ಸುಬ್ರಹ್ಮಣ್ಯ: ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನಡ್ ಬ್ರಹ್ಮಕಲಶೋತ್ಸವ ವಾರ್ಷಿಕ ದಿನತ್ತ ಅಂಗವಾದ್ ಫೆ.25 ಸನಿವಾರ ದಾನಿ ಬೇತೆ ಬೇತೆ ಧಾರ್ಮಿಕ ಕಾರ್ಯಕ್ರಮ ನಡತ್ಂಡ್.
ಫೆ.24 ತಾನಿ ಕಾಂಡೆ 108 ಬೊಂಡಾಭಿಷೇಕ , 108 ಕಲಶಾರಾಧನೆ , ಕಳಸಾಭಿಷೇಕ, ಅಂಚನೆ ಬೇತೆ ಬೇತೆ ಧಾರ್ಮಿಕ ಕಾರ್ಯಕ್ರಮಕುಲು ಕ್ಷೇತ್ರದ ಮುಖ್ಯ ಪುರೋಹಿತೆರಾಯಿನ ಸೀತಾರಾಮ ಎಡಪಡಿತ್ತಾಯ ಅರೆನ ನೇತೃತ್ವಡ್ ನಡತ್ಂಡ್.
ಶ್ರೀ ದೇವೆರೆಗೆ ಮಹಾಪೂಜೆ ಆದ್ ಪ್ರಸಾದ ವಿತರಣೆ ನಡತ್ಂಡ್. ಈ ಪೊರ್ತುಡು ಶ್ರೀ ದೇವಳದ ಉಲಾಯಿದ ಅರಿಕೊಟ್ಟಿಲು (ನೈವೇದ್ಯ ಕೊಠಡಿ )ದುರಸ್ತಿ ಪೂರ್ಣ ಆದ್ ಅವೆನ್ ಬ್ರಹ್ಮಕಲಶೋತ್ಸವ ವಾರ್ಷಿಕ ದಿನತಾನಿ ಲೋಕಾರ್ಪಣೆ ಮಲ್ತೆರ್. ಅವ್ವೇ ದಿನ ಹೈದರಾಬಾದ್ ದ ಶ್ರೀ ದೇವೆರ್ನ ಭಕ್ತೆ ಮಹೇಶ್ ರಾಧಿಕಾ ರೆಡ್ಡಿ ಸುಮಾರ್ 75 ಲಕ್ಷ ವೆಚ್ಚದ ಬಂಗಾರ್ದ ಪ್ರಭಾವಳಿನ್ ಕೊಡುಗೆ ರೂಪಡ್ ಸಮರ್ಪಣೆ ಮಲ್ತೆರ್. 4.5 ಲಕ್ಷ ರೂ ಬಿಲೆತ್ತ ಪೂತ್ತ ಅಲಂಕಾರಗ್ ಕೊರಿಯೆರ್. ಮೇರ್ ಈ ದುಂಬುಲ ಶ್ರೀ ಕ್ಷೇತ್ರಗ್ ನಾಲ್ ಪುಂಗನೂರು ಪೆತ್ತ ಬೊಕ್ಕ ಭೋಜನ ಶಾಲೆದ ಅಡುಗೆ ಮಲ್ಪೆರೆ ಬೋಡಾಯಿನ ಪರಿಕರಲೆನ್ ಕೊರ್ದು ಇತ್ತೆರ್.
ಈ ಬಂಗಾರ್ದ ಪ್ರಭಾವಳಿನ್ ಪ್ರಸಿದ್ಧ ಶಿಲ್ಪಿಲಾಯಿನ ಅಲಗ್ರಾಜ್ ಸ್ತಪತಿ, ಪದ್ಮಾಲಯ ಆರ್ಟ್ ಆ್ಯಂಡ್ ಕ್ರಾಫ್ಟ್ಸ್ ರಾಜೇಶ್ವರಿ ನಗರ ಬೆಂಗಳೂರು ಮೊಕುಲು ಮಲ್ತ್ ಕೊರ್ತೆರ್.
ಈ ಪೊರ್ತುಡು ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ವ್ಯವಸ್ಥಾಪನ ಸಮಿತಿ ಗುರ್ಕಾರ್ಲು ಮೋಹನ್ ರಾಮ್ ಸುಳ್ಳಿ, ಸದಸ್ಯೆರಾಯಿನ ಶ್ರೀ ವತ್ಸ ಬೆಂಗಳೂರು, ಪಿಜಿಎಸ್ ಎನ್ ಪ್ರಸಾದ್ ,ಪ್ರಸನ್ನ ದರ್ಬೆ, ಮನೋಹರ ರೈ ,ವನಜ ಬಿ ಭಟ್, ಶೋಭಾ ಗಿರಿಧರ್, ಲೋಕೇಶ ಮುಂಡೋಕಜೆ ,ದೇವಳದ ಕಾರ್ಯನಿರ್ವಹಣಾಧಿಕಾರಿ ಡಾ. ನಿಂಗಯ್ಯ ಮಾಸ್ಟರ್ ಪ್ಲಾನ್ ಸದಸ್ಯೆರ್ ಸತೀಶ ಕೂಜುಗೋಡು ,ಮನೋಜ್ ಇತ್ತೆರ್.