February 2024

ಕೊಲಕಾಡಿ ಕಾಳಿಕಾಂಬಾ ದೇವಸ್ಥಾನ ಜೀರ್ಣೋದ್ಧಾರಗ್ ಮರತ್ತ ಶಿಲ್ಪ ಬೇಲೆಗ್ ಚಾಲನೆ

ಮುಲ್ಕಿ: ಕೊಲಕಾಡಿ ಶ್ರೀ ಕಾಳಿಕಾಂಬಾ ದೇವಸ್ಥಾನದ ಜೀರ್ಣೋದ್ಧಾರದ ಬೇಲೆಗ್ ಪೂರಕವಾದ್ ಗುರುವಾರ ಮರತ್ತ ಬೇಲೆಗ್ (ಕಾಷ್ಠಶಿಲ್ಪ) ಚಾಲನೆ ಕೊರಿಯೆರ್. ಕಾಷ್ಠಶಿಲ್ಪಿ ಕಲ್ಲಮುಂಡ್ಕೂರು ವಾಸುದೇವ ಆಚಾರ್ಯ ಮೇರ್ ಶಿಲ್ಪಪೂಜೆ ಮಲ್ಪುನ ಮುಕೇನ ಮರತ್ತ ಶಿಲ್ಪದ ಬೇಲೆಗ್ ಚಾಲನೆ ಕೊರಿಯೆರ್.

ಈ ಪೊರ್ತುಡು ಜೀರ್ಣೋದ್ಧಾರ ಸಮಿತಿದ ಗೌರವಾಧ್ಯಕ್ಷೆರ್ ಪ್ರಕಾಶ್ ಆಚಾರ್ಯ ಕಾರ್ಲ, ಸೀತಾರಾಮ ಆಚಾರ್ಯ ಬೆಳುವಾಯಿ, ದಿನೇಶ್ ಆಚಾರ್ಯ ಕಿನ್ನಿಗೋಳಿ, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಸುಬ್ರಾಯ ಆಚಾರ್ಯ, ಉಪಾಧ್ಯಕ್ಷೆರ್ ದಾಮೋದರ ಆಚಾರ್ಯ, ಪ್ರಶಾಂತ್ ಆಚಾರ್ಯ, ಕಾರ್ಯಾಧ್ಯಕ್ಷೆರ್ ಸುಧೀರ್ ಆಚಾರ್ಯ, ಆಡಳಿತ ಮೊಕ್ತೇಸರೆರ್ ಸುಧಾಕರ ಆಚಾರ್ಯ, ಕೂಡುವಳಿಕೆ ಮೊಕ್ತೇಸರೆರ್ ಸದಾಶಿವ ಆಚಾರ್ಯ, ಮುಲ್ಕಿ ವಿಶ್ವಕರ್ಮ ಸಮಾಜ ಸೇವಾ ಸಂಘದ ಅಧ್ಯಕ್ಷೆರ್ ಜಗದೀಶ ಆಚಾರ್ಯ, ಮಹಿಳಾ ಸಮಿತಿದ ಅಧ್ಯಕ್ಷೆರ್ ಶಶಿಕಲಾ ಜಗದೀಶ ಆಚಾರ್ಯ, ಕೊಲಕಾಡಿ ಮಹಿಳಾ ಮಂಡಳಿದ ಅಧ್ಯಕ್ಷೆರ್ ಪ್ರೇಮ ಸುಧಾಕರ ಆಚಾರ್ಯ, ವಾಸ್ತುಶಿಲ್ಪಿ ಉಮೇಶ್ ಆಚಾರ್ಯ ಮುಂಚೂರು, ಶಿಲ್ಪಿ ಶಿವಪ್ರಸಾದ್ ಆಚಾರ್ಯ ಅಂಚೆನೆ ಜೀರ್ಣೋದ್ಧಾರ ಸಮಿತಿದ, ಆಡಳಿತ ಮಂಡಳಿದ ,ಕೂಡುಕಟ್ಟ್, ಯುವಕ ವೃಂದ , ಜೈ ಜಗದಂಬಾ ಯಕ್ಷಗಾನ ಮಂಡಳಿ, ಮಹಿಳಾ ಬಳಗದ ಸದಸ್ಯೆರ್, ಊರು ಬೊಕ್ಕ ಪರವೂರುದ ಭಕ್ತೆರ್ ಇತ್ತೆರ್.

ಕಲ್ಪುನ ಜೋಕುಲು ಮೊಬೈಲ್ ಬುಡೊಡು, ಶಿಕ್ಷಣದೊಟ್ಟಿಗೆ ಸಂಸ್ಕೃತಿನ್ ಕಲ್ಪೊಡು : ಡಾ| ಉದಯ ಕುಮಾರ್

ಪಾವಂಜೆ ದೇವಾಡಿಗ ಸಮಾಜ ಸೇವಾ ಸಂಘದ ಮುತಾಲಿಕೆಡ್ ವಿದ್ಯಾರ್ಥಿವೇತನ ವಿತರಣೆ ಬೊಕ್ಕ ಸನ್ಮಾನ ಲೇಸ್

ಹಳೆಯಂಗಡಿ : “ಜೋಕುಲೆನ ಕಲ್ಪುನ ಆಯ್ಕೆದ ವಿಷಯೊಡು ಪೋಷಕೆರ್ ಬಲವಂತ ಮಲ್ಪುನ ಸರಿ ಅತ್ತ್, ಅಕ್ಲೆನ ಕಲ್ಪುನ ಆಯ್ಕೆನ್ ಅಕ್ಲೆನ ವಿವೇಚನೆಗ್ ಬುಡೊಡು. ನೆತ್ತೊಟ್ಟಿಗೆ ಮೊಬೈಲ್ ಗಲಸುನೆನ್ ಕಮ್ಮಿ ಮಲ್ತ್ಂಡ್ ಜೋಕುಲು ಸುಸಂಸ್ಕೃತರಾಪೆರ್” ಪಂದ್ ಕುಡ್ಲ ಸೈಂಟ್ ಆಗ್ನೇಸ್ ಕಾಲೇಜ್ ದ ಹಿಂದಿ ವಿಭಾಗದ ಅಸಿಸ್ಟೆಂಟ್ ಪ್ರೊಫೆಸರ್ ಡಾ| ಉದಯ ಕುಮಾರ್ ಮೇರ್ ಅಭಿಪ್ರಾಯ ತೆರಿಪಾಯೆರ್.

ಮೇರ್ ಇಂಚಿಪ್ಪ ದೇವಾಡಿಗ ಸಮಾಜ ಸೇವಾ ಸಂಘ (ರಿ.), ಪಾವಂಜೆ, ದೇವಾಡಿಗ ಯುವ ವೇದಿಕೆ ಪಾವಂಜೆ, ದೇವಾಡಿಗ ಮಹಿಳಾ ವೇದಿಕೆ ಪಾವಂಜೆ ಬೊಕ್ಕ ದೇವಾಡಿಗ ಸೇವಾ ಟ್ರಸ್ಟ್ (ರಿ.) ಪಾವಂಜೆದ ಒಟ್ಟುಸೇರಿಗೆಡ್ ನಡತಿನ ವಿದ್ಯಾರ್ಥಿವೇತನ ವಿತರಣೆ ಬೊಕ್ಕ ಸನ್ಮಾನ ಲೇಸ್ ದ ತುಡರ್ ಅರ್ಲಾದ್ ಪಾತೆರಿಯೆರ್‌.

ಮಲ್ಲ ಬಿನ್ನೆರಾದ್ ಬತ್ತಿನ ಅತ್ತಾವರ ಸರಕಾರಿ ಪ್ರೌಢಶಾಲೆದ ಸಹಾಯಕ ಶಿಕ್ಷಕಿ ವೀಣಾ ಗಣೇಶ್ ಪಾತೆರ್ದ್, “ಜವನೆರ್, ಜೋಕುಲು ಸಂಘಟನೆಡ್ ಪಾಲ್ ಪಡೆದ್ ಪೋಷಕೆರೆನ್, ಹಿರಿಯೆರೆನ್ ಗೌರವಿಸಾವುನ ಸಂಸ್ಕಾರನ್ ಪೋಷಕೆರ್ ಜೋಕ್ಲೆಗ್ ಕಲ್ಪಾವೊಡು” ಪಂದ್ ಪಂಡೆರ್.

ಶಿರಡಿ ಸಾಯಿ ಬಾಬಾ ಫ್ಯಾಬ್ರಿಕೇಶನ್ ಬೊಕ್ಕ ಡೆವಲಪರ್ಸ್ ಕುಡ್ಲದ ಮಾಲಕೆರ್, ಉದ್ಯಮಿ ಅಮೃತ್ ಕದ್ರಿ ಪಾತೆರ್ದ್, ಪಾವಂಜೆ ದೇವಾಡಿಗ ಸಂಘದ ಅಭಿವೃದ್ಧಿಗ್ ತನ್ನ ಕೈಟ್ಟ್ ಆಯಿನಾತ್ ಸಹಕಾರ ಕೊರ್ಪೆ ಪಂದ್ ಲೇಸ್ ಗ್ ಎಡ್ಡೆಪ್ಪು ಬಯಕಿಯೆರ್.

ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಲ್ಯದ ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶ ಉಚ್ಚಯ ಸಮಿತಿದ ಗುರ್ಕಾರೆ ರಘು ಕೆ.ದೇವಾಡಿಗ ಮಲ್ಲ ಬಿನ್ನೆರಾದ್ ಬತ್ತ್ ದ್ ಲೇಸ್ ಗ್ ಎಡ್ಡೆಪ್ಪು ಬಯಕಿಯೆರ್.

ಲೇಸ್ ದ ಗುರ್ಕಾರ್ಮೆನ್ ಒಯಿಸ್ ದಿತ್ತಿನ ಪಾವಂಜೆ ದೇವಾಡಿಗ ಸಂಘದ ಗುರ್ಕಾರೆ ರಾಮದಾಸ್ ಪಾವಂಜೆ ಪಾತೆರ್ದ್, ಜವನೆರ್ ಸಂಘಟನೆಡ್ ಪಾಲ್ ಪಡೆಯೆರೆ ಪೋಷಕೆರ್ ಮಲ್ಲ ಪಾತ್ರ ಒಯಿಸೊನೊಡು ಪಂದ್ ಪಂಡೆರ್.

ಲೇಸ್ ಡ್ ಎಸ್.ಎಸ್.ಎಲ್.ಸಿ. ಬೊಕ್ಕ ಪಿ.ಯು.ಸಿ. 2022-23ನೇ ಸಾಲ್ ಡ್ ಎಚ್ಚ ಮಾರ್ಕ್ಸ್ ಪಡೆಯಿನ ಒಟ್ಟು 21 ಜನ ಕಲ್ಪಾರ್ಥಿಲೆಗ್ ಕಿನ್ನಿಗೋಳಿ ದಿ. ಉಮ್ಮಕ್ಕ ಮೊಯಿಲ್ದಿ ನೆಂಪುಗಾದ್ ಅರೆನ ಮಗೆ ಯಾದವ ದೇವಾಡಿಗೆರ್ನ ಕೊಡುಗೆಡ್ ವಿದ್ಯಾರ್ಥಿವೇತನನ್ ಪಟ್ಟಿಯೆರ್.

ಈ ಪೊರ್ತುಡು ನಿವೃತ್ತ ಶಿಕ್ಷಕಿ ಸಮಾಜ ಸೇವಕಿ ಮೀರಾ ಬಾಯಿ ಕೆ., ಪ್ರಗತಿಪರ ಕೃಷಿಕೆರ್ ಗಂಗಾಧರ ದೇವಾಡಿಗ ಬೆಳ್ಳಾಯಿರು ಬೊಕ್ಕ ಅಂತರಾಷ್ಟ್ರೀಯ ಸೌಂದರ್ಯ ರಾಣಿ ಪಂತೊಡು ಗೆಂದಿನ ಕುಮಾರಿ ಯಶಸ್ವಿನಿ ದೇವಾಡಿಗ ಕುಳಾಯಿ ಮೊಕ್ಲೆಗ್ ಸನ್ಮಾನ ನಡತ್ಂಡ್.

2022-23ನೇ ಸಾಲ್ ಡ್ ಎಸ್.ಎಸ್.ಎಲ್.ಸಿ.ಡ್ ಎಚ್ಚ ಮಾರ್ಕ್ಸ್ ಪಡೆಯಿನ ವಿನೀತ್ ದೇವಾಡಿಗೆರೆನ, ಪದ್ಮನೂರು ದಿ| ಬಿ.ಜಿ.ದೇವಾಡಿಗ ನೆಂಪುಗಾದ್ ಬೊಕ್ಕ ಪಿ.ಯು.ಸಿ.ಡ್ ಎಚ್ಚ ಮಾರ್ಕ್ಸ್ ಪಡೆಯಿನ ಅಡ್ಯಾರ್ ಪ್ರಖ್ಯಾತ್ ಪ್ರಶಾಂತ್, ದಿ| ಕಮಲ ಬೊಕ್ಕ ಕೊರಗ ದೇವಾಡಿಗ ನೆಂಪುಗಾದ್ ಪ್ರತಿಭಾ ಪುರಸ್ಕಾರ ಕೊರಿಯೆರ್. ಬೊಕ್ಕ ವಾರ್ಷಿಕ ಕ್ರೀಡಾಕೂಟಡ್ ಗೆಂದಿನಕ್ಲೆಗ್ ಇನಾಮು ಕೊರಿಯೆರ್.

ಕಟ್ವಾನ ಸಮಿತಿದ ಪ್ರಧಾನ ಕಾರ್ಯದರ್ಶಿ ಜನಾರ್ದನ್ ಪಡುಪಣಂಬೂರು, ದೇವಾಡಿಗ ಯುವ ವೇದಿಕೆದ ಗುರ್ಕಾರೆ ಅಶ್ವಿನ್ ಪಡುಮನೆ, ದೇವಾಡಿಗ ಮಹಿಳಾ ವೇದಿಕೆದ ಗುರ್ಕಾರೆ ವಿಮಲ ಕೆ.ದೇವಾಡಿಗ, ದೇವಾಡಿಗ ಸೇವಾ ಟ್ರಸ್ಟ್ ದ ಗುರ್ಕಾರೆ ರಮೇಶ್ ದೇವಾಡಿಗ ತೋಕೂರು ಚಾವಡಿಡ್ ಪಾಲ್ ಪಡೆದಿತ್ತೆರ್.

ಸನ್ಮಾನ ಪತ್ರನ್ ಕ್ರಮವಾದ್ ಮಹಿಳಾ ವೇದಿಕೆದ ಕಾರ್ಯದರ್ಶಿ ಮಂಜುಳಾ ಶುಭ್ರತ್, ಸದಸ್ಯೆರ್ ಅನುಪಮಾ ಅಶೋಕ್ ಬೊಕ್ಕ ಕ್ರೀಡಾ ಬೊಕ್ಕ ಸಾಂಸ್ಕ್ರತಿಕ ಕಾರ್ಯದರ್ಶಿ ವಿಜಯಲಕ್ಷ್ಮಿ ಜನಾರ್ದನ್ ಓದಿಯೆರ್. ದೇವಾಡಿಗ ಯುವ ವೇದಿಕೆದ ಕಾರ್ಯದರ್ಶಿ ನಿಖಿಲ್ ಹಳೆಯಂಗಡಿ ವಿದ್ಯಾರ್ಥಿವೇತನದ ಪಟ್ಟಿನ್ ಬೊಕ್ಕ ದೇವಾಡಿಗ ಸೇವಾ ಟ್ರಸ್ಟ್ ದ ಗುರ್ಕಾರೆ ರಮೇಶ್ ತೋಕೂರು ಗೊಬ್ಬುದ ಪಂತೊಡ್ ಗೆಂದಿನಕ್ಲೆನ ಪಟ್ಟಿನ್ ಓದಿಯೆರ್.

ಶೈಲಜಾ ವಾಮನ್, ರೋಹಿಣಿ ರಮೇಶ್ ಬೊಕ್ಕ ರಾಜೀವಿ ವಾಮನ್ ಮೊಕ್ಲೆನ ಪ್ರಾರ್ಥನೆದೊಟ್ಟಿಗೆ ಸುರುವಾಯಿನ ಲೇಸ್ ಡ್ ಕಟ್ವಾನ ಸಮಿತಿದ ಪ್ರಧಾನ ಕಾರ್ಯದರ್ಶಿ ಜನಾರ್ದನ್ ಪಡುಪಣಂಬೂರು ಪ್ರಾಸ್ತಾವಿಕ ಭಾಷಣ ಮಲ್ತ್ ದ್ ಎದ್ಕೊನಿಯೆರ್. ದೇವಾಡಿಗ ಸಂಘದ ಪ್ರಧಾನ ಕಾರ್ಯದರ್ಶಿ ಜಗದೀಶ್ ಪಲಿಮಾರ್ ಸೊಲ್ಮೆ ಸಂದಾಯೆರ್. ಕಟ್ವಾನ ಸಮಿತಿದ ಕಾರ್ಯಾಧ್ಯಕ್ಷೆರ್ ಯಾದವ ದೇವಾಡಿಗೆರ್ ಲೇಸ್ ನ್ ಸುಧಾರಿಕೆ ಮಲ್ತೆರ್.

ಲೇಸ್ ದ ಸುರುಕು ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜೆ ಬೊಕ್ಕ ಶನೀಶ್ವರ ಪೂಜೆನ್ ಪಾವಂಜೆ ಶ್ರೀ ಗಣೇಶ್ ಕೆ.ಭಟ್ ಮೆರೆನ ಮುತಾಲಿಕೆಡ್ ನಡತ್ಂಡ್.

ಪುತ್ತೂರುಡು ತುಳುವೆರೆ ಮೇಳೊ-2024, ತೆನಸ್ ಮೇಳೊ

ಪುತ್ತೂರು: ತುಳುಕೂಟೊ ಪುತ್ತೂರು ತಾಲೂಕ್ ಸಮಿತಿದ ಮುತಾಲಿಕೆಡ್ ತುಳುವೆರೆ ಮೇಳೋ 2024 ಬೊಕ್ಕ ತೆನೆಸ್ ಮೇಳೊ ಮಾ.2 ಬೊಕ್ಕ 3 ಕ್ಕ್ ಪೇಂಟೆದ ಮಂಜಲ್ಪಡ್ಡು ಸುದಾನ ವಸತಿಯುತ ಶಾಲೆದ ಸಭಾಂಗಣಡ್ ನಡಪರೆ ಉಂಡು ಪಂದ್ ತುಳುವೆರೆ ಮೇಳೊ ಸಮಿತಿದ ಮಾನಾದಿಗೆದ ಗುರ್ಕಾರೆ ಸವಣೂರು ಕೆ. ಸೀತಾರಾಮ ರೈ ತೆರಿಪಾದೆರ್.

ಸೋಮಾರ ಸುದ್ದಿಗೋಷ್ಠಿಡ್ ಪಾತೆರ್ನ ಮೇರ್, ಮಾ.2 ಕ್ಕ್ ಮಧ್ಯಾಹ್ನ 2 ಗಂಟೆಗ್ ‘ತೆನಸ್ ಮೇಳೊ’ ಡ್ ಕಲ ಉದಿಪನನ್ ಪುತ್ತೂರು ವಾಣಿಜ್ಯ ಬೊಕ್ಕ ಕೈಗಾರಿಕಾ ಸಂಘದ ಗುರ್ಕಾರೆ ವಾಮನ ಪೈ, ಮೂಡಾಯಿ ತೆನಸ್ ದ ಕಲನ್ ಡಾ. ಸುರೇಶ್ ಪುತ್ತೂರಾಯ ಬೊಕ್ಕ ಪಡ್ಡಾಯಿ ತೆನೆಸ್‌ದ ಕಲನ್ ಉದ್ಯಮಿ ಅಭಿಜಿತ್ ಶೆಟ್ಟಿ ಉದಿಪನ ಮಲ್ಪೆರೆ ಉಲ್ಲೆರ್.

ಮಲ್ಲ ಬಿನ್ನೆರಾದ್ ರಾಜ್ಯ ರೈತ ಸಂಘ ಹಸಿರು ಸೇನೆದ ಜಿಲ್ಲಾಧ್ಯಕ್ಷೆರ್ ರೂಪೇಶ ರೈ ಅಲಿಮಾರ್, ವಿದ್ಯುತ್ ಗುತ್ತಿಗೆದಾರೆರೆನ ಸಂಘದ ಗುರ್ಕಾರೆ ಮಿತ್ತಳಿಕೆ ಸೂರ್ಯನಾಥ ಆಳ್ವ ಜನ್ಮ ಫೌಂಡೇಶನ್‌ದ ಡಾ.ಹರ್ಷ ಕುಮಾರ್ ರೈ ಮಾಡಾವು ಪಾಲ್ ಪಡೆಯೆರೆ ಉಲ್ಲೆರ್.

ಸವಣೂರು ಕೆ. ಸೀತಾರಾಮ ರೈ ಗುರ್ಕಾರ್ಮೆನ್ ಒಯಿಸೊನ್ವೆರ್. ಮಧ್ಯಾಹ್ನ 3.30 ರ್ದ್ ತುಳು ಪದ ನಲಿಕೆ, 5.30 ರ್ದ್ ಗಾನ ನೃತ್ಯ ವೈಭವ ರಾತ್ರೆ 7 ಗಂಟೆಗ್ ಗಾಯಕೆರ್ ನಾದ ಮಣಿನಾಲ್ಕೂರು ಮೆರೆರ್ದ್ ನಡಪುನ ತುಡರ ಪದ ಲೇಸ್ ನ್ ನಿವೃತ್ತ ಮುಖ್ಯ ಶಿಕ್ಷಕೆರ್ ನಾರಾಯಣ ರೈ ಕುಕ್ಕುವಳ್ಳಿ ಉದಿಪನ ಮಲ್ಪುವೆರ್.

ಮಾ.3 ಕ್ಕ್ ತುಳುವೆರೆ ಮೇಳೊ-2024 ಉದಿಪನ ಲೇಸ್ ಡ್ ಒಡಿಯೂರು ಗುರುದೇವಾನಂದ ಶ್ರೀ ಆಶೀರ್ವಚನ ಕೊರಿಯೆರೆ ಉಲ್ಲೆರ್. ಪುತ್ತೂರು ಶಾಸಕೆರ್ ಅಶೋಕ್ ಕುಮಾರ್ ರೈ ಉದಿಪನ ಮಲ್ಪುವೆರ್. ತುಳುವೆರೆ ಮೇಳೊ ಸಮಿತಿದ ಗುರ್ಕಾರೆ ರೆ.ವಿಜಯ ಹಾರ್ವಿನ್ ಗುರ್ಕಾರ್ಮೆನ್ ಒಯಿಸೊನ್ವೆರ್. ಸುಮಾರ್ ಜನ ಬಿನ್ನೆರ್ ಪಾಲ್ ಪಡೆಯೆರೆ ಉಲ್ಲೆರ್. ಈ ಪೊರ್ತುಡು 5 ಜನ ಸಾಧಕೆರೆಗ್ ಬಿರ್ದ್ ದ ತುಳುವೆರ್ ಪುತ್ತೂರು ತಾಲೂಕ್ ಪ್ರಶಸ್ತಿ-2024 ಕೊರ್ದು ಮಾನಾದಿಗೆ ಮಲ್ಪೆರೆ ಉಂಡು.

ಬೊಕ್ಕ ಮಧ್ಯಾಹ್ನ ಅಮೃತ ಸೋಮೇಶ್ವರೆರ್ನ ನೆಂಪು– ತುಳುವಾಮೃತ ಲೇಸ್ ಪ್ರಬಂಧ ಮಂಡನೆ, ಬೊಕ್ಕ 2 ಗಂಟೆರ್ದ್ ಕಬಿ ಕೂಟೊ, 4 ಗಂಟೆರ್ದ್ ತುಳು ಮನರಂಜನೆಲು, ಸಮರಸೌಗಂಧಿಕಾ ಪ್ರಸಂಗದ ಯಕ್ಷಗಾನ ತಾಳಮದ್ದಳೆ, ಬಲೆ ತೆಲಿಪುಗ ಹಾಸ್ಯ ತುಳು ಸಿನಿಮಾ ಪದೊಕುಲು, ತುಳು ಹಾಸ್ಯ ನಾಟಕ ನಂಬಿಕೆ ದಾಯೆಗೆ ಪ್ರದರ್ಶನ ಆಯೆರೆ ಉಂಡು. ತೆನಸ್ ಮೇಳಡ್ ತುಳುವೆರೆ ಕಾಯಿಕಜಿಪು ತೆನಸುಲು ಬೊಕ್ಕ ಮೀನ್ ಮಾಸ ತೆನಸುಲು ಇಸೇಸ ಆಯರೆ ಉಂಡು ಪಂದ್ ಪಂಡೆರ್.

ಸುದ್ದಿಗೋಷ್ಠಿಡ್ ತುಳುವೆರೆ ಮೇಳೋ ಸಮಿತಿ ಕಾರ್ಯಾಧ್ಯಕ್ಷೆರ್ ಪ್ಯಾಟ್ರಿಕ್ ಸಿಪ್ರಿಯನ್ ಮಸ್ಕರೇನಸ್, ಕಾರ್ಯದರ್ಶಿ ಡಾ| ರಾಜೇಶ್ ಬೆಜ್ಜಂಗಳ, ಜತೆ ಕಾರ್ಯದರ್ಶಿ ಉಲ್ಲಾಸ್ ಪೈ ಇತ್ತೆರ್.

ಫೆ.29: ಕೊಡೆತ್ತೂರು ಅರಸು ಕುಂಜರಾಯ ದೈವೊಲ್ಯಡ್ ಬ್ರಹ್ಮಕಲಶ ಉಚ್ಚಯ

6 ಕೋಟಿ ರೂ. ಕರ್ಚಿಡ್ ಭಂಡಾರ ಚಾವಡಿ, ದೈವೊಲ್ಯಲೆನ ಜೀರ್ಣೋದ್ಧಾರ

ಕಿನ್ನಿಗೋಳಿ: ಕೊಡೆತ್ತೂರು ಶ್ರೀ ಅರಸು ಕುಂಜರಾಯ ದೈವೊಲ್ಯಡ್ ಸುಮಾರ್ ಆಜಿ ಕೋಟಿ ರೂ. ಕರ್ಚಿಡ್ ಜೀರ್ಣೋದ್ಧಾರ ಬೇಲೆ ನಡತ್ ದ್ಂಡ್.

ಫೆ.29 ರ್ದ್ ಮಾ.13 ಮುಟ್ಟ ಪೊಸ ಭಂಡಾರ ಚಾವಡಿಡ್ ಶ್ರೀ ಅರಸು ಕುಂಜರಾಯೆರೆನ ಬೊಕ್ಕ ಸಪರಿವಾರ ದೈವೊಲೆನ ಪುನರ್ ಪ್ರತಿಷ್ಠೆ ಬೊಕ್ಕ ಕಲಶಾಭಿಷೇಕ, ದೈವೊಲೆನ ನೇಮ ನಡಪರೆ ಉಂಡು.

ದೈವೊಲ್ಯದ ಮೂಡುಪಡು, ತೆಂಕು ಬಡಗು ಗೋಪುರ ನಿರ್ಮಾಣ, ಪೊಸ ಕೊಡಿ ಮರ ಪ್ರತಿಷ್ಠೆ, ಆವರಣ ಗೋಡೆ ದೈವೊಲೆನ ಕೊಡಿ ಅಡಿ, ಸಾರ್ವಜನಿಕ ಸಭಾಭವನ, ಪೊಸ ಶ್ರೀ ಅರಸು ಕುಂಜರಾಯ ಪರಿವಾರ ದೈವೊಲೆನ ಭಂಡಾರ ಚಾವಡಿ, ಕಾಂತಾರಜಾಲ್ ಡ್ ಸಿಂಹಾಸನ ಕಟ್ಟೆ ಇಂಚ ಸುಮಾರ್ ಬೇಲೆ ನಡತ್ಂಡ್.

ಅರಸು ಕುಂಜರಾಯ ಬೊಕ್ಕ ಪರಿವಾರ ದೈವೊಲೆನ ಮಟ್ಟ ಆಕಾರದ ಭಂಡಾರ ಚಾವಡಿ ನಿರ್ಮಾಣ ಮಲ್ತ್ ದ್ ಮೂಲ ಮೈಸಂದಾಯ, ಅರಸು ಕುಂಜರಾಯ, ಪಂಜುರ್ಲಿ, ಜಾರಂದಾಯ ಬಂಟ, ಕಾಂತೇರಿ ಧೂಮಾವತಿ ಬಂಟ, ಸತ್ಯದೇವತೆ, ಬಬ್ಬರ್ಯ (ಆಲಿದೈವ) ಇಂಚ ದೈವೊಲೆನ ಪ್ರತಿಷ್ಟಾಪನೆ, ಕೊಂಡೇಲ ಗ್ರಾಮದ ಕೊಂಡೇಲ್ತಾಯ ದೈವೊದ ಬಂಡಾರ ಬತ್ತ್ ದ್ ನೇಮದೊಟ್ಟಿಗೆ ಮೂಜಿ ದಿನ ನಡತೊಂದು ಇತ್ತಿನ ನೇಮನ್ ಐನ್ ದಿನ ಮಲ್ಪೆರೆ ಪ್ರಶ್ನಾ ಚಿಂತನೆಡ್ ತೋಜಿದ್ ಬತ್ತಿಲೆಕ್ಕ ಕಲಶಾಭಿಷೇಕ ಮಲ್ತೆರ್.

ಕಾರ್ಲದ ಕಾಂತಾವರ ಶ್ರೀ ಕಾಂತೇಶ್ವರ ದೇವೆರೆಗ್ ಕೊಡೆತ್ತೂರು ಅರಸು ಕುಂಜರಾಯ ದೈವೊಗ್ ಜೈನ ಅರಸುಲೆನ ಕಾಲರ್ದ್ ಸಂಬಂಧ ಇತ್ತ್ಂಡ್ ಪನ್ಪುನೆಕ್ಕ್ ಮುಲ್ಪ ಇಪ್ಪುನ ಕಾಂತಾರ ಜಾಲ್ ದ ಕಲ್ಲ್ ದ ಶಾಸನಲು ಸಾಕ್ಷಿ ಆತ್ಂಡ್.

ಅರಸು ಕುಂಜರಾಯ ಕ್ಷೇತ್ರಗ್ ತಿಬಾರ್ ಉಳ್ಳಾಯ ಕೊಡಮಣಿತ್ತಾಯ, ಮಾಗಂದಡಿದ ಕಾಂತೇರಿ ಜುಮಾದಿ, ಎಕ್ಕಾರು ಬಡಕೆರೆದ ಜಾರಂದಾಯ, ಮಿತ್ತಬೈಲ್ ದ ಸರಳ ಜುಮಾದಿ ಬೊಕ್ಕ ಮೈಸಂದಾಯ, ಕೊಂಡೇಲ್ತಾಯ, ಅಡ್ಯಂತಾಯ, ಬಬ್ಬರ್ಯ, ಪಿಲಿಚಂಡಿ ದೈವೊಲೆಗ್ ಕಟ್ಟ್ ಕಟ್ಟಲೆದ ನೇಮ, ಕೋರ‍್ದಬ್ಬು ಜಾರಂದಾಯ ದೈವೊಲೆನ ಭೇಟಿ ನಡಪುನ ಕ್ರಮ ಉಂಡು.

1981, 1992 ಟ್ಟ್, 2009 ಟ್ಟ್ ಜೀರ್ಣೋದ್ಧಾರ ಬೇಲೆ ನಡತ್ ದ್ ಬ್ರಹ್ಮಕಲಶ ನಡತ್ ದ್ಂಡ್. ಇತ್ತೆ ಕುಡ ಕೊಡೆತ್ತೂರುದ ಕುಂಜರಾಯ ಕ್ಷೇತ್ರ ಬ್ರಹ್ಮಕಲಶ ಉಚ್ಚಯಗ್ ತಯಾರಾತ್ಂಡ್. ಪ್ರತಿ ದಿನ ನೂದೆರ್ದ್ ಎಚ್ಚ ಗ್ರಾಮಸ್ಥೆರ್ ಕರಸೇವೆದೊಟ್ಟಿಗೆ ಅಲಂಕಾರ, ಸ್ವಚ್ಛತೆ, ಬೇಲೆನ್ ಮಲ್ತೊಂದು ಉಲ್ಲೆರ್.

ನಂದಿನಿ ತುದೆಟ್ಟ್ 4 ಕಲ್ಪಾರ್ಥಿಲು ನೀರ್ ಪಾಲ್

ಹಳೆಯಂಗಡಿ: ಸುರತ್ಕಲ್ ಪೊಲೀಸ್ ಠಾಣಾ ವ್ಯಾಪ್ತಿದ ವಿದ್ಯಾದಾಯಿನಿ ಸ್ಕೂಲ್ ರ್ದ್ ಅಂಗಾರೆ ಬಯ್ಯಗ್ ನಾಪತ್ತೆ ಆದಿತ್ತಿನ ನಾಲ್ ಜನ ಕಲ್ಪಾರ್ಥಿಲು ಹಳೆಯಂಗಡಿದ ಕೊಪ್ಪಳ ಆಣೆಕಟ್ಟದ ರೈಲ್ವೇ ಸಂಕದ ತಿರ್ತ್ ನಂದಿನಿ ತುದೆಟ್ಟ್ ನೀರ್ ಪಾಲಾತೆರ್.

ತೀರ್ ಪೋಯಿನ ಕಲ್ಪಾರ್ಥಿಲೆನ್ ಸುರತ್ಕಲ್ ಅಗರಮೇಲ್ ನಿವಾಸಿ ಚಂದ್ರಕಾಂತ್ ಮೆರೆನ ಮಗೆ ಯಶ್ಚಿತ್(15), ಹಳೆಯಂಗಡಿ ತೋಕೂರು ನಿವಾಸಿ ವಸಂತ ಮೆರೆನ ಮಗೆ ರಾಘವೇಂದ್ರ (15), ಸುರತ್ಕಲ್ ಗುಡ್ಡೆಕೊಪ್ಲ ನಿವಾಸಿ ವಿಶ್ವನಾಥ ಮೆರೆನ ಮಗೆ ನಿರೂಪ (15) ಬೊಕ್ಕ ಚಿತ್ರಾಪುರ ನಿವಾಸಿ ದೇವದಾಸ್ ಮೆರೆನ ಮಗೆ ಅನ್ವಿತ್ (15) ಪಂದ್ ತೆರಿದ್ ಬೈದ್ಂಡ್.

ಮೊಕ್ಲೆನ ಪುನನ್ ವೆನ್ಲಾಕ್ ಶವಾಗಾರಡ್ ದೀತೆರ್. ಜೋಕ್ಲೆನ್ ಕಳೆವೊನ್ನ ಪೋಷಕೆರ್ನ ದುಃಖ ತೂವರೆ ಆವಂದಿನ ಸ್ಥಿತಿ ಉಂಡು.

ಕಜಮಲೆ ಶ್ರೀ ವಿಷ್ಣುಮೂರ್ತಿ ದೇವಲ್ಯಡ್ ತುಲು ಲಿಪಿ ಪುದರ್ ಪಲವೆ ಉದಿಪನ

ಕಾಸ್ರೋಡು ಜಿಲ್ಲೆದ ಕಜಮಲೆ ಶ್ರೀ ವಿಷ್ಣುಮೂರ್ತಿ ದೇವಲ್ಯದ ಬ್ರಹ್ಮಕಲಶ ಉಚ್ಚಯದ 5ನೇ ದಿನ ದೇವಲ್ಯದ ಆಡಳಿತ ಮಂಡಳಿ ಬೊಕ್ಕ ಜೈ ತುಲುನಾಡ್ (ರಿ.) ಸಂಘಟನೆದ ಸಾರಥ್ಯಡ್ ಕಜಮಲೆ ಶ್ರೀ ವಿಷ್ಣುಮೂರ್ತಿ ದೇವಲ್ಯದ ತುಲು ಲಿಪಿ ಪುದರ್ ಪಲವೆನ್ ಫೆ.25 ಐತಾರ ಕುಂಟಾರು ರವೀಶ್ ತಂತ್ರಿಲು ಉದಿಪನ ಮಲ್ತೆರ್.

ಉದಿಪನ ಮಲ್ತ್ ದ್ ಪಾತೆರ್ನ ಮೇರ್, ತುಲು ಭಾಷೆ, ಲಿಪಿ ಬೊಕ್ಕ ಸಂಸ್ಕೃತಿನ್ ಒರಿಪಾಯೆರೆ ಬೆನೊಂದು ಇಪ್ಪುನ ಜೈ ತುಲುನಾಡ್ (ರಿ.) ಸಂಘಟನೆನ್ ಮೆಚ್ಚೊಡಾಯಿನವು, ಅವ್ವೇ ರೀತಿ ಮಾತೆರ್ಲಾ ನಿರಂತರವಾದ್ ಬೆನೊಡು ಪಂದ್ ಪಂಡೆರ್.

ಲೇಸ್ ದ ಗುರ್ಕಾರ್ಮೆನ್ ಮಾನಾದಿಗೆದ ಗುರ್ಕಾರೆ ಬ್ರಹ್ಮಕಲಶ ಉಚ್ಚಯದ ಸಮಿತಿದ ಗುರ್ಕಾರೆ ಡಾ| ವೇಣುಗೋಪಾಲ ಕಳೆಯತ್ತೋಡಿ ಒಯಿಸ್ ದಿತ್ತೆರ್.

ಈ ಪೊರ್ತುಡು ಬ್ರಹ್ಮಕಲಶ ಉಚ್ಚಯ ಸಮಿತಿದ ಪ್ರಧಾನ ಕಾರ್ಯದರ್ಶಿ ಹರಿನಾರಾಯಣ ಶಿರಂತಡ್ಕ,‌ ವಿಶ್ವ ಹಿಂದೂ ಪರಿಷತ್ ಬದಿಯಡ್ಕದ ಪ್ರಖಂಡ ಗುರ್ಕಾರೆ ಹರಿಪ್ರಸಾದ್ ರೈ, ಗೋಸಾಡ ಕ್ಷೇತ್ರದ ಸೇವಾ ಸಮಿತಿದ ಪ್ರಧಾನ ಕಾರ್ಯದರ್ಶಿ ರವೀಂದ್ರ ರೈ ಗೋಸಾಡ, ಮಧುಸೂದನ್ ಐಯ್ಯರ್ ಕುಡ್ಲ, ಪತ್ರಕರ್ತೆರ್ ಅಖಿಲೇಶ್ ನಗುಮುಗಂ, ಜೈ ತುಲುನಾಡ್ (ರಿ.) ಕಾಸ್ರೋಡು ಘಟಕದ ಕಾರ್ಯದರ್ಶಿ ಜಗನ್ನಾಥ ಕಂಡತ್ತೋಡಿ ಬೊಕ್ಕ ಬ್ರಹ್ಮಕಲಶ ಉಚ್ಚಯ ಸಮಿತಿದ ಪದುಕೆರ್ ಪಾಲ್ ಪಡೆದಿತ್ತೆರ್.

ಮಂಜುನಾಥ್ ಉಡುಪ ಲೇಸ್ ಗ್ ಎಡ್ಡೆಪ್ಪು ಬಯಕಿಯೆರ್. ಪ್ರಚಾರ ಸಮಿತಿದ ಮುಖ್ಯಸ್ಥೆರ್ ರಾಜೇಶ್ ಮಾಸ್ಟರ್ ಆಗಲ್ಪಾಡಿ ಎದ್ಕೊನಿಯೆರ್. ಕಬಿ, ತುಲು ಸಾಹಿತಿ ವಿಜಯರಾಜ್ ಪುಣಿಂಚಿತ್ತಾಯ ಸೊಲ್ಮೆ ಸಂದಾಯೆರ್. ಅಮೃತ್ ರಾಜ್ ರೈ ಮುಕ್ಕೂರು ಲೇಸ್ ದ ಸುಧಾರಿಕೆ ಮಲ್ತೆರ್.

ಪಾಣೇರ್ ಶ್ರೀ ಭಯಂಕೇಶ್ವರ ಸದಾಶಿವ ದೇವಲ್ಯದ ಬ್ರಹ್ಮಕಲಶ ಉಚ್ಚಯಗ್ ದೊಂಪದ ಮೂರ್ತ

ಬಂಟ್ವಾಳ: ಸುಮಾರ್ ಏಳುನೂದು ವರ್ಷಲೆನ ಇತಿಹಾಸ ಪುಗರ್ತೆದ ಪಾಣೇರ್ ಶ್ರೀ ಭಯಂಕೇಶ್ವರ ಸದಾಶಿವ ದೇವಲ್ಯದ ಅಷ್ಟಬಂಧ ಬ್ರಹ್ಮಕಲಶ ಉಚ್ಚಯ ಬೊಕ್ಕ ಜಾತ್ರೆದ ಲೆಕ್ಕೊಡು ದೊಂಪ ಮೂರ್ತ ಐತಾರ ಕ್ಷೇತ್ರದ ಪ್ರಾಂಗಣಡ್ ನಡತ್ಂಡ್.

ವೇ.ಮೂ. ವೆಂಕಪ್ಪಯ್ಯ ಭಟ್ ಕರ್ಬೆಟ್ಟು ಬೊಕ್ಕ ಪ್ರಧಾನ ಅರ್ಚಕೆರ್ ನಾರಾಯಣ ಮಯ್ಯರು, ಸಹ ಅರ್ಚಕೆರ್ ಲಕ್ಷಣ ಆಕಾಶೆ, ಪ್ರಸನ್ನ ಹೆಗ್ಡೆ ಪೂಜೆದ ವಿಧಿವಿಧಾನನ್ ಮಲ್ತೆರ್.

ಈ ಪೊರ್ತುಡು ಬ್ರಹ್ಮಕಲಶ ಉಚ್ಚಯ ಸಮಿತಿದ ಮಾನಾದಿಗೆದ ಗುರ್ಕಾರೆ ಡಾ.ಎಂ. ಮೋಹನ ಆಳ್ವ ಬೆದ್ರ, ಜೀರ್ಣೋದ್ದಾರ ಸಮಿತಿ ಗುರ್ಕಾರೆ ಬಿ.ರಘುನಾಥ ಸೋಮಯಾಜಿ, ಒತ್ತು ಗುರ್ಕಾರೆ ರಘು ಸಪಲ್ಯ, ಜಿಲ್ಲಾ ಕಸಾಪ ಮಾಜಿ ಗುರ್ಕಾರೆ ಪ್ರದೀಪ ಕುಮಾರ ಕಲ್ಕೂರ, ಕಾರ್ಯಾಧ್ಯಕ್ಷೆರ್ ಜಗನ್ನಾಥ ಚೌಟ ಬದಿಗುಡ್ಡೆ, ಗುರ್ಕಾರೆ ಜಗನ್ನಾಥ ಬಂಗೇರ, ಕೋಶಾಧಿಕಾರಿ ಕೆ. ಶಂಕರನಾರಾಯಣ ರಾವ್, ಸಹಸಂಚಾಲಕೆರ್ ಕೃಷ್ಣಪ್ಪ ಗಾಣಿಗ, ಕೇಶವ ಕೋಡಿ, ನರಸಿಂಹ ಮಯ್ಯ ಬಿ.ಸಿ.ರೋಡ್, ಡಾ. ಆತ್ಮರಂಜನ್ ರೈ ಪಾಣೇರ್, ಗೋವಿಂದ ಪೈ, ನವೀನ ಮಾಣಿಮಜಲು, ವಸಂತ ಪಿ., ಶ್ರೀಶ ರಾಯಸ, ಪುರುಷೋತ್ತಮ ಸಾಲ್ಯಾನ್ ಪಾಲ್ ಪಡೆದಿತ್ತೆರ್.

ಮಾ.2-12 ಮುಟ್ಟ ಬ್ರಹ್ಮಕಲಶ ಉಚ್ಚಯದ ಬೇತೆ ಬೇತೆ ಧಾರ್ಮಿಕ ಬೊಕ್ಕ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು. ಮಾ.5 ಕ್ಕ್ ಪುದೆಕಾಣಿಕೆ ಸಮರ್ಪಣೆ ನಡಪರೆ ಉಂಡು.

ಮೋಹನದಾಸ ಕೊಟ್ಟಾರಿ ಈ ಲೇಸ್ ದ ಸುಧಾರಿಕೆ ಮಲ್ತೆರ್. ಕಾರ್ಯದರ್ಶಿ ಪದ್ಮನಾಭ ಮಯ್ಯ ಏಲಬೆ ಸೊಲ್ಮೆ ಸಂದಾಯೆರ್.

ಪೊವಾಯಿ ಕನ್ನಡ ಸೇವಾ ಸಂಘಡ್ ಅರಸಿನ ಕುಂಕುಮ, ಎಲ್ಯ ನಾಟಕ ಪಂತೊ

ಕನ್ನಡ ಸೇವಾ ಸಂಘ ಪೊವಾಯಿ, ಪೊಂಜೊವುಲೆನ ಕೂಟದಕ್ಲೆರ್ದ್ ಅರಸಿನ ಕುಂಕುಮ ಲೇಸ್ ಬೊಕ್ಕ ಎಲ್ಯ ನಾಟಕದ ಪಂತೊ ಫೆ.25 ಐತಾರ ಮದ್ದೆನ ಸಂಘದ ವಠಾರೊಡು ಬಾರಿ ಗೌಜಿಡ್ ನಡತ್ಂಡ್.

ಸಾಂಸ್ಕೃತಿಕ ಸಮಿತಿದ ಪ್ರಶಾಂತಿ ದಿವಾಕರ ಶೆಟ್ಟಿ, ಬೊಕ್ಕ ಕೂಟದ ಗುರ್ಕಾರ್ದಿ ಸುಗುಣ ಕೃಷ್ಣ ಶೆಟ್ಟಿ ಮೊಕ್ಲೆನ ಮುತಾಲಿಕೆಡ್ ಲೇಸ್ ನಡತ್ಂಡ್.

ಲೇಸ್ ಉದಿಪನ ಮಲ್ತಿನ ಬಂಟರ ಸಂಘದ ಮಹಿಳಾ ವಿಭಾಗದ ಮಾಜಿ ಕಾರ್ಯಾಧ್ಯಕ್ಷೆರ್ ಲತಾ ಜಯರಾಮ್ ಶೆಟ್ಟಿ ಪಾತೆರ್ದ್, ಪೊವಾಯಿ ಕನ್ನಡ ಸಂಘದ ಸದಸ್ಯೆರೆನ ಒಗ್ಗಟ್ಟ್, ಅಕುಲು ಮಲ್ಪುನ ಸಮಾಜ ಪರ ಕಾರ್ಯ ಎಂಕ್ ಮಸ್ತ್ ಖುಷಿ ಕೊರ್ತುಂಡು. ಯಾನ್ ಸುಮಾರ್ ಸರ್ತಿ ಬೈದೆ ಈ ಕಾರ್ಯಕ್ರಮಗು, ನೆತ್ತ ಪಿರವುಡ್ ಪ್ರಶಾಂತಿ ಬೊಕ್ಕ ಕೂಟದಕ್ಲೆನ ಮಸ್ತ್ ಪ್ರಯತ್ನ ಉಂಡು, ಯಾನ್ ಈ ಸಂದರ್ಬೊಡು ಸಂಘದ ಮಾತಾ ಸದಸ್ಯರೆಗ್ ಸೊಲ್ಮೆ ಸಂದಾಯ ಮಲ್ತೊಂದುಲ್ಲೆ ಪಂದ್ ಪಂಡೆರ್.

ಎಲ್ಯ ನಾಟಕ ಪಂತೊದ ತೀರ್ಪು ಕೊರಿನ ಡಾ| ಭಾರತ್ ಕುಮಾರ್ ಪೊಲಿಪು ಬೊಕ್ಕ ನಾರಾಯಣ ಶೆಟ್ಟಿ ನಂದಳಿಕೆ ಮೊಕ್ಲು, ಇಂಚಿನ ಪಂತೊ ಪ್ರತಿ ವರ್ಷ ಮಲ್ಪುಲೆ. ನೆಟ್ ಪೊಂಜೊವುಲೆಗ್ ತನ್ನ ಪ್ರತಿಭೆ ತೋಜಾವರೆ ಅವಕಾಶ ತಿಕ್ಕುಂಡು, ಇನಿ ಪಾಲ್ ಪಡೆಯಿನ ಮಾತಾ ತಂಡ ದಕುಲು ಮಸ್ತ್ ಎಡ್ಡೆ ಮಲ್ದೆರ್. ಮಾತೆರೆಗ್ಲಾ ಅಭಿನಂದನೆ ಪಂಡೆರ್.

ಪಂತೊಡು ಸುರುತ್ತ ಇನಾಮುನು ಭ್ರಾಮರಿ ಮಹಿಳಾ ತಂಡ, ರಡ್ಡನೇ ಇನಾಮುನು ಉಮಾಮಹೇಶ್ವರಿ ತಂಡ, ಮೂಜಿನೇ ಇನಾಮುನು ಬಂಟರ ಸಂಘದ ನವಿ ಮುಂಬೈ ಪ್ರಾದೇಶಿಕ ಸಮಿತಿ ಮೊಕ್ಲು ಪನವು ಬೊಕ್ಕ ನೆಂಪು ಕಾಣಿಕೆದೊಟ್ಟುಗು ಪಡೆಯೆರ್.

ಲೇಸ್ ದ ಮಿತ್ತ ಚಾವಡಿದ್ ಗುರ್ಕಾರ್ತಿ ಸುಗುಣ ಕೆ ಶೆಟ್ಟಿ,ಮಲ್ಲ ಬಿನ್ನೆದಿ ರತ್ನ ವಸಂತ್ ಶೆಟ್ಟಿ, ಶೋಭಾ ಶಂಕರ್ ಶೆಟ್ಟಿ , ಮಾನಾದಿಗೆದ ಬಿನ್ನೆರ್ ಅಶ್ವಿನಿ ಅಶೋಕ್ ಮಟೆಕಾರ್, ಅಂಧೇರಿ – ಬಾಂದ್ರಾ ಪ್ರಾದೇಶಿಕ ಸಮಿತಿದ ಮಹಿಳಾ ಕಾರ್ಯಾಧ್ಯಕ್ಷೆರ್ ಶೋಭಾ ಶೆಟ್ಟಿ ಇತ್ತೆರ್.

ಸಂಘದ ಗುರ್ಕಾರೆ ಸಂದೇಶ್ ಆರ್ ಶೆಟ್ಟಿ, ಮಹಿಳಾ ವಿಭಾಗ ಮಲ್ಪುನ ಕಾರ್ಯ ಕಜ್ಜ ದ ಬಗ್ಗೆ ಪಾತೆರಿಯೆರ್.

ಈ ಪೊರ್ತುಡು ಸಮಾಜ ಸೇವಕಿ, ಡಾಕ್ಟರ್ ರಜನಿ ವಿನಾಯಕ್ ಪೈ ಮೆರೆನ್ ಸಹಕಾರ ರತ್ನ ಪನ್ಪಿನ ಬಿರ್ದ್ ಕೊರ್ದು ಮಾನಾದಿಗೆ ಮಲ್ತೆರ್ . ಅಂಚೆನೇ ಸಂಘದ ಸದಸ್ಯೆ ಭಾರತಿ ಬಾಲಕೃಷ್ಣ ಶೆಟ್ಟಿ ಮಾನಾದಿಗೆ ಮಲ್ತೆರ್.

ಸಂಘ ಕೊರಿನ ಈ ಮಾನಾದಿಗೆ ಎನ್ನ ಜೀವ ಮಾನೊಡು ನೆಂಪು ದೀಪಿನವು. ಕನ್ನಡ ಸೇವಾ ಸಂಘ ನನಾತ್ ಎಡ್ಡೆ ಕೆಲಸ ಮಲ್ತ್ ಪುದರ್ ಮಲ್ಪಡ್. ನಿಕೆಗ್ ಎನ್ನ ಎಡ್ಡೆಪ್ಪು ಬಯಕುವೆ ಪಂದ್ ಡಾ. ರಜನಿ ವಿನಾಯಕ್ ಪೈ ಪಂಡೆರ್. ಬಿನ್ನೆರೆ ಚಾವಡಿಡ್ ಮಹಿಳಾ ಕಾರ್ಯದರ್ಶಿ ಆಶಾ ಸತೀಶ್ ಶೆಟ್ಟಿ, ಕೋಶಾಧಿಕಾರಿ,ಕುಶಲ ಎ ಬಂಗೇರ ಇತ್ತೆರ್ .

ಭವಾನಿ ಸೀತಾರಾಮ್ ಶೆಟ್ಟಿ ಪ್ರಾರ್ಥನೆ ಮಲ್ತೆರ್. ಬತ್ತಿನ ಬಿನ್ನೆರೆನ್ ಗುರ್ಕಾರ್ದಿ ಸುಗುಣ ಕೃಷ್ಣ ಶೆಟ್ಟಿ ಎದುಕೊಂಡೆರ್. ಸಾಂಸ್ಕೃತಿಕ ಸಮಿತಿದ ಪ್ರಶಾಂತಿ ದಿವಾಕರ್ ಶೆಟ್ಟಿ ಬೊಕ್ಕ ಶಿಕ್ಷಣ ಸಮಿತಿದ ಯಶೋದಾ ಎಸ್ ಪೂಜಾರಿ ಲೇಸ್ ಸುಧಾರಿಕೆ ಮಲ್ತೆರ್.

ಅಂಚೆನೆ ಎಲ್ಯ ನಾಟಕ ಪಂತೊನು ಸಂಘದ ಗೌರವ ಪ್ರಧಾನ ಕಾರ್ಯದರ್ಶಿ ಅನಿತಾ ಎಸ್ ಶೆಟ್ಟಿ ಸುಧಾರಿಕೆ ಮಲ್ತೆರ್ . ಜತೆ ಕಾರ್ಯದರ್ಶಿ ಪ್ರಮೀಳಾ ಡಿ ಶೆಟ್ಟಿ, ಪ್ರಶಾಂತಿ ದಿವಾಕರ್ ಶೆಟ್ಟಿ, ಯಶೋಧ ಎಸ್ ಪೂಜಾರಿ, ಅನಿತಾ ಯು ಶೆಟ್ಟಿ ಬಿನ್ನೆರ್ನ ಪೊಲಬು ಮಲ್ತ್ ಕೊರಿಯೆರ್ . ಜ್ಯೋತಿ ಆರ್ ಜಿ ಶೆಟ್ಟಿ ಸೊಲ್ಮೆ ಸಂದಾಯ ಮಲ್ತೆರ್.