November 2022

ಬೆರಿಕ್ಕ್ ಲ್ಯಾಪ್ ಟಾಪ್ ಬ್ಯಾಗ್ ಪಾಡೊಂದು “ಭೀಷ್ಮ”ನೊಟ್ಟಿಗೆ ಬೆಂಗ್ಲೂರ್ ರ್ದ್ ಧರ್ಮಸ್ಥಳ ಮುಟ್ಟ ಪಾದಯಾತ್ರೆ ಮಲ್ತಿನ ಶ್ರೇಯಂಶ ಡಿ. ಜೈನ್

ಕುಡುಮಪುರತ್ತ ಮಂಜುನಾಥ ಸ್ವಾಮಿಗ್ “ನಂದಿ” ಕಾಣಿಕೆ ಕೊರಿನ ಟೆಕ್ಕಿ

ಬೆಂಗ್ಲೂರ್ ದ ಪುಗರ್ತೆದ ಕಂಪೆನಿಡ್ ಬೇಲೆ ಮಲ್ತೊಂದು ಇಪ್ಪುನ ಶ್ರೇಯಂಶ ಡಿ. ಜೈನ್ ಮೇರ್ ತಾನ್ ಸಾಂಕ್ ದಿನ ಗೀರ್ ತಳಿತ್ತ ಕಂಜಿ ” ಭೀಷ್ಮ” ನ್ ಪತೊಂದು ಬೆಂಗಳೂರ್ದು ಧರ್ಮಸ್ಥಳ ಮುಟ್ಟ ಪಾದಯಾತ್ರೆ ಮಲ್ತ್ ದ್ ಬೈದೆರ್.

ಹೊರನಾಡ್ ದ ಧರ್ಮಪಾಲ್ ಬೊಕ್ಕ ಯಶಸ್ವತಿ ಮೆರೆನ ಮಗೆ ಮೇರ್. ಇತ್ತೆ ಮೊಕ್ಲೆನ ಇಲ್ಲ್ ಧರ್ಮಸ್ಥಳಡ್ ಉಂಡು. ಶ್ರೀ ಮಂಜುನಾಥ ಸ್ವಾಮಿನ ಭಕ್ತೆರಾಯಿನ ಈ ಜವನೆ ಬೆಂಗ್ಲೂರುಡು ಲಾಕ್ ಡೌನ್ ಪೊರ್ತುಡು ವರ್ಕ್ ಫ್ರಮ್ ಹೋಮ್ ಬೇಲೆ ಮಲ್ತೊಂದು ಇತ್ತೆರ್. ಅಪಗ ಗೀರ್ ತಳಿತ್ತ ಪೆತ್ತ ಒಂಜೆನ್ ದೆತೊಂದು ತಾಂಕೆರೆ ಸುರು ಮಲ್ತೆರ್.

ಮೆರೆಗ್ ಎಲ್ಯೆರ್ದೆ ಕೈಕಂಜಿ ಪಂಡ ಮಸ್ತ್ ಪ್ರೀತಿ. ಬೆಂಗ್ಲೂರ್ ಡ್ ಬಾಡಿಗೆ ಇಲ್ಲಲ್ ಇತ್ತ್ ದ್, ಪೆತ್ತ ತಾಂಕುನ ಕಷ್ಟದ ಬೇಲೆ. ಅಂಚಿನ ಪೊರ್ತುಡು ಮೆರೆಗ್ ಸಪೋರ್ಟ್ ಮಲ್ತಿನಿ ಮೆರೆನ ಬೊಡೆದಿ ರಶ್ಮಿ ಶ್ರೇಯಂಶ.

ಆ ಪೆತ್ತಗ್ ಪಾರ್ವತಿ ಪಂದ್ ಪುದರ್ ದೀಯೆರ್. ಆ ಪೆತ್ತದ ಮಗೆನೇ ಭೀಷ್ಮೆ. ಸುರುತ ಕಂಜಿ ಆಯಿನ 2 ವರ್ಷದ ಭೀಷ್ಮನ್ ಧರ್ಮಸ್ಥಳದ ಗೋ ಶಾಲೆಗ್ ಬುಡುಪುನೆ ಪಂದ್ ಪರಕೆ ಪಂಡ್ ದಿತ್ತೆರ್. ಪರಕೆ ತೀರ್ಸಾರೆ ಭೀಷ್ಮ ನ್ ಧರ್ಮಸ್ಥಳಗ್ ಲೆತ್ತೊಂದು ಬರಿಯೆರೆ ದಿನ ನಿಗಂಟ್ ಮಲ್ತ್ ದ್ ಇಂಚೊಗು ಧರ್ಮಸ್ಥಳಗ್ ಯಾತ್ರೆ ಸುರು ಮಲ್ದೆರ್. ಭೀಷ್ಮ ನ ಒಟ್ಟಿಗೆ ಪಾದಯಾತ್ರೆದೊಟ್ಟಿಗೆ ಪಿದಡಿನ ಮೇರ್ ಭೀಷ್ಮ ನ ಒಟ್ಟಿಗೆ ಅಪ್ಪೆ ಬಾಲೆದ ರೀತಿಡ್ ಬೆರಿಕ್ಕ್ ಎಣ್ಣೆ ಪೂಜಿದ್ ಜೆಪುಡಾದ್ ಒಲ್ಪಲ ಚೂರುಲ ಭೀಷ್ಮಗ್ ಬೇನೆ ಅವಂದಿನಂಚ ತೂದು ಆಯೆ ಜೆತ್ತಿ ಬೊಕ್ಕ ಕಂಪೆನಿದ ಬೇಲೆ ಮಲ್ತೊಂದು ಸುಮಾರ್ 33 ದಿನತ ಪ್ರಯಾಣದೊಟ್ಟಿಗೆ ಧರ್ಮಸ್ಥಳಗ್ ಬತ್ತ್ ದ್ ಪರಕೆ ಸಂದಾಯೆರ್.

ಮೆರೆನ ಪ್ರಯಾಣ ಬೊಲ್ಪುಗು 4 ಗಂಟೆಗ್ ಸುರು ಮಲ್ತ್ಂಡ 9 ಗಂಟೆಗ್ ವಿಶ್ರಾಂತಿ ದೆತೊನುವೆರ್. ಭೀಷ್ಮೆ ಜೆತ್ತಿ ಬೊಕ್ಕ ಮೆರೆನ ಕಂಪೆನಿದ ಬೇಲೆ ಮಲ್ತೊಂದು ಇತ್ತೆರ್. ಬೆರಿಕ್ ಒಂಜಿ ಲ್ಯಾಪ್ ಟಾಪ್ ಬ್ಯಾಗ್ ಪಾಡೊಂದು, ಗತ್ತ್ ಗಾಂಭೀರ್ಯರ್ದ್ ನಡಪುನ ಭೀಷ್ಮನೊಟ್ಟಿಗೆ ಮೆರೆನ ಪ್ರಯಾಣ. ಏರೆಗ್ಲಾ ತೆರಿಪಾವಂದೆ ಎರೆಗ್ಲಾ ಪ್ರಚಾರ ಮಲ್ಪದೆ ಭಕ್ತಿರ್ದ್ ಪಾದಯಾತ್ರೆ ಮೇರ್ ಮಲ್ದೆರ್.

ಕಡಬ: ಡ್ರೈವರ್ ನ ಅಕಲ್ ತತ್ತ್ ದ್ ಕರೆಂಟ್ ಕಂಬೊಗು ಗುದ್ದಿನ ಕಾರ್

ಕಡಬ: ಕಾರೊಂಜಿ ಡ್ರೈವರ್ ನ ಅಕಲ್ ತತ್ತ್ ದ್ ಕರೆಂಟ್ ಕಂಬೊಗು ಗುದ್ದ್ ದ್, ಐನ್ ಜನಕ್ ಮಸ್ತ್ ಪೆಟ್ಟಾಯಿನ ಘಟನೆ ದಕ್ಷಿಣ ಕನ್ನಡ ಜಿಲ್ಲೆದ ಕಡಬ ತಾಲೂಕ್ ದ ಧರ್ಮಸ್ಥಳ– ಸುಬ್ರಹ್ಮಣ್ಯ ರಾಜ್ಯ ಮಾರ್ಗದ ಮರ್ಧಾಳಡ್ ಇಪ್ಪುನ ಕಲ್ಲಾಜೆಡ್ ನಡತ್ಂಡ್.

ಈ ಘಟನೆಡ್ ಪೆಟ್ಟಾಯಿನಕ್ಲೆಗ್ ಕಡಬ ಸಮುದಾಯ ಆರೋಗ್ಯ ಕೇಂದ್ರಡ್ ಪ್ರಾಥಮಿಕ ಚಿಕಿತ್ಸೆ ಕೊರ್ದು, ಹೆಚ್ಚದ ಚಿಕಿತ್ಸೆಗಾದ್ ಪುತ್ತೂರ್ ದ ಖಾಸಗಿ ಆಸ್ಪತ್ರೆಗ್ ದಾಖಲ್ ಮಲ್ಪೆರೆ ಆತ್ಂಡ್ ಪಂದ್ ಮಾಹಿತಿ ತೆರಿದ್ ಬೈದ್ಂಡ್.

ರಾಷ್ಟ್ರಮಟ್ಟ್ ದ ಕರಾಟೆಡ್ ರಡ್ಡ್ ವಿಭಾಗೊಡ್ಲ ಬಂಗಾರ್ ದ ಪದಕ ಗೆಂದಿನ ರಿಯಾ.ಜಿ ಶೆಟ್ಟಿ

ಹಾವಂಜೆ ಗ್ರಾಮದ ಛಾಯಾಗ್ರಾಹಕೆರ್ ಕೀಳಂಜೆ ಗಣೇಶ್ ಶೆಟ್ಟಿ ಬೊಕ್ಕ ಜಯಲಕ್ಷ್ಮೀ ಶೆಟ್ಟಿ ದಂಪತಿಲೆನ ಮಗಲ್ ರಿಯಾ ಜಿ ಶೆಟ್ಟಿ ಮೇರ್ ರಾಷ್ಟ್ರಮಟ್ಟದ ಕರಾಟೆದ ರಡ್ಡ್ ವಿಭಾಗೊಡ್ಲ ಬಂಗಾರ್ ದ ಪದಕ ಗೆಂದ್ ದೆರ್.

ಮೇರ್ ನ.5 ಬೊಕ್ಕ 6 ಕ್ಕ್ ಇನ್ಸ್ ಟಿಟ್ಯೂಟ್ ಅಫ್ ಕರಾಟೆ ಎಂಡ್ ಆಟ್ಸ್೯ ಕೊಡವೂರು ನೆತ್ತ ಮುತಾಲಿಕೆಡ್ ಒಡಿಪುದ ಅಮ್ರತ್ ಗಾರ್ಡನ್ ದ ಸಭಾಂಗಣಡ್ ನಡತಿನ ರಾಷ್ಟ್ರ ಮಟ್ಟದ 40 ನೇ ಸ್ಪರ್ಧಾ ಕೂಟಡ್ ಪದಕ ಗೆಂದ್ ದೆರ್. ಕರ್ನಾಟಕ ರಾಜ್ಯನ್ ಪ್ರತಿನಿಧಿಸಾಯಿನ ರಿಯಾ ಜಿ. ಶೆಟ್ಟಿ ಕಟಾ ಬೊಕ್ಕ ಕುಮಿಟೆ ರಡ್ಡ್ ವಿಭಾಗಡ್ ಲ ಬಂಗಾರ್ದ ಪದಕ ಗೆಂದಿನ ಸಾಧಕಿ ಆತೆರ್. ಮೇರ್ ಒಡಿಪು ಒಳಕಾಡು ಶಾಲೆದ 8 ನೇ ಕ್ಲಾಸ್ ದ ವಿದ್ಯಾರ್ಥಿನಿ. ಅಂತರಾಷ್ಟ್ರೀಯ ಮಟ್ಟದ ಕರಾಟೆ ಪಟು ಶಿಕ್ಷಕಿ ಪ್ರವೀಣ ಪರ್ಕಳ ಮೆರೆನ ಶಿಷ್ಯೆ. ಪರ್ಕಳ ಪಿ.ಕೆ.ಸಿ ಕೂಟದ ಪೆರ್ಮೆದ ಸದಸ್ಯೆ ಆದುಲ್ಲೆರ್.  ಕರಾಟೆಡ್ ಮಲ್ಲ ಸಾಧನೆ ಮಲ್ತಿನ ಈ ಎಲ್ಯ ಪ್ರತಿಭೆ ಭವಿಷ್ಯಡ್ ಕರಾಟೆ ಚಾಂಪಿಯನ್ ಆಪುನ ಭರವಸೆ ತೊಜಪಾದೆರ್.

ಇಂಡಿಯಾ ಟೀಮ್ ದ ಕ್ಯಾಪ್ಟನ್ ರೋಹಿತ್ ಶರ್ಮಾನ ಕೈಕ್ಕ್ ಪೆಟ್ಟ್

ಅಡಿಲೈಡ್: ಭಾರತ ಕ್ರಿಕೆಟ್ ಟೀಮ್ ದ ಕ್ಯಾಪ್ಟನ್ ರೋಹಿತ್ ಶರ್ಮಾಗ್ ಪ್ರಾಕ್ಟೀಸ್ ದ ಪೊರ್ತುಡು ಕೈಕ್ಕ್ ಪೆಟ್ಟಾತ್ಂಡ್.

ಗುರುವಾರ ಭಾರತ- ಇಂಗ್ಲೆಂಡ್ ದ ನಡುಟ್ಟು ಸೆಮಿಫೈನಲ್ ಗೊಬ್ಬು ನಡಪರೆ ಉಂಡು. ನೆತ ಅಟ್ಟಣೆಗಾದ್ ಪ್ರಾಕ್ಟೀಸ್ ಮಲ್ತೊಂದು ಇಪ್ಪುನ ಪೊರ್ತುಡು ಚೆಂಡ್ ರೋಹಿತ್ ಶರ್ಮಾ ಮೆರೆನ ಬಲತ ಕೈಕ್ ಬೂರ್ದುಂಡು. ಆಂಡ ಮಲ್ಲ ಪೆಟ್ಟಾತಿಜಿ. ಒಂತೆ ಬೇನೆ ಉಂಡು ಪಂದ್ ಡಾಕ್ಟರ್ ತೆರಿಪಾದೆರ್.