ಗೃಹಲಕ್ಷ್ಮೀ ಯೋಜನೆಗ್ ಭಾರೀ ಸಂಖ್ಯೆಡ್ ಜನಕುಲು ಅರ್ಜಿ ಸಂದಾವೊಂದು ಉಲ್ಲೆರ್.
2ನೇ ದಿನ 7,77,423 ಪೊಂಜೋವ್ ವುಲು ನೊಂದಣಿ ಮಲ್ದೆರ್. ಇಡೆ ಮುಟ್ಟ 8,81,639 ಪೊಂಜೋವ್ ಲು ಅರ್ಜಿ ಸಂದಾದೆರ್ ಪಂದ್ ಇಲಾಖೆ ತೆರಿಪಾದ್ಂಡ್.
ರಡ್ಡನೇ ದಿನ ಸರ್ವರ್ ಸಮಸ್ಯೆ, ತಾಂತ್ರಿಕ ತೊಂದರೆರ್ದ್ ಎಸ್ ಎಂಎಸ್ ಬತ್ತಿಜಿಂಡಲ ಮಲ್ಲ ಸಂಖ್ಯೆಡ್ ಅರ್ಜಿನ್ ಸ್ವೀಕಾರ ಮಲ್ದ್ಂಡ್ ಪಂದ್ ವರದಿ ಆತ್ಂಡ್. ಸನಿಯಾರ, ಐತಾರ ನೊಂದಣಿ ಸಂಖ್ಯೆ ನನಾತ್ ಎಚ್ಚಾಪುನ ಅಂದಾಜಿ ಉಂಡು ಪಂದ್ ತೆರಿದ್ ಬೈದ್ಂಡ್.
ಕುಡ್ಲದ ಬಿಜೈ ಕಾಪಿಕಾಡ್ದಲ್ಪದ ಕಾಲೇಜ್ ವಿದ್ಯಾರ್ಥಿನ ಮಿತ್ತ್ ನೈತಿಕ ಪೊಲೀಸ್ ಗಿರಿ ನಡತ್ನ ಘಟನೆ ವರದಿಯಾತ್ಂಡ್.
ಮಹಮ್ಮದ್ ಹಫೀಸ್(20ವ) ಹಲ್ಲೆ ಆಯಿನ ವಿದ್ಯಾರ್ಥಿ.
ಕಾಲೇಜಿರ್ದ್ 6 ಜನ ವಿದ್ಯಾರ್ಥಿಲು ಪಣಂಬೂರು ಬೀಚ್ಗ್ ತಿರ್ಗರೆ ಪೊಯಿನ ಪೊರ್ತುಡು ಪಿರಾವುಡೆ ಬತ್ತಿನ ಒಂಜಿ ಕೂಟದಕುಲು ವಿದ್ಯಾರ್ಥಿಗ್ ಹಾಕ್ ದೆರ್ ಪಂದ್ ತೆರಿದ್ ಬೈದ್ಂಡ್.
ಪೆಟ್ಟ್ ತಿಂದಿನ ವಿದ್ಯಾರ್ಥಿ ಉರ್ವ ಪೊಲೀಸ್ ಠಾಣೆಡ್ ದೂರು ಕೊರ್ತೆರ್.
ಪುತ್ತೂರ್ : ಮುಲ್ಪದ ಕಡೇಶಿವಾಲಯದ ಗಡಿಯಾರದ ಕೈತಲ್ ಜಪಾನ್ ಮೂಲದ ವ್ಯಕ್ತಿಯೊರಿ ತಿಕ್ಕಿನ ಘಟನೆ ತೆರಿದ್ ಬೈದ್ಂಡ್.
ಕೈತಲ್ದ ಜನಕ್ಲ್ ಪುತ್ತೂರು ಪೊಲೀಸ್ ಠಾಣೆಗ್ ಮಾಹಿತಿ ಕೊರ್ತೆರ್.
ಜಾಗೆಗ್ ಬತ್ತಿನ ಪೋಲಿಸೆರ್ ವ್ಯಕ್ತಿನ ಪರಿಶೀಲನೆ ಮಲ್ತ್ ದೆರ್. ಆಯನ ಪಾಸ್ಪೋರ್ಟ್ ಡ್ ಸುಯೋಷಿ ಪಂದ್ ಪುದರ್ ಇತ್ತ್ಂಡ್. ಜಪಾನ್ರ್ದ್ ಪುತ್ತೂರ್ ಗ್ ದಾಯೆ ಬೈದೆ ಪಂದ್ ನನ ತೆರಿಯೊಡಾತೆ.
ಸುರತ್ಕಲ್: ರಾಷ್ಟ್ರಭಕ್ತ ನಾಗರಿಕ ವೇದಿಕೆದ ಮುತಾಲಿಕೆಡ್ 10ನೇ ವರ್ಷದ ಕಾರ್ಗಿಲ್ ವಿಜಯೋತ್ಸವ ಅಂಚೆನೆ ಸೈನಿಕ ಕುಟುಂಬದಕ್ಲೆಗ್ ಸೈನಿಕ ಕಲ್ಯಾಣ ನಿಧಿ ಪಟ್ಟುನ ಲೇಸ್, ಇಡ್ಯಾ ದೇವಸ್ಥಾನರ್ದ್ ತಿಬಿಲದ ದೀಪದ ಮೆರವಣಿಗೆ, ಸೈನಿಕರೆಗ್ ಮಾನಾದಿಗೆ ಇಂಚಿನ ಮಾತ ಕಾರ್ಯಕ್ರಮ ಜುಲೈ 26 ಕ್ಕ್ ಬಯ್ಯಡ್ ನಡಪರೆ ಉಂಡು ಪಂದ್ ವೇದಿಕೆದ ಅಧ್ಯಕ್ಷೆರ್ ಸತ್ಯಜಿತ್ ಸುರತ್ಕಲ್ ತೆರಿಪಾಯೆರ್.
ಆರ್ ಸುರತ್ಕಲ್ ಸೂರಜ್ ಹೋಟೆಲ್ ಡ್ ಸನಿಯಾರ ನಡತಿನ ಪತ್ರಿಕಾಗೋಷ್ಠಿಡ್ ಈ ವಿಷಯ ತೆರಿಪಾಯೆರ್.
ಜು. 26 ಕ್ಕ್ ಬಯ್ಯಡ್ 7.30 ಗು ಕರ್ನಾಟಕ ಸೇವಾ ವೃಂದ ವೇದಿಕೆ, ಸುರತ್ಕಲ್ ಮೂಲು ನಡಪುನ ಲೇಸ್ ದ ಗುರ್ಕಾರ್ಮೆನ್ ಭಾರತೀಯ ವಾಯುಪಡೆತ್ತ ನಿವೃತ್ತ ಗ್ರೂಪ್ ಕ್ಯಾಪ್ಟನ್ ಸುಧೀರ್ ಅಮೀನ್ ಒಯಿಸೊನರೆ ಉಲ್ಲೆರ್.
ಮಲ್ಲ ಬಿನ್ನೆರಾದ್ ಉದ್ಯಮಿ ಸುಜಿತ್ ಆಳ್ವ ಏತಮೊಗರುಗುತ್ತು ಪಾಲ್ ಪಡೆವೆರ್. ಆನಿ ಬಯ್ಯಡ್ 6-30 ಗು ಇಡ್ಯಾ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನರ್ದ್ ಸುರತ್ಕಲ್ ಮೊಸರುಕುಡಿಕೆ ವೇದಿಕೆ ಮುಟ್ಟ ತಿಬಿಲದ ದೀಪ ಮೆರವಣಿಗೆ ನಡಪರೆ ಉಂಡು. ಇಡ್ಯಾ ದೇವಸ್ಥಾನದ ಪ್ರಧಾನ ಅರ್ಚಕೆರ್ ವೇದಮೂರ್ತಿ ಐ. ರಮಾನಂದ ಭಟ್ ಮೆರವಣಿಗೆ ಉದಿಪನ ಮಲ್ಪರೆ ಉಲ್ಲೆರ್.
ಕಾರ್ಗಿಲ್ ವಿಜಯೋತ್ಸವದ ಪತ್ತನೇ ವರ್ಷಾಚರಣೆದ ನಿಲೆಟ್ಟ್ ಜು. 23 ಐತಾರ ಕಾಂಡೆ 10 ಗಂಟೆಗ್ ಅಮರ್ ಜವಾನ್ ಜ್ಯೋತಿ ಮೆರವಣಿಗೆ, ರಡ್ಡ್ ಚಕ್ರದ ಸುಮಾರ್ 500 ಗಾಡಿಲೆನ ಜಾಥಾ ಪಿದಾಡ್ದ್ 11:30 ಗಂಟೆಗ್ ಕದ್ರಿದ ಯುದ್ಧ ಸ್ಮಾರಕಡ್ ಮುಗಿತಲ ಆವರೆ ಉಂಡು ಪಂದ್ ತೆರಿಪಾಯೆರ್.
ಸುದ್ದಿಗೋಷ್ಠಿಡ್ ಅಧ್ಯಕ್ಷೆರ್ ಸತ್ಯಜಿತ್ ಸುರತ್ಕಲ್, ಪ್ರಧಾನ ಕಾರ್ಯದರ್ಶಿ ಅಣ್ಣಪ್ಪ ದೇವಾಡಿಗ, ಟ್ರಸ್ಟಿಲಾಯಿನ ಮಹಾಬಲ ಪೂಜಾರಿ ಕಡಂಬೋಡಿ, ಭಾಸ್ಕರ್ ರೈ, ಮಹೇಶ್ ಮೂರ್ತಿ ಸುರತ್ಕಲ್ ಇತ್ತೆರ್.
ವಿಧಾನಸಭೆ ಅಧಿವೇಶನಡ್ ಬಿಜೆಪಿದ 10 ಶಾಸಕೆರೆನ್ ಅಮಾನತ್ ಮಲ್ದಿನ ಸ್ಪೀಕರ್ ಯು.ಟಿ ಖಾದರ್ ಮೆರೆನ ವಿರುದ್ಧ ಇನಿ ಬಿಜೆಪಿ ರಾಜ್ಯ ಇಡೀ ಪ್ರತಿಭಟನೆ ಮಲ್ಪೆರೆ ಉಂಡು.
ಪ್ರಜಾಪ್ರಭುತ್ವ ವಿರೋಧಿ ಕಾಂಗ್ರೆಸ್ ಸರ್ಕಾರ ಶಾಸಕೆರೆನ ಹಕ್ಕ್ ನ್ ದೆತೊಂದು, ಸ್ಪೀಕರ್ ಕೈಟ್ಟ್ ಈ ಬೇಲೆನ್ ಮಲ್ಪಾದ್ಂಡ್ ಪಂದ್ ಬಿಜೆಪಿ ಬೆಚ್ಚ ಆತ್ಂಡ್.
ಸಂವಿಧಾನ ವಿರೋಧಿ ನಡೆತ್ತ ವಿರುದ್ಧ ಬಿಜೆಪಿ ಮಾತ ಜಿಲ್ಲೆ ತಾಲೂಕ್ ಕೇಂದ್ರಡ್ ಪ್ರತಿಭಟನೆ ಮಲ್ಪೆರೆ ಉಂಡು ಪಂದ್ ಪಂತ್ಂಡ್.
ಪುಗರ್ತೆದ ಕಾದಂಬರಿಕಾರೆ ಪದ್ಮಭೂಷಣ ಡಾ.ಎಸ್.ಎಲ್ ಭೈರಪ್ಪ ಮೇರ್ ಕನ್ನಡ ವಿಭಾಗದ ಪ್ರತಿಭಾವಂತ ಕಲ್ಪಾರ್ಥಿ ಅನಿತಾ ಪೂಜಾರಿ ಮೆರೆಗ್ ಬೊಂಬೈ ವಿಶ್ವವಿದ್ಯಾಲಯಡ್ ಶೋಧ ಸಿರಿ ಪುರಸ್ಕಾರನ್ ಪ್ರಧಾನ ಮಲ್ತೆರ್.
ಅನಿತಾ ಮೇರ್ ಬೊಂಬೈ ವಿಶ್ವವಿದ್ಯಾಲಯಡ್ ಬೊಂಬೈ ಬಿಲ್ಲವೆರೆನ ಸಾಂಸ್ಕ್ರತಿಕ ಅಧ್ಯಯನ ಪನ್ಪಿನ ಇಸಯದ ಬಗ್ಗೆ ಅಧ್ಯಯನ ಮಲ್ತೊಂದು ಉಲ್ಲೆರ್. ಪಿಎಚ್.ಡಿ ಕೋರ್ಸ್ ವರ್ಕ್ ದ ಸಲುವಾದ್ ಬಿಲ್ಲವ ಸಮಾಜದ ಅಭಿವೃದ್ದಿದ ರೂವಾರಿ ಜಯ ಸಿ.ಸುವರ್ಣ ಮೆರೆನ ಬಗ್ಗೆ ತಯಾರ್ ಮಲ್ತಿನ ಸಂಪ್ರಬಂಧಗ್ ಈ ಪುರಸ್ಕಾರ ತಿಕ್ ದ್ಂಡ್.
ಜೈ ತುಲುನಾಡ್ (ರಿ.) ಬೆಂಗ್ಲೂರ್, ಎಗ್ಗೆದ ಮುತಾಲಿಕೆಡ್ ತುಲುನಾಡ ಆಟಿ ಜುಲೈ 30 ಐತಾರದಾನಿ ಬೆಂಗ್ಲೂರ್ ಮೆಜೆಸ್ಟಿಕ್ ಸ್ವಾಗತ್ ಹೋಟೆಲ್ ಡ್ ನಡಪರೆ ಉಂಡು.
ಈ ಲೇಸ್ ಡ್ ಮಾತ ತುಳುವೆರ್ ಪಾಲ್ ಪಡೆವೊಡು ಪಂದ್ ಜೈ ತುಲುನಾಡ್ (ರಿ.) ಬೆಂಗ್ಲೂರ್ ಎಗ್ಗೆದ ಗುರ್ಕಾರ್ಲು ಬೊಕ್ಕ ಮಾತ ಪದುಕೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಬೆಂಗ್ಲೂರು: ಸಿಎಂ ಸಿದ್ದರಾಮಯ್ಯೆರ್ ಬಜೆಟ್ಡ್ ಘೋಷಣೆ ಮಲ್ತಿನ ಪ್ರಕಾರ ಮದ್ಯದ ಬೆಲೆ ಇನಿರ್ದ್ ಅನ್ವಯ ಆಪುಲೆಕ ಶೇ. 20% ಜಾಸ್ತಿ ಆತ್ಂಡ್.
ಸರ್ಕಾರ ಅಬಕಾರಿ ಸುಂಕನ್ ಏರಿಕೆ ಮಲ್ತಿನ ಹಿನ್ನೆಲೆಡ್ ಗರಿಷ್ಠ ಶೇ.20% ದಾತ್ ಜಾಸ್ತಿ ರೇಟ್ ಡ್ ಮಾರೊಂದುಲ್ಲೆರ್.
ರಾಜ್ಯ ಸರ್ಕಾರ ನನ ಜಾರಿಗ್ ಕನವೊಡಾಯಿನ ಬೇತೆ ಬೇತೆ ಯೋಜನೆಲೆಗ್ ಸಂಪನ್ಮೂಲ ಒಟ್ಟು ಮಲ್ಪುನ ದೃಷ್ಟಿಡ್ ಮದ್ಯದ ಕಾಸ್ ಜಾಸ್ತಿ ಮಲ್ದೆರ್ ಪಂದ್ ತೆರಿದ್ ಬೈದ್ಂಡ್. ರಾಜ್ಯದ ಕೆಲವು ಜಿಲ್ಲೆಡ್ ರಿಟೇಲ್ ಮದ್ಯ ಮಾರಾಟದ ಬಾರ್ ಬೊಕ್ಕ ರೆಸ್ಟೋರೆಂಟ್ಡ್ ಗುರುವಾರ ರಾತ್ರೆಡೆ ಜಾಸ್ತಿ ರೇಟ್ ಗಿರಾಕಿಲೆರ್ದ್ ವಸೂಲಿ ಮಲ್ತಿನ ಪ್ರಕರಣಲ ದಾಖಲಾತ್ಂಡ್.
ಬಜೆಟ್ಡ್ ಬ್ರಾಂದಿ, ವಿಸ್ಕಿ, ಜಿನ್, ರಮ್ ಗ್ ಶೇ.20% ದಾತ್ ಬೊಕ್ಕ ಬಿಯರ್ಗ್ ಶೇ. 10% ದಾತ್ ಎಚ್ಚ ಆತ್ತ್ಂಡ್ ಪಂದ್ ತೆರಿಪಾದೆರ್.
ಕುಡ್ಲ: ಜು.23 ದಾನಿ ಪುತ್ತೂರು ತಾಲೂಕ್ದ ನಿಡ್ಪಳ್ಳಿ ಆರ್ಯಾಪು, ಬಂಟ್ವಾಳ ತಾಲೂಕ್ದ ಪುದು ಬೊಕ್ಕ ಬೆಳ್ತಂಗಡಿ ತಾಲೂಕ್ದ ಉಜಿರೆ ಬೊಕ್ಕ ಮಡಂತ್ಯಾರ್ ಗ್ರಾಮ ಪಂಚಾಯತ್ ದ ಚುನಾವಣೆ/ ಉಪಚುನಾವಣೆ ನಡಪರೆ ಉಂಡು. ಅಂಚಾದ್ ಜು.21 ದಾನಿ ಬಯ್ಯ 5 ಗಂಟೆರ್ದ್ ವೋಟು ಮುಗಿನ ಮುಟ್ಟ 3 ಕಿ.ಮೀ. ಕೈತಲ್ಡ್ ಮುದ್ಯಮುಕ್ತ ದಿನ ಪಂದ್ ಜಿಲ್ಲಾಧಿಕಾರಿ ಆದೇಶ ಕೊರ್ತೆರ್.
ಇನಿರ್ದ್ ಮಾತ ತರತ್ತ ಮದ್ಯದಂಗಡಿ ಬೊಕ್ಕ ಮದ್ಯ ಮಾರಾಟ ಪರವಾನಿಗೆ ಇಪ್ಪುನ ಅಂಗಡಿ, ಮಾರಾಟ ಕೇಂದ್ರ, ಹೋಟೆಲ್, ಸ್ಟಾರ್ ಹೋಟೆಲ್ಡ್ ಮದ್ಯ ಮಾರುನ ಬೊಕ್ಕ ಸರಬರಾಜು ಮಲ್ಪುನೆನ್ ನಿಷೇಧ ಮಲ್ತ್ ದೆರ್.
ಮಣಿಪುರ ಕಾಂಗ್ಪೊಕ್ಷಿ ಜಿಲ್ಲೆಡ್ ಮೇ 4 ತಾರೀಕ್ಗ್ ನಡತಿನ ಹಿಂಸಾಚಾರದ ಪೊರ್ತುಡು ಕುಕಿ-ಜೋಮಿ ಸಮುದಾಯಗ್ ಸೇರಿನ ಪೊಂಜೊವ್ಲೆನ ಪುಂಡೆರ್ ಬೆತ್ತಲೆ ಮೆರವಣಿಗೆ ಮಲ್ತಿನ ನಿಲೆಟ್ಟ್ ನಾಲ್ ಜನ ಆರೋಪಿಲೆನ್ ಪೊಲೀಸೆರ್ ಪತ್ ದೆರ್ ಪಂದ್ ತೆರಿದ್ ಬೈದ್ಂಡ್.
ಘಟನೆದ ಬಗ್ಗೆ ಬೇಜಾರ್ ಆಯಿನ ಪ್ರಧಾನಿ ಮೋದಿ, ತಪ್ಪು ಮಲ್ತಿನಕ್ಲೆನ್ ಬುಡ್ಪುಜಿ, ಕಾನೂನು ಕ್ರಮ ದೆತೊನ್ವ ಪನ್ನ ಪೆಟ್ಟಿಗೆ ಈ ಕೇಸ್ ಡ್ ನಾಲ್ ಜನ ಆರೋಪಿಲು ತಿಕ್ ದ್ ಬೂರ್ದೆರ್. ಬಾಕಿ ಆರೋಪಿನಕ್ಲೆನ್ ನಾಡೊಂದುಲ್ಲೆರ್ ಪಂದ್ ತೆರಿದ್ ಬೈದ್ಂಡ್.
