April 2023

ಮೇ2-5: ಮೀಯಪದವು ಬ್ರಹ್ಮಶ್ರೀ ಮೊಗೇರ ಮಹಾಂಕಾಳಿ ದೈವೊಲ್ಯಡ್ ಪುನರ್ ಪ್ರತಿಷ್ಠಾ ಬ್ರಹ್ಮಕಲಶ ಉಚ್ಚಯ, ನೇಮ

ಮೀಯಪದವು ಬ್ರಹ್ಮಶ್ರೀ ಮೊಗೇರ ಮಹಾಂಕಾಳಿ ದೈವೊಲ್ಯಡ್ ಪುನರ್ ಪ್ರತಿಷ್ಠಾ ಬ್ರಹ್ಮಕಲಶ ಉಚ್ಚಯ ಬೊಕ್ಕ ನೇಮ ಮೇ 2-5 ಮುಟ್ಟ ನಡಪರೆ ಉಂಡು.

ಮೇ 2 ಅಂಗಾರೆ ಬಯ್ಯಗ್ ಪುದೆಕಾಣಿಕೆ ಕೊನೊಯೆರೆ, ತಂತ್ರಿಲು ಬರಿಯೆರೆ, ಸಾಮೂಹಿಕ ಪ್ರಾರ್ತನೆ, ರಕ್ಷೋಘ್ನ ಹೋಮ, ವಾಸ್ತು ಹೋಮ, ವಾಸ್ತುಪೂಜೆ, ಪ್ರಕಾರ ಬಲಿ, ನೃತ್ಯ ವೈಭವ, ರಾತ್ರೆ ಸಭಾ ಲೇಸ್ ಬೊಕ್ಕ ಗೀತ್ ಸಂಗೀತ್ ಉಪ್ಪಳ‌ ಮೊಕ್ಲೆನ, ರಂಜಿತ್ ಬಾಬಾ ಕೋಡಿಬೈಲ್ ಬೊಕ್ಕ ಕೂಟದಕ್ಲೆರ್ದ್ ಮ್ಯೂಸಿಕಲ್ ನೈಟ್ಸ್ 2023 ನಡಪರೆ ಉಂಡು. ‌

ಮೇ 3 ಬುಧಾರ ಬೊಲ್ಪುಗು ಗಣಹೋಮ, ಕಲಶಪೂಜೆ, ಪ್ರತಿಷ್ಠಾ ಪ್ರಧಾನ ಹೋಮ, ಶ್ರೀ ದೈವೊಲೆನ ಪುನರ್ ಪ್ರತಿಷ್ಠಾ ಬ್ರಹ್ಮಕಲಶ ಉಚ್ಚಯ, ಧಾರ್ಮಿಕ ಸಭಾ ಲೇಸ್, ಮಧ್ಯಾಹ್ನ ತಂಬಿಲ, ಮಹಾಪೂಜೆ, ಬಯ್ಯಗ್ ಭಂಡಾರ ಏರಿಯೆರೆ, ಶ್ರೀ ಗುಳಿಗ ದೈವೊದ ನೇಮ, ರಾತ್ರೆ ಅಭಿನಯ ಕಲಾವಿದೆರ್ ಒಡಿಪು ಮೊಕ್ಲೆರ್ದ್ ಶಾಂಭವಿ ತುಳು ನಾಟಕ, ಶ್ರೀ ಮಹಾಂಕಾಳಿ ದೈವೊದ ನೇಮ ನಡಪರೆ ಉಂಡು.

ಮೇ 4 ಗುರುವಾರ ಬೊಲ್ಪುಗು ಶ್ರೀ ಮಹಾಂಕಾಳಿ ದೇವಿಡ ತನ್ನ ಅನಿಸಿಕೆದ ಬಗೆಟ್ ಪರಕೆ ಮಲ್ತೊಂದು ಶ್ರೀ ದೇವಿನ ಗಂಧ ಪ್ರಸಾದ ದೆತೊನಿಯೆರ್. ಬೊಕ್ಕ ಧೂಪಾರಾಧನೆ, ಬಯ್ಯಗ್ ಭಂಡಾರ ಏರುಂಡು. ರಾತ್ರೆ ಶ್ರೀ ಕೊರಗತನಿಯ ದೈವೊದ ನೇಮ, ಕೈತಲ್ ದ ಪ್ರತಿಭೆಲೆರ್ದ್ ನೃತ್ಯ ವೈಭವ, ಬ್ರಹ್ಮಶ್ರೀ ಮೊಗೇರ ದೈವೊದ ನೇಮ, ಶ್ರೀ ತನ್ನಿಮಾನಿಗ ದೈವೊದ ಅಂಗಣ ಪ್ರವೇಶ ಅವೆರೆ ಉಂಡು.

ಮೇ 5 ಸುಕ್ರಾರ ಬೊಲ್ಪುಗು ಶ್ರೀ ದೈವೊಲೆಡ ಭಕ್ತಾದಿಲೆನ ಪರಕೆ ಬೊಕ್ಕ ದೈವೊದ ಗಂಧ ಪ್ರಸಾದ ದೆತೊನಿಯೆರೆ, ಶ್ರೀ ದೈವೊದ ಭಂಡಾರ ಜಪ್ಪೆರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಬತ್ತ್ ದ್ ಶ್ರೀ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಬ್ರಹ್ಮಕಲಶ ಉಚ್ಚಯ ಸಮಿತಿದ ಅಧ್ಯಕ್ಷೆರ್ ರಘುನಾಥ ಶೆಟ್ಟಿ ಕೊಮ್ಮಂಗಳ, ಗೌರವಾಧ್ಯಕ್ಷೆರ್ ಡಾ.‌ಚಂದ್ರಶೇಖರ ಚೌಟ, ಆಡಳಿತ ಸಮಿತಿದ ಅಧ್ಯಕ್ಷೆರ್ ಸಂಜೀವ ಮೀಯಾಪದವು ಲೆಪ್ಪೋಲೆಡ್ ತೆರಿಪಾದೆರ್.

ಕುಡ್ಲ ಉತ್ತರ ಕ್ಷೇತ್ರಗ್ ನಾಮಪತ್ರ ಸಂದಾಯಿನ ಕಾಂಗ್ರೆಸ್ ಅಭ್ಯರ್ಥಿ ಇನಾಯತ್

ಕುಡ್ಲ ಉತ್ತರ ಕ್ಷೇತ್ರಗ್ ಕಾಂಗ್ರೆಸ್ ಟಿಕೆಟ್ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಇನಾಯತ್ ಆಲಿ ಮೆರೆಗ್ ತಿಕ್ ದ್ಂಡ್. ಮೇರ್ ಗುರುವಾರ ಪಕ್ಷದ ನಾಯಕೆರ್, ಮುಖಂಡೆರ್, ಕಾರ್ಯಕರ್ತೆರ್ ಬೊಕ್ಕ ಅಭಿಮಾನಿಲೆನೊಟ್ಟಿಗೆ ಮಲ್ಲ ಜನಸಂಖ್ಯೆದ ಪಾದಯಾತ್ರೆಡ್ ಬತ್ತ್ ದ್ ಮಿನಿ ವಿಧಾನಸೌಧದ ಚುನಾವಣಾಧಿಕಾರಿ ಕಚೇರಿಡ್ ನಾಮಪತ್ರ ಸಂದಾಯೆರ್.

ನೇರ್ದ್ ದುಂಬು ಪೇಂಟೆದ ಕಾವೂರು ಜಂಕ್ಷನ್ ಡ್ ಪಕ್ಷದ ಸಾರ್ವಜನಿಕ ಸಭೆ ನಡತ್ಂಡ್. ಬೊಕ್ಕ ಪಕ್ಷದ ಅಭ್ಯರ್ಥಿ ಇನಾಯತ್ ಆಲಿ ಮೇರ್ ಸಾರ್ವಜನಿಕ ಸಭೆನ್ ಉದ್ದೇಶಿಸಾದ್ ಪಾತೆರಿಯೆರ್.

ಭಾರಿ ಸಂಖ್ಯೆಡ್ ಪಕ್ಷದ ಕಾರ್ಯಕರ್ತೆರ್ ಬೊಕ್ಕ ಅಭಿಮಾನಿಲು ಇತ್ತೆರ್. ಮಾಜಿ ಶಾಸಕೆರ್ ಮೊಯ್ದೀನ್ ಬಾವಾ ಬೊಕ್ಕ ಆಲಿ ಮೆರೆನ ನಡುಟ್ಟ್ ಟಿಕೆಟ್ ಗಾದ್ ಜಿದ್ದಾಜಿದ್ದಿ ನಡತ್ ಇತ್ಂಡ್. ಆಂಡ ಅಕೇರಿಗ್ ಟಿಕೆಟ್ ಇನಾಯತ್ ಆಲಿ ಮೆರೆಗೇ ತಿಕ್ ದ್ಂಡ್.

ಜಾತ್ಯತೀತ ಮನೋಭಾವದ ಇನಾಯತ್ ಅಲಿ ಮೇರ್ ಕಾಂಗ್ರೆಸ್ ಪಕ್ಷದ ಶಿಸ್ತ್ ದ ಸಿಪಾಯಿ. ಕಲ್ಪಾರ್ಥಿ ದಿಸೆರ್ದೆ ಕಾಂಗ್ರೆಸ್ ಪಕ್ಷಡ್ ಎಪಲ ಗುರುತಿಸಾಯಿನ ಕಾಂಗ್ರೆಸ್ ಕಲ್ಪಾರ್ಥಿ ಘಟಕ ಆಯಿನ ಎನ್ ಎಸ್ ಯುಐ ಮುಖೇನ ಸುಮಾರ್ ಕಲ್ಪಾರ್ಥಿ ಪೊರ್ಂಬಾಟಡ್ ದುಂಬು ಇತ್ತೆರ್. ಬೊಕ್ಕ ಮೇರ್ ಕೈತಲ್ ದ ಮಟ್ಟರ್ದ್ ರಾಷ್ಟ್ರಮಟ್ಟಡ್ ಕಾಂಗ್ರೆಸ್ ಪಕ್ಷಕ್ಕಾದ್ ಸೇವೆ ಮಲ್ದೆರ್.

ಮೇರ್ ಸುರುತ್ತ ಸರ್ತಿ 1997 ಟ್ಟ್ ಎನ್ ಎಸ್ ಯುಐ ಬ್ಲಾಕ್ ಅಧ್ಯಕ್ಷೆರಾದ್ ಆಯ್ಕೆ ಆಯೆರ್. ಬೊಕ್ಕ 2000ನೇ ಇಸವಿಡ್ ಎನ್ ಎಸ್ ಯುಐ ರಾಜ್ಯ ಉಪಾಧ್ಯಕ್ಷೆರಾದ್, 2003 ಟ್ಟ್ ರಾಷ್ಟ್ರೀಯ ಕಾರ್ಯದರ್ಶಿಯಾದ್, 2005 ಟ್ಟ್ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿಯಾದ್, 2009 ಟ್ಟ್ ಕರ್ನಾಟಕ ಪ್ರದೇಶ ಯುವ ಕಾಂಗ್ರೆಸ್ ಸಮಿತಿದ ಪ್ರಧಾನ ಕಾರ್ಯದರ್ಶಿಯಾದ್, ಇತ್ತೆ ಕರ್ನಾಟಕ ಪ್ರದೇಶ ಕಾಂಗ್ರೆಸ್ ಸಮಿತಿದ ಪ್ರಧಾನ ಕಾರ್ಯದರ್ಶಿಯಾದ್ ಮಾತ್ರ ಅತ್ತಂದೆ ಎನ್ ಎಸ್ ಯುಐ ರಾಜ್ಯ ಉಸ್ತುವಾರಿಯಾದ್ ಸೇವೆ ಮಲ್ತೊಂದು ಉಲ್ಲೆರ್.

ಬೇಲೆಡ್ ಮೇರ್ ಒರಿ ಯಶಸ್ವಿ ಉದ್ಯಮಿ. ಮೇರ್ ದುಂಬುರ್ದೆ ಪ್ರತಿಫಲಾಪೇಕ್ಷೆ ಬಯಸಂದೆ ಸಮಾಜ ಸೇವೆ ಚಟುವಟಿಕೆಡ್ ಎಪಲ ಇತ್ತಿನಾರ್. ತನ್ನ ಸಾಮಾಜಿಕ ‌ಸೇವೆ ಕಾರ್ಯಲಯಗಾದ್ ನೋಂದಾಣಿದ ಐಎಎಮ್ ಫೌಂಡೇಶನ್ ಸಂಸ್ಥೆನ್ ಸ್ಥಾಪನೆ ಮಲ್ತ್ ದ್ ಈ ಸಂಸ್ಥೆದ ಮುಖೇನ ಕರಿನ ಸುಮಾರ್ ವರ್ಷೊದಿಂಚ ಬಡಪತ್ತ್ ಜನಕ್ಕ್ ಶೈಕ್ಷಣಿಕ, ಆರೋಗ್ಯ, ವಸತಿ ಬೊಕ್ಕ ಅಕ್ಲೆನ ಅಗತ್ಯಲೆಗ್ ಸ್ಪಂದಿಸಾದೆರ್. ಅತ್ತಂದೆ ಅವೆತೊ ಬಡಪತ್ತ್ ಕುಟುಂಬದ ಪೊಣ್ಣು ಜೋಕುಲೆನ ಮದಿಮೆಗ್ ಜಾತಿ-ಮತ ತೂವಂದೆ ಸಕಾಯ ಮಲ್ದೆರ್. ತನ್ನ ಸೇವೆದ ಚಟುವಟಿಕೆದ ಮುಖೇನ ಪುದರಾಯಿನ ಮೇರ್ ಈ ಸರ್ತಿ ಕುಡ್ಲ ಉತ್ತರ ವಿಧಾನಸಭೆ ಕ್ಷೇತ್ರಡ್ ವಿರೋಧ ಪಕ್ಷಲೆಗ್ ಪ್ರಬಲ ಪ್ರತಿಸ್ಪರ್ಧಿ ಅವೆರೆ ಉಲ್ಲೆರ್ ಪಂದ್ ರಾಜಕೀಯ ತಜ್ಞೆರೆನ ಅಭಿಪ್ರಾಯ ಆತ್ಂಡ್.

ಎ.24-ಮೇ 3: ಬಳ್ಳಮಂಜ ಮಹತೋಭಾರ ಶ್ರೀ ಅನಂತೇಶ್ವರ ಸ್ವಾಮಿ ದೇವಲ್ಯಡ್ ಬ್ರಹ್ಮಕಲಶ ವಾರ್ಷಿಕ ದಿನಾಚರಣೆ, ವಾರ್ಷಿಕ ಮೇಷ ಜಾತ್ರೆ ಉಚ್ಚಯ

ಬೊಲ್ತೇರ್: ಬಳ್ಳಮಂಜ ಮಹತೋಭಾರ ಶ್ರೀ ಅನಂತೇಶ್ವರ ಸ್ವಾಮಿ ದೇವಲ್ಯಡ್ ಬ್ರಹ್ಮಕಲಶ ವಾರ್ಷಿಕ ದಿನಾಚರಣೆ ಬೊಕ್ಕ ವಾರ್ಷಿಕ ಮೇಷ ಜಾತ್ರೆ ಉಚ್ಚಯ ಎ.24 ರ್ದ್ ಮೇ 3 ಮುಟ್ಟ ನಡಪರೆ ಉಂಡು.

ಎ.24 ಸೋಮಾರ ಬೊಲ್ಪುಗು ಬೊಂಡಲ ಅಭಿಷೇಕ, ಮಹಾಪೂಜೆ ರಾತ್ರೆ ಕೊಡಿ ಏರಿಯೆರೆ, ಮಹಾಪೂಜೆ, ಉಚ್ಚಯ, ವಸಂತ ಸೇವೆ ನಡಪರೆ ಉಂಡು. ಎ.25 ಅಂಗಾರೆ ಮಧ್ಯಾಹ್ನ ಮಹಾಪೂಜೆ, ರಾತ್ರೆ ಉಚ್ಚಯ ನಡಪರೆ ಉಂಡು. ಎ.26 ಬುಧಾರ ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ಶ್ರೀ ದೇವಲ್ಯರ್ದ್ ಭಂಡಾರ ಪಿದಾಡ್ ದ್ ಪಿಲಿಚಾಮುಂಡಿ ದೈವೊದ ನೇಮ, ಮಹಾಪೂಜೆ, ಉಚ್ಚಯ ನಡಪರೆ ಉಂಡು. ಎ.27 ಗುರುವಾರ ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ಕೊಪ್ಪರಿಗೆ ಏರಿಯೆರೆ, ಬಯ್ಯದ ಬಲಿ ಸುರು, ವಸಂತ ಸೇವೆ, ಮಹಾಪೂಜೆ ನಡಪರೆ ಉಂಡು. ಎ.28 ಸುಕ್ರಾರ ಮಧ್ಯಾಹ್ನ ಮಹಾಪೂಜೆ, ರಾತ್ರೆ ಆಯನ ಉಚ್ಚಯ ನಡಪರೆ ಉಂಡು.

ಎ.29 ಸನಿಯಾರ ಮಹಾಪೂಜೆ, ಬಯ್ಯಗ್ ಉಚ್ಚಯ, ಮೂಡುಕಟ್ಟೆ ಸವಾರಿ, ವಸಂತ ಸೇವೆ, ಮಹಾಪೂಜೆ ನಡಪರೆ ಉಂಡು. ಎ.30 ಐತಾರ ಬೊಲ್ಪುಗು ಬ್ರಹ್ಮಕಲಶ ದಿನಾಚರಣೆದ ಲೆಕ್ಕೊಡು ಗಣಯಾಗ, ಏಕದಶಾರುದ್ರಾಭಿಷೇಕ, ಪವಮಾನಹೋಮ, ಆಶ್ಲೇಷ ಬಲಿ, ಶ್ರೀ ಅನಂತೇಶ್ವರ ಸ್ವಾಮಿಗ್ ಇಸೇಸ ಕಲಶಾಭಿಷೇಕ, ಶ್ರೀ ಗಣಪತಿ ದೇವೆರೆಗ್ ಕಟಾಹ ಅಪೂಪ ನೈವೇದ್ಯ ಸಮರ್ಪಣೆ, ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ಚಂದ್ರಮಂಡಲ ಉಚ್ಚಯ, ಮಹಾಪೂಜೆ ನಡಪರೆ ಉಂಡು.

ಮೇ 1 ಸೋಮಾರ ಬೊಲ್ಪುಗು ದರ್ಶನ ಬಲಿ, ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ಮಲ್ಲ ತೇರ್ ಉಚ್ಚಯ, ಮಹಾಪೂಜೆ, ಶ್ರೀಧೂತ ಬಲಿ ನಡಪರೆ ಉಂಡು. ಮೇ 2 ಅಂಗಾರೆ ಬೊಲ್ಪುಗು ಕವಾಟ ಉದಿಪನ, ವಸಂತ ಸೇವೆ, ಮಧ್ಯಾಹ್ನ ಮಹಾಪೂಜೆ ಬಯ್ಯಗ್ ಅವಭೃತ, ರಾತ್ರೆ ಕೊಡಿ ಜವೆರೆ ಉಂಡು. ಮೇ 3 ಬುಧಾರ ಮಹಾಸಂಪ್ರೋಕ್ಷಣೆ, ಮಧ್ಯಾಹ್ನ ಮಹಾಪೂಜೆ, ಅನ್ನಸಂತರ್ಪಣೆ ನಡಪರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಗಂಧ ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಅನುವಂಶೀಯ ಆಡಳಿತ ಮೊಕ್ತೇಸರೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಪಟ್ಲ ಫೌಂಡೇಶನ್ ಟ್ರಸ್ಟ್ ಅಭಿವೃದ್ದಿದ ಪಥಡ್ ಸಾಗಡ್: ಉಳಿ ಯೋಗೇಂದ್ರ ಭಟ್

ಪಟ್ಲ ಸಂಭ್ರಮದ ಲೆಪ್ಪೋಲೆ ಬುಡುಗಡೆ

ಕುಡ್ಲ: ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ಅಭಿವೃದ್ದಿದ ಪಥಡ್ ಸಾಗಡ್. ಮೇ 28 ಕ್ಕ್ ಅಡ್ಯಾರ್ ಗಾರ್ಡನ್ ಡ್ ನಡಪರೆ ಇಪ್ಪುನ ಪಟ್ಲ ಸಂಭ್ರಮ ಗೌಜಿಡ್ ನಡಪಡ್, ಸಂಘಟನೆಡ್ ವೈವಿಧ್ಯತೆ ಉಂಡು ಪಂದ್ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಯುಎಸ್ ಎ ಘಟಕದ ಸಂಚಾಲಕೆರ್ ಉಳಿ ಯೋಗೀಂದ್ರ ಭಟ್ ತೆರಿಪಾಯೆರ್.

ಮೇರ್ ಬಲ್ಲಾಲ್ ಬಾಗ್ ಕೈತಲ್ ದ ಪತ್ತುಮುಡಿಟ್ಟ್ ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಮುತಾಲಿಕೆಡ್ ನಡಪುನ ಪಟ್ಲ ಸಂಭ್ರಮದ ಲೆಪ್ಪೋಲೆನ್ ಬುಡುಗಡೆ ಮಲ್ತ್ ದ್ ಪಾತೆರಿಯೆರ್.

ಅಯಿರ್ದ್ ಬೊಕ್ಕ ಆಟದ ಕಲಾವಿದೆರ್ ಉಜಿರೆ ಅಶೋಕ್ ಭಟ್ ಪಾತೆರ್ದ್, ಪಟ್ಲ ಸಂಭ್ರಮ ವೈವಿದ್ಯತೆ ಇಪ್ಪುನ ಲೇಸ್, ವೈಭವದ ಮುಖೇನ ಪ್ರಕಾಶಮಾನವಾದ್ ನಡಪಡ್ ಪಂದ್ ಪಂಡೆರ್. ಭಾಗವತ ಪಟ್ಲ ಸತೀಶ್ ಮೆರೆರ್ದ್ ಯಕ್ಷಗಾನ ಕ್ಷೇತ್ರದ ವ್ಯಾಪ್ತಿ ವಿಸ್ತಾರ ಆತ್ಂಡ್. ಪಟ್ಲೆರ್ ಆಟಗ್ ಪೊಸ ರೂಪ ಕೊರ್ತೆರ್. ಪೊಸ ಜನಾಂಗನ್ ಸೃಷ್ಟಿ ಮಲ್ದೆರ್ ಪಂದ್ ತೆರಿಪಾಯೆರ್.

ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಸ್ಥಾಪಕಾಧ್ಯಕ್ಷೆರ್ ಪಟ್ಲ ಸತೀಶ್ ಶೆಟ್ಟಿ ಪ್ರಾಸ್ತಾವಿಕವಾದ್ ಪಾತೆರಿಯೆರ್. ಸಂಘಟನಾ ಕಾರ್ಯದರ್ಶಿ ಕದ್ರಿ ನವನೀತ ಶೆಟ್ಟಿ ಪಟ್ಲ ಸಂಭ್ರಮದ ರೂಪು ರೇಶೆನ್ ತೆರಿಪಾಯೆರ್.

ಈ ಪೊರ್ತುಡು ಭುಜಬಲಿ ಧರ್ಮಸ್ಥಳ, ಡಾ.ಪ್ರಭಾಕರ ಜೋಷಿ, ಪ್ರಧಾನ ಕಾರ್ಯದರ್ಶಿ ಪುರುಷೋತ್ತಮ ಭಂಡಾರಿ ಅಡ್ಯಾರ್, ಕೋಶಾಧಿಕಾರಿ ಸುದೇಶ್ ಕುಮಾರ್ ರೈ, ಉಪಾಧ್ಯಕ್ಷೆರ್ ಮನು ರಾವ್, ಜತೆ ಕಾರ್ಯದರ್ಶಿ ರವಿಚಂದ್ರ ಶೆಟ್ಟಿ, ಸಂಘಟನಾ ಕಾರ್ಯದರ್ಶಿ ಜಗನ್ನಾಥ ಶೆಟ್ಟಿ ಬಾಳ, ಪ್ರದೀಪ್ ಆಳ್ವ ಕದ್ರಿ, ಮಹಿಳಾ ಘಟಕದ ಪದಾಧಿಕಾರಿ ಆರತಿ ಆಳ್ವ, ಪೂರ್ಣಿಮಾ ಯತೀಶ್ ರೈ, ಬೇತೆ ಬೇತೆ ಘಟಕದ ಅಧ್ಯಕ್ಷೆರ್ ಬೊಕ್ಕ ಪದಾಧಿಕಾರಿಲು ಇತ್ತೆರ್.

ಈ ಲೇಸ್ ಡ್ ಕಟೀಲ್ ಮೇಳದ ಕಲಾವಿದೆರ್ ಮವ್ವಾರು ಬಾಲಕೃಷ್ಣ ಮಣಿಯಾಣಿ ಬೊಕ್ಕ ಬಪ್ಪನಾಡ್ ಮೇಳದ ಕಲಾವಿದೆರ್ ಪಡುಮಲೆ ನಾಗಪ್ಪ ಮೆರೆಗ್ ಇಲ್ಲ್ ಕಟ್ಟೆರೆ ಪನವುದ ಸಕಾಯ ಮಲ್ತೆರ್.

ಪುರುಷೋತ್ತಮ‌ ಭಂಡಾರಿ ಎದ್ಕೊಂದು, ಲೇಸ್ ಸುಧಾರಿಕೆ ಮಲ್ತೆರ್. ರವಿಚಂದ್ರ ಶೆಟ್ಟಿ ಸೊಲ್ಮೆ ಸಂದಾಯೆರ್.

ನಾಮಪತ್ರ ಸಂದಾಯೆರ್ ಪುತ್ತೂರ್ ಕಾಂಗ್ರೆಸ್ ಅಭ್ಯರ್ಥಿ ಅಶೋಕ್ ಕುಮಾರ್ ರೈ

ಪುತ್ತೂರ್: ವಿಧಾನಸಭೆ ಕ್ಷೇತ್ರದ ವೋಟುಗು ಪುತ್ತೂರ್ ಕಾಂಗ್ರೆಸ್ ಅಭ್ಯರ್ಥಿ ಅಶೋಕ್ ಕುಮಾರ್ ರೈ ಕೋಡಿಂಬಾಡಿ ಮೇರ್ ಬುಧಾರ ಸಾರರ್ದ್ ಎಚ್ಚ ಕಾರ್ಯಕರ್ತೆರ್, ಬೆಂಬಲಿಗೆರ್, ಹಿತೈಷಿಲೆನೊಟ್ಟಿಗೆ ಮಲ್ಲ ಮೆರವಣಿಗೆದ ಮುಖೇನ ಬತ್ತ್ ದ್ ಮಿನಿವಿಧಾನಸೌಧಡ್ ನಾಮಪತ್ರ ಸಂದಾಯೆರ್.

ಕೋಡಿಂಬಾಡಿ ಶ್ರೀ ಮಹಿಷಮರ್ಧಿನಿ, ಪುತ್ತೂರ್ ಮಹಾಲಿಂಗೇಶ್ವರ ದೇವಲ್ಯಡ್ ಪ್ರಾರ್ತನೆ ಸಂದಾದ್, ದರ್ಬೆರ್ದ್ ಮೆರವಣಿಗೆಡ್ ಸಾರರ್ದ್ ಎಚ್ಚ ಕಾಂಗ್ರೆಸ್ ಕಾರ್ಯಕರ್ತೆರ್ ಪಕ್ಷದ ಧ್ವಜ ಪತ್ತೊಂದು ಜಯಘೋಷ ಪಾಡೊಂದು ಕಿಲ್ಲೆ ಮೈದಾನಗ್ ಬತ್ತೆರ್.‌ ಮೊಕ್ಲೆನೊಟ್ಟಿಗೆ ಕಲಾ ಪ್ರಕಾರ ಕೂಟಲು, ಚೆಂಡೆ ಬಳಗ, ನಾಸಿಕ್ ಬ್ಯಾಂಡ್ ಇತ್ಂಡ್.

ಬೊಕ್ಕ ಅಭ್ಯರ್ಥಿ ಅಶೋಕ್ ಕುಮಾರ್ ರೈ ಪಾತೆರ್ದ್, ಕರಿನ ಐನ್ ವರ್ಷದ ಬಿಜೆಪಿ ಆಡಳಿತಡ್ ಅಕ್ರಮ-ಸಕ್ರಮ, 94ಸಿ ಡ್ ಬಡವೆರೆನ್ ಲೂಟಿ ಮಲ್ದ್ಂಡ್. ಶಾಸಕೆಯಾದ್ ಆಯ್ಕೆ ಆಯಿನ ಬೊಕ್ಕ ಭ್ರಷ್ಟಾಚಾರ ಮುಕ್ತ ಆಡಳಿತ ಕೊರ್ದು, ಸರ್ವ ಸಮಾಜದ ಹಿತಕ್ಕಾದ್ ಬೆನ್ಪೆ ಪಂದ್ ಪಂಡೆರ್.

ಈ ಪೊರ್ತುಡು ವಿಧಾನಪರಿಷತ್ ಸದಸ್ಯೆರ್ ಮಂಜುನಾಥ ಭಂಡಾರಿ, ಕಾಂಗ್ರೆಸ್ ವಕ್ತಾರೆ ಭವ್ಯ ನರಸಿಂಹಮೂರ್ತಿ, ದ.ಕ.ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷೆರ್ ಹರೀಶ್ ಕುಮಾರ್, ಮಾಜಿ ಶಾಸಕಿ ಶಕುಂತಲಾ ಟಿ ಶೆಟ್ಟಿ, ಜಿಲ್ಲಾ ಉಸ್ತುವಾರಿ ಶಿಭಾ ರಾಮಚಂದ್ರನ್, ಜಿಲ್ಲಾ ಮಹಿಳಾ ಕಾಂಗ್ರೆಸ್ ಅಧ್ಯಕ್ಷೆರ್ ಶಾಲೆಟ್ ಪಿಂಟೊ ಇತ್ತೆರ್.

ಸಾರರ್ದ್ ಎಚ್ಚ ಕಾರ್ಯಕರ್ತೆರೆನೊಟ್ಟಿಗೆ ನಾಮಪತ್ರ ಸಂದಾಯಿನ ಪುತ್ತೂರ್ ಬಿಜೆಪಿ ಅಭ್ಯರ್ಥಿ ಆಶಾ ತಿಮ್ಮಪ್ಪ ಗೌಡ

ಪುತ್ತೂರ್: ವಿಧಾನಸಭೆ ಕ್ಷೇತ್ರದ ವೋಟುಗು ಕೋಡೆ ಬಿಜೆಪಿ ಅಭ್ಯರ್ಥಿ ಆಶಾ ತಿಮ್ಮಪ್ಪ ಗೌಡ ಮೇರ್ ಸಾರರ್ದ್ ಎಚ್ಚ ಕಾರ್ಯಕರ್ತೆರೆನೊಟ್ಟಿಗೆ ಮೆರವಣಿಗೆಡ್ ಪೋದು ಬಿಜೆಪಿ ರಾಜ್ಯಾಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್ ನೊಟ್ಟಿಗೆ ನಾಮಪತ್ರ ಸಂದಾಯೆರ್.

ಮಹಾಲಿಂಗೇಶ್ವರ ದೇವಲ್ಯರ್ದ್ ಪಿದಾಡಿನ ಮೆರವಣಿಗೆಡ್ ಬಿಜೆಪಿ ಸ್ಟಾರ ಪ್ರಚಾರಕೆರ್ ನಟಿ ಶೃತಿ, ಬಿಜೆಪಿ ಯುವ ಮೋರ್ಚಾ ಅಧ್ಯಕ್ಷೆರ್, ಸಂಸದೆರ್ ತೇಜಸ್ವಿ ಸೂರ್ಯ ಪಾಲ್ ಪಡೆದಿತ್ತೆರ್.

ಪುತ್ತೂರ್ ಜಾತ್ರೆ ಸಂಪನ್ನ

ಪುತ್ತೂರ್ ಮಹತೋಭಾರ ಶ್ರೀ ಮಹಾಲಿಂಗೇಶ್ವರ ದೇವಲ್ಯದ ಜಾತ್ರೆ ಎ.20 ಕ್ಕ್ ಮುಗಿಂಡ್.

ಎ.20 ಕ್ಕ್ ದೇವಲ್ಯಡ್ ರಾತ್ರೆ ಪೂಜೆದ ಬೊಕ್ಕ ದೇವಲ್ಯದ ತಂತ್ರಿಲು ಕುಂಟಾರು ರವೀಶ ಮೇರ್ ಮಂತ್ರಾಕ್ಷತೆನ್ ಭಕ್ತೆರ್ ಗ್ ಕೊರಿಯೆರ್. ಬೊಕ್ಕ ದೇವೆರೆನ ನಿತ್ಯ ಬಲಿ ಉಚ್ಚಯ, ವಸಂತ ಕಟ್ಟೆ ಪೂಜೆ ನಡತ್ಂಡ್.

ಈ ಪೊರ್ತುಡು ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಮುಳಿಯ ಕೇಶವ ಪ್ರಸಾದ್, ಸಮಿತಿ ಸದಸ್ಯೆರ್ ವಿ.ಎಸ್ ಭಟ್, ರವೀಂದ್ರನಾಥ ರೈ ಬಳ್ಳಮಜಲು, ಶೇಖರ್ ನಾರಾವಿ, ರಾಮಚಂದ್ರ ಕಾಮತ್, ಬಿ.ಐತ್ತಪ್ಪ ನಾಯ್ಕ್, ರಾಮ್‌ದಾಸ್ ಗೌಡ, ವೀಣಾ ಬಿ.ಕೆ. ಡಾ. ಸುಧಾ ಎಸ್ ರಾವ್, ದೇವಲ್ಯದ ಕಾರ್ಯನಿರ್ವಹಣಾಧಿಕಾರಿ ನವೀನ್ ಕುಮಾರಿ ಭಂಡಾರಿ ಹೆಚ್, ಕಚೇರಿ ವ್ಯವಸ್ಥಾಪಕೆರ್ ಹರೀಶ್ ಶೆಟ್ಟಿ, ದೇವಲ್ಯದ ವಾಸ್ತು ಇಂಜಿನಿಯರ್ ಪಿ.ಜಿ.ಜಗನ್ನಿವಾಸ ರಾವ್ ಇತ್ತೆರ್.

ಅಂಚೆನೆ ದೇವಲ್ಯದ ಪೂಜೆದ ಸುರುಕ್ಕ್ ಜಾತ್ರೆ ಉಚ್ಚಯಡ್ ಬೇತೆ ಬೇತೆ ಸೇವಾ ಕಾರ್ಯಡ್ ಪಾತ್ರರಾಯಿನ ದೇವಲ್ಯದ ಅರ್ಚಕೆರ್, ಪರಿಚಾರಕ ವರ್ಗಗ್ ಸಂಪ್ರದಾಯದಂಚೆನೆ ಪೊಸ ಡ್ರೆಸ್ ನ್ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಮುಳಿಯ ಕೇಶವಪ್ರಸಾದ್ ಕೊರಿಯೆರ್.

ಮೇ 3-5: ಶಂಭೂರ್ ದಕ್ಷಿಣದ ಶ್ರೀ ಶಿರ್ಡಿ ಸಾಯಿ ಮಂದಿರಡ್ ಬ್ರಹ್ಮಕಲಶ ಉಚ್ಚಯ

ಶಂಭೂರ್ ದಕ್ಷಿಣದ ಶ್ರೀ ಶಿರ್ಡಿ ಸಾಯಿ ಮಂದಿರಡ್ ಉದಿಪನ ಲೇಸ್, ಬ್ರಹ್ಮಕಲಶ ಉಚ್ಚಯ ಬೊಕ್ಕ ಪ್ರತಿಷ್ಠಾ ಉಚ್ಚಯ ಮೇ 3-5 ಮುಟ್ಟ ನಡಪರೆ ಉಂಡು.

ಈ ಲೇಸ್ ಶಿರ್ಡಿ ಸಂಸ್ಥಾನದ ಪಂಡಿತೆರ್ ಉಪೇಂದ್ರ ತುಕಾರಾಮ ಪಾರಕ್ ಮೆರೆನ ಕೈಟ್ಟ್, ಮಂದಿರದ ತಂತ್ರಿಲು, ಪುರೋಹಿತೆರ್ ಕೇಶವ ಶಾಂತಿ ನಾಟಿ ನರಿಕೊಂಬು ಮೆರೆನ ಮುತಾಲಿಕೆಡ್ ವೈದಿಕ, ವಿಧಿ ವಿಧಾನ ಗೌಜಿಡ್ ನಡಪರೆ ಉಂಡು.

ಮೇ 3 ಬುಧಾರ ಮಧ್ಯಾಹ್ನ ಋತ್ವಿಜರ ಬರಿಯೆರೆ, ಬೊಕ್ಕ 3 ಗಂಟೆಗ್ ಶ್ರೀ ರಕ್ತೇಶ್ವರಿ ದೇವಿ ದೇವಲ್ಯರ್ದ್ ಸುರು ಆಪುನ ಪುದೆಕಾಣಿಕೆದೊಟ್ಟಿಗೆ, ಬಾಬಾರ ಪಲ್ಲಕ್ಕಿ, ಪಾದುಕೆ, ಬೊಳ್ಳಿ, ಕಿರೀಟ, ಬೊಳ್ಳಿ ರುದ್ರಾಕ್ಷಿ ಮಾಲೆನ್ ಮೆರವಣಿಗೆದ ಮುಖೇನ ಮಂದಿರಗ್ ಕನಯೆರೆ ಉಂಡು. ಬೊಕ್ಕ ಉಗ್ರಾಣ ಮೂರ್ತ, ಬಯ್ಯಗ್ ಸಾಂಸ್ಕೃತಿಕ ಲೇಸ್, ಸಭಾ ಲೇಸ್, ರಾತ್ರೆ ಖರ್ಚಿಗ್ ಕಾಸ್ ಇಜ್ಜಿ ತುಳು ನಾಟಕ ನಡಪರೆ ಉಂಡು.

ಮೇ 4 ಗುರುವಾರ ಮಧ್ಯಾಹ್ನ ದಾಸ ಸಂಕೀರ್ತನೆ, ಬಯ್ಯಗ್ ಜೋಕುಲೆರ್ದ್ ಸಾಂಸ್ಕೃತಿಕ ಲೇಸ್, ಸಭಾ ಲೇಸ್ ರಾತ್ರೆ ಭಕ್ತಿ ಪ್ರಧಾನ ನಾಟಕ ಶಿವಧೂತ ಗುಳಿಗ ನಡಪರೆ ಉಂಡು.

ಮೇ 5 ಸುಕ್ರಾರ ಮಧ್ಯಾಹ್ನ ಭಜನೆ ಸೇವೆ, ಸ್ಯಾಕ್ಸೋಪೋನ್ ಬೊಕ್ಕ ಕೊಳಲುವಾದನ, ಬಯ್ಯಗ್ ಪಲ್ಲಕ್ಕಿ ಉಚ್ಚಯ ನಡಪರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್, ಸೇವೆ ಸಂದಾದ್, ಪ್ರಸಾದ ದೆತೊಂದು ಶ್ರೀ ಸಾಯಿಬಾಬಾನ ಕೃಪೆಗ್ ಪಾತ್ರರಾವೊಡು ಪಂದ್ ಶಂಭೂರ್ ದಕ್ಷಿಣದ ಶ್ರೀ ಶಿರ್ಡಿ ಸಾಯಿ ಮಂದಿರ, ಕುಡ್ಲ ಶ್ರೀ ಸಾಯಿ ಟ್ರಸ್ಟ್ (ರಿ.) ದ ಅಧ್ಯಕ್ಷೆರ್, ಸಾಯಿ ಭಕ್ತೆರ್ ಬೊಕ್ಕ ಮಂದಿರದ ಜೋಕುಲು ಲೆಪ್ಪೋಲೆಡ್ ತೆರಿಪಾದೆರ್.

ಎಲ್ಲೆರ್ದ್ ಚಾರ್ ಧಾಮ್ ಯಾತ್ರೆ ಸುರು

ಎಲ್ಲೆರ್ದ್ ಚಾರ್ ಧಾಮ್ ಯಾತ್ರೆ ಸುರು ಆಪುಂಡು.

ಗಂಗೋತ್ರಿ ಬೊಕ್ಕ ಯಮುನೋತ್ರಿ ದೇವಲ್ಯ ಸನಿಯಾರ ಓಪನ್ ಆಪುಂಡು. ಕೇದಾರನಾಥ ದೇವಲ್ಯ ಎಪ್ರಿಲ್ 25 ಕ್ಕ್ ಬೊಕ್ಕ ಬದರಿನಾಥ ದೇವಲ್ಯ ಎಪ್ರಿಲ್ 27 ಕ್ಕ್ ಓಪನ್ ಆಪುಂಡು.

ಆಂಡ ಕೋಡೆ ಬತ್ತಿನ ಬರ್ಸಗ್ ಚಾರ್ ಧಾಮ್ ಯಾತ್ರೆಗ್ ತೊಂದರೆ ಆತ್ಂಡ್. ಕುಡೊಂಜಿ ಕಡೆಟ್, ಹಿಮ, ಬರ್ಸ ಬೊಕ್ಕ ಶೀತ ಗಾಳಿರ್ದ್ ಚಮೋಲಿ ಬೊಕ್ಕ ರುದ್ರಪ್ರಯಾಗ ಜಿಲ್ಲೆಡ್ ತಾಪಮಾನ ಕನಿಷ್ಠ ಮಟ್ಟಡ್ ಉಂಡು.

ಸೆಕೆಂಡ್ ಪಿಯುಸಿ ರಿಸಲ್ಟ್ ಪ್ರಕಟ: ದಕ್ಷಿಣ ಕನ್ನಡ ಜಿಲ್ಲೆ ಫಸ್ಟ್

ಬೆಂಗ್ಲೂರ್: 2022-23ನೇ ಶೈಕ್ಷಣಿಕ ಸಾಲ್ ದ ಸೆಕೆಂಡ್ ಪಿಯುಸಿ ರಿಸಲ್ಟ್ ಪ್ರಕಟ ಆಂಡ್.

ಪಿಯು ಮಂಡಳಿ ನಿರ್ದೇಶಕೆರ್ ಸುದ್ದಿಗೋಷ್ಠಿ ನಡಪಾದ್ ರಿಸಲ್ಟ್ ಪ್ರಕಟ ಮಲ್ದೆರ್.

ಈ ರಿಸಲ್ಟ್ ನ್ https://karresults.nic.in ವೆಬ್‌ಸೈಟ್‌ಡ್ ಕಲ್ಪಾರ್ಥಿಲು ಹಾಲ್‌ ಟಿಕೆಟ್‌ ನಂಬರ್ ಬೊಕ್ಕ ಪುಟ್ಟುನ ತಾರೀಕ್ ಪಾಡ್ದ್ ತೂವೊಲಿ.

ಈ ರಿಸಲ್ಟ್ ಡ್ ಕಲಾ ವಿಭಾಗಡ್ ಶೇ.61.22, ವಾಣಿಜ್ಯ ವಿಭಾಗಡ್ ಶೇ.75.89, ವಿಜ್ಞಾನ ವಿಭಾಗಡ್ ಶೇ.85.71 ಬೈದ್ಂಡ್.

ದಕ್ಷಿಣ ಕನ್ನಡ ಜಿಲ್ಲೆ ಸುರುತ್ತ ತಾನ ಪಡೆತ್ಂಡ್. ಒಡಿಪು ರಡ್ಡನೇ, ಕೊಡಗು ಮೂಜಿನೇ ಬೊಕ್ಕ ಉತ್ತರ ಕನ್ನಡ ನಾಲ್ ನೇ ತಾನ ಪಡೆತ್ಂಡ್. ಯಾದಗಿರಿ ಜಿಲ್ಲೆ ಅಕೇರಿದ ತಾನಡ್ ಉಂಡು.

ಮಾ.9 ರ್ದ್ 29 ಮುಟ್ಟ ರಾಜ್ಯದ 1,109 ಕೇಂದ್ರಲೆಡ್ ಪರೀಕ್ಷೆ ನಡತ್ ದ್ಂಡ್. ಒಟ್ಟು 7,27,387 ಕಲ್ಪಾರ್ಥಿಲು ಪುದರ್ ನೊಂದಣಿ ಮಲ್ದೆರ್. 725,821 ಕಲ್ಪಾರ್ಥಿಲು ಆಯಿಟ್ಟ್ ಅರ್ಹರಾತೆರ್. 23,724 ಕಲ್ಪಾರ್ಥಿಲು ಪರೀಕ್ಷೆಗ್ ಗೈರುಹಾಜರಾತೆರ್. 702,067 ಕಲ್ಪಾರ್ಥಿಲು ಪರೀಕ್ಷೆ ಬರೆತೆರ್. 524,209 ಕಲ್ಪಾರ್ಥಿಲು ಪರೀಕ್ಷೆಡ್ ಉತ್ತೀರ್ಣರಾತೆರ್.