October 2023

ಮುಲ್ಕಿ ಹಿಂದೂ ಯುವ ಸೇನೆ ಬೊಕ್ಕ ಮಹಿಳಾ ಮಂಡಳಿದ 25 ನೇ ವರ್ಷದ ಶಾರದಾ ಮಹೋತ್ಸವ ಉದಿಪನ

ಮುಲ್ಕಿ : ಸಮಾಜ ಸರಿಯಾಯಿನ ಸಾದಿಡ್ ನಡಪೊಡು. ಜೋಕುಲೆನ ಭವಿಷ್ಯ ಹಾಳ್ ಮಲ್ಪುನ ಮಾದಕವಸ್ತು ಬೊಕ್ಕ ಬೊಡ್ಚಾಂದಿನ ಚಟುವಟಿಕೆನ್ ತಡೆಪರೆ ಮಾತೆರ್ಲ ಸಹಕಾರ ಕೊರೊಡು ಪಂದ್ ಮುಲ್ಕಿ ಪೊಲೀಸ್ ಠಾಣೆದ ಇನ್ಸ್ ಪೆಕ್ಟರ್ ವಿದ್ಯಾಧರ್ ಡಿ. ಬೈಕೇರಿಕರ್ ತೆರಿಪಾಯೆರ್.

ಆರ್ ಮುಲ್ಕಿ ಹಿಂದೂ ಯುವ ಸೇನೆ ಬೊಕ್ಕ ಮಹಿಳಾ ಮಂಡಳಿದ ನಿರೆಲ್ಡ್ ಮುಲ್ಕಿದ ಶಿವಾಜಿ ಮಂಟಪಡ್ ಗುರುವಾರದಾನಿ 25 ನೇ ವರ್ಷದ ಬೊಳ್ಳಿ ಪರ್ಬದ ಶಾರದಾ ಮಹೋತ್ಸವದ ಮೂರ್ತಿ ಪ್ರತಿಷ್ಠಾಪನೆ ಲೇಸ್ ರ್ದ್ ಬೊಕ್ಕ ಭಗವಾಧ್ವಜ ಉದಿಪನ ಮಲ್ತ್ ದ್ ಪಾತೆರಿಯೆರ್.

ಡಾ. ಅರುಣ್ ಕುಡ್ವ ಅಧ್ಯಕ್ಷತೆ ಒಯಿಸ್ ದಿತ್ತೆರ್. ಮಲ್ಲ ಬಿನ್ನೆರಾದ್ ಮುಲ್ಕಿ ಅರಸು ಕಂಬುಲ ಸಮಿತಿ ದ ಅಧ್ಯಕ್ಷೆರ್ ಕೊಲ್ನಾಡುಗುತ್ತು ಕಿರಣ್ ಶೆಟ್ಟಿ, ಉದ್ಯಮಿ ಬೊಕ್ಕ ದಾನಿಲಾಯಿನ ಪ್ರಕಾಶ್ ಶೆಣೈ, ಪ್ರಭೋದ್ ಕುಡ್ವ, ಹಿಂದೂ ಯುವ ಸೇನೆ ಮುಲ್ಕಿ ಘಟಕದ ಅಧ್ಯಕ್ಷೆರ್ ದಿನೇಶ್ ಕೊಲ್ನಾಡ್, ಮಹಿಳಾ ಮಂಡಳಿದ ಅಧ್ಯಕ್ಷೆರ್ ಲತಾ ಶೇಖರ್ ಮಿತ್ತರ್ಮೆಡ್ ಇತ್ತೆರ್.

ಈ ಪೊರ್ತುಡು ನಾಗಸ್ವರ ವಾದಕೆರ್ ನಾಗೇಶ್ ಎ. ಬಪ್ಪನಾಡು ಮೆರೆಗ್ ಮಾನಾದಿಗೆ ನಡತ್ಂಡ್. ಶಂಕರ್ ಭಟ್ ಪ್ರಾರ್ಥನೆ ಮಲ್ತೆರ್.

ದಿನೇಶ್ ಕೊಲ್ನಾಡ್ ಪ್ರಸ್ತಾವಿಕವಾದ್ ಪಾತೆರ್ದ್ ಬಿನ್ನೆರೆನ್ ಎದ್ಕೊಂಡೆರ್. ಹರ್ಷರಾಜ್ ಶೆಟ್ಟಿ ಸೊಲ್ಮೆ ಸಂದಾಯೆರ್. ಶಿವಶಂಕರ್ ನಿರೂಪಣೆ ಮಲ್ತೆರ್. ಅವರ್ದ್ ಬೊಕ್ಕ ಮಾತೃ ಮಂಡಳಿ ಬಪ್ಪನಾಡು ಮೊಕ್ಲೆರ್ದ್ ಭಜನಾ ಸೇವೆ ನಡತ್ಂಡ್.

ರೇಡಿಯೊ ಮಣಿಪಾಲಡ್ ಬನ್ನಂಜೆ ಬತ್ತೆರ್ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಬನ್ನಂಜೆ ಬತ್ತೆರ್ ಸರಣಿ ಲೇಸ್ ಇನಿ ಬಯ್ಯಗ್ (ಅ.19) 5‌ ಗಂಟೆಗ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಜಾನಪದ ವಿದ್ವಾಂಸೆರ್ ಬನ್ನಂಜೆ ಬಾಬು ಅಮೀನ್ ಪಾಲ್ ಪಡೆದ್ ಪಾತೆರಿಯೆರೆ ಉಲ್ಲೆರ್. ಅ.20 ಕ್ಕ್ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಪುಂಡು.

ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಪುಣೆ ತುಳು ಕೂಟದ ವರ್ಷೊದ ಸಭೆ, ದಸರಾ ಪೂಜೆ, ಕೊರಲ್ ಪರ್ಬ

ಪುಣೆ: ಪುಣೆ ತುಳು ಕೂಟದ ಮುತಾಲಿಕೆಡ್ ವರ್ಷೊದ ಸಭೆ, ದಸರಾ ಪೂಜೆ, ಕುರಲ್ ಪರ್ಬ, ದಾಂಡಿಯ ರಾಸ್ (ಅ.19) ಇನಿ ಬಯ್ಯಗ್ ಕರ್ವೆ ನಗರದ ಹೋಟೆಲ್ ರತ್ನದ ಬ್ಯಾಂಕ್ವೆಟ್ ಹಾಲ್ ಡ್ ನಡಪರೆ ಉಂಡು.

ಈ ಲೇಸ್ ಗುರ್ಕಾರೆ ಮೋಹನ್ ಶೆಟ್ಟಿ ಎಣ್ಣೆಹೊಳೆ ಮೆರೆನ ಗುರ್ಕಾರ್ಮೆನ್ ಡ್, ಮಹಿಳಾ ವಿಭಾಗದ ಗುರ್ಕಾರ್ದಿ ಸುಜಾತ ಡಿ ಶೆಟ್ಟಿ, ಯುವ ವಿಭಾಗದ ಗುರ್ಕಾರೆ ಅಭಿಜಿತ್ ಶೆಟ್ಟಿ ಬೊಕ್ಕ ತುಳುಕೂಟದ ಪದುಕೆರೆನ ಪಾಲ್ವಿಕೆಡ್ ನಡಪರೆ ಉಂಡು.

ಅಂಚೆನೆ ಶ್ರೀ ದುರ್ಗಾ ಪೂಜೆ, ಕುರಲ್ ಪೂಜೆ, ಪುಣೆದ ಶ್ರೀ ಗುರುದೇವ ಚಿಣ್ಣರ ಬಳಗದ ಜೋಕುಲೆರ್ದ್ ಭಜನೆ, ಮಹಾ ಮಂಗಳಾರತಿ, ಪ್ರಸಾದ ಪಟ್ಟಿಯೆರೆ ಉಂಡು. ಬೊಕ್ಕ ದಾಂಡಿಯಾ ರಾಸ್ ಅಂಚೆನೆ ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು ಪಂದ್ ಗುರ್ಕಾರೆ ಮೋಹನ್ ಶೆಟ್ಟಿ ಎಣ್ಣೆಹೊಳೆ, ಕಾರ್ಯದರ್ಶಿ ಸಂತೋಷ್ ಶೆಟ್ಟಿ ಎಣ್ಣೆಹೊಳೆ, ಕೋಶಾಧಿಕಾರಿ ದಿವಾಕರ ಶೆಟ್ಟಿ ಮಾಣಿಬೆಟ್ಟು, ಮಹಿಳಾ ವಿಭಾಗದ ಗುರ್ಕಾರ್ದಿ ಸುಜಾತ.ಡಿ ಶೆಟ್ಟಿ, ಯುವ ಭಾಗದ ಗುರ್ಕಾರೆ ಅಭಿಜಿತ್ ಶೆಟ್ಟಿ ಬೊಕ್ಕ ಪದುಕೆರ್ ಪ್ರಕಟಣೆಡ್ ತೆರಿಪಾದೆರ್.