February 2024

ಮಾ.9-10: ಡೊಂಬಿವಲಿ ಶ್ರೀ ಜಗದಂಬಾ ಮಂದಿರಡ್ 9ನೇ ವರ್ಷದ ಉಚ್ಚಯ

ಡೊಂಬಿವಲಿ ಶ್ರೀ ಜಗದಂಬಾ ಮಂದಿರಡ್ 9ನೇ ವರ್ಷದ ಉಚ್ಚಯ ಬೊಕ್ಕ ಪಲ್ಲಕ್ಕಿ ಉಚ್ಚಯ ಮಾ.9 ಬೊಕ್ಕ 10 ಕ್ಕ್ ನಡಪರೆ ಉಂಡು.

ಈ ಲೇಸ್ ಪ್ರಧಾನ ಅರ್ಚಕೆರ್ ರಘಪತಿ ಭಟ್ರೆನ ಮುತಾಲಿಕೆಡ್ ನಡಪರೆ ಉಂಡು.

ಮಾ.8 ಸುಕ್ರಾರ ಮಹಾ ಶಿವರಾತ್ರಿ ನಡಪುಂಡು. ಆನಿ ಬೊಲ್ಪುಗು ರುದ್ರಾಭಿಷೇಕ ಬಯ್ಯಗ್ ಭಜನೆ, ಮಹಾಮಂಗಳಾರತಿ ನಡಪರೆ ಉಂಡು.

ಮಾ.9 ಸನಿಯಾರ ಬೊಲ್ಪುಗು ಸಾಮೂಹಿಕ ಪ್ರಾರ್ತನೆ, ತೋರಣ ಮೂರ್ತ, ಗಣಪತಿ ಹೋಮ, ಶನಿಶಾಂತಿ, ಸಾಮೂಹಿಕ ಸತ್ಯನಾರಾಯಣ ಪೂಜೆ ಮಧ್ಯಾಹ್ನ ಶನಿಪೂಜೆ, ಯಕ್ಷಗಾನ ತಾಳಮದ್ದಳೆ, ಪಲ್ಲಪೂಜೆ ಬಯ್ಯಗ್ ದುರ್ಗಾ ನಮಸ್ಕಾರ ಪೂಜೆ, ಕುಂಕುಮಾರ್ಚನೆ ನಡಪರೆ ಉಂಡು.

ಮಾ.10 ಬೊಲ್ಪುಗು 25 ಕಲಶದ ಕಲಶಾರಾಧನೆ ಪ್ರಧಾನ ಹೋಮ, ಪಂಚಾಮೃತ ಅಭಿಷೇಕ, ನವಕಲಶ, ಕಲಶಾಭಿಷೇಕ, ಉಚ್ಚಯ ಬಲಿ ಕಟ್ಟೆಪೂಜೆ, ಶೋಭಾಯಾತ್ರೆ, ಪಲ್ಲಪೂಜೆ, ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ಬಯ್ಯಗ್ ಕುಂಕುಮಾರ್ಚನೆ ಮಹಾಪೂಜೆ, ರಂಗಪೂಜೆ, ಕೊರಬ್ಬು ಬಾರಗ ತುಳು ಆಟ ನಡಪರೆ ಉಂಡು.

ಮಾ.11 ಸೋಮಾರ ಬೊಲ್ಪುಗು ಸಂಪ್ರೋಕ್ಷಣೆ, ನವಕ ಕಲಶಾಭಿಷೇಕ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ಶ್ರೀಗಂಧ ತೀರ್ಥ ಪ್ರಸಾದ ದೆತೊಂದು ಪ್ರಧಾನ ದೇವೆರೆರಾಯಿನ ಜಗದಂಬಾ ದೇವಿ, ಕಲಿಯುಗ ಒಡೆಯೆ ಶ್ರೀ ಶನೀಶ್ವರ ಮಹಾಗಣಪತಿ, ನಾಗದೇವೆರೆನ ಅನುಗ್ರಹಗ್ ಪಾತ್ರರಾವೊಡು ಪಂದ್ ಮಾನಾದಿಗೆದ ಗುರ್ಕಾರೆ ಹರೀಶ್ ಡಿ ಶೆಟ್ಟಿ, ಗುರ್ಕಾರೆ ದಿವಾಕರ ಜಿ ರೈ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಪಕ್ಷಿಕೆರೆ ಶ್ರೀ ವಿನಾಯಕ ಮಿತ್ರ ಮಂಡಲಿದ ಮುತಾಲಿಕೆಡ್ ಸಾಧಕೆರೆಗ್ ಸನ್ಮಾನ, ದತ್ತಿನಿಧಿ, ಆರೋಗ್ಯ ನಿಧಿ ಪಟ್ಟುನ ಲೇಸ್

ಶ್ರೀ ವಿನಾಯಕ ಮಹಿಳಾ ಮಂಡಳಿ ಉದಿಪನ

ಪಕ್ಷಿಕೆರೆ : ಕುಡ್ಲ ಯುವ ಕಾರ್ಯ ಬೊಕ್ಕ ಕ್ರೀಡಾ ಸಚಿವಾಲಯ ನೆಹರು ಯುವ ಕೇಂದ್ರ, ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ, ಜಿಲ್ಲಾ ಯುವಮಂಡಲ ಪ್ರಶಸ್ತಿ ಗೆಂದಿನ ಪಕ್ಷಿಕೆರೆ ಶ್ರೀ ವಿನಾಯಕ ಮಿತ್ರ ಮಂಡಲದ ಒಟ್ಟುಸೇರಿಗೆಡ್ ಸಾಧಕೆರೆಗ್ ಸನ್ಮಾನ-ಪ್ರತಿಭಾ ಪ್ರದರ್ಶನ, ದತ್ತನಿಧಿ-ಆರೋಗ್ಯ ನಿಧಿ ವಿತರಣೆ ಬೊಕ್ಕ ಶ್ರೀ ವಿನಾಯಕ ಮಹಿಳಾ ಮಂಡಳಿದ ಉದಿಪನ ಲೇಸ್ ಪಕ್ಷಿಕೆರೆ ಶ್ರೀ ಗಣೇಶ ಕಲಾ ಮಂಟಪದ ಚಾವಡಿಡ್ ನಡತ್ಂಡ್.

ಮುಲ್ಕಿ-ಬೆದ್ರ ಶಾಸಕೆರ್ ಉಮಾನಾಥ ಕೋಟ್ಯಾನ್ ಲೇಸ್ ನ್ ಉದಿಪನ ಮಲ್ತ್ ದ್ ಪಾತೆರ್ದ್, ಬೇತೆ ಬೇತೆ ರೀತಿದ ಸಮಾಜ ಸೇವೆ ಮಲ್ತೊಂದು ಇಪ್ಪುನ ಸಾಧಕೆರ್ ಬೊಕ್ಕ ಸಂಘ ಸಂಸ್ಥೆಲೆನ್ ಮಾನಾದಿಗೆ ಮಲ್ಪುನ ಲೇಸ್ ಮೆಚ್ಚೊಡಾಯಿನವು ಪಂದ್ ಪಂಡೆರ್.

ಶ್ರೀ ವಿನಾಯಕ ಮಹಿಳಾ ಮಂಡಳಿದ ಉದಿಪನನ್ ದಕ ಜಿಲ್ಲಾ ಪಂಚಾಯತ್ ಮಾಜಿ ಒತ್ತು ಗುರ್ಕಾರ್ದಿ ಕಸ್ತೂರಿ ಪಂಜ ಮಲ್ತೆರ್.

ಲೇಸ್ ಡ್ ಪಕ್ಷಿಕೆರೆ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಪ್ರಧಾನ ಅರ್ಚಕೆರ್ ಶ್ರೀ ವಾಸುದೇವ ಭಟ್ ಪಂಜ ಮೇರ್ ಎಡ್ಡೆಪ್ಪು ಬಯಕಿಯೆರ್. ಲೇಸ್ ದ ಗುರ್ಕಾರ್ಮೆನ್ ಕಿನ್ನಿಗೋಳಿ ಉದ್ಯಮಿ ಪ್ರರ್ಥ್ವಿರಾಜ್ ಆಚಾರ್ಯ ಒಯಿಸ್ ದಿತ್ತೆರ್.

ಈ ಪೊರ್ತುಡು ಭಾರತೀಯ ವಾಯುಪಡೆತ್ತ ನಿವೃತ್ತ ಯೋಧೆರ್ ಅರವಿಂದ ಆರ್ ಭಟ್ ಕುದ್ಕೋಳಿ, ಹಿರಿಯ ಸಾವಯವ ಕೃಷಿಕೆ ಜಯ ಶೆಟ್ಟಿ ನಲ್ಯಗುತ್ತು ಪಂಜ, ಸಮಾಜ ಸೇವೆದ ಶಿವ ಸಂಜೀವಿನಿ ಸುರಗಿರಿ, ರಾಷ್ಟ್ರೀಯ ಕರಾಟೆ ಪಟು ಸುಶಾನ್ ಜೆ ದೇವಾಡಿಗ, ಶೈಕ್ಷಣಿಕ ಕ್ಷೇತ್ರಡ್ ಸಾಧನೆ ಮಲ್ತಿನ ಕುಮಾರಿ ಸುಶ್ಮಿತಾ ಸಿ ಆಚಾರ್ಯ ಪಕ್ಷಿಕೆರೆ ಮೊಕ್ಲೆಗ್ ಸನ್ಮಾನ ಮಲ್ತ್ ದ್ ಮಾನಾದಿಗೆ ಮಲ್ತೆರ್.

ಕಿನ್ನಿಗೋಳಿ ಉದ್ಯಮಿ ಡೋಲ್ಫಿ ಸಂತುಮಾಯೇರ್ ಆರೋಗ್ಯ ನಿಧಿ ಬೊಕ್ಕ ಕೆಮ್ರಾಲ್ ಶ್ರೀ ಕೋರ್ದಬ್ಬು ದೈವೊಲ್ಯ ಜೀರ್ಣೋದ್ಧಾರ ಬೊಕ್ಕ ಕುಂಭಾಭಿಷೇಕ ಸಮಿತಿದ ಗುರ್ಕಾರೆ ಸಂತೋಷ್ ಬಿ ಶೆಟ್ಟಿ‌ ದತ್ತಿ ನಿಧಿ ಪಟ್ಟಿಯೆರ್.

ಈ ಪೊರ್ತುಡು ಚಾವಡಿಡ್ ಕೆಮ್ರಾಲ್ ಪಂಚಾಯತ್ ಗುರ್ಕಾರೆ ಮಯ್ಯದಿ, ಮಾಜಿ ಜಿಲ್ಲಾ ಪಂಚಾಯತ್ ಸದಸ್ಯೆರ್ ವಿನೋದ್ ಬೊಳ್ಳೂರು,ತಾಲೂಕ್ ಪಂಚಾಯತ್ ಮಾಜಿ ಸದಸ್ಯೆರ್ ದಿವಾಕರ ಕರ್ಕೇರ, ಹಳೆಯಂಗಡಿ ಪಿಸಿಎ ಬ್ಯಾಂಕ್ ಮಾಜಿ ನಿರ್ದೇಶಕೆರ್ ಜಯರಾಮ್ ಆಚಾರ್ಯ, ಸುರಗಿರಿ ಯುವಕ ಮಂಡಲದ ಮಾನಾದಿಗೆದ ಗುರ್ಕಾರೆ ಸುನಿಲ್ ಭಂಡಾರಿ, ತೋಕೂರು ರಜತ ಮಹೋತ್ಸವ ಸಮಿತಿ ಮಹಿಳಾ ಮಂಡಲದ ಮಾನಾದಿಗೆದ ಗುರ್ಕಾರ್ದಿ ಅನುಪಮಾ ಎ ರಾವ್, ತೋಕೂರು ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್ ಮಹಿಳಾ ಕಾರ್ಯಧ್ಯಕ್ಷೆರ್ ಯಶೋಧ ದೇವಾಡಿಗ, ಗಣಪತಿ ಆಚಾರ್ಯ, ಪಿಸಿಎ ಬ್ಯಾಂಕ್ ಕಾರ್ಯನಿರ್ವಾಹಣಾಧಿಕಾರಿ ಹಿಮಕರ, ಶ್ರೀ ವಿನಾಯಕ ಮಹಿಳಾ ಮಂಡಲ ಗುರ್ಕಾರ್ದಿ ಸರಸ್ವತಿ ಶ್ರೀನಿವಾಸ್, ವಿನಾಯಕ ಮಹಿಳಾ ಮಂಡಲ ಗುರ್ಕಾರೆ ಯತೀಶ್ ಬಂಗೇರ ಪಾಲ್ ಪಡೆದಿತ್ತೆರ್.

ಶ್ರೀ ವಿನಾಯಕ ಮಿತ್ರ ಮಂಡಳಿ ಮಾನಾದಿಗೆದ ಗುರ್ಕಾರೆ ಧನಂಜಯ್ ಶೆಟ್ಟಿಗಾರ್ ಎದ್ಕೊನಿಯೆರ್. ಯಜ್ಞೇಶ್ ಪಿ ಶೆಟ್ಟಿಗಾರ್ ಸೊಲ್ಮೆ ಸಂದಾಯೆರ್. ಅಭಿಷೇಕ್ ಶೆಟ್ಟಿ ಲೇಸ್ ದ ಸುಧಾರಿಕೆ ಮಲ್ತೆರ್.

ಉರ್ವಸ್ಟೋರ್ ದ ಅಂಗಡಿಗುಡ್ಡೆ ಕೋಟೆದ ಬಬ್ಬುಸ್ವಾಮಿನ ಪೊಸ ಬಿಂಬ ಪ್ರತಿಷ್ಠೆ, ಬ್ರಹ್ಮಕಲಶ ಉಚ್ಚಯ, ನೇಮದ ಲೆಪ್ಪೋಲೆ ಬುಡುಗಡೆ

ಉರ್ವಸ್ಟೋರ್ ದ ಅಂಗಡಿಗುಡ್ಡೆ ಶ್ರೀ ಕೋಟೆದ ಬಬ್ಬುಸ್ವಾಮಿ ದೈವೊಲ್ಯಡ್ ನಡಪುನ ಪೊಸ ಬಿಂಬ ಪ್ರತಿಷ್ಠೆ, ಬ್ರಹ್ಮಕಲಶ ಉಚ್ಚಯ ಬೊಕ್ಕ ನೇಮದ ಲೆಪ್ಪೋಲೆ ಬುಡುಗಡೆ ಲೇಸ್ ಫೆ.24 ಕ್ಕ್ ಬಯ್ಯಗ್ ದೈವೊಲ್ಯದ ಚಾವಡಿಡ್ ನಡತ್ಂಡ್.

ಈ ಪೊರ್ತುಡು ಜೀರ್ಣೋದ್ಧಾರ ಸಮಿತಿದ ಮಾನಾದಿಗೆದ ಗುರ್ಕಾರೆ, ಶಾಸಕೆರ್ ವೇದವ್ಯಾಸ್ ಕಾಮತ್, ಗುರ್ಕಾರೆ ಉದ್ಯಮಿ ರಾಜ್ ಗೋಪಾಲ್ ರೈ, ಮಾನಾದಿಗೆದ ಸಲಹೆಗಾರೆ, ಮಾಜಿ ಸಚಿವೆರ್ ನಾಗರಾಜ್ ಶೆಟ್ಟಿ, ಮಹಾ ಪೌರೆರ್ ಸುಧೀರ್ ಶೆಟ್ಟಿ, ಕೃಷ್ಣ ಅಡಿಗ ಕದ್ರಿ, ಶ್ರೀ ಜಗದೀಶ್ ಶೇಣವ, ಸಮಿತಿದ ಒತ್ತು ಗುರ್ಕಾರೆ, ಮ.ನ.ಪಾ ಸದಸ್ಯೆರ್ ಗಣೇಶ್ ಕುಲಾಲ್, ಮನೋಜ್ ಕೋಡಿಕಲ್, ಜಯಲಕ್ಷ್ಮಿ ಶೆಟ್ಟಿ, ಕಟ್ವಾನ ಸಮಿತಿ ಗುರ್ಕಾರೆ ವಿನೋದ್ ಶೆಟ್ಟಿ, ಸಮಿತಿ ಕೋಶಾಧಿಕಾರಿ, ಉರ್ವಸ್ಟೋರ್ ಶ್ರೀ ಶಾರದ ಪೂಜಾ ಸಮಿತಿದ ಗುರ್ಕಾರೆ ಉದಯ್ ಕುಮಾರ್, ಉತ್ತರ ಮಹಾ ಶಕ್ತಿ ಕೇಂದ್ರದ ಒತ್ತು ಗುರ್ಕಾರೆ ಚರಿತ್ ಪೂಜಾರಿ, ಸಮಿತಿ ಕಾರ್ಯದರ್ಶಿ, ಮ.ನ.ಪಾ ಸದಸ್ಯೆರ್ ಕಿರಣ್, ಸಾಯಿಪ್ರಸಾದ್ ಶೆಟ್ಟಿ, ನಿವೃತ್ತ ಶಿಕ್ಷಕೆರ್ ಕೆ.ಎ ರೋಹಿಣಿ, ಸಚಿನ್ ರೈ, ಸಮಿತಿ ಕಾರ್ಯದರ್ಶಿ ಹೇಮಾನಂದ ಕೊಡಿಯಾಲ್ ಬೈಲ್, ಅರುಣ್ ಉರ್ವ, ಸಂಘಟನಾ ಕಾರ್ಯದರ್ಶಿ ಸುಬ್ರಮಣಿ ಎಸ್, ಗುರುಪ್ರಸಾದ್ ರಾವ್ ಬೊಕ್ಕ ಗ್ರಾಮದ ಗುರಿಕಾರೆರ್ ದಿನಕರ ದಡ್ಡಲ್ ಕಾಡ್ ಬೊಕ್ಕ ಊರುದ ಭಕ್ತೆರ್ ಪಾಲ್ ಪಡೆದಿತ್ತೆರ್.

ದೇವೆರೆ ಪಾದೊ ಸೇರಿಯೆರೆ ಗಿರಿಜಾ ತೂಮಿನಾಡು

ಮಂಜೇಶ್ವರ: ಕನ್ನಡ ಬೊಕ್ಕ ತುಳು ಚಿತ್ರರಂಗದ ಪುಗರ್ತೆದ ಪೋಷಕೆರ್ ಬೊಕ್ಕ ಹಾಸ್ಯ ನಟೆ ಪ್ರಕಾಶ್ ಕೆ. ತೂಮಿನಾಡು ಮೆರೆನ ಅಮ್ಮ ಗಿರಿಜಾ ಮೇರ್ ಹುಷಾರ್ ದಾಂತೆ ತೀರ್ ಪೋಯೆರ್.

ಮೆರೆನ ಅಕೇರಿದ ಕ್ರಿಯೆ ಅಂಗಾರೆ ಬೊಲ್ಪುಗು (ಇನಿ) ತೂಮಿನಾಡು ಇಲ್ಲಲ್ ನಡಪರೆ ಉಂಡು ಪಂದ್ ಕುಟುಂಬ ಸದಸ್ಯೆರ್ ತೆರಿಪಾದೆರ್.

ಬೊಂಬೈ ಕಲಾ ಸೌರಭದ 31ನೇ ವರ್ಷಾಚರಣೆ, ಸರಣಿ ಸಂಗೀತ ಉಚ್ಚಯದ ಉದಿಪನ

ಬೊಂಬೈ: ಪಿದಯಿ ಊರುದ ಕನ್ನಡಿಗೆರೆನ ಪುಗರ್ತೆದ ಬೊಕ್ಕ ಸಾಂಸ್ಕೃತಿಕ ರಾಯಭಾರಿಯಾದ್ ಜನಸೇವೆಡ್ ಇಪ್ಪುನ ಕರಿನ ಮೂಜಿ ದಶಕರ್ದ್ ಭಾರತೀಯ ಸಂಸ್ಕಾರ ಸಂಸ್ಕೃತಿ ಇಸೇಸವಾದ್ ಕರುನಾಡ ಕಲೆನ್ ಒರಿಪಾವುನ ಅವೆತೊ ಸಂಗೀತ ನೃತ್ಯ ಕಲಾವಿದೆರೆಗ್ ಸಕಾಲಡ್ ಸಹಾಯಹಸ್ತ ಕೊರ್ದು ಸ್ವಂದಿಸಾವುನ ಕಲಾ ಸೌರಭ ಸಂಸ್ಥೆ ಇತ್ತೆ ಶಿರ್ಡಿ ಶ್ರೀ ಸಾಯಿಬಾಬಾನ ಸಾನಿಧ್ಯಡ್ ವೈವಿಧ್ಯಮಯ ಬಹುಭಾಷಾ ಸಾಂಸ್ಕೃತಿಕ ಲೇಸ್ ನ್ ಪ್ರದರ್ಶನ ಮಲ್ಪುನ ರೀತಿ ನೀತಿ ತೂದು ಮನಸ್ ದಿಂಜಿಂಡ್ ಪಂದ್ ಸಾಯಿ ಪ್ಯಾಲೆಸ್ ಹೋಟೆಲ್ ಸಮೂಹದ ಆಡಳಿತ ನಿರ್ದೇಶಕೆರ್ ಉದಯ ಶೆಟ್ಟಿ ತೆರಿಪಾದೆರ್.

ಮೇರ್ ಶಿರ್ಡಿ ಸಾಯಿ ನಗರ ಶ್ರೀ ಸಾಯಿಬಾಬಾ ಸಂಸ್ಥಾನಮ್ ಮುತಾಲಿಕೆದ ಸಾಯಿ ಸಭಾಂಗಣಡ್ ಕರಿನ ಸುಕ್ರಾರ (ಫೆ.16) ನಡತಿನ ಕಲಾ ಸೌರಭದ 31ನೇ ವರ್ಷದ ಸಾಂಸ್ಕೃತಿಕ ಸಂಗೀತ ಉಚ್ಚಯದ ಸರಣಿ ಲೇಸ್ ನ್ ತುಡರ್ ಅರ್ಲಾದ್ ಉದಿಪನ ಮಲ್ತ್ ದ್ ಪಾತೆರಿಯೆರ್.

ಶಿರ್ಡಿ ಸಂಸ್ಥಾನಮ್ ಸಾಂಸ್ಕೃತಿಕ ವಿಭಾಗದ ಅಧಿಕಾರಿ ಎಸ್ ಜಾಧವ್ ಎಡ್ಡೆಪ್ಪು ಬಯಕಿಯೆರ್.

ಪುಷ್ಪಾಂಜಲಿ ನೃತ್ಯ ಅಕಾಡೆಮಿದ ನಿರ್ದೇಶಕೆರ್ ಗುರು ವಿದ್ವಾನ್ ಕೋಲಾರ ರಮೇಶ್, ಶಿರ್ಡಿ ಸಾಯಿ ಪ್ಯಾಲೆಸ್ ಹೋಟೆಲ್ ದ ಆಡಳಿತಾಧಿಕಾರಿ ಶಶಿ ಶೆಟ್ಟಿ, ಸುರೇಶ್ ಕೋಟ್ಯಾನ್, ಪುಣೆದ ಉದ್ಯಮಿ ಜಗದೀಶ್ ಪೂಜಾರಿ, ಕಲಾ ಸೌರಭ ಭಜನಾ ಕೂಟದ ಮುಖ್ಯಸ್ಥೆ ಸುಶೀಲ ಎಸ್ ದೇವಾಡಿಗ, ಸಂಗೀತ ನಿರ್ದೇಶಕೆರ್ ಶೇಖರ್ ಸಸಿಹಿತ್ಲು, ಗಾಯಕೆರ್ ಪ್ರಮೋದ್ ಕಾಂಬ್ಳಿ ಚಾವಡಿಡ್ ಇತ್ತೆರ್.

ಸಂಗೀತ ನಿರ್ದೇಶಕೆರ್ ಕಲಾ ಸೌರಭ ಕೂಟದ ನಿರ್ದೇಶಕೆರ್ ಪದ್ಮನಾಭ್ ಸಸಿಹಿತ್ಲು ಕಲಾ ನಿರ್ದೇಶಕೆರೆನ್ ಪರಿಚಯಿಸಾದ್ ಪ್ರಸ್ತಾವನೆ ಮಲ್ತೆರ್.

ಕಲಾ ಸೌರಭದ ಬೊಂಬೈ ಬೊಕ್ಕ ಬೆಂಗ್ಲೂರುದ 70ರ್ದ್ ಎಚ್ಚ ಕಲಾವಿದೆರ್ ಸುರುತ್ತ ದಿನ ಶ್ರೀ ಸಾಯಿ ನಗರ, ಶ್ರೀ ಶನಿ ಸಿಂಗ್ನಪೂರ್ ಎತ್ತ್ ದ್ ಶ್ರೀ ಶನಿ ದೇವೆರೆನ ಪೂಜೆ ನಡಪಾದ್ ಪ್ರಾರ್ತನೆ ರೂಪವಾದ್ ಮಹಿಳಾ ಕೂಟದಕ್ಲೆರ್ದ್ ಭಜನಾ ಲೇಸ್ ನಡತ್ಂಡ್. ಸುರುಕು ಸುಶೀಲ ದೇವಾಡಿಗ, ಗೀತ ದೇವಾಡಿಗ ಬೊಕ್ಕ ಸಮೂಹ ಶ್ರೀ ಸಾಯಿ ಸ್ತುತಿ ಭಜನಾವಳಿ ನಡತ್ಂಡ್.

ಗುರು ವೈಶಾಲಿ ಜೋಶಿ ಮೇರ್ ಕಥಕ್ ಶೈಲಿಡ್ ಗಣೇಶ್ ವಂದನ ಬೊಕ್ಕ ವಿದೂಷಿ ಆಶಾ ನಂಬಿಯಾರ್ ನಿರ್ದೇಶನಡ್ ವೈಷ್ಣವಿ ಕಲಾ ಕ್ಷೇತ್ರ ಬೊಂಬೈ ಕೂಟ ಭಕ್ತಿ ಪ್ರಧಾನ ಗೀತೆದ ಒಡಿಸ್ಸಿ ನೃತ್ಯ ಬೊಕ್ಕ ಕಲಾ ಸೌರಭದ ಸಂಗೀತ ಕಲಾವಿದೆರ್ ಬಹುಭಾಷೆದ ಸಾಯಿ ಸ್ತುತಿ ಭಕ್ತಿ ರಸಮಂಜರಿ ನಡತ್ಂಡ್.

ಸಂಗೀತ ವರ್ಗಡ್ ನಿರ್ದೇಶಕೆರ್ ಶೇಖರ್ ಸಸಿಹಿತ್ಲು, ಚಂದು ಪಂಚಾಲ್, ದಿನೇಶ್ ಕಂಡೇಕರ್ ಬೊಕ್ಕ ಚಾರುಕೆಶ್ ಬಂಗೇರ ಪಾಲ್ ಪಡೆದಿತ್ತೆರ್.

ಗಾಯನಡ್ ಪ್ರಮೋದ್ ಕಾಂಬ್ಳಿ, ಸದಾಶಿವ್ ಪೂಜಾರಿ, ವಿದ್ಯಾ ಅಲಂಕಾರ್, ಶ್ರದ್ಧಾ ದೇಸಾಯಿ, ಬೇಬಿ ಸಮೃದ್ಧಿ ಪೂಜಾರಿ, ಸುಮಧುರ ಗೀತೆದೊಟ್ಟಿಗೆ ಶ್ರೀ ಸಾಯಿ ಸ್ತುತಿನ್ ಪಂಡೆರ್.

ರಡ್ಡನೇದಾದ್ ನಾಟ್ಯಾಂಕಿತ ಕಲಾ ಮಂದಿರದ ನಿರ್ದೇಶಕಿ ಕು. ಅಂಕಿತ ನಾಯಕ್ ಬೊಕ್ಕ ಕು.ಸಪ್ನಾ ತಾಪ ಬಳಗ ಯಕ್ಷಕುಣಿತ ಬೊಕ್ಕ ಭಸ್ಮಾಸುರ ಮೋಹಿನಿ ಯಕ್ಷ ನೃತ್ಯರೂಪಕ, ಅಕೇರಿಗ್ ಪುಷ್ಪಾಂಜಲಿ ನೃತ್ಯ ಕಲಾ ಅಕಾಡಮಿ ಬೆಂಗ್ಲೂರು ಕಲಾವಿದೆರ್ ಅಂತರಾಷ್ಟ್ರೀಯ ಪುಗರ್ತೆದ ನೃತ್ಯಗುರು ವಿದ್ವಾನ್ ಕೋಲಾರ ರಮೇಶ್ ನಿರ್ದೇಶನಡ್ ಕುವೆಂಪು ಮಹಾ ಕಾವ್ಯ ಆಧಾರದ ಸಂಪೂರ್ಣ ರಾಮಾಯಣ ದರ್ಶನಂ ನೃತ್ಯ ರೂಪಕ ನಡತ್ಂಡ್.

ಸಂಗೀತ ಉಚ್ಚಯದ ಒಟ್ಟು ಲೇಸ್ ನ್ ಬಹುಭಾಷಾ ನಟಿ ಸಂಘಟಕಿ ಚಂದ್ರಾವತಿ ವಸಂತ್ ಹಿಂದಿ ಮರಾಠಿ ಭಾಷೆಡ್ ಸುಧಾರಿಕೆ ಮಲ್ತೆರ್. ಸರಸ್ವತಿ ಬಿಲ್ಲವ, ಸರೋಜ ನಾಯಕ್, ಸವಿತಾ ಪೂಜಾರಿ, ಸಚಿನ್, ಪೃಥ್ವಿರಾಜ್ ಮುಂಡ್ಕೂರು ಸಹಕಾರ ಮಲ್ತೆರ್. ಗುರು ವೈಶಾಲಿ ಜೋಶಿ ಸೊಲ್ಮೆ ಸಂದಾಯೆರ್. ಸಾಯಿ ನಾಮಸ್ತುತಿದೊಟ್ಟಿಗೆ ಲೇಸ್ ಮುಗಿತಲ ಆಂಡ್.

ಮಾ.3: ಬ್ರಹ್ಮಾವರ ಬಿಲ್ಲವ ಸಮಾಜ ಸೇವಾ ಸಂಘ (ರಿ.) ದ ಮುತಾಲಿಕೆಡ್ ಬ್ರಹ್ಮಶ್ರೀ ನಾರಾಯಣಗುರು ಮಂದಿರದ ಉದಿಪನ, ಗುರುಕ್ಲೆನ ಮೂರ್ತಿ ಪ್ರತಿಷ್ಠೆ

ಬ್ರಹ್ಮಾವರ ಬಿಲ್ಲವ ಸಮಾಜ ಸೇವಾ ಸಂಘ (ರಿ.) ದ ಮುತಾಲಿಕೆಡ್ ಬ್ರಹ್ಮಶ್ರೀ ನಾರಾಯಣಗುರು ಮಂದಿರದ ಉದಿಪನ ಬೊಕ್ಕ ಗುರುಕ್ಲೆನ ಮೂರ್ತಿ ಪ್ರತಿಷ್ಠೆ ಮಾ.3 ಐತಾರ ಬ್ರಹ್ಮಾವರ ನಾರಾಯಣಗುರು ಸಭಾಭವನಡ್ ನಡಪರೆ ಉಂಡು.

ಸೋಲೂರು ಮಠ ಆರ್ಯ ಈಡಿಗ ಸಮಾಜದ ಪೀಠಾಧಿಪತಿ ಶ್ರೀ ವಿಖ್ಯಾತನಂದ ಸ್ವಾಮೀಜಿ ಆಶೀರ್ವಚನ ಕೊರಿಯೆರೆ ಉಲ್ಲೆರ್. ಪ್ರಾಥಮಿಕ ಬೊಕ್ಕ ಪ್ರೌಢ ಶಿಕ್ಷಣ ಸಚಿವೆರ್ ಲೇಸ್ ದ ಮಧು ಬಂಗಾರಪ್ಪ ಲೇಸ್ ಉದಿಪನ ಮಲ್ಪುವೆರ್. ಬ್ರಹ್ಮಾವರ ಬಿಲ್ಲವ ಸಮಾಜ ಸೇವಾ ಸಂಘ (ರಿ.) ದ ಗುರ್ಕಾರೆ ಬಿ‌.ಎನ್ ಶಂಕರ ಪೂಜಾರಿ ಲೇಸ್ ದ ಗುರ್ಕಾರ್ಮೆನ್ ಒಯಿಸೊನ್ವೆರ್.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಬ್ರಹ್ಮಾವರ ಬಿಲ್ಲವ ಸಮಾಜ ಸೇವಾ ಸಂಘ (ರಿ‌.) ದ ಗುರ್ಕಾರೆ, ಪದುಕೆರ್, ಸರ್ವಸದಸ್ಯೆರ್ ಬೊಕ್ಕ ಮಹಿಳಾ ಘಟಕ, ಯುವ ವೇದಿಕೆ ಲೆಪ್ಪೋಲೆಡ್ ತೆರಿಪಾದೆರ್.

ಜೆಸಿಐ ಕೊಕ್ಕಡ ಕಪಿಲ ಘಟಕದ ಮುತಾಲಿಕೆಡ್ “ಪರೀಕ್ಷೆ ಬರೆಪುನೆ ಎಂಚ ?” ಪನ್ಪುನ ತರಬೇತಿ

ಜೆಸಿಐ ಕೊಕ್ಕಡ ಕಪಿಲ ಘಟಕದ ಮುತಾಲಿಕೆಡ್ ದಿವ್ಯಜ್ಯೋತಿ ಆಂಗ್ಲ ಮಾಧ್ಯಮ ಶಾಲೆ ಕಾಯರ್ತ್ತಡ್ಕದ ವಿದ್ಯಾರ್ಥಿಲೆಗ್ “ಗೆಲುವಿಗೆ ಇನ್ನೊಂದೇ ಮೆಟ್ಟಿಲು” ಪನ್ಪುನ ಶೀರ್ಷಿಕೆಡ್ “ಪರೀಕ್ಷೆ ಬರೆಪುನೆ ಎಂಚ?” ಪನ್ಪುನ ತರಬೇತಿ ಲೇಸ್ ನಡತ್ಂಡ್.

ಈ ತರಬೇತಿ ಲೇಸ್ ನ್ ಸಂಪನ್ಮೂಲ ವ್ಯಕ್ತಿ ಜೆಸಿಐ ವಲಯ ತರಬೇತಿದಾರೆ ಜೆಸಿಐ Sen ಪ್ರದೀಪ್ ಬಾಕಿಲ ಮೇರ್ ನಡಪಾದ್ ಕೊರಿಯೆರ್.

ಈ ತರಬೇತಿ ಲೇಸ್ ದ ಚಾವಡಿಡ್ ಗುರ್ಕಾರೆ ಜೆ ಸಿ ಎಚ್‌ ಜಿ ಎಫ್ ಸಂತೋಷ್ ಜೈನ್, ಕಾರ್ಯದರ್ಶಿ ಅಕ್ಷತ್ ರೈ, ಮಲ್ಲ ಬಿನ್ನೆರಾಯಿನ ಸಿಸ್ಟರ್ ದಿವ್ಯ ಮರಿಯಾ, ಮುಖ್ಯೋಪಾಧ್ಯಾಯೆರ್ ಕಾಯರ್ತ್ತಡ್ಕ ಲೇಸ್ ದ ನಿರ್ದೇಶಕೆರ್ ಜೆ ಸಿ ಪಿ ಟಿ ಸಬಾಸ್ಟಿನ್ ಇತ್ತೆರ್.

ಈ ಪೊರ್ತುಡು ಪೂರ್ವ ಗುರ್ಕಾರೆ ಜೆ ಸಿ ಜೆ ಎಫ್ ಎಂ ಕೆ ಶ್ರೀಧರ್ ರಾವ್, ಕೋಶಾಧಿಕಾರಿ ವಿದ್ಯೇಂದ್ರ, ಪ್ರಿಯಾ ಜೆ ಅಮೀನ್, ಶಾಲೆದ ಶಿಕ್ಷಕ ವೃಂದ, ಆಡಳಿತ ಮಂಡಳಿ ಸದಸ್ಯೆರ್ ಬೊಕ್ಕ ಲೇಸ್ ದ ಕೇಂದ್ರ ಬಿಂದುಲಾಯಿನ ವಿದ್ಯಾರ್ಥಿ ಮಿತ್ರೆರ್ ಪಾಲ್ ಪಡೆದಿತ್ತೆರ್.

ವಿದ್ಯಾರ್ಥಿಲೆಗ್ ತೀಪೆತಿಂಡಿನ್ ಜೆಸಿ ಜಾನ್ಸನ್ ಪಟ್ಟಿಯೆರ್. ಜೆಸಿ ವಾಣಿ ಜೆಸಿ ಶ್ರವಣ್ ಓದಿಯೆರ್. ಜೆಸಿ ಎಚ್ ಜಿ ಎಫ್ ಸಂತೋಷ್ ಜೈನ್ ಎದ್ಕೊನಿಯೆರ್. ಜೆ ಸಿ ಪಿಟಿ ಸಬಾಸ್ಟಿನ್ ಸೊಲ್ಮೆ ಸಂದಾಯೆರ್.