ದೈವಾರಾಧನೆದ ಬಗೆಟ್ ಅಪಹಾಸ್ಯ ಮಲ್ಪುನಕ್ಲೆನ ಮಿತ್ತ್ ಸರ್ಕಾರ ಕಾನೂನು ಕ್ರಮ ದೆತೊನೊಡು: ರಾಜ್ಯ ಪರವಾನ್ ಸಂಘದ ಬಿನ್ನಾಪು

ಕುಡ್ಲ: ತುಳುನಾಡ್ ದ ದೈವಾರಾಧನೆ ಸಾರ ಸಾರ ವರ್ಷಲೆನ ಇತಿಹಾಸ ಇಪ್ಪುನವು. ಈ ದೈವಾರಾಧನೆದ ಧಾರ್ಮಿಕ ಆಚರಣೆಡ್ ದೈವನರ್ತನ ಸೇವೆನ್ ಎಂಕುಲು ವಂಶಪಾರಂಪರ್ಯವಾದ್ ನಡಪಾವೊಂದು ಬರೊಂದುಲ್ಲ. ಆಂಡ ನಮ್ಮ ರಾಜ್ಯಡ್ ಇಪ್ಪುನ ಕೆಲವೊಂಜಿ ಇಚಾರವಾದಿಲು ತುಳುನಾಡ್ ದ ಧಾರ್ಮಿಕ ಆಚರಣೆ ಆಯಿನ ದೈವಾರಾಧನೆದ ಬಗೆಟ್ ಬೊರ್ಚಾಂದಿನ ಪಾತೆರ್ದ್ ದೈವ ನರ್ತನ ಮಲ್ಪುನ ಸಮುದಾಯದಕ್ಲೆನ್ ಅವಮಾನ ಮಲ್ದೆರ್.

ಆತೆ ಅತ್ತಂದೆ ಈ ಇಚಾರವಾದಿಲು ಮಾಸಾಶನ ಕೊರಿಯೆರೆ ಬಲ್ಲಿ ಪಂದ್ ಪಂತೆರ್. ಉಂದು ತಪ್ಪುಪಂದ್ ಅಕುಲು ತೆರಿಪಾದೆರ್. ನಮ್ಮ ನಾಡ್ ದ ಧಾರ್ಮಿಕ ನಂಬಿಕೆದ ದೈವಾರಾಧನೆದ ಬಗೆಟ್ಟ್ ಸಾರ್ವಜನಿಕ ವೇದಿಕೆಡ್, ಮೆರವಣಿಗೆಡ್, ಸಾಮಾಜಿಕ ಜಾಲತಾಣಡ್, ಇಲ್ಲ್ ಇಲ್ಲದ ಮನರಂಜನೆ ಲೇಸ್ ಡ್ ಎಲ್ಯ ರೀತಿಡ್ ತೂಪುನೆನ್ ಬೊಕ್ಕ ಧಾರ್ಮಿಕ ನಂಬಿಕೆನ್ ಅಪಹಾಸ್ಯ ಮಲ್ಪುನಕ್ಲೆನ ವಿರುದ್ಧ ಸರ್ಕಾರ ಕಾನೂನು ಕ್ರಮ ದೆತೊನೊಡು ಪಂದ್ ರಾಜ್ಯ ಪರವನ್ ಸಂಘದ ಡಾ.ರವೀಶ್ ಪಡುಮಲೆ, ಅಧ್ಯಕ್ಷೆರ್ ನಾರಾಯಣ, ಉಪಾಧ್ಯಕ್ಷೆರ್ ಸುರೇಶ್ ಮರೋಡಿ, ಜತೆ ಕಾರ್ಯದರ್ಶಿ ರಾಜು ಮಾರನಾಡು, ಖಜಾಂಚಿ ಅಶೋಕ್ ಇರುವೈಲು, ಗೌರವಾಧ್ಯಕ್ಷೆರ್ ಬಾಬು ಮಿಜಾರು, ಶಿವಾನಂದ ಬೆದ್ರ, ನಾರಾಯಣ ಗಾಂಧಿನಗರ, ಚುಕುಡ, ಪದಾಧಿಕಾರಿಲಾಯಿನ ಯೋಗೇಶ್ ಸಾಣೂರು, ಪ್ರವೀಣ್ ಕಕ್ಕಿಂಜೆ, ರಮೇಶ್ ಮರೋಡಿ ಬೊಕ್ಕ 50ರ್ದ್ ಹೆಚ್ಚ ಸದಸ್ಯೆರ್, ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆ ಬೊಕ್ಕ ಇಂಧನ ಇಲಾಖೆದ ಸಚಿವೆರಾಯಿನ ವಿ. ಸುನಿಲ್ ಕುಮಾರ್ ಮೆರೆಗ್ ಬಿನ್ನಾಪು ಸಂದಾಯೆರ್.