October 2023

ಕುಡ್ಲ ದಸರಾಡ್ ಶಾಸಕೆರ್ ವೇದವ್ಯಾಸ್ ಕಾಮತ್ ಮುತಾಲಿಕೆಡ್ ಕುಡ್ಲದ ಪಿಲಿಪರ್ಬ 2023

ಸಂಸದೆರ್ ನಳಿನ್ ಕುಮಾರ್ ಕಟೀಲ್ ಮೆರೆನ ಮಾರ್ಗದರ್ಶನ ಬೊಕ್ಕ ಶಾಸಕೆರ್ ಡಿ.ವೇದವ್ಯಾಸ್ ಕಾಮತ್ ಮೆರೆನ ಮುತಾಲಿಕೆಡ್ ಕುಡ್ಲದ ಪಿಲಿಪರ್ಬನ್ ಕರಿನ ವರ್ಷ ಗೌಜಿಡ್ ಆಯೋಜನೆ ಮಲ್ತ್ ದ್ ಇತ್ಂಡ್. ಅಂಚೆನೆ ಈ ವರ್ಷಲ ಕುಡ್ಲದ ಪಿಲಿಪರ್ಬ-2023 ತ್ತ ಪಿಲಿಏಸ ಪಂತೊ ಅ.21 ಸನಿಯಾರ ಜಿಲ್ಲೆದ ಕೇಂದ್ರ ಮೈದಾನಡ್ ಬೊಲ್ಪುಗು 10 ಗಂಟೆಗ್ ಗೌಜಿಡ್ ನಡಪರೆ ಉಂಡು.

ಕೇಂದ್ರ ಮೈದಾನದ ಚಾವಡಿಡ್, ಜಿಲ್ಲೆದ ತೀರ್ಪುಗಾರೆರೆನ ಸಮ್ಮುಖಡ್, ತುಳುನಾಡ್ ದ ಪುಗರ್ತೆದ 15 ಪಿಲಿಏಸ ಕೂಟದಕುಲು ಪಂತೊಡು ಪಾಲ್ ಪಡೆಪೆರ್. ಈ ಲೇಸ್ ಡ್ ಪಾಲ್ ಪಡೆಯೆರೆ ಜೋಕುಲೆರ್ದ್ ಮಲ್ಲ ಅಕ್ಲೆನ ಮುಟ್ಟ ಪ್ರತಿಯೊರಿ ಕಲಾಪ್ರೇಮಿಗ್ಲಾ ಅವಕಾಶ ಉಂಡು.

ಪಿಲಿಪರ್ಬಡ್ ಪಾಲ್ ಪಡೆಪಿನ ಪಿಲಿಏಸ ಕೂಟ ಮೆರವಣಿಗೆದ ಮುಖೇನ ಚಾವಡಿಗ್ ಬರ್ಪುಂಡು. 20 ನಿಮಿಷದ ಪ್ರದರ್ಶನ ಕೊರ್ಪುಂಡು. ಪ್ರತಿ ಕೂಟ 38 ಕೆ.ಜಿ ತೂಕದ ಅರಿತ್ತ ಮುಡಿನ್ ರಾಪಾವುನೇ ಕಡ್ಡಾಯ ಆತ್ಂಡ್. ಕಪ್ಪುಪಿಲಿ, ಕಿನ್ನಿಪಿಲಿ, ಹಿಮ್ಮೇಳ, ಧರಣಿ ಮಂಡಲ ಇಂಚ ಇಡೀ ಕೂಟ ವೈವಿಧ್ಯತೆರ್ದ್ ಇಪ್ಪುಂಡು.

ಪಂತೊ ನಡಪುನ ಮೈದಾನಡ್ 5 ಸಾರ ಜನ ಕುಲ್ಲುದು ತೂಪುನ ಗ್ಯಾಲರಿ ನಿರ್ಮಾಣ ಆತ್ಂಡ್. ಅಲ್ಪ ಮಲ್ಲ ಪರದೆದ ವ್ಯವಸ್ಥೆನ್ ಮಲ್ದೆರ್. ಲೇಸ್ ಗ್ ಬರಿಯೆರೆ ಆವಂದಿನ ಹಿರಿಯೆರೆಗ್ ಬೊಕ್ಕ ಜೋಕುಲೆಗ್ ಇಲ್ಲಲ್ ಕುಲ್ಲುದು ಲೇಸ್ ತೂಯೆರೆ ಸೀದಾ ಪ್ರಸಾರದ ವ್ಯವಸ್ಥೆ ಮಲ್ದೆರ್. ಗಾಡಿಲೆಗ್ ಮೈದಾನಡ್ ಪಾರ್ಕಿಂಗ್ ವ್ಯವಸ್ಥೆ ಉಂಡು. ಬೊಕ್ಕ ಲೇಸ್ ಗ್ ಬರ್ಪುನ ಬಿನ್ನೆರೆಗ್, ದಾನಿಲೆನ್ ಇಸೇಸ ಆಸನದ ವ್ಯವಸ್ಥೆ ಉಂಡು.

ಪಂತೊಡು ಪಾಲ್ ಪಡೆಪುನ 15 ಪಿಲಿಏಸ ಕೂಟಲು:
1.ಶಿವಶಕ್ತಿ ಟೈಗರ್ಸ್ ಕುಂಜತ್ತೂರು ಮಂಜೇಶ್ವರ
2.ವಿಶಾಲ್ ಕ್ರಿಕೆಟರ್ಸ್ ಕೋಡಿಕಲ್
3. ಪಾಂಡೇಶ್ವರ ಶಾರದಾ ಹುಲಿ, ಪಾಂಡೇಶ್ವರ
4. ಜೈ ಹಿಂದ್ ಫ್ರೆಂಡ್ಸ್, ಮಂಕಿ ಸ್ಟ್ಯಾಂಡ್
5. ವಿಸಿಎಸ್, ಮೂಡುಶೆಡ್ಡೆ (ವಿಷ್ಣು ಪಿಲಿಕುಲು)
6. ನಂದಿಗುಡ್ಡ ಫ್ರೆಂಡ್ಸ್ ಬಾಬು ಗುಡ್ಡ
7. ಮುಳಿಹಿತ್ಲು ಫ್ರೆಂಡ್ಸ್ ಸರ್ಕಲ್ ಜಗದಂಬಾ ಹುಲಿ
8. ಅಶೋಕ್ ರಾಜ್ ಟೀಮ್ ಕಾಡಬೆಟ್ಟು ಒಡಿಪು
9. ಎಸ್ ಎಫ್ ಸಿ ಸೋಮೇಶ್ವರ
10. ಎಸ್ ಕೆ ಬಿ ಟೈಗರ್ಸ್ ಕುಂಪಲ
11. ಪುರಲ್ದಪ್ಪೆನ ಮೋಕೆದ ಬೊಲ್ಲಿಲು ಪೊಳಲಿ ಟೈಗರ್ಸ್
12. ಮಂಗಳೂರ್ ಫ್ರೆಂಡ್ಸ್ ಟೈಗರ್ಸ್ ಮುಳಿಹಿತ್ಲು
13. ಯಂಗ್ ಬಾಯ್ಸ್ ಮುಳಿಹಿತ್ಲು ಮಂಗಳಾದೇವಿ ಹುಲಿ
14. ಶ್ರೀ ಭದ್ರಕಾಳಿ ಟೈಗರ್ಸ್ ಕುಡ್ಲ
15. ಟೀಮ್ ಕಲ್ಲೇಗ ಟೈಗರ್ಸ್ ಪುತ್ತೂರು

ಅಂಚೆನೆ ಈ ಪಂತೊಡು ಕಲಾಪ್ರೇಮಿಲು ಕುಟುಂಬ ಸಮೇತೆರಾದ್ ಬತ್ತ್ ದ್, ದಸರಾ ಗೌಜಿದೊಟ್ಟಿಗೆ ಪಿಲಿಪರ್ಬದ ಪಿಲಿಏಸ ಪಂತೊನು ತೂವೊಡು ಪಂದ್ ಕುಡ್ಲ ಸಾಂಸ್ಕೃತಿಕ ಪ್ರತಿಷ್ಠಾನ ತೆರಿಪಾದ್ಂಡ್.

ಪತ್ರಿಕಾಗೋಷ್ಠಿಡ್ ಕುಡ್ಲ ಸಾಂಸ್ಕೃತಿಕ ಪ್ರತಿಷ್ಠಾನದ ಮಾನಾದಿಗೆದ ಗುರ್ಕಾರೆ ಗಿರಿಧರ್ ಶೆಟ್ಟಿ, ಗುರ್ಕಾರೆ ದಿವಾಕರ್ ಪಾಂಡೇಶ್ವರ್, ಚೇತನ್ ಕಾಮತ್, ಕಿರಣ್ ಶೆಣೈ, ಸೂರಜ್ ಕಾಮತ್, ಜಗದೀಶ್ ಕದ್ರಿ, ಲಲಿತ್ ರಾಜ್ ಮೆಂಡನ್, ಉದಯ್ ಪೂಜಾರಿ, ಅಶ್ವಿತ್ ಕೊಟ್ಟಾರಿ ಪಾಲ್ ಪಡೆದಿತ್ತೆರ್.

ರಾಜ್ಯಡ್ ಅಭಿವೃದ್ಧಿ ದಾಲ ಅತಿಜಿ: ಕೋಟಿ ರೂ. ಕುಡ್ಲಗ್ ಬತ್ತಿನ ಅಧಿಕಾರಿರ್ದ್ ಜನಕ್ಲೆನ ಸುಲಿಗೆ: ಶಾಸಕೆರ್ ಡಾ.ಭರತ್ ಶೆಟ್ಟಿ

ಕುಡ್ಲ : ಕೋಟಿ ಕೊರ್ದು ಕುಡ್ಲಗ್ ಬತ್ತಿನ ಅಧಿಕಾರಿಯೊರಿ ಜನಕ್ಲೆರ್ದ್ ಸುಲಿಗೆ ವಸೊಲಿ ಮಲ್ತಿನ ಪೊಲಬು ಕೇಂದ್ ಬರೊಂದು ಉಂಡು. ಅಂಚೆನೆ ರಾಜ್ಯ ಖಜಾನೆಡ್ ಕಾಸ್ ಇಜ್ಜಂದಿನ ಕಾರಣ ನಮಕ್ ಅನುದಾನ ತಿಕೊಂದು ಇಜ್ಜಿ. ಈ ಸರಕಾರಡ್ ಅಭಿವೃದ್ಧಿ ಪನ್ಪಿನವು ದಾಲ ಇಜ್ಜಿ ಪಂದ್ ಕುಡ್ಲ ಉತ್ತರ ಶಾಸಕೆರ್ ಡಾ. ವೈ. ಭರತ್ ಶೆಟ್ಟಿ ಆರೋಪ ಮಲ್ತೆರ್.

ಮೇರ್ ಬಿಜೆಪಿ ಕುಡ್ಲ ಉತ್ತರ ಮಂಡಲದ ಮುತಾಲಿಕೆಡ್ ಕಾಂಗ್ರೆಸ್ ಭೃಷ್ಟಾಚಾರದ ವಿರುದ್ದ ಕಾವೂರು ಜಂಕ್ಷನ್‍ಡ್ ಅಂಗಾರೆ ಆಯೋಜನೆ ಮಲ್ತಿನ ಪ್ರತಿಭಟನೆಡ್ ಪಾಲ್ ಪಡೆದ್ ಪಾತೆರಿಯೆರ್.

ಬಿಜೆಪಿ ರಾಜ್ಯಾಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್ ಪಾತೆರ್ದ್, ರಾಜ್ಯದ ಕಾಂಗ್ರೆಸ್ ಕಾರ್ಪೋರೇಟರ್ ನ ಇಲ್ಲಲ್ ತಿಕಿನ ಕಾಸ್ ಲಂಚದ ಕಾಸ್ ಆತ್ಂಡ್. ಗುತ್ತಿಗೆದಾರೆರೆನ 600 ಕೋಟಿದಾತ್ ಕಮಿಷನ್ ಆಧಾರಡ್ ಬುಡುಗಡೆ ಮಲ್ತ್ ದ್ ಆ ಕಾಸ್ ಐಟಿ ದಾಳಿಡ್ ತಿಕ್ ದ್ಂಡ್. ನೆಕ್ಕ್ ಆಧಾರಲ ಉಂಡು, ಕಾಂಗ್ರೆಸ್ ನಾಯಕೆರೆಗ್ ಕುಡ ತಿಹಾರ್ ಜೈಲ್ ಕೋಣೆ ತಯಾರ್ ಆವೊಂದು ಉಂಡು ಪಂದ್ ಪಂಡೆರ್.

ಈ ಪೊರ್ತುಡು ಬಿಜೆಪಿ ಮುಖಂಡೆರ್ ಜಗದೀಶ್ ಶೇಣವ, ತಿಲಕ್ ರಾಜ್ ಕೃಷ್ಣಾಪುರ, ಕಸ್ತೂರಿ ಪಂಜ, ಪೂಜಾ ಪೈ, ರಣ್‍ದೀಪ್ ಕಾಂಚನ್, ಉಪ ಮೇಯರ್ ಸುನಿತಾ, ಬಿಜೆಪಿ ಮನಪಾ ಸದಸ್ಯೆರ್, ಜಿಲ್ಲೆದ ಪ್ರಮುಖೆರ್, ಮಂಡಲದ ಪದುಕೆರ್ ಪಾಲ್ ಪಡೆದಿತ್ತೆರ್.