ಕುಡ್ಲದ ಪುಗರ್ತೆದ ಕಂಪೆನಿ MRPL ದ CSR ಫಂಡ್ ದ ಮುಖೇನ ಶ್ರೀ ಕ್ಷೇತ್ರ ಈಶ್ವರಗೋಳಿದ ಸಮುದಾಯ ಭವನಗ್ ಕೆಸರ್ ಕಲ್ಲ್ ಪಾಡುನ ಲೇಸ್ ನಡತ್ಂಡ್.
ಈ ಪೊರ್ತುಡು MRPL ಸಂಸ್ಥೆದ ಅಧಿಕಾರಿಲು, ಪೊಸೊಡಿ ವಾರ್ಡ್ ದ ಕಾರ್ಪೊರೇಟರ್ ವರುಣ್ ಚೌಟ, ಜೀರ್ಣೋದ್ದಾರ ಸಮಿತಿದ ಗುರ್ಕಾರೆ, ಸದಸ್ಯೆರ್, ಊರುದ ಪರವೂರುದ ಭಕ್ತೆರ್, ಬೊಕ್ಕ ಪತ್ತ್ ಸಮಸ್ತೆರ್ ಪಾಲ್ ಪಡೆದಿತ್ತೆರ್.
ಪುತ್ತೂರು : ದೇವಸ್ಥಾನದ ಕಾರ್ಯಕ್ರಮ ಒಂಜೆಟ್ಟ್ ರಾಜಕೀಯ ಮರತ್ತ್ದ್ ನಾಯಕೆರ್ ಮಾತಾ ಒಂಜಾದ್ ತೋಜಿದೆರ್. ಇತಿಹಾಸ ಪ್ರಸಿದ್ಧ ಪುತ್ತೂರು ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನ ವಠಾರಡ್ ಪುನರುತ್ಥಾನ ಕಾರ್ಯದ ಪೈಕಿ ಅನ್ನಛತ್ರ ನಿರ್ಮಾಣ, ಕಿರೆ ಪುನರುತ್ಥಾನ ನಿಧಿ ಸಂಚಯದ ಬಗ್ಗೆಟ್ ಅ.15 ದಾನಿ ನಡತ್ತ್ನ ಭಕ್ತರ ಮಹಾಸಭೆಟ್ ಶಾಸಕೆರ್ ಅಶೋಕ್ ಕುಮಾರ್ ರೈ, ಮಾಜಿ ಶಾಸಕೆರ್ ಸಂಜೀವ ಮಠಂದೂರು, ಪುತ್ತಿಲ ಪರಿವಾರದ ಅರುಣ್ ಕುಮಾರ್ ಪುತ್ತಿಲ, ಮುರಳಿಕೃಷ್ಣ ಹಸಂತಡ್ಕ ಜೊತೆಯಾದ್ ಇತ್ತೆರ್.
ಈ ಪೊರ್ತುಡು ಕಾಂಗ್ರೆಸ್ ನಾಯಕೆರ್ ಕೃಷ್ಣಪ್ರಸಾದ್ ಆಳ್ವ ಒಟ್ಟಿಗೆ ಇತ್ತೆರ್. ಸಭಾ ಕಾರ್ಯಕ್ರಮದ ಉದಿಪನನ್ ಶಾಸಕೆರ್ ಅಶೋಕ್ ಕುಮಾರ್ ರೈ ಮಲ್ತೆರ್. ಬೊಕ್ಕ ಮಾಜಿ ಶಾಸಕೆರ್ ಸಂಜೀವ ಮಠಂದೂರು, ಪಿ.ಜಿ.ಜಗನ್ನಿವಾಸ ರಾವ್ ಬೊಕ್ಕ ದೇವಸ್ಥಾನದ ವ್ಯವಸ್ಥಾಪನ ಸಮಿತಿದ ಗುರ್ಕಾರ್ಲು ಕೇಶವಪ್ರಸಾದ್ ಮುಳಿಯ ಇತ್ತೆರ್. ಈ ಮಾತ ಬೆಳವಣಿಗೆದ ಮೂಲಕ ರಾಜಕೀಯ ದೇವಸ್ಥಾನದ ಪಿದಯಿ ಮಾತ್ರ ಉಲಾಯಿ ಅತ್ತ್ ಪಂದ್ ತೊಜಿಪಾದ್ ಕೊರಿಯೆರ್. ಶಾಸಕೆರ್ ತನ್ನ ಭಾಷಣಡ್ ದೇವಸ್ಥಾನದ ಉಲಾಯಿ ಬನ್ನಗ ಚಪ್ಪಲ್ನ್ ಎಂಚ ಪಿದಾಯಿ ಬುಡ್ದು ಬರ್ಪ ಅಂಚೆನೆ ರಾಜಕೀಯನ್ಲ ಬುಡ್ದು ಬರೊಡು ಪಂದ್ ಪಂಡೆರ್.
ಪ್ರತೀ ವರ್ಸ ಇನ್ಫೋಸಿಸ್ ಪ್ರೆಶರ್ನಕಲೆನ್ ಕ್ಯಾಂಪಸ್ ಸೆಲೆಕ್ಷನ್ ಮಲ್ತೊಂದಿತ್ತ್ಂಡ್. ಆಂಡ ಈ ಸಲ ಕ್ಯಾಂಪಸ್ ಸೆಲೆಕ್ಷನ್ರ್ದ್ ದೂರ ಒರಿವ ಪಂದ್ ತೆರಿಪಾದೆರ್. ಕರಿನ ವರ್ಸದ ಫ್ರೆಶರ್ ಬ್ಯಾಚ್ ಉಂಡು, ಕುಡ ಕುಡ ಬ್ಯಾಚ್ ಮಲ್ತ್ಂಡ ವ್ಯವಸ್ಥೆಡ್ ಅಸಮತೋಲನ ಆಪುಂಡು ಪಂದ್ ಸಿಎಫ್ಓ ನೀಲಂಜನ ರಾಯ್ ತೆರಿಪಾದೆರ್.
ಪುತ್ತೂರು: ಪುತ್ತೂರು ಕಿಲ್ಲೆ ಮೈದಾನಡ್ ಮಾಜಿ ಶಾಸಕಿ ಶಕುಂತಳಾ ಶೆಟ್ಟಿ ಸಾರಥ್ಯಡ್ ಅ.22 ದಾನಿ ನಡಪುನ ಪುತ್ತೂರ್ದ ಪಿಲಿರಂಗ್ ಸೀಸನ್-2 ಕಾರ್ಯಕ್ರಮದ ಚಪ್ಪರ ಮೂರ್ತ ಅ.15 ದಾನಿ ನಡತ್ಂಡ್. ವೇ.ಮೂ. ನವೀನ್ ಕೃಷ್ಣ ಪೂಜಾ ವಿಧಿ ವಿಧಾನ ನಡಪಾದ್ ಭೂಮಿಪೂಜೆ ಮಲ್ತೆರ್.
ಪುತ್ತೂರ್ದ ಪಿಲಿರಂಗ್ ಸೀಸನ್-2 ಕಾರ್ಯಕ್ರಮದ ಗುರ್ಕಾರ್ಲು ಬೊಕ್ಕ ಬನ್ನೂರು ರೈತರ ಸೇವಾ ಸಹಕಾರಿ ಸಂಘದ ಗುರ್ಕಾರ್ಲು ಆದ್ ಇಪ್ಪುನ ಪಂಜಿಗುಡ್ಡೆ ಈಶ್ವರ ಭಟ್ ಬೊಕ್ಕ ಪಿಡಬ್ಲ್ಯೂಡಿ ಗುತ್ತಿಗೆದಾರೆರ್, ಪಿಲಿರಂಗ್ ಸೀಸನ್ -2 ಕ್ರೀಡಾ ಸಮಿತಿದ ಪದಾಧಿಕಾರಿ ರಾಧಾಕೃಷ್ಣ ಧ್ವಜಸ್ತಂಭ ನಡ್ಪುನ ಮೂಲಕ ಚಪ್ಪರ ಮುಹೂರ್ತಗ್ ಚಾಲನೆ ಕೊರಿಯೆರ್.
ಪುತ್ತೂರ್ದ ಪಿಲಿರಂಗ್ ಸೀಸನ್-2 ಕ್ರೀಡಾ ಸಮಿತಿ ಬೇತೆ ಬೇತೆ ಪದಾಧಿಕಾರಿಲಾಯಿನ ರಂಜಿತ್ ಬಂಗೇರ, ರೋಷನ್ ರೈ ಬನ್ನೂರು, ಪೂರ್ಣೇಶ್ ಭಂಡಾರಿ, ಶ್ರೀಪ್ರಸಾದ್ ಪಾಣಾಜೆ, ಕೃಷ್ಣಪ್ರಸಾದ್ ಆಲ್ವ, ಪ್ರಜ್ವಲ್ ರೈ ತೊಟ್ಲ, ಸನತ್ ರೈ ಏಳ್ನಾಡು ಗುತ್ತು, ಜಯಂತ ನಗರ, ಶರತ್ ಕೇಪುಳು, ಹರ್ಷಿತ್ರಾಮ್ ಬೊಳುವಾರು, ಶಮೀರ್ ಪಳಿಕೆ, ಕಿಶೋರ್, ಸುಶಾಂತ್ ಶೆಟ್ಟಿ ಕಂಬಳಬೆಟ್ಟು, ಸುಮಿತ್ ಶೆಟ್ಟಿ ಕಂಬಳಬೆಟ್ಟು, ಶ್ರೀಕಾಂತ್, ವಿಕ್ರಂ ರೈ ಅಂತರ, ಸೀತಾ ಭಟ್, ಸುಧಾ ಕುಂಜತ್ತಾಯ, ರವಿ ಕುಂಜತ್ತಾಯ, ವಿಕ್ರಂ ಆಳ್ವ, ಹರ್ಷ ಶೆಟ್ಟಿ, ಪ್ರತೀಕ್ ಚಿಕ್ಕಪುತ್ತೂರು, ಕಾರ್ತಿಕ್ ಚಿಕ್ಕಪುತ್ತೂರು, ಧನುಷ್, ರವಿ ಮಣಿಯ, ವಿಶ್ವಜಿತ್ ಅಮ್ಮುಂಜ, ಯೋಗಿಣಿ ರೈ ಸರ್ವೆ, ಸಂತೋಷ್ ಭಂಡಾರಿ ಚಿಲ್ಮೆತ್ತಾರು, ಮಿಥುನ್ ರೈ, ಸಂದೀಪ್ ರೈ, ಜೆ.ಎಸ್.ಭಂಡಾರಿ, ಕಾರ್ತಿಕ್ ಗೌಡ, ಯೋಗೀಶ್ ಸಾಮಾನಿ, ರಾಮಚಂದ್ರ ನಾಯ್ಕ ಈ ಪೊರ್ತುಡು ಇತ್ತೆರ್.
ಕುಡ್ಲ: ಕುದ್ರೋಳಿ ಗೋಕರ್ಣನಾಥೇಶ್ವರ ದೇವಲ್ಯಡ್ 34ನೇ ವರ್ಷೊದ ದಸರಾ ಉಚ್ಚಯ ಗೌಜಿಡ್ ಅ.15 ಐತಾರ ಉದಿಪನ ಆಂಡ್.
ಕೇಂದ್ರದ ಮಾಜಿ ಸಚಿವೆರ್ ಬಿ.ಜನಾರ್ದನ ಪೂಜಾರಿ ಮೇರ್ ಶಾರದಾದೇವಿ ಮೂರ್ತಿನ ಎದುರು ಸಾಂಪ್ರದಾಯಿಕ ತುಡರ್ ನ್ ಅರ್ಲಾವುನ ಮುಖೇನ ನವರಾತ್ರಿ ಆಚರಣೆಗ್ ಚಾಲನೆ ಕೊರಿಯೆರ್.
ಬೊಕ್ಕ ಶೈಲ ಪುತ್ರಿ, ಬ್ರಹ್ಮಚಾರಿಣಿ, ಚಂದ್ರಘಂಟಾ, ಕೂಷ್ಮಾಂಡಿನಿ, ಸ್ಕಂದ ಮಾತಾ, ಕಾತ್ಯಾಯಿನಿ, ಕಾಳರಾತ್ರಿ, ಮಹಾಗೌರಿ, ಸಿದ್ಧಿದಾತ್ರಿ ಇಂಚ ನವದುರ್ಗೆಯೆರೆನ ಮೂರ್ತಿನ್ ಪ್ರತಿಷ್ಠಾಪನೆ ಮಲ್ತೆರ್.
ಔಪಚಾರಿಕ ಉದಿಪನ ಲೇಸ್ ಡ್ ಶಾಸಕೆರ್ ವೇದವ್ಯಾಸ ಕಾಮತ್, ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು, ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆ ಎಚ್.ಎಸ್. ಸಾಯಿರಾಮ್, ಸಮಿತಿದ ಕೋಶಾಧಿಕಾರಿ ಆರ್. ಪದ್ಮರಾಜ್, ಹರಿಕೃಷ್ಣ ಬಂಟ್ವಾಳ್ ಪಾಲ್ ಪಡೆದಿತ್ತೆರ್.
ಉಬಾರ್ : ಪೆರ್ನೆದ ಕಳೆಂಜ ದೇಂತಡ್ಕದ ಶ್ರೀ ವಿಷ್ಣುಮೂರ್ತಿ ದೇವಸ್ಥಾನಡ್ ದೇವರೆಗ್ ಕೊರ್ನ ಬಂಗಾರ್ ನಾಪತ್ತೆ ಆಯಿನ ಬಗ್ಗೆ ಅ.15 ದಾನಿ ತೆರಿದ್ ಬೈದುಂಡ್. ಈ ಬಗೆಟ್ಟ್ ದೇವಾಲಯದ ಮಾಜಿ ಕಾರ್ಯದರ್ಶಿ ಗೋಪಾಲ ಶೆಟ್ಟಿ ಎನ್. ಉಬಾರ್ ಪೊಲೀಸೆರೆಗ್ ದೂರು ಕೊರ್ತೆರ್.
ಕರಿನ ಡಿಸೆಂಬರ್ ಡ್ ಈ ದೇವಾಲಯದ ಬ್ರಹ್ಮಕಲಶಾಭಿಷೇಕ ಆದ್, ಈ ಪೊರ್ತುಡ್ ದೇವೆರೆ ಗ್ ಭಕ್ತೆ ಒರಿ ಸುಮಾರ್ ಮೂಜಿ ಮುಕ್ಕಾಲು ಪವನ್ ದ ಐನ್ ಇಲೆತ ಬಂಗಾರ್ ದ ಜೋ ಮಾಲೆನ್ ದೇವೆರೆಗ್ ಸಮರ್ಪನೆ ಮಲ್ತ್ ಇತ್ತೆರ್. ಅವ್ ಬೊಕ್ಕ ರೆಡ್ ಪವನ್ದ ಬಂಗಾರ್ ದ ಸರ ನಾಪತ್ತೆಯಾತ್ಂಡ್. ಸರಕಾರ ದೇವಾಲಯಗ್ ಆಡಳಿತಾಧಿಕಾರಿನ್ ನೇಮಕ ಮಲ್ತ್ ಇತ್ತೆರ್. ಅಧಿಕಾರ ಸ್ವೀಕಾರ ಮಲ್ತಿನ ಆರ್ ಅ.15 ದಾನಿ ಭಕ್ತಾದಿಲೆನ ಸಮ್ಮುಖಡ್ ಮಹಜರು ಮಲ್ಪುನಗ ಬಂಗಾರ್ದ ಸರ ನಾಪತ್ತೆ ಆತಿನ ವರದಿ ಆತ್ಂಡ್. ನೆತ್ತ ಬಗೆಟ್ಟ್ ಉಬಾರ್ ಪೊಲೀಸ್ ಸ್ಟೇಷನ್ಡ್ ಕೇಸ್ ದಾಖಲಾತ್ಂಡ್.
ಕುಡ್ಲ ನಗರ ಪಾಲಿಕೆರ್ದ್ ಕುಡ್ಲದ ಮಾರ್ನೆಮಿ ಮೆರವಣಿಗೆಗ್ ವಿದ್ಯುತ್ ದೀಪಾಲಂಕಾರೊಗು 1.39 ಕೋಟಿ ಖರ್ಚಿ ಮಲ್ತೊಂದುಂಡ್. ಕುಡ್ಲ ದಸರೊಗು ಕುದ್ರೋಳಿ ಗೋಕರ್ಣನಾಥ ದೇವಲ್ಯ, ಮಂಗಳಾದೇವಿ, ಉರ್ವ ಮಾರಿಗುಡಿ, ಭಗವತಿ, ವೆಂಕಟರಮಣ ಅಂಚೆನೆ ಪೇಂಟೆದ ಬೇತೆ ದೇವಲ್ಯೊಗು ಪೋಪಿನ ತಾದಿಲೆಡ್ ಪೂರಾ ಲೈಟಿಂಗ್ ಪಾಡುಂಡು ಪನ್ದ್ ಕುಡ್ಲದ ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು ಪನ್ತೆರ್. ನನ ದುಂಬಗ್ ಮಾರ್ನೆಮಿದ ಪೊರ್ತು ಲೈಟಿಂಗ್ ಮಲ್ಪರೆ ಶಾಶ್ವತವಾಯಿನ ವ್ಯವಸ್ಥೆ ಮಲ್ಪುವ ಪನ್ದ್ ಪಂತೆರ್.
ಶಾಸಕೆರ್ ವೇದವ್ಯಾಸ ಕಾಮತೆರ್ ಪಾತೆರ್ದ್, ಕುಡ್ಲದ ದಸರಾ ಪಂಡ ಮೈಸೂರು ದಸರಾದಾತೇ ಪುಗಾರ್ತೆ ಉಂಡು.
ಮಾತಾ ಕಡೆರ್ದ್ ಜನಕುಲು ಇಡೆ ಬರ್ಪೆರ್. ಕರಿನ ಮೂಜಿ ವರ್ಸೊರ್ದಿಂಚಿ ಕುಡ್ಲ ಮಹಾನಗರ ಪಾಲಿಕೆ ಕುಡ್ಲ ದಸರೊಗು ಲೈಟಿಂಗ್ ವ್ಯವಸ್ಥೆ ಮಲ್ತೊಂದುಂಡು. “ಪಿಲಿ ನಲಿಕೆ”, “ಪಿಲಿ ಪರ್ಬ” ದಂಚಿನ ಲೇಸುಲು ನಡಪರೆ ಉಂಡು. ದಸರೊದ ಪೊರ್ತುಡು ತುಳುನಾಡ ಸಂಸ್ಕೃತಿ, ಕುಡ್ಲದ ಪೊಲಬು ತೆರಿಪಾವುನ ಕಜ್ಜೊಲೆನ್ ಮಲ್ಪೊಲಿ ಉಂದೆಕ್ ಸಾರ್ವಜನಿಕೆರ್ ಸಲಹೆ ಸೂಚನೆ ಕೊರೊಲಿ ಪನ್ದ್ ಪಂಡೆರ್.
ಕುಡ್ಲದ ಮಂಗಳಾದೇವಿ ದೇವಲ್ಯದ ಮಾರ್ನೆಮಿ ಉಚ್ಚಯೊಗು ಹಿಂದೂ ಸಂಘಟನೆಲೆನ ವಿರೋಧದ ನಡುಟೇ ಸನಿಯಾರ ಬಾಕಿ ಒರಿದಿನ ಅಂಗಡಿ ಸ್ಟಾಲ್ಲೆನ ಟೆಂಡರ್ ಲೆತ್ತ್ದ್ ಅಂತಿಮ ಮಲ್ದೆರ್. ಸನಿಯಾರ ನಡತಿನ ಏಲಂಡ್ 11 ಸ್ಟಾಲ್ಲೆಡ್ 6 ಸ್ಟಾಲ್ಲೆನ್ ಮುಸ್ಲಿಮೆರ್ ಟೆಂಡರ್ಡ್ ಗೆತೊಂದೆರ್.
ಉಂದೆರ್ದಾವರ ಈ ಸರ್ತಿ ಮಾರ್ನೆಮಿ ಉಚ್ಚಯೊಡು ಸ್ಟಾಲ್ ಪಾಡ್ದೇ ಸೈ ಪನ್ಪಿನ ಜಾತ್ರಾ ವ್ಯಾಪಾರಸ್ಥೆರೆ ಸಮನ್ವಯ ಸಮಿತಿದ ಬಿನ್ನಾಪು ಇಡೆಗ್ ಎತ್ತ್ದ್ಂಡ್. ಐನ್ ದಿನೊಕು ದುಂಬು ದೇವಲ್ಯೊದ ಆಡಳಿತ ಮಂಡಳಿ ಟೆಂಡರ್ ಲೆತ್ತ್ದ್ ಫೈನಲ್ ಮನ್ಪುನಗ 125 ಸ್ಟಾಲ್ಲೆಡ್ 92 ಸ್ಟಾಲ್ಲೆನ್ ಕೊರ್ದಿತ್ತೆರ್. ಆಂಡ 71 ಜನ ಮಾತ್ರ ಬಿಡ್ ಕಾಸ್ ಕಟ್ಟ್ದ್ ಸ್ಟಾಲ್ನ್ ಅಧಿಕೃತ ಮಲ್ತಿತ್ತೆರ್. ಟೆಂಡರ್ದ ಪೊರ್ತುಡು ದೇವಲ್ಯೊದ ಪಿದಯಿ ಪಾಲಿಕೆ ಜಾಗೆಡ್ ಸ್ಟಾಲ್ ಪಾಡೆರೆ ಮುಕ್ತ ಅವಕಾಶ ಇತ್ತ್ದ್, ಉ್ಂದೆರ್ದ್ ಮುಸ್ಲಿಮೆರೆನ್ ದೂರ ದೀತೆರ್ ಪಂದ್ ಆರೋಪಿತ್ದ್ ಜಾತ್ರಾ ವ್ಯಾಪಾರಸ್ಥೆರೆ ಸಮನ್ವಯ ಸಮಿತಿ ಜಿಲ್ಲಾಡಳಿತ ಬೊಕ್ಕ ಪೊಲೀಸ್ ಕಮಿಷನರ್ಗ್ ಒಯಿಲ್ ಕೊರ್ತಿನತ್ತಂದೆ, ಶುಕ್ರವಾರ ಪೊರ್ಂಬಾಟೊಲಾ ಮಲ್ತಿತ್ತ್ಂಡ್.
ಈ ದಿಸೆಟ್ ಜಿಲ್ಲಾಧಿಕಾರಿಲು ಬಿನ್ನಾಪು ಮಲ್ತ್ದ್, ಬಾಕಿ ಒರಿದಿನ ಸ್ಟಾಲ್ಲೆನ ಟೆಂಡರ್ ಲೆಪ್ಪಾದ್ ಪಟ್ಟೊಡೂಂದು ದೇವಲ್ಯೊದ ಆಡಳಿತೊಗು ಸೂಚನೆ ಕೊರ್ದಿತ್ತೆರ್. ಆ ಪ್ರಕಾರೊಡು ಸನಿಯಾರ ಮಧ್ಯಾಹ್ನ ಟೆಂಡರ್ ನಡತ್ಂಡ್.
ಬಂಟ್ವಾಳ : ನವರಾತ್ರಿದ ಲೆಕ್ಕಡ್ ಮಾಣಿ ಪೆರಾಜೆ ಶ್ರೀರಾಮಚಂದ್ರಾಪುರ ಮಠಕ್ಕ್ ಬತ್ತ್ದ್ ಶ್ರೀಮದ್ ಜಗದ್ಗುರು ಶಂಕರಾಚಾರ್ಯ ಶ್ರೀ ಶ್ರೀರಾಘವೇಶ್ವರಭಾರತೀ ಮಹಾಸ್ವಾಮೀಜಿನ್ ಕ್ಯಾಪ್ಟನ್ ಬ್ರಿಜೇಶ್ ಚೌಟ ಭೇಟಿಯಾದ್ ಆಶೀರ್ವಾದ ಪಡೆಯೆರ್. ಈ ಪೊರ್ತುಡು ಜಿಲ್ಲಾ ಪಂಚಾಯತ್ ಮಾಜಿ ಅಧ್ಯಕ್ಷೆರ್ ಶೈಲಜಾ ಭಟ್ ಕೊಂಕೋಡಿ, ಹವ್ಯಕ ಪರಿಷತ್ತ್ದ ಶ್ರೀಪ್ರಕಾಶ್ ಕುಕ್ಕಿಲ, ನೇರಳಕಟ್ಟೆ ಸಿಎ ಬ್ಯಾಂಕ್ ಗುರ್ಕಾರೆರ್ ಪುಷ್ಪರಾಜ್ ಚೌಟ ಇತ್ತೆರ್.
ಉಚ್ಚಿಲ ದಸಾರ ಲೇಸ್ ಡ್ ರಂಗ ಸಂಗೀತ ಬೊಕ್ಕ ಜಾನಪದ ಗೀತೆ ಅ.15 ಬಯ್ಯಗ್ ಶ್ರೀ ಕ್ಷೇತ್ರ ಉಚ್ಚಿಲದ ಶ್ರೀಮತಿ ಶಾಲಿನಿ ಡಾ/ ಜಿ ಶಂಕರ್ ಸಭಾಂಗಣಡ್ ನಡತ್ಂಡ್.
ಈ ಲೇಸ್ ಕುಡ್ಲ ಜರ್ನಿ ಥೇಟರ್ ಗ್ರೂಪ್ (ರಿ.) ದ ಲೆಕ್ಕೊಡು ಈ ಲೇಸ್ ನಡತ್ಂಡ್.
