ಮೀರಾ ಭಾಯಂದರ್ ಟೀಮ್ ಯುವ ಬ್ರಿಗೇಡ್ ದ ಮುತಾಲಿಕೆಡ್ ಪಾವಂಜೆ ಮೇಳದಕ್ಲೆರ್ದ್ ಶ್ರೀ ದೇವಿ ಮಹಾತ್ಮೆ ಆಟ ನ.4 ಸನಿಯಾರ ಮೀರಾ ಭಾಯಂದರ್ ಇಂದ್ರಲೋಕ ಸ್ವರ್ಗೀಯ ಬಾಳ ಸಾಹೇಬ್ ಠಾಕ್ರೆ ಮೈದಾನಡ್ ನಡಪರೆ ಉಂಡು.
ತ್ರಿರಂಗ ಸಂಗಮದ ಒಟ್ಟುಸೇರಿಗೆಡ್ ಯಕ್ಷಧ್ರುವ ಪಟ್ಲ ಸತೀಶ್ ಶೆಟ್ಟಿ ಮೆರೆನ ಭಾಗವತಿಕೆಡ್ ಯಕ್ಷಗಾನ ನಡಪುಂಡು ಪಂದ್ ಮಾರ್ಗದರ್ಶಕೆರ್ ಸಚ್ಚಿದಾನಂದ ಶೆಟ್ಟಿ, ಗುರ್ಕಾರೆ ಅರುಣ್ ಶೆಟ್ಟಿ ಪಣಿಯೂರು ಬೊಕ್ಕ ಮಹಿಳಾ ವಿಭಾಗ, ಯುವ ವಿಭಾಗದ ಪದುಕೆರ್ ಲೆಪ್ಪೋಲೆಡ್ ತೆರಿಪಾದೆರ್.
ನನ ಶಾಲೆದ ಮಾತ ಪಾಠ ಬೂಕುಡು ಇಂಡಿಯಾ ಪುದರ್ ದ ಬದಲ್ ಭಾರತ್ ಪಂದ್ ಸೇರ್ಸಾಯೆರೆ NCERT ಸಮಿತಿ ಶಿಫಾರಸು ಮಲ್ದ್ಂಡ್.
ವಿಪಕ್ಷಲು I.N.D.I.A ಮೈತ್ರಿಕೂಟ ಮಲ್ತಿನ ಬೊಕ್ಕ ಇಂಡಿಯಾ ಪದದ ಬಗೆಟ್ಟ್ ಪ್ರಧಾನಿ ಮೋದಿ ವ್ಯಂಗ್ಯ ಮಲ್ತ್ ದ್ ಇತ್ತೆರ್. ಬೊಕ್ಕ ರಾಷ್ಟ್ರಪತಿ ಭವನದ ಲೆಪ್ಪೋಲೆಡ್ ಭಾರತ್ ಪಂದ್ ನೊಂದಣಿ ಮಲ್ತಿನ ಮುಖೇನ ಈ ಪದ ಬಳಕೆಗ್ ಬೈದ್ಂಡ್. ಇತ್ತೆ ಪ್ರಧಾನಿ ಕಚೇರಿ ಸೇರಿನಂಚೆನೆ ಸುಮಾರ್ ಕೆಡೆಟ್ಟ್ ಇಂಡಿಯಾ ಬದಲ್ ಭಾರತ್ ಪನ್ಪುನ ಪದನ್ ಗಲಸೊಂದು ಉಲ್ಲೆರ್.
ಸುಬ್ರಹ್ಮಣ್ಯ: ದೇವೆರ್ನ ದರ್ಶನದ ಪೊರ್ತುಡು ಕಲ್ವೆರ್ ಪೊಂಜೊವ್ನ 1.4 ಲಕ್ಷ ಬಿಲೆತ್ತ ಬಂಗಾರ್ದ ಕರಿಮಣಿ ಸರ ಕಂಡಿನ ಘಟನೆ ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನಡ್ ನಡತ್ಂಡ್. ಕಡಬ ತಾಲೂಕ್ದ ಇಚ್ಲಂಪಾಡಿ ಬರೆಮೇಲು ನಿವಾಸಿ ಭಾರತಿ ಎಮ್ ಡಿ ಅಕ್ಟೋಬರ್ 22 ಮಧ್ಯಾಹ್ನ ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನಗ್ ಭೇಟಿ ಕೊರ್ದ್ ಇತ್ತೆರ್. ದೇವೆರೆ ದರ್ಶನ ಮಲ್ತ್ ಆರತಿ ದೆತೊನಗ ಕರಿಮಣಿ ಸರ ಕಾಣೆ ಆತ್ಂಡ್. ನೆತ್ತ ಬಗೆಟ್ ಸುಬ್ರಹ್ಮಣ್ಯ ದೇವಸ್ಥಾನಡ್ ಕೇಸ್ ದಾಖಲಾತ್ಂಡ್.
ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಬಿ.ಸಿ.ಟ್ರಸ್ಟ್, ಜನಜಾಗೃತಿ ವೇದಿಕೆದ ಮುತಾಲಿಕೆಡ್ ಅಜ್ಜಾವರಡ್ ನಡಪುನ 1753 ನೇ ಮದ್ಯವರ್ಜನ ಶಿಬಿರದ ಲೆಪ್ಪೋಲೆ ಬುಡುಗಡೆನ್ ಧರ್ಮಸ್ಥಳಡ್ ಡಾ.ಡಿ.ವೀರೇಂದ್ರ ಹೆಗ್ಗಡೆರ್ ಇನಿ ಬಿಡುಗಡೆ ಮಲ್ತೆರ್.
ಸುಳ್ಯಡ್ ನಡತ್ತಿನ ಗಾಂಧಿಸ್ಮೃತಿ ಬೊಕ್ಕ ಜನಜಾಗೃತಿ ಸಮಾವೇಶದ ಯಶಸ್ವಿಯಾದ್ ನಿರ್ವಹಣೆ ಮಲ್ತಿನ ಜನಜಾಗೃತಿ ವೇದಿಕೆದ ಅಧ್ಯಕ್ಷರೆನ್ ಬೊಕ್ಕ ಪದಾಧಿಕಾರಿಲೆಗ್ ಹೆಗ್ಗಡೆರ್ ಅಭಿನಂದನೆ ಸಲ್ಲಿಸಾಯೆರ್.
ಈ ಪೊರ್ತುಡು ಅಖಿಲ ಕರ್ನಾಟಕ ಜನಜಾಗೃತಿ ನಿಕಟಪೂರ್ವ ಜಿಲ್ಲಾಧ್ಯಕ್ಷೆರ್ ಎನ್. ಎ. ರಾಮಚಂದ್ರ, ತಾಲೂಕು ಅಧ್ಯಕ್ಷೆರ್ ಲೋಕನಾಥ್ ಅಮೆಚೂರು, ತಾಲೂಕು ನಿಕಟಪೂರ್ವಾಧ್ಯಕ್ಷೆರ್ ಮಹೇಶ್ ಕುಮಾರ್ ಮೇನಾಲ, ಪ್ರಗತಿಬಂಧು ಸ್ವಸಹಾಯ ಸಂಘದ ತಾಲೂಕು ಅಧ್ಯಕ್ಷೆರ್ ಸುರೇಶ್ ಕಣೆಮರಡ್ಕ, ಪೂರ್ವಾಧ್ಯಕ್ಷೆರ್ ಬೂಡು ರಾಧಾಕೃಷ್ಣ ರೈ, ಮದ್ಯವರ್ಜನ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಶಿವಪ್ರಕಾಶ್ ಅಡ್ಪಂಗಾಯ, ತಾಲೂಕು ಯೋಜನಾಧಿಕಾರಿ ನಾಗೇಶ್ ಪಿ, ವಲಯ ಮೇಲ್ವಿಚಾರಕಿ ವಿಶಾಲ ಕೆ, ಮದ್ಯವರ್ಜನ ಸಮಿತಿದ ಉಪಾಧ್ಯಕ್ಷೆರ್ ಶಶ್ಮಿ ಭಟ್ ಇತ್ತೆರ್.
ಬಾಂಬೆ ಬಿಗ್ ಬಜಾರ್ ಕುಂಟುದ ಅಂಗಡಿಡ್ ತೂ ಪೊತ್ತಿನ ಘಟನೆ ದಾವಣಗೆರೆ ಜಿಲ್ಲೆದ ಚನ್ನಗಿರಿ ತಾಲೂಕ್ದ ಸಂತೆಬೆನ್ನೂರ್ಡ್ ನಡತ್ಂಡ್. ಬುಧವಾರ ಕಾಂಡೆ ಈ ತೂ ಪೊತ್ತಿನ ಘಟನೆ ಆದ್ ವಿದ್ಯುತ್ ಶಾರ್ಟ್ ಶರ್ಕ್ಯೂಟ್ ಕಾರಣ ಪಂದ್ ತೆರಿದ್ ಬೈದ್ಂಡ್. ನೆರ್ದ್ 40 ಲಕ್ಷದಾತ್ ಕುಂಟು ಬೊಕ್ಕ ವಸ್ತುಲು ತೂಕ್ ಖರ್ಚಿಂದ್ ಪೊತುಂಡು ಪಂದ್ ತೆರಿದ್ ಬೈದ್ಂಡ್. ಸಂತೆಬೆನ್ನೂರು ಪೊಲೀಸ್ ಠಾಣೆಡ್ ಈ ಬಗ್ಗೆ ಕೇಸ್ ದಾಖಲಾತ್ಂಡ್.
ಒಡಿಪು: ಒಡಿಪು ತಾಲೂಕ್ದ ಚೆರ್ಕಾಡಿ ಗ್ರಾಮದ ಶ್ರೀ ದುರ್ಗಾಪರಮೇಶ್ವರಿ ಭಜನಾ ಮಂಡಳಿ ಕನ್ನಾರು ನೆತ್ತ ಸ್ಥಾಪಕೆರಾಯಿನ, ಸುಮಾರ್ 50 ವರ್ಷರ್ದ್ ಭಜನಾ ಸೇವೆ ಮಲ್ತೊಂದು ಬರೊಂದು ಇಪ್ಪುನ, ಬೊಕ್ಕ ಒಡಿಪು ತಾಲೂಕು ಭಜನಾ ಪರಿಷತ್ ನೆತ್ತ ಅಧ್ಯಕ್ಷೆರಾದ್ ಬೇತೆ ಬೇತೆ ಕಡೆಟ್ ಭಜನಾ ಸೇವೆನ್ ಮಲ್ತೊಂದು ಇಪ್ಪುನ ‘ಬಾಲಕೃಷ್ಣ ಎಮ್ ಶೆಟ್ಟಿ ನೂಜಿನ ಬೈಲು’ ಮೇರೆಗ್ ಒಡಿಪು ತಾಲೂಕ್ದ ಭಜನಾ ಸಾಧಕ ಪ್ರಶಸ್ತಿ ಪ್ರದಾನ ಮಲ್ತೆರ್.
ಶ್ರೀ ಕ್ಷೇತ್ರ ಧರ್ಮಸ್ಥಳಡ್ ನಡತ್ತಿನ 25 ನೇ ವರ್ಷದ ಭಜನಾ ಕಮ್ಮಟಡ್ ಡಾ|. ಡಿ. ವೀರೇಂದ್ರ ಹೆಗ್ಗಡೆರ್ ಬೊಕ್ಕ ಮಾಣಿಲ ಕ್ಷೇತ್ರದ ಮೋಹನದಾಸ ಸ್ವಾಮೀಜಿ ಒಡಿಪು ತಾಲೂಕು ಭಜನಾ ಸಾಧಕ ಪ್ರಶಸ್ತಿನ್ ಕೊರ್ದ್ ಮಾನಾದಿಗೆ ಮಲ್ತೆರ್.
ಬೆಳ್ತಂಗಡಿ: ದೇಯಿ ಬೈದೆತಿ ಕೋಟಿ ಚೆನ್ನಯ ಮೂಲಸ್ಥಾನ ಶ್ರೀ ಕ್ಷೇತ್ರ ಗೆಜ್ಜೆಗಿರಿ ನೆತ್ತ ಕ್ಷೇತ್ರಾಡಳಿತ ಸಮಿತಿದ ಮಹಾಸಭೆ ಗೆಜ್ಜೆಗಿರಿಟ್ ನಡತ್ಂಡ್. ಮಹಾ ಸಭೆತ ಗುರ್ಕಾರ್ಮೆನ್ ವಹಿಸ್ದ್ ಪಾತೆರ್ನ ಕ್ಷೇತ್ರಾಡಳಿತ ಸಮಿತಿದ ಗುರ್ಕಾರ್ಲು ಪೀತಾಂಬರ ಹೇರಾಜೆ ದೇಶ ವಿದೇಶಡ್ ಇಪ್ಪುನ ದೇಯಿ ಬೈದೆತಿ ಕೋಟಿ ಚೆನ್ನಯ ಮೂಲಸ್ಥಾನದ ಭಕ್ತಾದಿಲು ಸೇರ್ದ್ ನಿರ್ಮಾಣ ಮಲ್ತಿನ ಶ್ರೀ ಕ್ಷೇತ್ರ ಇನಿ ವಿಶ್ವಾದ್ಯಂತ ಭಕ್ತರೆನ್ ಆಕರ್ಷಣೆ ಮಲ್ಪುನ ಪುಣ್ಯ ಕ್ಷೇತ್ರ ಆತ್ಂಡ್.
ಶ್ರೀ ಕ್ಷೇತ್ರನ್ ನನಾತ್ ಅಭಿವೃದ್ಧಿ ಮಲ್ಪುನ ಬಗ್ಗೆ ಸಭೆಟ್ ತೆರಿಪಾಯೆರ್. ಕ್ಷೇತ್ರಾಡಳಿತ ಸಮಿತಿದ ಪ್ರಧಾನ ಕಾರ್ಯದರ್ಶಿ ಉಲ್ಲಾಸ್ ಕೋಟ್ಯಾನ್ ವಾರ್ಷಿಕ ವರದಿನ್ ಮಂಡನೆ ಮಲ್ತೆರ್. ಕೋಶಾಧಿಕಾರಿ ದೀಪಕ್ ಕೋಟ್ಯಾನ್ ಲೆಕ್ಕಪತ್ರ ಮಂಡನೆ ಮಲ್ತೆರ್. ಗೌರವಾಧ್ಯಕ್ಷೆರ್ ರಾಜಶೇಖರ ಕೋಟ್ಯಾನ್ ಶ್ರೀ ಕ್ಷೇತ್ರಗ್ ಬರ್ಪುನ ಯಾತ್ರಿಲೆಗ್ ಮೂಲಭೂತ ಸೌಕರ್ಯನ್ ಅಭಿವೃದ್ಧಿ ಮಲ್ಪುನ ಬಗ್ಗೆ ಚರ್ಚೆ ಮಲ್ತೆರ್.
ಆಡಳಿತ ಸಮಿತಿದ ಕಾರ್ಯಕಾರಿ ಸದಸ್ಯೆರ್ ಗೆಜ್ಜೆಗಿರಿ ಮೇಳದ ಸಂಚಾಲಕೆರ್ ನವೀನ್ ಸುವರ್ಣ ಸಜಿಪ ಶ್ರೀ ಕ್ಷೇತ್ರದ ಗೆಜ್ಜೆಗಿರಿ ಮೇಳ ಯಶಸ್ವಿ ದಾಖಲೆ ಪ್ರದರ್ಶನ ಆಯಿನ ಬಗ್ಗೆ ಮೇಳದ ವರದಿನ್ ಒಪ್ಪಿಸಾಯೆರ್. ಉಪಾಧ್ಯಕ್ಷೆರ್ ರವಿಪೂಜಾರಿ ಚಿಲಿಂಬಿ ಕ್ಷೇತ್ರಾಡಳಿತ ಸಮಿತಿ ಆರ್ಯುವೇದ, ಗಿಡಮೂಲಿಕೆದ ಉತ್ಪನ್ನದ ತಯಾರಿ, ಮಾರಾಟ, ಬೊಕ್ಕ ಸ್ವಾವಲಂಬಿ ಉದ್ಯೋಗಗ್ ಪ್ರೋತ್ಸಾಹ ಕೊರ್ಪುನ ಬಗ್ಗೆ ಕಾರ್ಯ ಸೂಚಿನ್ ತೆರಿಪಾಯೆರ್.
ಈ ಸಭೆಟ್ ಚಿತ್ತರಂಜನ್ ಕಂಕನಾಡಿ, ಮುಂಬೈ ಬಿಲ್ಲವ ಅಸೋಸಿಯೇಶನ್ ಅಧ್ಯಕ್ಷೆರ್ ಹರೀಶ್ ಜಿ ಅಮೀನ್, ಕ್ಷೇತ್ರದ ಗೌರವಾಧ್ಯಕ್ಷೆರ್ ಜಯಂತ ನಡುಬೈಲ್ ಇತ್ತೆರ್. ಮುಂಬೈ ಭಾರತ್ ಬ್ಯಾಂಕ್ ನಿರ್ದೇಶಕೆರಾದ್ ಆಯ್ಕೆಯಾಯಿನ ಕ್ಷೇತ್ರಾಡಳಿತ ಸಮಿತಿದ ಉಪಾಧ್ಯಕ್ಷೆರ್ ನಿತ್ಯಾನಂದ ಕೋಟ್ಯಾನ್, ದಯಾನಂದ ಪೂಜಾರಿ ಮೊಕ್ಲೆಗ್ ಈ ಪೊರ್ತುಡ್ ಮಾನಾದಿಗೆ ಮಲ್ತೆರ್.
ಕುಡ್ಲ: ಕುದ್ರೋಳಿ ಶ್ರೀ ಕ್ಷೇತ್ರದ ಮಾಜಿ ಉಪಾಧ್ಯಕ್ಷೆರ್ ರಾಘವೇಂದ್ರ ಕೂಳೂರು (92) ಮೇರ್ ದೇವೆರೆ ಪಾದೊ ಸೇರಿಯೆರ್.
ಸಾಮಾಜಿಕ ಸೇವೆನ್ ಏಪಲ ಮಲ್ತೊಂದು ಇತ್ತಿನ ರಾಘವೇಂದ್ರ ಕೂಳೂರು ಮೇರ್ ಧಾರ್ಮಿಕ ಬೊಕ್ಕ ಸಮಾಜ ಸೇವೆನ್ ಏಪಲ ಮಲ್ತೊಂದು ಇತ್ತೆರ್. ಅಂಚೆನೆ ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಆಡಳಿತ ಸಮಿತಿದ ಉಪಾಧ್ಯಕ್ಷೆರಾದಿತ್ತೆರ್. ಪಡುಕೋಡಿ ಗ್ರಾಮ ಪಂಚಾಯತ್ ಮಾಜಿ ಗುರ್ಕಾರೆಯಾದ್, ಲಯನ್ಸ್ ಕ್ಲಬ್ ಸದಸ್ಯೆರಾದ್ ಸೇವೆ ಸಂದಾದೆರ್. ಮೆರೆಗ್ ಒಂಜಿ ಮಗಲ್, ಪುಲ್ಲಿಯಲ್ಲು ಉಲ್ಲೆರ್.
ಬ್ರಹ್ಮಾವರ: ಬಾರಕೂರು ಮೂಡುಕೇರಿ ಶ್ರೀ ಸರಸ್ವತಿ ನಾರಾಯಣಿ ದೇವಲ್ಯಡ್ ಶರನ್ನವರಾತ್ರಿ ಲೆಕ್ಕೊಡು ಕೋಡೆ ಸುರೇಶ್ ನಾಯಕ್ ಪರ್ಕಳ ಮೆರೆನ ಸೇವೆ ರೂಪವಾದ್ ಚಂಡಿಕಾಯಾಗ ನಡತ್ಂಡ್.
ಕೂಡ್ಲಿ ಗಣಪತಿ ಉಡುಪ ಮೆರೆನ ಪ್ರಧಾನ ಪೌರೋಹಿತ್ಯಡ್ ಹೋಮ ನಡತ್ಂಡ್. ಈ ಪೊರ್ತುಡು ದೇವಿಗ್ ಇಸೇಸ ಅಲಂಕಾರ ಮಲ್ತ್ ದ್ ಇತ್ತೆರ್. ದೇವಲ್ಯದ ಆಡಳಿತ ಮೊಕ್ತೇಸರೆರ್ ಶಂಕರ ನಾಯಕ್ ಬ್ರಹ್ಮಾವರ, ಮಾನಾದಿಗೆದ ಗುರ್ಕಾರೆ ಗೋವಿಂದ ನಾಯಕ್ ಕಾವೂರ್, ಗುರ್ಕಾರೆ ಗೋವಿಂದ ನಾಯ್ಕ್, ಪ್ರಧಾನ ಕಾರ್ಯದರ್ಶಿ ಚಂದ್ರನಾಯ್ಕ್, ಕೋಶಾಧಿಕಾರಿ ರಾಘವ ನಾಯ್ಕ್, ಮಹಿಳಾ ವಿಭಾಗದ ಗೀತಾ ವಿದು ಶೇಖರ ಬೊಕ್ಕ ಪದುಕೆರ್ ಪಾಲ್ ಪಡೆದಿತ್ತೆರ್.
ಮೈಸೂರು: ಮೈಸೂರು ದಸರಾದ ಲೆಕ್ಕೊಡು ಸುರುವಾಯಿನ ಜಂಬೂಸವಾರಿ ಮೆರವಣಿಗೆದೊಟ್ಟಿಗೆ ಮುಗಿತಲ ಆಂಡ್.
ಬಯ್ಯಗ್ ಮುಖ್ಯಮುಂತ್ರಿ ಸಿದ್ದರಾಮಯ್ಯ ಮೇರ್ ಪುಷ್ಪಾರ್ಚನೆ ಮಲ್ತಿನ ಬೊಕ್ಕ 750 ಕೆಜಿ ತೂಕದ ಬಂಗಾರ್ ದ ಅಂಬಾರಿನ್ ದೆರ್ತ್ತೊಂದು, ಅರಮನೆತ್ತ ಚಾವಡಿರ್ದ್ ಬತ್ತಿನ ಅಭಿಮನ್ಯು ಆನೆ ರಾತ್ರೆ ಬನ್ನಿ ಮಂಟಪಗ್ ಬತ್ತ್ಂಡ್. ಸುಮಾರ್ ಒಂಜಾರೆ ಗಂಟೆ ಮೆರವಣಿಗೆ ನಡತ್ಂಡ್. ಈ ಮೆರವಣಿಗೆಡ್ 49 ಟ್ಯಾಬ್ಲೊ, ಬೇತೆ ಬೇತೆ ಕಲಾಕೂಟಲು ಪಾಲ್ ಪಡೆದಿತ್ತ್ಂಡ್.
