ಪದ್ಮಶ್ರೀ ಪುರಸ್ಕೃತೆರ್ ಸಾಲು ಮರದ ತಿಮ್ಮಕ್ಕ ಮೆರೆನ ಭಾವಚಿತ್ರಗ್ ಭಾವಪೂರ್ಣ ಶ್ರದ್ಧಾಂಜಲಿ ಪಂದ್ ಪಾಡ್ ದ್ ಕಿಡಿಗೇಡಿಲು ಸಾಮಾಜಿಕ ಜಾಲತಾಣಡ್ ಸುಳ್ಳು ಸುದ್ಧಿ ಪಸೆರೊಂದು ಉಲ್ಲೆರ್.
ನೆಕ್ಕ್ ಮೆರೆನ ದತ್ತು ಮಗೆ ಉಮೇಶ್, ಇಂಚಿನ ಸುಳ್ಳು ಸುದ್ಧಿನ್ ಪಸೆರೊರ್ಚಿ ಪಂದ್ ತಿಮ್ಮಕ್ಕ ಮೆರೆನ ವಿಡಿಯೋನ್ ಪೋಸ್ಟ್ ಮಲ್ದೆರ್.
ಸುಬ್ರಹ್ಮಣ್ಯ: ಸುಳ್ಯ ತಾಲೂಕ್ ದ ಪಂಜಡ್ ಇಪ್ಪುನ ಒಂಜೇ ಒಂಜಿ ಸಮುಚ್ಚಯ ಆಸ್ಪತ್ರೆನ್ ಮೇಲ್ದರ್ಜೆಗ್ ಏರಿಸಾಲೆ, ಸಮುದಾಯ ಆಸ್ಪತ್ರೆಯಾದ್ ದಿನದ 24 ಗಂಟೆಲ ಸೇವೆನ್ ಒದಗಿಸಾವೊಲೆಕ್ಕ ಮಲ್ಪರೆ ಪಂಜ ಗಾಂಧಿ ವಿದ್ಯಾಪೀಠದ ಮುತಾಲಿಕೆಡ್ ಗಾಂಧಿ ಜಯಂತಿದಾನಿ ಉಪವಾಸ ಸತ್ಯಾಗ್ರಹ ಮಲ್ತೆರ್.
ಪಂಜಗಾಂಧಿ ವಿದ್ಯಾಪೀಠದ ಗುರ್ಕಾರೆ ಪುರುಷೋತ್ತಮ ಮುಡೂರು ಮೇರ್ ಪಾತೆರ್ದ್, ಮುಲ್ಪ ಇತ್ತೆನೇ ಆರೋಗ್ಯ ಸಮುಚ್ಚಯ ಆಸ್ಪತ್ರೆ ಇತ್ತ್ ದ್, ದಿನತ್ತ 24 ಗಂಟೆ ಸೇವೆ ಕೊರ್ಪಾಯೆರೆ ವಿಫಲ ಆತ್ಂಡ್. ಇಪ್ಪುನ ಒರಿ ವೈದ್ಯೆರ್ ಪಗೆಲ್ ಡ್ ಬೇಲೆ ಮಲ್ತ್ಂಡ ರಾತ್ರೆದ ಪೊರ್ತುಡು ಏರ್ಲಾ ಇಪ್ಪುಜೆರ್. ಅತ್ತಂದೆ ಸಿಬ್ಬಂದಿಲೆನ ಕೊರತೆಲ ಉಂಡು. ಪಂಜ ನಾಡಕಚೇರಿ ವ್ಯಾಪ್ತಿಡ್ ಸುಮಾರ್ 21 ಗ್ರಾಮದ ಜನಕುಲು ಚಿಕಿತ್ಸೆ ಪಡೆಯೆರೆ ಉಂದುವೇ ಆಸ್ಪತ್ರೆಗ್ ಬರ್ಪೆರ್. ಮುಲ್ಪ ಬನ್ನಗ ವೈದ್ಯೆರ್ ಇಜ್ಜಿಂಡ ವಾಪಸ್ ಪೋಯಿನ ಪರಿಸ್ಥಿತಿ ಮಸ್ತ್ ಸರ್ತಿ ಆತ್ಂಡ್. ಸರ್ಕಾರದಕುಲು ಸುಮಾರ್ ಮೂಜಿ ಎಕರೆದಾತ್ ಜಾಗೆನ್ ಆಸ್ಪತ್ರೆ ಅಭಿವೃದ್ಧಿಗ್ ಮೀಸಲಾದ್ ದೀತೆರ್. ಅತ್ತಂದೆ ಸುಮಾರ್ ರಡ್ಡ್ ಕೋಟಿ ಕರ್ಚಿಡ್ ಪೊಸ ಆಸ್ಪತ್ರೆನ್ ಕಟ್ಟದ್, ಆಯಿಟ್ಟ್ 12 ಬೆಡ್ ಪಾಡುನ ವ್ಯವಸ್ಥೆಲ ಉಂಡು. ಈ ಬಗೆಟ್ಟ್ ಸುಮಾರ್ ಸರ್ತಿ ಗ್ರಾಮ ಪಂಚಾಯತ್ ಬೊಕ್ಕ ಒರಿನ ಇಲಾಖೆಗ್ ಬಿನ್ನಾಪು ಸಂದಾಂಡಲ ಇಡೇ ಮುಟ್ಟ ದಾಲ ಪ್ರಯೋಜನ ಆತಿಜಿ. ಅಂಚಾದ್ ಸರಕಾರದಕುಲು ಕೂಡ್ಲೆ ಈ ಬಗ್ಗೆ ಗಮನ ಕೊರ್ದು, ಈ ಆಸ್ಪತ್ರೆನ್ ಮೇಲ್ದರ್ಜೆಗ್ ಏರಿಸಾದ್ ಮುಲ್ಪ ದಿನದ 24 ಗಂಟೆಲ ಆರೋಗ್ಯ ಸೇವೆನ್ ಕೊರ್ಪುಲೆಕ್ಕ ಮಲ್ಪೊಡು ಪಂದ್ ಪಂಡೆರ್.
ಈ ಪೊರ್ತುಡು ಪೀಠದ ಸಂಚಾಲಕೆರ್ ಜಿನ್ನಪ್ಪ ಗೌಡ ಅಳಪೆ ಬೊಕ್ಕ ಪಶುವೈದ್ಯೆರ್ ಡಾ.ದೇವಿ ಪ್ರಸಾದ್ ಕಾನತ್ತೂರು ಪಾಲ್ ಪಡೆದಿತ್ತೆರ್.
ವರದಿ: ಗೋಪಿಚಂದನ್ ಕೆಎಸ್
ಬೆಂಗಳೂರು: ಮಹಾನಗರ ಸಾರಿಗೆ ಸಂಸ್ಥೆ(BMTC) ಮಾಜಿ ಮುಖ್ಯ ಟ್ರಾಫಿಕ್ ಮ್ಯಾನೇಜರ್ ಹಿರಿಯ ಅಧಿಕಾರಿಲೆನ ನಕಲಿ ಸಹಿ ಬೊಕ್ಕ ಕರಿನ ಮೂಜಿ ವರ್ಷಡ್ ಅನರ್ಹ ಸಂಸ್ಥೆಗ್ ಗುತ್ತಿಗೆ ಕೊರ್ದು ಬಿಎಂಟಿಸಿಗ್ 17 ಕೋಟಿ ರೂ. ಎಚ್ಚ ನಷ್ಟ ಮಲ್ತಿನ ಆರೋಪದ ಮಿತ್ತ್ ಅರೆಸ್ಟ್ ಮಲ್ತ್ದ ಪಂದ್ ಪೊಲೀಸೆರ್ ತೆರಿಪಾದೆರ್.
ಅಸಿಸ್ಟೆಂಟ್ ಸೆಕ್ಯುರಿಟಿ ಬೊಕ್ಕ ವಿಜಿಲೆನ್ಸ್ ಅಧಿಕಾರಿ ರಮ್ಯಾ ಸಿ.ಕೆ. ಗಂಭೀರ ವಂಚನೆನ್ ಪತ್ತೆ ಮಲ್ತಿನ ಬೊಕ್ಕ ಅಕ್ಟೋಬರ್ 2 ದಾನಿ ಅಮಾನತು ಆಯಿನ ಏಲ್ ಬಿಎಂಟಿಸಿ ಅಧಿಕಾರಿಲೆನ ವಿರುದ್ಧ ವಿಲ್ಸನ್ ಗಾರ್ಡನ್ ಪೊಲೀಸ್ ಠಾಣೆಡ್ ಎಫ್ಐಆರ್ ದಾಖಲಾದಿತ್ತ್ಂಡ್. ದೂರುದಾರರ ಪ್ರಕಾರ, ಆಪಾದಿತ ವಂಚನೆರ್ದ್ ನಿಗಮ ಒಟ್ಟು 17 ಕೋಟಿರ್ದ್ ಎಚ್ಚ ನಷ್ಟ ಆತ್ಂಡ್ ಪಂದ್ ಪೊಲೀಸ್ ಅಧಿಕಾರಿ ತೆರಿಪಾದೆರ್.
ಸುಬ್ರಹ್ಮಣ್ಯ: ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಪಿರವುಡ್ ಇಪ್ಪುನ ಕುಮಾರಪರ್ವತದ ಚಾರಣಗ್ ಅ.3 ರ್ದ್ ನಿರ್ಬಂಧ ಪಾಡ್ದೆರ್.
ಅವೆರ್ದ್ ಬೊಕ್ಕ ಬರ್ಸದ ಪ್ರಮಾಣ ಎಚ್ಚ ಇತ್ತಿನೇರ್ದಾವರ ಬೊಕ್ಕ ಹವಾಮಾನ ಇಲಾಖೆ ಆರೆಂಜ್ ಅಲರ್ಟ್ ಘೋಷಣೆ ಮಲ್ತಿನೆರ್ದಾವರ ಚಾರಣಿಗೆರೆನ ಸುರಕ್ಷತೆದ ನಿಲೆಟ್ಟ್ ಅ.3 ರ್ದ್ ನನದ ಆದೇಶ ಮುಟ್ಟ ಕುಮಾರಪರ್ವತ ಚಾರಣ ನಿಷೇಧ ಮಲ್ದ್ಂಡ್ ಪಂದ್ ಅರಣ್ಯ ಇಲಾಖೆದ ಅಧಿಕಾರಿಲು ತೆರಿಪಾದೆರ್.
ಮಲ್ಲ ಗುಡ್ಡೆನ್ ಬರ್ತಿಯೆರೆ ಬರ್ಸದಾವೆರ ಚಾರಣಿಗೆರೆಗ್ ಮಸ್ತ್ ಕಷ್ಟ ಆಪಿನ ಕಾರಣ ಇಲಾಖೆ ಅ.3 ರ್ದ್ ನನದ ಆದೇಶ ಮುಟ್ಟ ಕುಮಾರಪರ್ವತ ಚಾರಣಗ್ ನಿರ್ಬಂಧ ಪಾಡ್ದ್ಂಡ್. ಅಂಚಾದ್ ಚಾರಣಿಗೆರ್, ಪ್ರವಾಸಿಗೆರ್ ಬೊಕ್ಕ ಸಾರ್ವಜನಿಕೆರ್ ಸಹಕಾರ ಮಲ್ಪೊಡು ಪಂದ್ ಇಲಾಖೆ ಬಿನ್ನಾಪು ಮಲ್ದ್ಂಡ್.
ಮೇ ತಿಂಗೊಲ್ ರ್ದ್ ಸೆ.29 ಮುಟ್ಟ ಅರಣ್ಯ ಇಲಾಖೆ ದೊಂಬು ಬೊಕ್ಕ ಎಚ್ಚ ಬರ್ಸರ್ದಾವರ ಚಾರಣಿಗೆರೆಗ್ ಕುಮಾರಪರ್ವತ ಪ್ರಯಾಣಗ್ ನಿರ್ಬಂಧ ಪಾಡ್ದಿತ್ತೆರ್. ಸನಿಯಾರರ್ದ್ ನಿರ್ಬಂಧ ದೆತ್ತ್ ದ್ ಚಾರಣಗ್ ಮುಕ್ತ ಅವಕಾಶ ಕೊರ್ದಿತ್ತೆರ್. ಈ ಕಾರಣರ್ದ್ ಸನಿಯಾರ, ಐತಾರ ಮಲ್ಲ ಸಂಖ್ಯೆಡ್ ಚಾರಣಿಗೆರ್ ಪಾಲ್ ಪಡೆದಿತ್ತೆರ್. ಆಂಡ ಈ ದಿನಟ್ಟ್ ಕುಕ್ಕೆ ಸೇರಿನಂಚೆನೆ ಗುಡ್ಡೆ ಪ್ರದೇಶಡ್ ಮಸ್ತ್ ಬರ್ಸ ಬತ್ತಿನ ಕಾರಣ ಚಾರಣಿಗೆರೆಗ್ ಚಾರಣ ಪೋಯೆರೆ ಕಷ್ಟ ಆದಿತ್ತ್ಂಡ್. ಅತ್ತಂದೆ ನನದ ದಿನಟ್ಟ್ ಎಚ್ಚದ ಬರ್ಸದ ಮುನ್ನಚೂಚನೆನ್ ಹವಾಮಾನ ಇಲಾಖೆ ಕೊರ್ನ ಕಾರಣ ಮುನ್ನೆಚ್ಚರಿಕೆ ಕ್ರಮವಾದ್ ಇಲಾಖೆ ಈ ಆದೇಶ ಕೊರ್ತುಂಡು. ಐತಾರ ಎಚ್ಚಿನ ಸಂಖ್ಯೆಡ್ ಜನಕುಲು ಕುಮಾರಪರ್ವತಗ್ ಪೋದಿತ್ತೆರ್.
ವರದಿ: ಗೋಪಿಚಂದನ್ ಕೆಎಸ್
ಮುಲ್ಕಿ: ಕರ್ನಿರೆದ ದಿನಸಿ ಬ್ಯಾರ ಮಲ್ಪುನಾರ್ ಒರಿ ವಿಷತ್ತ ಉಚ್ಚು ತುಚ್ಚಿದ್ ತೀರ್ ಪೋತೆರ್.
ಕರ್ನಿರೆ ಮಸೀದಿ ಕೈತಲ್ದ ಸಯ್ಯದ್ ಆಲಿ(57) ತೀರ್ ಪೋಯಿನಾರ್. ಆರ್ ತನ್ನ ತೋಟಡ್ ತರ್ಕಾರಿ ಬುಳೆನ್ ಮಲ್ತೊಂದಿತ್ತ್ ದ್ , ಕಾಂಡೆ ತೋಟಗ್ ಪೋನಗ ಉಚ್ಚು ತುಚ್ಚಿದ್ಂಡ್. ಅಪಗನೆ ಅರೆನ್ ಆಸ್ಪತ್ರೆಗ್ ದಾಖಲ್ ಮಲ್ತ್ಂಡಲ ಚಿಕಿತ್ಸೆ ಫಲಕಾರಿ ಆವಂದೆ ತೀರ್ ಪೋಯೆರ್.
ಪುತ್ತೂರು : ಶ್ರೀ ಸೋದೆ ಮಠಾಧೀಶೆರ್ ಪ್ರತಿಷ್ಠಾಪನೆ ಮಲ್ತಿನ ಶ್ರೀ ವಿಷ್ಣುಮೂರ್ತಿ ದೇವಸ್ಥಾನ ಕಳೆಂಜ ದೇಂತಡ್ಕ, ಬಿಳಿಯೂರು ಪೆರ್ನೆಡ್ ಮಾರ್ನೆಮಿದ ನವರಾತ್ರಿ ಉಚ್ಚಯ ಅ.15 ರ್ದ್ 24 ಮುಟ್ಟ ನಡಪೆರೆ ಉಂಡು. ನೆತ್ತ ಲೆಪ್ಪೋಲೆ ಬುಡುಗಡೆನ್ ಅ.5 ದಾನಿ ದೇವಾಲಯಡ್ ಬುಡುಗಡೆ ಮಲ್ತೆರ್.
ಲೇಸ್ಡ್ ದೇವಸ್ಥಾನದ ಪವಿತ್ರಪಾಣಿ ಕೃಷ್ಣರಾವ್ ಬಾಗ್ಲೊಡಿ, ದೇವಸ್ಥಾನದ ಆಡಳಿತ ಮಂಡಳಿದ ಗುರ್ಕಾರೆ ಕೃಷ್ಣಮೂರ್ತಿ ಕಾರಂತ ಶಂಕರಯ್ಯ ಪಾಲು , ಕಾರ್ಯದರ್ಶಿ ರೇವತಿ ಪಿ, ಉಪಾಧ್ಯಕ್ಷೆರ್ ಉಮೇಶ್ ಪೂಜಾರಿ ಬಾಕಿಮಾರ್ , ಕೋಶಾಧಿಕಾರಿ ಚಿದಾನಂದ ಕಳೆಂಜ, ಉಮಾನಾಥ ಶೆಟ್ಟಿ ಸಂಪಿಗೆಕೋಡಿ, ಸುಂದರ ಮಲ್ಲಡ್ಕ, ವಿಜೇತ್ ಕುಮಾರ್, ಪುಷ್ಪರಾಜ್ ಶೆಟ್ಟಿ ಪದಬರಿ, ರವೀಂದ್ರ ಶೆಟ್ಟಿ, ದಿನೇಶ್ ಗುಂಡಿ, ವೇಣುಗೋಪಾಲ್ ಬಟ್ಟೆಜಾಲ್, ಶೀನಪ್ಪ ಪೂಜಾರಿ, ಸುರೇಶ್ ಶೆಟ್ಟಿ, ನೀಲಪ್ಪ ಗೌಡ, ಚಂದ್ರಹಾಸ ಶೆಟ್ಟಿ, ಸಂಜೀವ ಪೂಜಾರಿ, ಐತ್ತಪ್ಪ ಭಂಡಾರಿ, ಪುರಂದರ ಗೌಡ, ವಿದ್ಯಾಪ್ರಸಾದ್, ಕಿರಣ್ ಶೆಟ್ಟಿ, ಪ್ರೀತಮ್ ಕೇದಗೆ, ಗೋಪಾಲ ಶೆಟ್ಟಿ ಸಂಪಿಗೆಕೋಡಿ, ಗಿರೀಶ್ ಭಟ್,ಗಂಗಾಧರ ಶೆಟ್ಟಿ,ಶೀವಪ್ಪ ನಾಯ್ಕ, ನಳಿನಿ ಉಮೇಶ್,ಮಿತ್ರದಾಸ್ ರೈ, ಸದಾಶಿವ ಶೆಟ್ಟಿ, ಗೀರಿಶ್ ಪೂಜಾರಿ, ಚೇತನ್, ಸೀತಾರಾಮ ಸಾಮಾನಿ, ಶೀನಪ್ಪ ಗೌಡ ಕುಂಡಾಜೆ, ಪದ್ಮನಾಭ ಸಾಮಾನಿ, ಮೋಹನ್ ಶೆಟ್ಟಿ, ತನಿಯಪ್ಪ ಪೂಜಾರಿ,ಸತೀಶ್ ಶೆಟ್ಟಿ, ನಾರಾಯಣ ಪೂಜಾರಿ, ಕೊರಗಪ್ಪ ಭಂಡಾರಿ, ಜಯ ಆಚಾರ್ಯ, ದೇವಸ್ಥಾನದ ಅರ್ಚಕೆರಾಯಿನ ನಾರಾಯಣ ಭಟ್ ಬೊಕ್ಕ ಊರುದ ಭಕ್ತಾದಿಲು ಇತ್ತೆರ್.
ಕೋಚಿಂಗ್ ಇಜ್ಜಂದೆ ಯುಪಿಎಸ್ಸಿ ಪರೀಕ್ಷೆ ಬರೆದ್ ಸಲೋನಿ ವರ್ಮಾ ಮೇರ್ 70 ನೇ ರ್ಯಾಂಕ್ ಪಡೆತೆರ್.
ಯುಪಿಎಸ್ಸಿ ಪರೀಕ್ಷೆ ಬರೆದ್ ಐಎಎಸ್, ಐಪಿಎಸ್, ಅಂಚನೆ ಐಎಫ್ ಎಸ್ ಅಧಿಕಾರಿ ಆವೊಡು ಪನ್ಪಿನವು ಮಸ್ತ್ ಜನತ್ತ ಕನ ಆದಿಪ್ಪುಂಡು.
ಜಾರ್ಖಂಡ್ ದ ಜಮ್ಶೆಡ್ಪುರದಾರ್ ಆಯಿನ ಮೇರ್ ಇತ್ತೆ ದಿಲ್ಲಿಡ್ ವಾಸ ಉಲ್ಲೆರ್.
ಸಿಕ್ಕಿಂಡ್ ಆಯಿನ ಮೇಘಸ್ಪೋಟಡ್ ಬೊಲ್ಲ ಬತ್ತ್ದ್ 14 ಜನ ತೀರ್ ಪೋದಿತ್ತ್ದ್, 102 ಜನ ನಾಪತ್ತೆ ಆಯಿನ ಘಟನೆ ನಡತ್ಂಡ್.
ಸಂಕಲು, ಗಾಡಿಲು, ಇಲ್ಲ್-ಕಟ್ವಾನೊಲು ಬೊಲ್ಲಡ್ ಪೋದಿತ್ತ್ದ್ ಈ ಘಟನೆನ್ ಸಿಕ್ಕಿಂ ಸರ್ಕಾರ “ರಾಷ್ಟ್ರೀಯ ವಿಪತ್ತು” ಪಂದ್ ಘೋಷಣೆ ಮಲ್ತ್ದ್ಂಡ್. ಅಂಗಾರೆ ನಡುರಾತ್ರೆ ಟೀಸ್ಟಾ ತುದೆಟ್ಟ್ ಬೊಲ್ಲ ಬತ್ತಿತ್ಂಡ್.
ಬೊಂಬೈ: ಮಹಾರಾಷ್ಟ್ರದ ಮಣ್ಣ್ ಡ್ ಬಿಲ್ಲವ ಸಮಾಜದ ಪ್ರತಿಷ್ಠೆದ ಬ್ಯಾಂಕ್, ತುಳುವೆರೆನ ಪೆರ್ಮೆದ ಭಾರತ್ ಬ್ಯಾಂಕ್ ದ ಆಡಳಿತ ಮಂಡಳಿದ ಓಟುಡು ಬಿಲ್ಲವ ಭವನದ ರೂವಾರಿ ದಿ. ಜಯ ಸುವರ್ಣ ಮೆರೆನ ಕೂಟದಕುಲು ಗೆಂದ್ ದೆರ್.
ಪ್ರತಿಷ್ಠಿತ ಭಾರತ್ ಬ್ಯಾಂಕ್ ಗ್ ಅ.2 ಕ್ಕ್ ಓಟು ನಡತ್ ದ್ ಅ.4 ಕ್ಕ್ ರಿಸಲ್ಟ್ ಬೈದ್ಂಡ್. ಬೊಲ್ಪುರ್ದ್ ರಾತ್ರೆ ಮುಟ್ಟ ಒಟ್ಟು 5 ಸುತ್ತುಡು ಓಟು ಗೆನ್ಪುನ ಬೇಲೆ ನಡತ್ಂಡ್. ಸುರುತ್ತ ಸುತ್ತುಡು ಜಯ ಸುವರ್ಣ ಪ್ಯಾನೆಲ್ ದ ಮಾತ ಅಭ್ಯರ್ಥಿಲು ಮಸ್ತ್ ಓಟುರ್ದ್ ದುಂಬು ಇತ್ತೆರ್. ಅಕೇರಿದ ಸುತ್ತುದ ಓಟುದ ಲೆಕ್ಕ ಮುಗಿನಗ ಜಯ ಸುವರ್ಣ ಪ್ಯಾನೆಲ್ ದ ಎಚ್ಚದ ಅಭ್ಯರ್ಥಿಲು 1500 ರ್ದ್ ಎಚ್ಚ ಓಟುದ ಅಂತರಡ್ ಗೆಂದಿಯೆರ್.
ಭಾರತ್ ಬ್ಯಾಂಕ್ ದ ಆಡಳಿತ ಮಂಡಳಿ ಓಟುಡು ಈ ಸರ್ತಿ ಜಯ ಸುವರ್ಣ ಬೊಕ್ಕ ಬೊಂಬೈ ಬಿಲ್ಲವರ ಅಸೋಸಿಯೇಷನ್ ದ ಅಧ್ಯಕ್ಷೆರ್ ಹರೀಶ್ ಅಮೀನ್ ಮೆರೆನ ಪ್ಯಾನೆಲ್ ದ ನಡುಟ್ಟ್ ನೇರ ಫೈಟ್ ಇತ್ತ್ ದ್, ಭಾರಿ ಕುತೂಹಲ ಇತ್ತ್ಂಡ್.
ಓಟುದ ಫಲಿತಾಂಶ ಘೋಷಣೆ ಆಯಿನಂಚೆನೆ, ಜಯ ಸುವರ್ಣ ಅಭಿಮಾನಿ ಬಳಗ, ಹಿತೈಷಿಲು, ಸಮಾಜ ಬಾಂಧವೆರ್ ಜಯ ಸುವರ್ಣ ಪ್ಯಾನೆಲ್ ದ ನಾಯಕೆ ಸೂರ್ಯಕಾಂತ ಜಯ ಸುವರ್ಣ ಬೊಕ್ಕ ಗೆಂದಿನ ಮಾತ ಅಭ್ಯರ್ಥಿಲೆಗ್ ಅಭಿನಂದನೆ ಸಂದಾದೆರ್.
ಕುಡ್ಲ: 2021-2022 ಅಂಚನೆ 2023 ನೇ ಸಾಲ್ದ ಮುಖ್ಯಮಂತ್ರಿಲೆನ ಬಂಗಾರ್ದ ಪದಕ ಪುರಸ್ಕಾರಗ್ ಜಿಲ್ಲೆದ ಅಗ್ನಿಶಾಮಕ ಅಧಿಕಾರಿಲು ಬೊಕ್ಕ ಸಿಬ್ಬಂದಿಗಳು ಆಯ್ಕೆ ಆತೆರ್.
ಪಾಂಡೇಶ್ವರ ಅಗ್ನಿಶಾಮಕ ಠಾಣೆದ ಜಿಲ್ಲಾ ಅಗ್ನಿಶಾಮಕ ಅಧಿಕಾರಿ ಭರತ್ ಕುಮಾರ್, ಕದ್ರಿ ಅಗ್ನಿಶಾಮಕ ಠಾಣೆದ ಜಿಲ್ಲಾಧಿಕಾರಿ ಮಹಮ್ಮದ್ ಜುಲ್ಫಿಕರ್ ನವಾಜ್ ಕೆ ಪಿ, ಜಿಲ್ಲೆದ ಸಹಾಯಕ ಅಗ್ನಿಶಾಮಕ ಠಾಣಾಧಿಕಾರಿ ರಾಜ್, ಜಿಲ್ಲೆದ ಕುಡ್ಲ ತಾಲೂಕ್ದ ಆದರ್ಶ ನಗರದ ಪ್ರಮುಖ ಅಗ್ನಿಶಾಮಕ-1647 ಸುದರ್ಶನ್.ಕೆ, ಕಡಬ ತಾಲೂಕ್ದ ಕೊಂಬಾರು ಪ್ರಮುಖ ಅಗ್ನಿಶಾಮಕ-2119 ರುಕ್ಮಯ ಗೌಡ ಇ, ಕುಡ್ಲ ತಾಲೂಕ್ದ ಗುರುಪುರ ಗ್ರಾಮದ ಪ್ರಮುಖ ಅಗ್ನಿಶಾಮಕ- 2189 ಸುರೇಶ್ ಶೆಟ್ಟಿ, ಬೊಲ್ತೇರ್ ತಾಲೂಕ್ದ ಗರ್ಗಾಡಿ ಗ್ರಾಮದ ಅಗ್ನಿಶಾಮಕ – 2427 ಉಸ್ಮಾನ್ ಮುಖ್ಯಮಂತ್ರಿ ಬಂಗಾರ್ದ ಪದಕ ಪಡೆಯಿನ ಅಧಿಕಾರಿಲು ಬೊಕ್ಕ ಸಿಬ್ಬಂದಿಲು ಪಂದ್ ಜಿಲ್ಲಾ ಅಗ್ನಿಶಾಮಕ ಅಧಿಕಾರಿಲು ಪ್ರಕಟನೆಡ್ ತೆರಿಪಾದೆರ್.
