January 2024

ಫೆ.18: ಭಾಯಂದರ್ ಸೈಂಟ್ ಆಗ್ನೇಸ್ ಇಂಗ್ಲೀಷ್ ಹೈಸ್ಕೂಲ್ ಡ್ ಸಂಪೂರ್ಣ ರಾಮಾಯಣ ಪರೀಕ್ಷಾ ಪಂತೊ

ಮೀರಾ ಭಾಯಂದರ್ ವೀರ ಕೇಸರಿ ಕೂಟದ ಮುತಾಲಿಕೆಡ್ ಸಂಪೂರ್ಣ ರಾಮಾಯಣ ಪರೀಕ್ಷಾ ಪಂತೊ ಫೆ.18 ಕ್ಕ್ ಭಾಯಂದರ್ ಸೈಂಟ್ ಆಗ್ನೇಸ್ ಇಂಗ್ಲೀಷ್ ಹೈಸ್ಕೂಲ್ ಡ್ ನಡಪರೆ ಉಂಡು.

ಈ ಲೇಸ್ ರಾಧಾಕೃಷ್ಣ ಭಟ್ ಬೊಕ್ಕ ಸಾಣೂರು ಸಾತಿಂಜ ಜನಾರ್ದನ ಭಟ್ರೆನ ಆಶೀರ್ವಾದಡ್, ಮೀರಾ ಭಾಯಂದರ್ ವೀರ ಕೇಸರಿದ ಗುರ್ಕಾರೆ ಹರೀಶ್ ರೈ ಮೆರೆನ ಮುತಾಲಿಕೆಡ್ ನಡಪರೆ ಉಂಡು.

ಅಂಚೆನೆ ಈ ಪಂತೊಡು ಗೆಂದಿನಕ್ಲೆಗ್ ಸುರುತ್ತ ಇನಾಮು 7777 ರೂ., ರಡ್ಡನೇ ಇನಾಮು 5555 ರೂ., ಮೂಜಿನೇ ಇನಾಮು 3333 ರೂ. ಬೊಕ್ಕ ವೀರ ಕೇಸರಿ ಸಂಸ್ಥೆದ ಪ್ರಮಾಣ ಪತ್ರ ತಿಕ್ಕುಂಡು. ಈ ಪಂತೊಡು ಪಾಲ್ ಪಡೆಪಿನಕುಲು (ಜ.10) ಇನಿಯೇ ಪುದರ್ ನೊಂದಣಿ ಮಲ್ಪಾವೊಡು.

ಎಲ್ಲೆ ಡೆಲ್ಲಿಡ್ ಕಾಂಗ್ರೆಸ್ ಸಭೆ

ಲೋಕಸಭೆ ವೋಟುದ ತಯಾರಿಗಾದ್ ಎಲ್ಲೆ (ಜ.11) ಕ್ಕ್ ಡೆಲ್ಲಿದ ಕಾಂಗ್ರೆಸ್ ಕಚೇರಿಡ್ ಹೈಕಮಾಂಡ್ ನಾಯಕೆರೆನೊಟ್ಟಿಗೆ ರಾಜ್ಯ ನಾಯಕೆರೆನ ಸಭೆ ನಡಪರೆ ಉಂಡು.

ಈ ಸಭೆಟ್ಟ್ 28 ಲೋಕಸಭೆ ಕ್ಷೇತ್ರಲೆಗ್ ಉಸ್ತುವಾರಿಯಾದ್ ನೇಮಕ ಆಯಿನ ಸಚಿವೆರ್ ಪಾಲ್ ಪಡೆಯೆರೆ ಉಲ್ಲೆರ್.

ಬೊಲ್ಪುರ್ದ್ ಬಯ್ಯ ಮುಟ್ಟ ಈ ಸಭೆ ನಡಪುಂಡು. ಈ ಪೊರ್ತುಡು ರಾಜ್ಯಡ್ ಇಪ್ಪುನ ಪರಿಸ್ಥಿತಿಲೆನ ಬಗೆಟ್ಟ್ ನಾಯಕೆರ್ ವಿವರಣೆ ಕೊರಿಯೆರೆ ಉಲ್ಲೆರ್. ಬೊಕ್ಕ ಕಾರ್ಯತಂತ್ರದ ಬಗೆಟ್ಟ್ ನಿರ್ಧಾರ ಮಲ್ಪೆರೆ ಉಂಡು ಪಂದ್ ತೆರಿದ್ ಬೈದ್ಂಡ್.

ರಾಜ್ಯಡ್ ಇನಿ ಭಾರೀ ಬರ್ಸ!?

ರಾಜ್ಯದ ಸುಮಾರ್ ಜಿಲ್ಲೆಡ್ ಇನಿ ಭಾರೀ ಬರ್ಸ ಬರ್ಪಿನ ಅಂದಾಜಿ ಉಂಡು ಪಂದ್ ಹವಾಮಾನ ಇಲಾಖೆ ತೆರಿಪಾದ್ಂಡ್.

ದಕ್ಷಿಣ ಕನ್ನಡ, ಒಡಿಪು, ಉತ್ತರ ಕನ್ನಡ ಬೊಕ್ಕ ಕೊಡಗು ಜಿಲ್ಲೆಡ್ ತೆಡಿಲ್ ಬರ್ಸ ಬರ್ಪಿನ ಅಂದಾಜಿ ಉಂಡು.

ಮೈಸೂರು, ಮಂಡ್ಯ, ರಾಮನಗರ, ಬೆಂಗ್ಲೂರ್, ತುಮಕೂರು ಸೇರಿನಂಚೆನೆ ದಕ್ಷಿಣ ಒಳನಾಡುದ ಜಿಲ್ಲೆಡ್ ಸಾಧಾರಣ ಬರ್ಸ ಬರ್ಪುಂಡು.

ಉತ್ತರ ಒಳನಾಡ್ ದ ಗದಗ, ಕೊಪ್ಪಳ ಬೊಕ್ಕ ರಾಯಚೂರು ಜಿಲ್ಲೆನ್ ಬುಡ್ದ್ ಒರಿನ ಕಡೆಟ್ಟ್ ಸಾಧಾರಣ ಬರ್ಸ ಬರ್ಪುಂಡು.

ಅಂಡಮಾನ್ ಡ್ ಭೂಕಂಪ

ಅಂಡಮಾನ್ ದ್ವೀಪಡ್ ಬೊಲ್ಪುಗು 4.1 ಬಿರ್ಸ್ ದ ಭೂಕಂಪ ಆತ್ಂಡ್.

ಈ ಘಟನೆಡ್ ಒವ್ವೇ ರೀತಿದ ತೊಂದರೆ ಆಯಿನ ಬಗೆಟ್ಟ್ ವರದಿ ಆತಿಜಿ.

ಬಂಟರ ಯಾನೆ ನಾಡವರ ಮಾತೃಸಂಘದ ಶತಮಾನೋತ್ಸವ ಕಟ್ವಾನ ನಿರ್ಮಾಣ ಸಮಿತಿದ ಗುರ್ಕಾರೆಯಾದ್ ಕೆ.ಪ್ರಕಾಶ್ ಶೆಟ್ಟಿ

ಕುಡ್ಲ: ಬಂಟರ ಯಾನೆ ನಾಡವರ ಮಾತೃಸಂಘದ ಶತಮಾನೋತ್ಸವ ಕಟ್ವಾನ ನಿರ್ಮಾಣ ಸಮಿತಿದ ಗುರ್ಕಾರೆಯಾದ್ ಎಂ.ಆರ್.ಜಿ. ಸಮೂಹ ಸಂಸ್ಥೆಲೆನ ಗುರ್ಕಾರೆ ಕೆ.ಪ್ರಕಾಶ್ ಶೆಟ್ಟಿ ಆಯ್ಕೆ ಆತೆರ್.

ಕುಡ್ಲಡ್ ನಡತಿನ ಸಭೆಟ್ಟ್ ಈ ಆಯ್ಕೆ ಪ್ರಕ್ರಿಯೆ ನಡತ್ಂಡ್.

ಬಂಟರ ಯಾನೆ ನಾಡವರ ಮಾತೃಸಂಘದ ಶತಮಾನೋತ್ಸವ ಕಟ್ವಾನ ನಿರ್ಮಾಣ ಸಮಿತಿದ ಗುರ್ಕಾರೆಯಾದ್ ಆಯ್ಕೆ ಆಯಿನ ಎಮ್‌ಆರ್‌ಜಿ ಸಮೂಹ ಸಂಸ್ಥೆಲೆನ ಗುರ್ಕಾರೆ ಕೆ.ಪ್ರಕಾಶ್ ಶೆಟ್ಟಿ ಮೆರೆನ್ ಬಂಟರ ಯಾನೆ ನಾಡವರ ಮಾತೃಸಂಘದ ಗುರ್ಕಾರೆ ಮಾಲಾಡಿ ಅಜಿತ್‌ಕುಮಾರ್ ರೈ, ಎಜೆ ಸಮೂಹ ಸಂಸ್ಥೆಲೆನ ಗುರ್ಕಾರೆ ಡಾ.ಎಜೆ ಶೆಟ್ಟಿ, ಬೊಂಬೈ ಹೇರಂಭ ಇಂಡಸ್ಟ್ರೀಸ್ ಸಂಸ್ಥೆದ ಆಡಳಿತ ನಿರ್ದೇಶಕೆರ್ ಕನ್ಯಾನ ಸದಾಶಿವ ಶೆಟ್ಟಿ, ಬೆದ್ರ ಆಳ್ವಾಸ್ ಶಿಕ್ಷಣ ಸಂಸ್ಥೆದ ಗುರ್ಕಾರೆ ಡಾ.ಎಂ. ಮೋಹನ್ ಆಳ್ವ, ರವಿ ಎಸ್ ಶೆಟ್ಟಿ ಸಾಯಿರಾಧ ಬೊಂಬೈ, ಬೊಂಬೈ ಬಂಟರ ಸಂಘದ ಗುರ್ಕಾರೆ ಪ್ರವೀಣ್ ಭೋಜ ಶೆಟ್ಟಿ, ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಗುರ್ಕಾರೆ ಐಕಳ ಹರೀಶ್ ಶೆಟ್ಟಿ, ಮಾತೃಸಂಘದ ಒತ್ತು ಗುರ್ಕಾರೆ ಎ.ಹೇಮನಾಥ ಶೆಟ್ಟಿ, ಮಾತೃಸಂಘದ ಪ್ರಧಾನ ಕಾರ್ಯದರ್ಶಿ ಕೆ.ಎಮ್ ಶೆಟ್ಟಿ, ಮಾತೃಸಂಘದ ಕೋಶಾಧಿಕಾರಿ ಸಿಎ ರಾಮ್‌ಮೋಹನ್ ರೈ, ವಿಜಯ ಶೆಟ್ಟಿ ಬೊಂಬೈ, ಪೂನ ಬಂಟರ ಸಂಘದ ಗುರ್ಕಾರೆ ಸಂತೋಷ್ ಶೆಟ್ಟಿ, ಹುಬ್ಬಳ್ಳಿ-ಧಾರವಾಡ ಬಂಟರ ಸಂಘದ ಗುರ್ಕಾರೆ ಸುಧಾಕರ ಶೆಟ್ಟಿ ಸುಗ್ಗಿ, ಬೆಂಗ್ಲೂರು ಬಂಟರ ಸಂಘದ ಮಾಜಿ-ಗುರ್ಕಾರೆ ಉಪೇಂದ್ರ ಶೆಟ್ಟಿ, ಜಾಗತಿಕ ಬಂಟ ಪ್ರತಿಷ್ಠಾನದ ಕಾರ್ಯದರ್ಶಿ ಸಿಎ ಸುಧೀರ್ ಶೆಟ್ಟಿ, ಆರ್ಕಿಟೆಕ್ ಸನತ್ ಕುಮಾರ್ ಶೆಟ್ಟಿ, ಸುಪ್ರೀತ್ ಆಳ್ವ, ವಿನೋಧ್ ಶೆಟ್ಟಿ, ಮಾತೃಸಂಘದ ಕಾರ್ಯಕಾರಿ ಸಮಿತಿ ಸದಸ್ಯೆರ್ ಎನ್ ರವಿರಾಜ್ ಶೆಟ್ಟಿ, ವಸಂತ ಶೆಟ್ಟಿ, ರತ್ನಾಕರ ಶೆಟ್ಟಿ, ಕರುಣಾಕರ ಶೆಟ್ಟಿ, ಮಾತೃಸಂಘದ ಆಡಳಿತಾಧಿಕಾರಿ ಉಮೇಶ್ ರೈ ಮೊಕ್ಲೆನ ಉಪಸ್ಥಿತಿಡ್ ಸನ್ಮಾನ ಮಲ್ತೆರ್.

ರಾಜ್ಯ ಮಟ್ಟದ ಕರಾಟೆ ಪಂತೊಡು ಪುತ್ತೂರುದ ಅಣ್ಣೆ ಮೆಗ್ಗಿಯಗ್ ಸುರುತ್ತ ತಾನ

ಕುಡ್ಲ: ಕುಡ್ಲಡ್ ಜ.7 ಕ್ಕ್ Western Institute of Martial Arts ದ ಮುತಾಲಿಕೆಡ್ ನಡತಿನ ರಾಜ್ಯ ಮಟ್ಟದ ಕರಾಟೆ ಚಾಂಪಿಯನ್ ಶಿಪ್ ಡ್ ಸೆನ್ಸಾಯಿ ಮಾಧವ ಅಳಿಕೆ ಬೊಕ್ಕ ರೋಹಿತ್ S.N ಮೆರೆನ ಶಿಷ್ಯೆರಾಯಿನ ರಿಶೋನ್ ಲಸ್ರಾದೋ ಬೊಕ್ಕ ರಿಯೋನ್ ಲಸ್ರಾದೋ ತಲಾ 3 ಪದಕದೊಟ್ಟಿಗೆ ಸುರುತ್ತ ತಾನನ್ ಪಡೆತೆರ್.

ರಿಶೋನ್ ಲಸ್ರಾದೋ (13) ಮೇರ್ ಕಟಾಡ್ ಸುರುತ್ತ, ಕುಮಿಟೆಡ್ ರಡ್ಡನೇ ಬೊಕ್ಕ ಗ್ರೂಪ್ ಕಟಾಡ್ ಸುರುತ್ತ, ಇಂಚ ಮೂಜಿ ಪದಕನ್ ಪಡೆತೆರ್.

ರಿಯೋನ್ ಲಸ್ರಾದೋ (11) ಮೇರ್ ಕಟಾಡ್ ಸುರುತ್ತ, ಕುಮಿಟೆಡ್ ಸುರುತ್ತ ಬೊಕ್ಕ ಗ್ರೂಪ್ ಕಟಾಡ್ ಸುರುತ್ತ ಇಂಚ ಮೂಜಿ ಪದಕನ್ ಪಡೆದ್ ಸುರುತ್ತ ತಾನ ಪಡೆತೆರ್.

ಈ ಅಣ್ಣೆ ಮೆಗ್ಗೆ ರಡ್ಡ್ ಜನ ಪುತ್ತೂರು ಬೆಥನಿ ಆಂಗ್ಲ ಮಾಧ್ಯಮ ಶಾಲೆದ ವಿದ್ಯಾರ್ಥಿಲು. ಮೊಕುಲು ಸೋನಿ ವಿಷನ್ ಕೇಬಲ್ ಟಿವಿ & ಬ್ರಾಡ್ ಬ್ಯಾಂಡ್ ಸರ್ವಿಸಸ್ ದ ಧಣಿ ರೋಶನ್ ಬೊಕ್ಕ ಸುಶಾಂತಿ ಲಾಸ್ರದೋ ದಂಪತಿಲೆನ ಜೋಕುಲು.

ಮೊಕ್ಲೆಗ್ ಸೆನ್ಸಾಯಿ ಮಾಧವ ಅಳಿಕೆ, ರೋಹಿತ್ S.N ಬೊಕ್ಕ ನಿಖಿಲ್ K.T ಮೊಕುಲು ಇಸೇಸ ತರಬೇತಿ ಕೊರ್ತೆರ್.

ಜ.14: ಕೊಯಿಲ ಹನುಮಾನ ನಗರಡ್ ಮಹಾಚಂಡಿಕಾ ಯಾಗ, ರಾಮತಾರಕ ಮಂತ್ರ ಹೋಮ, ಶ್ರೀ ದೇವಿ ಮಹಾತ್ಮೆ ಆಟ

ರಾಯಿ: ಕೊಯಿಲ ವಿವೇಕಾನಂದ ಚಾರಿಟೇಬಲ್ ಟ್ರಸ್ಟ್ (ರಿ.) ದ ಮುತಾಲಿಕೆಡ್ ಹಿಂದೂ ಧರ್ಮೊತ್ಥಾನ ವೇದಿಕೆ ಟ್ರಸ್ಟ್ (ರಿ.) ದ ಒಟ್ಟುಸೇರಿಗೆಡ್ ಅಯೋಧ್ಯೆ ಶ್ರೀ ರಾಮ ಮಂದಿರ ಉದಿಪನದ ಲೆಕ್ಕೊಡು ಮಹಾಚಂಡಿಕಾ ಯಾಗ ಬೊಕ್ಕ ರಾಮತಾರಕ ಮಂತ್ರ ಹೋಮ, ಶ್ರೀ ದೇವಿ ಮಹಾತ್ಮೆ ಆಟ ಜ.14 ಐತಾರ ಕೊಯಿಲ ಹನುಮಾನ್ ನಗರದ ಮವಂತೂರು ದಿ.ದೇವಪ್ಪ ಶೆಟ್ಟಿ ವೇದಿಕೆಡ್ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಮಾನಾದಿಗೆದ ಗುರ್ಕಾರೆ ಮಾಜಿ ಸಚಿವೆರ್ ನಾಗರಾಜ ಶೆಟ್ಟಿ, ಶ್ರೀನಿವಾಸ ಪಿ ಸಪಲ್ಯ ಬೊಂಬೈ, ಗುರ್ಕಾರೆ ಪ್ರವೀಣ್ ಅಂಚನ್ ಕೊಯಿಲ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಫೆ.10: ಅಜ್ಜಿಕಾನ್ ಕಟ್ಟೆ ಮಂಜುನಾಥ ಫ್ರೆಂಡ್ಸ್ ಸರ್ಕಲ್ ದ 22ನೇ ವಾರ್ಷಿಕ ಉಚ್ಚಯ

ಕುಡ್ಲ: ಯೆಯ್ಯಾಡಿದ ಅಜ್ಜಿಕಾನ್ ಕಟ್ಟೆ ಮಂಜುನಾಥ ಫ್ರೆಂಡ್ಸ್ ಸರ್ಕಲ್ ಡ್ 22ನೇ ವರ್ಷದ ವಾರ್ಷಿಕ ಉಚ್ಚಯ ಫೆ.10 ಸನಿಯಾರ ನಡಪರೆ ಉಂಡು.

ಆನಿ ಬೊಲ್ಪುಗು ಗಣಹೋಮ, ಸಾರ್ವಜನಿಕ ಸತ್ಯನಾರಾಯಣ ಪೂಜೆ, ಮಹಾಪೂಜೆ ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ಬಯ್ಯಗ್ ಸಭಾ ಲೇಸ್, ರಾತ್ರೆ ಭರತನಾಟ್ಯ ಬೊಕ್ಕ ಚಲನಚಿತ್ರ ನಟೆ ಮಂಜು ರೈ ಮೂಳೂರು ನಿರೂಪಣೆದ ಸರಿಗಮಪ ಮ್ಯೂಸಿಕಲ್ ನೈಟ್ ಲೇಸ್ ನಡಪರೆ ಉಂಡು.

ಅಂಚೆನೆ ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಗುರ್ಕಾರೆ ಉಮೇಶ್ ಶೆಟ್ಟಿ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಜ.12 ಕ್ಕ್ ತುಳುನಾಡ್‌ಡ್ ಬುಡುಗಡೆ ಆಯರೆ ಉಂಡು “ಮಿಸ್ಟರ್ ಮದಿಮಯೆ” ತುಳು ಪಿಚ್ಚರ್

ಕುಡ್ಲ: “ಎಮ್ ಎಮ್ ಎಮ್ ಗ್ರೂಪ್ಸ್ ಬ್ಯಾನರ್ ಡ್ ನಿರ್ಮಾಣ ಆಯಿನ “ಮಿಸ್ಟರ್ ಮದಿಮಯೆ” ತುಳು ಪಿಚ್ಚರ್ ಜ.12 ಕ್ಕ್ ತುಳುನಾಡ್‌ಡ್ ಬುಡುಗಡೆ ಆಯರೆ ಉಂಡು ಪಂದ್ ನಟೆ ಸಾಯಿಕೃಷ್ಣ ಕುಡ್ಲ ಪತ್ರಿಕಾಗೋಷ್ಠಿಡ್ ಮಾಹಿತಿ ಕೊರಿಯೆರ್.

ಈ ಬಗೆಟ್ಟ್ ಪಾತೆರಿನ ಆರ್, “ಮಿಸ್ಟರ್ ಮದಿಮಯೆ ಪಿಚ್ಚರ್ ಕುಡ್ಲದ ಬಿಗ್ ಸಿನಿಮಾಸ್, ಸಿನಿಪೊಲಿಸ್, ಪಿವಿಆರ್, ಸುರತ್ಕಲ್‌ದ ಸಿನಿಗ್ಯಾಲಕ್ಸಿ, ಪಡ್ಡೆದ್ರದ ಬಿಗ್ ಸಿನಿಮಾಸ್, ಪುತ್ತೂರ್‌ದ ಭಾರತ್ ಸಿನಿಮಾಸ್, ಬೊಲ್ತೇರ್‌ದ ಭಾರತ್, ಸುಳ್ಯದ ಸಂತೋಷ್ ಚಿತ್ರಮಂದಿರಡ್ ಬುಡುಗಡೆ ಆಯರೆ ಉಂಡು. ಒಡಿಪುದ ಕಲ್ಪನಾ ಬೊಕ್ಕ ಕುಡ್ಲದ ರೂಪವಾಣಿ ಥಿಯೇಟರ್‌ಡ್ ಜ.19ಗ್ ಬುಡುಗಡೆ ಆಯರೆ ಉಂಡು ಪಂದ್ ಮಾಹಿತಿ ಕೊರಿಯೆರ್.

ಅವೆರ್ದ್ ಬೊಕ್ಕ ಪಾತೆರಿನ ಪ್ರಕಾಶ್ ಪಾಂಡೇಶ್ವರ್, “ಪೊಸ ಜನಕುಲು ಒಟ್ಟು ಸೇರ್ದ್ ಒಂಜಿ ಎಡ್ಡೆ ಪಿಚ್ಚರ್‌ನ್ ಮಲ್ಪರೆ ಪ್ರಯತ್ನ ಮಲ್ತ್‌ದೆರ್. ಮಾತೆರ್ಲಾ ಪಿಚ್ಚರ್ ತೂಪುನ ಮುಕೇನ ಪ್ರೋತ್ಸಾಹ ಕೊರ್ಲೆ. ಈ ಪಿಚ್ಚರ್ 20 ದಿನಟ್ಟ್ ಚಿತ್ರೀಕರಣ ಆದಿತ್ತ್‌ದ್ ಮುಖ್ಯವಾದ್ ಪಿಚ್ಚರ್‌ಡ್ ಪೊಸ ಕಲಾವಿದೆರೆಗ್ ಅವಕಾಶ ಕೊರ್ತೆರ್. ಪ್ರತಿಭಾವಂತೆರ್‍ನ ತಂಡ ಸೇರೊಂದು ಬೇಲೆ ಮಲ್ತ್‌ದೆರ್ ಪಂದ್ ಪಂಡೆರ್.

ನವೀನ್ ಜಿ ಪೂಜಾರಿ ಮೆರೆನ ನಿರ್ದೇಶನದ ಈ ಪಿಚ್ಚರ್‌ದ ನಾಯಕ ನಟೆ ಆದ್ ಸಾಯಿಕೃಷ್ಣ ಕುಡ್ಲ ಬೊಕ್ಕ ಪ್ರಮುಖ ಪಾತ್ರಡ್ ಶ್ವೇತಾ ಸುವರ್ಣ, ರವಿಕಾಂತ್ ಪೂಜಾರಿ, ಜ್ಯೋತಿಷ್ ಶೆಟ್ಟಿ, ಸುನೀಲ್ ನೆಲ್ಲಿಗುಡ್ಡೆ, ಕಾಮಿಡಿ ಕಿಲಾಡಿ ಪುಗರ್ತೆದ ಪಿಂಕಿ ರಾಣಿ, ರವಿ ರಾಮಕುಂಜ, ಪ್ರಕಾಶ್ ಪಾಂಡೇಶ್ವರ್, ಕಾಮಿಡಿ ಗ್ಯಾಂಗ್ ಪುಗರ್ತೆದ ಮನೀಷ್ ಶೆಟ್ಟಿ ಉಪ್ಪಿರ, ಅಕ್ಷಯ್ ಸರಿಪಲ್ಲ, ಸಂದೀಪ್ ಶೆಟ್ಟಿ ರಾಯಿ, ಶರಣ್ ಕೈಕಂಬ, ಪ್ರವೀಣ್ ಮರ್ಕಮೆ, ಉತ್ಸವ್ ವಾಮಂಜೂರು, ಸವ್ಯರಾಜ್ ಕಲ್ಲಡ್ಕ, ಪ್ರಥ್ವಿನ್ ಪೊಳಲಿ ನಟನೆ ಮಲ್ತ್‌ದೆರ್. ಮಿಥುನ್ ಕೆ.ಎಸ್. ನಿರ್ಮಾಪಕೆರ್ ಆದ್ ರಾಜೇಶ್ ಫೆರಾವೋ ಮೇರ್ ಸಹ ನಿರ್ಮಾಪಕೆರ್ ಆದ್ ಉಲ್ಲೆರ್. ಮದಿಮೆದ ಲೇಸ್‌ದ ಸುತ್ತ ಮುತ್ತ ನಡಪುನ ಕಥೆಕ್ಕ್ ಹಾಸ್ಯದ ಲೇಪನ ಕೊರ್ತೆರ್.

ಪತ್ರಿಕಾಗೋಷ್ಠಿಡ್ ನಾಯಕೆ ನಟೆ ಸಾಯಿಕೃಷ್ಣ ಕುಡ್ಲ, ನಟಿ ಶ್ವೇತಾ ಸುವರ್ಣ, ಸುನಿಲ್ ನೆಲ್ಲಿಗುಡ್ಡೆ, ನಿರ್ಮಾಪಕೆರ್ ಮಿಥುನ್ ಕೆ.ಎಸ್, ಎಡಿಟರ್ ಸುಜಿತ್ ನಾಯಕ್, ಮೆನೇಜರ್ ಹೆರಾಲ್ಡ್, ಪ್ರಕಾಶ್ ಪಾಂಡೇಶ್ವರ್, ಪಿಚ್ಚರ್‌ದ ನಿರ್ದೇಶಕೆರ್ ನವೀನ್ ಜಿ. ಪೂಜಾರಿ, ಸಂಗೀತ ನಿರ್ದೇಶಕೆರ್ ಮಿಲನ್, ಚಿತ್ರ ವಿತರಕ ಸಚಿನ್ ಎ.ಎಸ್. ಉಪ್ಪಿನಂಗಡಿ, ರಾಜೇಶ್ ಫೆರಾವೋ ಇತ್ತೆರ್.