರೆನ್ಲಾ ವಿಶ್ವಾಸಗ್ ದೆತೊಂದು ಬ್ರಹ್ಮಕಲಶ ಉಚ್ಚಯನ್ ನಡಪಾದ್ ದೇವಲ್ಯದ ಹಿರಿಮೆನ್ ದುಂಬಾರಿಸಾಲೆ ಪಂದ್ ಡಾ| ಮೋಹನ ಆಳ್ವೆರ್ ಪಂಡೆರ್.
ಮಾಜಿ ಸಚಿವೆರ್, ಬ್ರಹ್ಮಕಲಶ ಉಚ್ಚಯ ಸಮಿತಿದ ಮಾನಾದಿಗೆದ ಗುರ್ಕಾರೆ ಅಭಯಚಂದ್ರ ಮಲ್ಲ ಬಿನ್ನೆರಾದ್ ಪಾಲ್ ಪಡೆದ್ ದೇವಲ್ಯದ ಬ್ರಹ್ಮಕಲಶ ಉಚ್ಚಯಡ್ ಸಾರ್ವಜನಿಕೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆವೊಡು ಪಂದ್ ಬಿನ್ನಾಪು ಮಲ್ತೆರ್.
ಈ ಪೊರ್ತುಡು ಬ್ರಹ್ಮಕಲಶ ಉಚ್ಚಯ ಸಮಿತಿದ ಮಾನಾದಿಗೆದ ಗುರ್ಕಾರೆ ಕೆ. ಶ್ರೀಪತಿ ಭಟ್, ಮೊಕ್ತೇಸರೆರ್ ರಾಜ್ ಮೋಹನ್ ಶೆಟ್ಟಿ, ಸಮಿತಿದ ಪ್ರಮುಖೆರ್ ನಾರಾಯಣ ಪಿ.ಎಂ, ಸುದರ್ಶನ್ ಎಂ., ಚಂದ್ರಶೇಖರ್ ಎಂ., ಮೂಡುಬರ್ಕೆ ಭಾಗ್ಯಶ್ರೀ ಅಂಚನ್, ಕೃಷ್ಣ ಶೆಟ್ಟಿ, ಭರತ್ ಪೂಂಜ, ಸಂತೋಷ್ ಶೆಟ್ಟಿ ಸಾಮನೊಟ್ಟು ಪಾಲ್ ಪಡೆದಿತ್ತೆರ್. ಈ ಲೇಸ್ ನ್ ಸಮಿತಿದ ಪ್ರಧಾನ ಕಾರ್ಯದರ್ಶಿ ತೋಡಾರು ದಿವಾಕರ ಶೆಟ್ಟಿ ಸುಧಾರಿಕೆ ಮಲ್ತೆರ್.
pallavi shetty