October 2023

ರಾಷ್ಟ್ರಮಟ್ಟದ ಅಥ್ಲೆಟಿಕ್ಸ್ ಗ್ ವಿವೇಕಾನಂದ ಪಿಯು ಕಾಲೇಜ್‌ದ ಆಂಜೋಕ್ಲೆನ ತಂಡ ಆಯ್ಕೆ

ಪುತ್ತೂರು: ಹೈದರಾಬಾದ್‌ಡ್ ಅ.10ದಾನಿ ನಡತ್ತಿನ ವಿದ್ಯಾಭಾರತಿ ಕ್ಷೇತ್ರ ಮಟ್ಟದ ಅಥ್ಲೆಟಿಕ್ಸ್ ಕ್ರೀಡಾಕೂಟಡ್ ವಿವೇಕಾನಂದ ಪದವಿಪೂರ್ವ ಕಾಲೇಜ್‌ದ ಆಂಜೊಕ್ಲೆನ ತಂಡ ಸುರುತ ಇನಾಮು ಪಡೆದ್‌, ಬಿಹಾರಡ್ ನಡಪುನ ರಾಷ್ಟ್ರಮಟ್ಟದ ಅಥ್ಲೆಟಿಕ್ಸ್ ಕ್ರೀಡಾಕೂಟಗ್ ಆಯ್ಕೆಯಾತೆರ್.‌
ಆಂಜೊಕ್ಲೆನ ವಿಭಾಗದ ಕಲ್ಪಾರ್ಥಿಲಾಯಿನ ಅಭಿಷೇಕ್, ಕೀರ್ತನ್ ಎಸ್ ಕೆ, ಬ್ರಿಜೇಷ್, ಸುಶಾನ್, ಪ್ರಮಥ್, ನಿಹಾಲ್ ರಾಜ್, ಆಯುಷ್ ಪಾಲ್‌ ಪಡೆದಿತ್ತೆರ್. ಈ ತಂಡ ಕಾಲೇಜ್‌ದ ದೈಹಿಕ ಶಿಕ್ಷಣ ನಿರ್ದೇಶಕೆರ್ ರವಿಶಂಕರ್, ಡಾ. ಜ್ಯೋತಿ ಬೊಕ್ಕ ಯತೀಶ್ ಮೊಕ್ಲೆನ ನೇತೃತ್ವಡ್ ತರಬೇತಿನ್‌ ಪಡೆಯೊಂದು ಉಲ್ಲೆರ್. ಕಲ್ಪಾರ್ಥಿಲೆನ ಸಾಧನೆಗ್ ಕಾಲೇಜ್‌ದ ಆಡಳಿತ ಮಂಡಳಿ, ಪ್ರಾಂಶುಪಾಲೆರ್, ಅಧ್ಯಾಪಕೆರ್ ಬೊಕ್ಕ ಅಧ್ಯಾಪಕೇತರ ವೃಂದದಕುಲು ಸೊಲ್ಮೆ ಸಂದಾದೆರ್‌.

ಬೆಂಗ್ಲೂರು ಕಂಬುಲಗ್‌ ಕರೆ ಪೂಜೆ

ಬೆಂಗಳೂರು: ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲಾ ಕಂಬಳ ಸಮಿತಿ (ರಿ), ತುಳು ಕೂಟ ಬೆಂಗಳೂರು, ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲಾ ಸರ್ವ ಸಂಘ ಸಂಸ್ಥೆದ ಒಟ್ಟು ಸೇರಿಗೆಡ್ ಬೆಂಗಳೂರು ಕಂಬಳ ಸಮಿತಿ ಮುಖೇನ ನಡಪುನ ಬೆಂಗಳೂರು ಕಂಬುಲಗ್ ಅ.11ದಾನಿ ಕರೆಪೂಜೆ ನಡತ್‌ಂಡ್.‌
ರಾಜ್ಯದ ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್, ಮಾಜಿ‌ ಮುಖ್ಯಮಂತ್ರಿ ಡಿ.ವಿ.ಸದಾನಂದ ಗೌಡ, ಬೆಂಗಳೂರು ಕಂಬಳ ಸಮಿತಿದ ಗುರ್ಕಾರೆ, ಪುತ್ತೂರು ಶಾಸಕೆರ್ ಅಶೋಕ್‌ ಕುಮಾರ್ ರೈ ಸೇರಿನಂಚ ಗಣ್ಯೆರ್‌ ಸೇರ್ದ್ ಕರೆಪೂಜೆ ಮಲ್ತೆರ್.‌ ಈ ಪೊರ್ತುಡು ಗುಣರಂಜನ್ ಶೆಟ್ಟಿ, ಮಾಜಿ ಡಿಸಿಎಂ ಡಾ.ಅಶ್ವತ್ಥನಾರಾಯಣ್, ಸ್ಥಳೀಯ ಶಾಸಕೆರ್ ಹ್ಯಾರಿಸ್ ನಲಪಾಡ್, ಉದ್ಯಮಿ ಉಮರ್ ಟಿ.ಕೆ., ಗುರುಕಿರಣ್, ಕಂಬಳ ಸಮಿತಿದ ಜಿಲ್ಲಾಧ್ಯಕ್ಷೆರ್ ದೇವಿಪ್ರಸಾದ್ ಶೆಟ್ಟಿ ಬೆಳಪು, ಎಸ್ ಸಿ‌ಡಿಸಿಸಿ ಬ್ಯಾಂಕ್‌ದ ಗುರ್ಕಾರ್ಲು ಡಾ.ಎಂ.ಎನ್. ರಾಜೇಂದ್ರಕುಮಾರ್, ಎಂಆರ್ ಜಿ ಗ್ರೂಪ್‌ದ ಧಣಿ ಪ್ರಕಾಶ್ ಶೆಟ್ಟಿ, ಇತ್ತೆರ್.

ವಿಟ್ಲ : ಬಿಲ್ಲವ ಸಂಘದ ಮಹಿಳಾ ಘಟಕದ ಗುರ್ಕಾರ್ದಿ ಆದ್ ಮಮತಾ ಸಂಜೀವ ಪೂಜಾರಿ, ಕಾರ್ಯದರ್ಶಿಯಾದ್ ಭಾರತಿ ಪ್ರಕಾಶ್‌‌

ವಿಟ್ಲ : ಬಿಲ್ಲವ ಸಂಘದ ಮಹಿಳಾ ಘಟಕದ ಕಾರ್ಯಕಾರಿ ಸಮಿತಿದ ಪದಾಧಿಕಾರಿಲೆನ ಆಯ್ಕೆ ಇಂಚೊಗು ಬಿಲ್ಲವ ಸಂಘದ ಮಹಾಸಭೆಟ್‌ ನಡತ್‌ಂಡ್.

ಗುರ್ಕಾರ್ದಿ ಆದ್ ಮಮತಾ ಸಂಜೀವ ಪೂಜಾರಿ, ಗೌರವಾಧ್ಯಕ್ಷೆ ಪ್ರೇಮಲತಾ, ಉಪಾಧ್ಯಕ್ಷೆ ಲತಾ ಗಣೇಶ್ ಪೂಜಾರಿ ಪಟ್ಲ, ಕಾರ್ಯದರ್ಶಿಯಾದ್ ಭಾರತಿ ಪ್ರಕಾಶ್, ಜೊತೆ ಕಾರ್ಯದರ್ಶಿಯಾದ್ ಶೋಭಾ ಪಟ್ಲ, ಕೋಶಾಧಿಕಾರಿಯಾದ್ ಪ್ರಮೀಳಾ, ಸಂಘಟನಾ ಕಾರ್ಯದರ್ಶಿಯಾದ್ ನಿರ್ಮಲ, ಕ್ರೀಡಾ ಕಾರ್ಯದರ್ಶಿಯಾದ್ ಧನಲಕ್ಷ್ಮೀ ರಾಜೇಶ್, ಸುನಿತಾ ಸುಂದರ ಆಯ್ಕೆಯಾತೆರ್. ಈ ಪೊರ್ತುಡು ಕಾರ್ಯಕಾರಿ ಸಮಿತಿ ಸದಸ್ಯರೆನ್ಲ ನೇಮಕ ಮಲ್ತೆರ್.

ಸುಬ್ರಹ್ಮಣ್ಯ: ಕಾರ್‌ದ ಕನ್ನಡಿ ಪುಡತ್ತ್‌ದ್‌ ಬಂಗಾರ್‌ ಕಂಡಿನ ಕಲ್ವೆ ಅರೆಸ್ಟ್!

ಕುಕ್ಕೆ ಸುಬ್ರಹ್ಮಣ್ಯ ಪಾರ್ಕಿಂಗ್‌ಡ್‌ ಉಂತಾದ್‌ ಇತ್ತಿನ ಕಾರ್‌ದ ಕನ್ನಡಿ ಪುಡತ್ತ್‌ದ್‌ ಬಂಗಾರ್‌ ಕಂಡಿನ ಕಲ್ವನ್‌ ಸುಬ್ರಹ್ಮಣ್ಯದ ಪೊಲೀಸೆರ್‌ ಅರೆಸ್ಟ್‌ ಮಲ್ತ್‌ದೆರ್. ಪ್ರಭಾಕರ ಹೊನ್ನವಳ್ಳಿ ಪನ್ಪಿನಾಯೆ ಅರೆಸ್ಟ್‌ ಆಯಿನ ಆರೋಪಿ.‌
ಸುಬ್ರಹ್ಮಣ್ಯ ಪೊಲೀಸ್ ಠಾಣಾಧಿಕಾರಿ ಕಾರ್ತಿಕ್ ಬೊಕ್ಕ ಮುರಳೀಧರ ನಾಯಕ್, ಕರುಣಾಕರ ಅಂಚನೆ ಸಿಬ್ಬಂದಿಲೆನ ರಡ್ಡ್‌ ಟೀಮ್ ಮಲ್ತ್‌ದ್ ಆರೋಪಿನ್‌ ಸುಬ್ರಹ್ಮಣ್ಯ ರೋಡ್ ರೈಲ್ವೆ ಸ್ಟೇಷನ್‌ಡ್ ಪತ್ ದೆರ್. ಆರೋಪಿನ ಮಿತ್ತ್ ಹೊನ್ನವಳ್ಳಿ ಸೇರಿನಂಚ ಬೇತೆ ಬೇತೆ ಸ್ಟೇಷನ್‌ಡ್ ಕೇಸ್ ಇತ್ತ್‌ದ್‌, ದೇವಸ್ಥಾನಲೆಗ್‌ ಪೋದ್‌ ಏರ್ಲ ಇಜ್ಜಂದಿನ ಪೊರ್ತುಡು ಕಾರ್‌ದ ಕನ್ನಡಿ ಪುಡತ್ತ್‌ದ್‌ ಕಂಡುನ ಬೇಲೆ ಮಲ್ಪುವೆ ಪಂದ್‌ ಪೊಲೀಸೆರ್‌ ತೆರಿಪಾದೆರ್.‌ ಆರೋಪಿನ್‌ ಅರೆಸ್ಟ್‌ ಮಲ್ತ್‌ದ್ ಸುಳ್ಯ ಕೋರ್ಟ್‌ಗ್‌ ಹಾಜರ್‌ ಪಡಿಸಾದ್‌, ಕುಡ್ಲ ಜೈಲ್‌ಗ್‌ ಪಾರ್ದೆರ್‌ ಪಂದ್‌ ತೆರಿದ್‌ ಬೈದ್‌ಂಡ್.