ಬಿಲ್ಲವರ ಎಸೋಸಿಯೇಶನ್ ಬೊಂಬೈದ ಪೊಂಜೋವ್ ಲೆನ ವಿಭಾಗದ ಮುತಾಲಿಕೆಡ್ ಭಜನಾ ಪಂತೊ ಅ.14 ಸನಿಯಾರ ನಡಪರೆ ಉಂಡು.
ಈ ಲೇಸ್ ಕೈತಲ್ ದ ಮಾತ ಕಚೇರಿದ ಪೊಂಜೋವ್ ಲೆರ್ದ್ ನಡಪುಂಡು ಪಂದ್ ಬಿಲ್ಲವರ ಎಸೋಸಿಯೇಷನ್ ಬೊಂಬೈದ ಗುರ್ಕಾರೆ ಹರೀಶ್ ಜಿ ಅಮೀನ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ದೇವರ ಮನೆ ಪ್ರವಾಸಗ್ ಬತ್ತ್ ಇತ್ತಿನ ಬೋಲ್ತೆರ್ ತಾಲೂಕುದ ಕೊಯ್ಯೂರು ಗ್ರಾಮದ ದೀಕ್ಷಿತ್ ಅಕ್ಟೋಬರ್ 10 ದಾನಿ ಅಂಗಾರೆ ಬಯ್ಯಗ್ ನಾಪತ್ತೆ ಆದ್, ಆಂಡ ಇತ್ತೆ ಅಕ್ಟೋಬರ್ 11 ದಾನಿ ಕಾಂಡೆ ಇಲ್ಲದ ಕೈತಲ್ದ ಮೋರಿಡ್ ಪತ್ತೆ ಆತೆ. ಮೋರಿಡ್ ಕುಲ್ದ್ ಇತ್ತಿನಾಯನ್ ಊರುದಕುಲ್ ಇಲ್ಲಗ್ ಬುಡ್ದು ನಾಪತ್ತೆ ಪ್ರಕರಣ ಸುಖಾಂತ್ಯ ಆತ್ಂಡ್.
ಜವನೇ ಬೇತೆ ಗಾಡಿದ ಮುಖೇನ ಊರುಗ್ ಬತ್ತ್ದ್ ಪತ್ತೆ ಆತಿನ ಬಗ್ಗೆಟ್ ಬಣಕಲ್ ಪೊಲೀಸೆರೆಗ್ ಇಲ್ಲದಕುಲ್ ಮಾಹಿತಿ ಕೊರ್ತೆರ್.
ಭಾರತ-ಪಾಕ್ WC ಪಂತೊ ಅ.14 ಕ್ಕ್ ಅಹಮದಾಬಾದ್ ದ ಮೋದಿ ಸ್ಟೇಡಿಯಂಡ್ ನಡಪರೆ ಉಂಡು.
ನೆಕ್ಕ್ 11 ಸಾರರ್ದ್ ಎಚ್ಚ ಭದ್ರತಾ ಸಿಬ್ಬಂದಿನ್ ನಿಯೋಜನೆ ಮಲ್ದೆರ್. ಭದ್ರತಾ ಸಿಬ್ಬಂದಿಲು ಕ್ರೀಡಾಂಗಣ ಬೊಕ್ಕ ಇಡೀ ಪೇಂಟೆಡ್, ಸೂಕ್ಷ್ಮ ಪ್ರದೇಶಡ್ ಪಥಸಂಚಲನ ನಡಪಾಯೆರೆ ಉಲ್ಲೆರ್ ಪಂದ್ ಪೌರಾಯುಕ್ತ ಜಿಎಸ್ ಮಲಿಕ್ ತೆರಿಪಾದೆರ್.
ಗುಜರಾತ್ ಪೊಲೀಸ್, ಎನ್ಎಸ್ ಜಿ, ಆರ್ ಎಎಫ್ ಬೊಕ್ಕ ಗೃಹ ರಕ್ಷಕ ದಳ ಸೇರ್ದ್ ಬೇತೆ ಬೇತೆ ಇಲಾಖೆದ ಭದ್ರತಾ ಸಿಬ್ಬಂದಿಲು ಬರ್ಪೆರ್.
ಕುಡ್ಲ: ತುಳುನಾಡ್ ದ ಕಲೆ, ಸಂಸ್ಕೃತಿನ್ ಒರಿಪಾವುನ ದಿಟ್ಟಿಡ್ ಸುರು ಆಯಿನ ಕುಡ್ಲ ಸಾಂಸ್ಕೃತಿಕ ಪ್ರತಿಷ್ಠಾನದ ರಡ್ಡನೇ ವರ್ಷೊದ ಪಿಲಿಪರ್ಬದ ಲೆಪ್ಪೋಲೆನ್ ಪ್ರತಿಷ್ಠಾನದ ಮಾರ್ಗದರ್ಶಕೆರ್, ಸಂಸದೆರ್, ಬಿಜೆಪಿ ರಾಜ್ಯಾಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್ ಕುಡ್ಲಡ್ ಬುಡುಗಡೆ ಮಲ್ತೆರ್.
ಬೊಕ್ಕ ಮೇರ್ ಪಾತೆರ್ದ್, ಕುಡ್ಲದ ಕೇಂದ್ರ ಮೈದಾನಡ್ ಅ.21 ಕ್ಕ್ ನಡಪುನ ಪಿಲಿಪರ್ಬ ಈ ವರ್ಷ ಗೌಜಿಡ್ ನಡಪರೆ ಉಂಡು. ಒಟ್ಟು 15 ಕೂಟಲು ಪಾಲ್ ಪಡೆಯೆರೆ ಉಂಡು ಪಂದ್ ಪಂಡೆರ್.
ಪಿಲಿಪರ್ಬದ ಗುರ್ಕಾರ್ಮೆನ್ ಒಯಿಸೊನ್ನ ಶಾಸಕೆರ್ ವೇದವ್ಯಾಸ ಕಾಮತ್ ಪಾತೆರ್ದ್, ತುಳುನಾಡ್ ದ ಸಂಸ್ಕೃತಿ ಪಿಲಿಏಸನ್ ರಾಜ್ಯ, ದೇಶ, ಅಂತಾರಾಷ್ಟ್ರೀಯ ಮಟ್ಟಡ್ ಪ್ರಚಾರ ಮಲ್ಪರೆ ನಮ್ಮ ಪ್ರತಿಷ್ಠಾನ ತಯಾರ್ ಆತ್ಂಡ್. ಪಿಲಿಏಸ ಪಾಡಿನಕ್ಲೆನ್ ಪ್ರೋತ್ಸಾಹ ಮಲ್ಪುನ ದಿಟ್ಟಿಡ್ ಈ ವೇದಿಕೆನ್ ನಿರ್ಮಾಣ ಮಲ್ದ್ಂಡ್. ನೆಕ್ಕ್ ಮಸ್ತ್ ಕಾಸ್ ಖರ್ಚಾಪುಂಡು. ಎಂಕ್ಲೆನ್ ಬೆಂಬಲಿಸಾಯೆರೆ ದುಂಬು ಬತ್ತಿನ ಮಾತ ಸಂಘ, ಸಂಸ್ಥೆಲೆಗ್ ಅಭಿನಂದನೆ ಸಂದಾವೆ ಪಂದ್ ಪಂಡೆರ್.
ಈ ಪೊರ್ತುಡು ಪ್ರತಿಷ್ಠಾನದ ಮಾನಾದಿಗೆದ ಗುರ್ಕಾರೆ ಗಿರಿಧರ್ ಶೆಟ್ಟಿ, ಗುರ್ಕಾರೆ ದಿವಾಕರ ಪಾಂಡೇಶ್ವರ, ಪ್ರಮುಖೆರ್ ಮಂಗಲ್ಪಾಡಿ ನರೇಶ್ ಶೆಣೈ, ಜಗದೀಶ್ ಕದ್ರಿ, ಚೇತನ್ ಕಾಮತ್, ಲಲಿತ್ ಮೆಂಡನ್, ಶಾನ್ ಪಾಲ್ ಪಡೆದಿತ್ತೆರ್.
ಒಡಿಪು: ಕೋಟ ಶಿವರಾಮ ಕಾರಂತೆರೆನ ಪುಟ್ಟು ಪರ್ಬದ ಆಚರಣೆಗ್ ಒಡಿಪು ಜಿಲ್ಲೆಗ್ ಕರ್ನಾಟಕ ರಾಜ್ಯದ ರಾಜ್ಯಪಾಲೆರ್ ಥಾವರ್ ಚಂದ್ ಗೆಹ್ಲೋಟ್ ಭೇಟಿ ಕೊರಿಯೆರ್.
ಅವೆರ್ದ್ ಬೊಕ್ಕ ಕೊಲ್ಲೂರು ಶ್ರೀ ಮೂಕಾಂಬಿಕಾ ದೇವಲ್ಯಗ್ ಭೇಟಿ ಕೊರ್ದು ಬಯ್ಯಗ್ ಕುಡ ಕುಡ್ಲ ಇಮಾನ ನಿಲ್ದಾಣದ ಮುಖೇನ ಬೆಂಗ್ಲೂರುಗ್ ಪ್ರಯಾಣ ಮಲ್ತೆರ್. ಮೆರೆಗ್ ಒಡಿಪು ಬಿಜೆಪಿ ನಿಯೋಗರ್ದ್ ಮಾನಾದಿಗೆ ಮಲ್ತೆರ್. ಜಿಲ್ಲಾ ಬಿಜೆಪಿ ಗುರ್ಕಾರೆ ಕುಯಿಲಾಡಿ ಸುರೇಶ್ ನಾಯಕ್ ರಾಜ್ಯಪಾಲೆರೆಗ್ ಅಭಿನಂದನೆ ಸಂದಾಯೆರ್.
ಈ ಪೊರ್ತುಡು ವಿಭಾಗ ಪ್ರಭಾರಿಲಾಯಿನ ಉದಯ ಕುಮಾರ್ ಶೆಟ್ಟಿ, ಶಾಸಕೆರ್ ಯಶ್ಪಾಲ್ ಸುವರ್ಣ, ಗುರ್ಮೆ ಸುರೇಶ್ ಶೆಟ್ಟಿ, ಗುರುರಾಜ್ ಗಂಟಿಹೊಳೆ, ಮಾಜಿ ಶಾಸಕೆರ್ ಕೆ ರಘುಪತಿ ಭಟ್, ಪ್ರಮೋದ್ ಮಧ್ವರಾಜ್, ಬಿಜೆಪಿ ಜಿಲ್ಲಾ ಪಧಾನ ಕಾರ್ಯದರ್ಶಿ ಕುತ್ಯಾರು ನವೀನ ಶೆಟ್ಟಿ, ಜಿಲ್ಲಾ ಬಿಜೆಪಿ ವಕ್ತಾರೆರ್ ಕೆ ರಾಘವೇಂದ್ರ ಕಿಣಿ, ಪೂರ್ಣಿಮಾ ಸುರೇಶ್ ಪಾಲ್ ಪಡೆದಿತ್ತೆರ್.
NTPC ಲಿಮಿಟೆಡ್ ಡ್ ಖಾಲಿ ಇಪ್ಪುನ 495 ಬೇತೆ ಬೇತೆ ಟ್ರೈನಿ ಬೇಲೆಗ್ ಗ್ರಾಜುಯೇಟ್ ಆಪ್ಟಿಟ್ಯೂಡ್ ಟೆಸ್ಟ್ ಇನ್ ಇಂಜಿನಿಯರಿಂಗ್ (GATE) ಪರೀಕ್ಷೆ ಬರೆದ್ ಪಾಸಾಯಿನಕುಲು ಅರ್ಜಿ ಸಂದಾವೊಲಿ.
ಆಸಕ್ತೆರ್ ಆನ್ ಲೈನ್ ಮುಖೇನ ಅ.20 ದೊಲಯಿ ಅರ್ಜಿ ಸಂದಾವೊಡು. ತಿಂಗೊಲುಗು ಸಂಬಳ 40 ಸಾರರ್ದ್ 1 ಲಕ್ಷ ಮುಟ್ಟ ಉಂಡು.
ಪಣಂಬೂರು: ಮಡಿಕೇರಿದ ಒಂಜಿ ಜನ ಪಣಂಬೂರು ಪೊಲೀಸ್ ಠಾಣೆ ವ್ಯಾಪ್ತಿದ ಬಬ್ಬು ಸ್ವಾಮಿ ದೈವೊಲ್ಯಡ್ ಬಲ್ಲ್ ಪಾಡೊಂದು ತೀರ್ ಪೋಯಿನ ಘಟನೆ ನಡತ್ ದ್ಂಡ್.
ತೀರ್ ಪೋಯಿನಾರ್ ಕೊಡಗು ಜಿಲ್ಲೆ ಮಡಿಕೇರಿ ತಾಲೂಕ್ ದ ಗೋಪಾಲ (64) ಪಂದ್ ತೆರಿದ್ ಬೈದ್ಂಡ್. ಮೆರೆನ ಸಾವುಗ್ ನಿಜವಾಯಿನ ಕಾರಣ ತೆರಿದ್ ಬೈದಿಜಿ. ಈ ಘಟನೆಗ್ ಸಂಬಂಧ ಪಟ್ಟಿನಂಚೆನೆ ಪಣಂಬೂರು ಪೊಲೀಸೆರ್ ಜಾಗೆ ಪರಿಶೀಲನೆ ನಡಪಾದ್ ಕೇಸ್ ದಾಖಲ್ ಮಲ್ದೆರ್.
ಮುಲ್ಕಿ: ಕೇಂದ್ರ ಸರಕಾರದ ರಾಷ್ಟ್ರೀಯ ಹೆದ್ದಾರಿ ಸಚಿವಾಲಯದ ವ್ಯಾಪ್ತಿಡ್ 1934 ರಲ್ಲಿ ರಚನೆ ಆಯಿನ ಇಂಜಿನಿಯರ್ಸ್ ಬೊಕ್ಕ ತಾಂತ್ರಿಕ ಪರಿಣಿತರ ಸದಸ್ಯೆರ್ ಇಪ್ಪುನ ಉನ್ನತ ಸಮಿತಿ, ಇಂಡಿಯನ್ ರೋಡ್ಸ್ ಕಾಂಗ್ರೆಸ್ ( ಐ ಆರ್ ಸಿ) ದ ಸದಸ್ಯೆರಾದ್ ಮುಲ್ಕಿ ಇಂಜಿನಿಯರ್ಸ್ ಅಸೋಸಿಯೇಷನ್ದ ಅಧ್ಯಕ್ಷೆರ್ ಮುಲ್ಕಿ ಕೆ. ಜೀವನ್ ಶೆಟ್ಟಿ ಮೇರ್ ಆಯ್ಕೆ ಆತೆರ್.
ದೇಶದ ಹೆದ್ದಾರಿದ ವಿಷಯಡ್ ಈ ಸಮಿತಿ ಅನುಭವ ಬೊಕ್ಕ ಸಲಹೆನ್ ಸದಸ್ಯರೆರ್ದ್ ಪಡೆಯೊಂದು ಕುಂದು ಕೊರತೆ ನಿವಾರಿಸಾದ್ ದೇಶದ ಅಭಿವೃದ್ಧಿದ ಬೇಲೆ ಮಲ್ಪೆರೆ ಜೀವನ್ ಶೆಟ್ರೆಗ್ ಐಆರ್ ಸಿದ ಸದಸ್ಯತ್ವ ಕೊರ್ತುಂಡು.
ಭೂಕಂಪ, ತೂ, ಬೊಲ್ಲ, ಸುನಾಮಿ , ಇಂಚಿನ ಮಾತ ಬರ್ಪುನೆನ್ ತೆರಿಪಾದ್ ಜೂವ ಬಚಾವ್ ಮಲ್ಪುನ ನಿಲೆಟ್ಟ್ ಜನಕ್ಲೆಡ ಜನ ಜಾಗೃತೆ ಪುಟ್ಟಾವರೆ ಎಚ್ಚರ್ಗೆ ಕೊರ್ರೆ ನಿಕ್ಲೆನ ಮೊಬೈಲ್ ಜೋರುಡು , ಬುಡಂದೆ ಬೀಪ್ ಸೌಂಡ್ ಬರ್ಪಿನ ವ್ಯವಸ್ಥೆನ್ ಸರ್ಕಾರ ಮಲ್ದ್ಂಡ್. ಅಯಿತ್ತ ನಿಲೆಟ್ಟ್ ಎಲ್ಲೆ (ಅ.12) ಕ್ಕ್ ನಿಕ್ಲೆನ ಮೊಬೈಲ್ ಗ್ ಬುಡಂದೆ ಬೀಪ್ ಸೌಂಡ್ ಬರ್ಪುಂಡು.
ನನದ ದಿನೊಕ್ಲೆಡ್ ಪ್ರಕೃತಿ ವಿಕೋಪದ್ ಬಗೆಟ್ ಮುನ್ಸೂಚನೆ ಕೊರ್ಪುನ ನಿಟ್ಟ್ ಡ್ ಟೆಲಿಕಮ್ಯುನಿಕೇಶನ್ ಇಲಾಖೆ ಬೊಕ್ಕ ರಾಷ್ಟ್ರೀಯ ವಿಪತ್ತು ನಿರ್ವಹಣ ಪ್ರಾಧಿಕಾರದ ಸಹಯೋಗಡ್ ಸಕಾಲಿಕ ಮುನ್ನೆಚ್ಚರಿಕೆ (ವಿಭಿನ್ನ ಧ್ವನಿ ಮತ್ತು ಕಂಪನ) ಕೊರ್ಪುನ ವ್ಯವಸ್ಥೆ ನ್ ಮಲ್ದೆರ್. ಅವೆತ್ತ ಪರೀಕ್ಷಾರ್ಥ ರಾಜ್ಯಡ್ ಅ. 12 ದಾನಿ ತುರ್ತು ಎಚ್ಚೆರ್ಗೆ ಸೌಂಡ್ ಬರ್ಪುಂಡು. ಉಂದೆಕ್ಕ್ ಮಂಡೆ ಬೆಚ್ಚ ಮಲ್ಪುನ ಅಗತ್ಯ ಇಜ್ಜಿ. ರೆಸ್ಪಾಂಡ್ ಮಲ್ಪುನಲ ಅಗತ್ಯ ಇಜ್ಜಿ ಪಂದ್ ತೆರಿಪಾದೆರ್.
ಪ್ರಯೋಜನ ದಾದ? ಭೂಕಂಪ, ಸುನಾಮಿ, ಅಗ್ನಿ ದುರಂತ ಬೊಕ್ಕ ಹಠಾತ್ ಪ್ರವಾಹ, ಯುದ್ಧದಂಚಿನ ವಿಪತ್ತುದ ಪೊರ್ತುಡು ವಿಪತ್ತು ನಿರ್ವಹಣ ಪ್ರಾಧಿಕಾರನ್ ಸಾರ್ವಜನಿಕೆರೆಗ್ ಎಚ್ಚರಿಕೆ ಕೊರಿಯೆರೆ ಈ ವ್ಯವಸ್ಥೆ ಸಹಕಾರ ಆಪುಂಡ್. ದುಂಬುದ ದಿನಟ್ ವಿಕೋಪ ಆಪುನ ಜಾಗೆಡ್ ಮೊಬೈಲ್ ಯೂಸ್ ಮಲ್ಪುನಕ್ಲೆಗ್ ಈ ಫ್ಲಾಶ್ ಮೆಸೇಜ್ ಮುಖೆನ ಎಚ್ಚರ ಕೊರ್ಪುಂಡು.
ಬೈಂದೂರು ಬಿಜೆಪಿ ಟಿಕೆಟ್ ದೆಪ್ಪಾದ್ ಕೊರ್ಪೆ ಪಂದ್ ಉದ್ಯಮಿ ಗೋವಿಂದ್ ಬಾಬು ಪೂಜಾರಿಡ ಕೋಟಿಗಟ್ಲೆ ಕಾಸ್ ಪೀಂಕಾದ್ ವಂಚನೆ ಮಲ್ತ್ ಇತ್ತಿನ ಚೈತ್ರಾ ಪ್ರಕರಣೊಡು ಇತ್ತೆ ವಿಚಾರಣೆಗ್ ಬರಿಯೆರೆ ವಜ್ರದೇಹಿ ಸ್ವಾಮಿಲೆಗ್ ಬೆಂಗ್ಳೂರ್ ಸಿಸಿಬಿ ಪೊಲೀಸೆರ್ ನೋಟಿಸ್ ಕೊರ್ತೆರ್.
ಕುಡ್ಲದ ಗುರುಪುರೊಟುಪ್ಪುನ ವಜ್ರದೇಹಿ ಮಠೊತ ರಾಜಶೇಖರಾನಂದ ಸ್ವಾಮಿಲೆಗ್ ನೋಟೀಸ್ ಕಡಪುರ್ದ್, ದುಂಬುದ ದಿನೊಟು ಸ್ವಾಮೀಜಿ ವಿಚಾರಣೆಗ್ ಹಾಜಿರಾವರೆ ಉಲ್ಲೆರ್ ಪಂದ್ ತೆರಿದ್ ಬೈದ್ಂಡ್.
