ಎನ್.ಎನ್.ಎಮ್ ಪ್ರೊಡಕ್ಷನ್ ಲಾಂಛನಡ್ ಆತ್ಮಾನಂದ ರೈ ನಿರ್ಮಾಣಡ್ ತಯಾರ್ ಆಯಿನ ತುಳು ಪಿಚ್ಚರ್ ಪಿಲಿ ಫೆ.24 ಕ್ಕ್ ತುಳುನಾಡ್ಡ್ ಬುಡುಗಡೆ ಆಯರೆ ಉಂಡು ಪಂದ್ ನಿರ್ದೇಶಕೆರ್ ಮಯೂರ್ ಆರ್ ಶೆಟ್ಟಿ ಪಂಡೆರ್.
ಈ ಬಗೆಟ್ ಕುಡ್ಲಡ್ ನಡತಿನ ಪತ್ರಿಕಾಗೋಷ್ಠಿಡ್ ಪಾತೆರಿನ ಆರ್, ಫೆ.10 ಕ್ಕ್ ಬುಡುಗಡೆ ಆವೊಡಿತ್ತಿನ ಈ ಪಿಚ್ಚರ್ ಕಾರಣಾಂತರರ್ದಾವರ ಬುಡುಗಡೆ ಆತಿಜಿ. ಬಂಗ ಬತ್ತ್ದ್ ತುಳು ಭಾಷೆದ ಅಭಿಮಾನರ್ದ್ ಈ ಪಿಚ್ಚರ್ನ್ ತಯಾರ್ ಮಲ್ತ್ದ. ದುಬೈಡ್ ಇತ್ತೆ ಪಿಚ್ಚರ್ದ ಪ್ರೀಮಿಯರ್ ಶೋ ನಡತ್ತ್ದಿತ್ತ್ದ್ ಜನಕ್ಲೆನ ಪುಗರ್ತೆ ಪಡೆತ್ಂಡ್. ಈ ಪಿಚ್ಚರ್ಡ್ ಯುವ ನಟೆ ಭರತ್ ಭಂಡಾರಿ ಕಥೆ ಬರೆದ್ ಸುರುತ್ತ ಸರ್ತಿ ನಾಯಕೆ ನಟೆಯಾದ್ ಅಂಚನೆ ಸ್ವಾತಿ ಶೆಟ್ಟಿ ನಾಯಕಿ ನಟಿಯಾದ್ ನಟನೆ ಮಲ್ತ್ದೆರ್ ಪಂದ್ ಪಂಡೆರ್.
ತುಳುನಾಡ್ದ ಸಂಸ್ಕೃತಿ, ಆಚರಣೆ ಬೊಕ್ಕ ನಂಬಿಕೆಡ್ ಒಂಜಾಯಿನ ಪಿಲಿ ನಲಿಕೆದ ಕಥೆ ಇಪ್ಪುನ ಪಿಚ್ಚರ್ ಪಿಲಿ. ತುಳುನಾಡ್ಡ್ ಪಿಲಿನಲಿಕೆಗ್ ಅಯ್ತನೆ ಆಯಿನ ಗೌರವ ಅಂಚನೆ ಪರಪೋಕು ಉಂಡು. ಆ ಗೌರವಗ್ ಧಕ್ಕೆ ಬನ್ನಗ ಆಚರಣೆಡ್ ಆಪುನ ಲೋಪ-ದೋಷ ಅಂಚನೆ ಪರಿಣಾಮನ್ ಎದುರಿಸಾವೊಡು ಪನ್ಪಿನವು ಈ ಪಿಚ್ಚರ್ದ ಕಥೆ ಆತ್ಂಡ್.
ಈ ಪಿಚ್ಚರ್ಡ್ ತುಳುನಾಡ್ದ ಪುಗರ್ತೆದ ಕಲಾವಿದೆರ್ ಆಯಿನ ನವೀನ್ ಡಿ.ಪಡೀಲ್, ಅರವಿಂದ ಬೋಳಾರ್, ಭೋಜರಾಜ ವಾಮಂಜೂರು, ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್, ತ್ರಿಷಾ ಶೆಟ್ಟಿ, ಕೃತಿ ಶೆಟ್ಟಿ, ವಿಸ್ಮಯ ವಿನಾಯಕ್, ಸ್ವರಾಜ್ ಶೆಟ್ಟಿ, ಸಂತೋಷ್ ಶೆಟ್ಟಿ, ರೂಪ ಡಿ ಶೆಟ್ಟಿ, ಉಮೇಶ್ ಮಿಜಾರ್, ಪ್ರಸನ್ನ ಶೆಟ್ಟಿ ಬೈಲೂರು, ಸಂದೀಪ್ ಶೆಟ್ಟಿ ಮಾಣಿಬೆಟ್ಟು, ದೀಪಕ್ ರೈ ಪಾಣಾಜೆ, ಚೇತನ್ ರೈ ಮಾಣಿ ಸೇರಿನಂಚನೆ ಮಸ್ತ್ ಕಲಾವಿದೆರ್ ಬೇತೆ ಬೇತೆ ರೀತಿದ ಪಾತ್ರಡ್ ನಟನೆ ಮಲ್ತ್ದೆರ್.
ಪಿಚ್ಚರ್ದ ನಾಯಕೆ ನಟೆ ಭರತ್ ಭಂಡಾರಿ, ತುಳುನಾಡ ರಕ್ಷಣಾ ವೇದಿಕೆದ ಯೋಗಿಶ್ ಶೆಟ್ಟಿ ಜೆಪ್ಪು, ಸಹ ನಿರ್ದೇಶಕೆರ್ ಸತೀಶ್ ಪತ್ರಿಕಾಗೋಷ್ಠಿಡ್ ಇತ್ತೆರ್.
pallavi shetty