ಪುತ್ತೂರ್: ತುಳುನಾಡ್ದ ಕಂಬುಲಗ್ ಕುಡೊರ ಕುತ್ತು ಬರ್ಪಿಲೆಕ ಉಂಡು. ಕಂಬುಲ ನಿಷೇಧ ಮಲ್ಪೊಡು ಪಂದ್ ಪ್ರಾಣಿ ದಯಾ ಸಂಘ (ಪೆಟಾ)ದಕುಲು ಕುಡ ಸುಪ್ರೀಂಕೋರ್ಟ್ ಗು ಅರ್ಜಿ ಪಾಡ್ದೆರ್. ಈ ಬಗೆಟ್ ತೆರಿನ ಉಬಾರ್ ವಿಜಯ ವಿಕ್ರಮ ಜೋಡು ಕರೆ ಕಂಬುಲ ಸಮಿತಿದ ಅಧ್ಯಕ್ಷೆರಾಯಿನ ಅಶೋಕ್ ಕುಮಾರ್ ರೈ ಮೇರ್ ಕಂಬುಲೊನು ಒರಿಪಾವುನ ನಿಲೆಟ್ಟ್ ಸುಪ್ರೀಂ ಕೋರ್ಟುದ ಸಾಂವಿಧಾನಿಕ ಪೀಠೊಗು ಮೇಲರ್ಜಿ ಪಾಡ್ದೆರ್.
ಕಂಬುಲದ ಅಭಿಮಾನಿ ಅಂಚೆನೆ ಕೋಡಿಂಬಾಡಿ ರೈ ಎಸ್ಟೇಟ್ ಧಣಿ ಆಯಿನ ಅಶೋಕ್ ರೈಕುಲು ಸಂದಾಯಿನ ಮೇಲ್ಮನವಿ ಅರ್ಜಿದ ವಿಚಾರಣೆ ಸುಪ್ರೀಂಕೋರ್ಟ್ ದ ಸಾಂವಿಧಾನಿಕ ಪೀಠಡ್ ನ.29ಗು ನಡಪರೆ ಉಂಡು. ಅಶೋಕ್ ರೈ ಮೆರೆನ ಪರವಾದ್ ಪುಗರ್ತೆದ ವಕೀಲೆರ್ ಸಂಜಯ್ ನೂಲಿ ವಾದ ಮಲ್ಪೆರೆ ಉಲ್ಲೆರ್. “ಕಂಬುಲ ಕೂಟಡ್ ಪ್ರಾಣಿ ಹಿಂಸೆ ನಡತೊಂದು ಉಂಡು. ಅಯಿರ್ದಾವರ ಕಂಬುಲ ಆಯೋಜನೆಗ್ ನಿಷೇಧ ಪಾಡೊಡು” ಪಂದ್ ಪ್ರಾಣಿ ದಯಾ ಸಂಘ ನಿರಂತರವಾದ್ ಪೊರ್ಂಬಾಟ ಮಲ್ತೊಂದು ಉಂಡು. ನೆತ್ತ ವಿರುದ್ಧ ಅಶೋಕ್ ರೈ ಮೇರ್ ಕಾನೂನು ಪೊರ್ಂಬಾಟ ನಡಪಾವೊಂದು ಉಲ್ಲೆರ್. ನೇರ್ದ್ ಪಿರವು ರಾಷ್ಟ್ರಪತಿಕ್ಕುಲು ಸುಗ್ರೀವಾಜ್ಞೆ ಮುಖೇನ ಕಂಬುಲ ಕೂಟಗ್ ಅವಕಾಶ ಕೊರ್ದಿತ್ತೆರ್. ಅಯಿರ್ದ್ ಬೊಕ್ಕ ತುಳುನಾಡ್ ಡ್ ಕಂಬುಲ ಕೂಟ ನಡತೊಂದು ಉಂಡು. ಪೆಟಾ ಅರ್ಜಿದ ವಿರುದ್ಧ ಮೇಲ್ಮನವಿ ಕೊರಿನ ಅಶೋಕ್ ಕುಮಾರ್ ರೈಕುಲು, ಕಂಬುಲ ಕೂಟಗ್ ಪ್ರಾಚೀನ ಇತಿಹಾಸ ಉಂಡು. ಕಂಬುಲಡ್ ಎರ್ಲೆಗ್ ಹಿಂಸೆ ಆಪುಜಿ.ಅವೆನ್ ಜೋಕುಲೆಲೆಕ್ಕ ಮೋಕೆಡ್ ಸಾಂಕುವ. ಅಂಚಾದ್ ಕಂಬುಲಗ್ ನಿಷೇಧ ಪಾಡರೆ ಬಲ್ಲಿ ಪಂದ್ ಸುಪ್ರೀಂ ಕೋರ್ಟ್ ಗು ರಿಟ್ ಸಂದಾದೆರ್.
pallavi shetty