ಸ್ಲ್ಯಾಪ್ ಜರಿದ್ ತೀರ್ನ ಕಾರ್ಮಿಕೆ, ಕಾಂಟ್ರಾಕ್ಟರ್ಗ್ ಗಡಿ
ಇಲ್ಲದ ಸಿಟೌಟ್ದ ಸ್ಲ್ಯಾಪ್ದ ಸೆಂಟ್ರಿಂಗ್ ಬೇಲೆ ಮಲ್ತೊಂದುಪ್ಪುನಗ ಸ್ಲ್ಯಾಪ್ ಜರಿದ್ ಕಾರ್ಮಿಕೆ ಒರಿ ತೀರ್ದ್, ಕಂಟ್ರಾಕ್ಟರ್ಗ್ ಗಡಿ ಆತಿನ ಘಟನೆ ಪುತ್ತೂರು ತಾಲೂಕ್, ಅರಿಯಡ್ಕ ಗ್ರಾಮೊದ, ಪಾದಲಾಡಿ ಪನ್ಪಿನಲ್ಪ ಕೋಡೆ ಕಾಂಡೆ ನಡತ್ದ್ಂಡ್.
ತೀರ್ದಿನ ಕಾರ್ಮಿಕೆ ಅರಿಯಡ್ಕ ಗ್ರಾಮೊದ ಕೌಡಿಚ್ಚಾರ್ ನಿವಾಸಿ ಶೇಖರ ಕುಲಾಲ್ (45) ಅಂಚೆನೇ ಪೆಟ್ಟಾತಿನ ಕಂಟ್ರಾಕ್ಟರ್ ಸಂಜೀವ ಮೊಗೇರ ಪಂದ್ ತೆರಿದ್ಬೈದ್ಂಡ್. ಅರಿಯಡ್ಕ ಗ್ರಾಮೊದ ಪಾದಲಾಡಿ ನಿವಾಸಿ ಕಮಲ ಪನ್ಪಿನಾರೆನ ಇಲ್ಲದ ಸಿಟೌಟ್ದ ಸ್ಲ್ಯಾಪ್ದ ಸೆಂಟ್ರಿಂಗ್ ಬೇಲೆ ಮಲ್ತೊಂದುಪ್ಪುನಗ ಈ ನಡಕೆ ನಡತ್ದ್ಂಡ್. ಈ ನಡಕೆಡ್ ಶೇಖರ ಕುಲಾಲ್ ಬೊಕ್ಕ ಸಂಜೀವ ಮೊಗೇರೆರೆಗ್ ಗಡಿಕುಲಾದ್, ಗಾತಿದ ಪೆಟ್ಟಾದಿತ್ತಿನ ಶೇಖರ ಕುಲಾಲ್ ಆಸ್ಪತ್ರೆಗ್ ಲೆತೊಂದು ಪೋಪಿನ ಸಾದಿಡೇ ತೀರ್ದೆರ್. ಸಮ ಕ್ಯೂರಿಂಗ್ ಆವಂದಿನ ಜಾಗೆಡ್ ಬೇಲೆ ಮನ್ಪುನ ಜೂವೊಗು ಸಂಚಿಕರ ಪಂದ್ ತೆರಿದಿತ್ತ್ದ್ಲಾ ಶೇಖರ್ ಕುಲಾಲೆರೆನ್ ಬೇಲೆ ಮನ್ಪಾಯಿನ ಕಾಂಟ್ರ್ಯಾಕ್ಟರ್ ಸಂಜೀವ ಮೊಗೇರ ಬೊಕ್ಕ ಇಲ್ಲದ ದನಿ ಕಮಲ ಮೊಕ್ಲೆನ ಗೋಸ್ಮರಿಯೇ ನೆವನ ಪಂದ್ ತೀರ್ದಿನ ಶೇಖರ ಕುಲಾಲ್ ಮೆರೆನ ಪಲಯೆ ದಿನೇಶ್ ಕುಲಾಲ್ ಕೊರ್ತಿನ ಒಯಿಲ್ದಂಚ, ಪುತ್ತೂರು ಗ್ರಾಮಾಂತರ ಪೊಲೀಸ್ ಸ್ಟೇಶನ್ ಕೇಸ್ ದಾಖಲ್ ಮಲ್ತೊಂದು, ಪೊಲೀಸೆರ್ ತನಿಖೆ ಮಲ್ತೊಂದುಲ್ಲೆರ್.
