ಬೆಂಗ್ಲೂರ್: ಪ್ರತಿ ಲೀಟರ್ ನಂದಿನಿ ಪೇರ್ಗ್ 3 ರೂ. ಜಾಸ್ತಿ ಮಲ್ಪರೆ ಕೆಎಂಎಫ್ ನಿರ್ಧಾರ ಮಲ್ತ್ದ್ಂಡ್ ಪಂದ್ ತೆರಿದ್ ಬೈದ್ಂಡ್.
ಕೆಎಂಎಫ್ದ ವಾರ್ಷಿಕ ಸಭೆಟ್ಟ್ ರಾಜ್ಯದ 14 ಜಿಲ್ಲಾ ಹಾಲು ಒಕ್ಕೂಟದ ಅಧ್ಯಕ್ಷೆರ್ ಕಾಸ್ ಎಚ್ಚ ಮಲ್ಪರೆ ನಿರ್ಧಾರ ಮಲ್ತ್ದೆರ್.
ನೊಯ್ಡಾ: ಇತ್ತೆ ಮಾತಾ ಕಡೆಟ್ಟ್ ಲ ತಾಂಕಿನ ನಾಯಿಲ್ನಲ ಉಪದ್ರ ಜೋರಾತ್ಂಡ್. ನಾಯಿಲೆನ್ ಇಲ್ಲಡ್ದ್ ಪಿದಯಿ ಲೆತೊಂದು ಪೋಯಿನಲ್ಪ ಬೇತೆಕ್ಲೆನ ಮಿತ್ತ್ ದಾಳಿ ಮಲ್ತಿನ ಘಟನೆ ಅಲ್ಪಲ್ಪ ನಡತೊಂದು ಉಂಡು.
ಅಂಚಾದ್ ನೊಯ್ಡಾ ಪ್ರಾಧಿಕಾರ ತಾಂಕಿನ ಪ್ರಾಣಿಲೆನ ಬಗೆಟ್ಟ್ ಪೊಸ ರೂಲ್ಸ್ ಕನದ್ಂಡ್. ನಾಯಿ, ಪುಚ್ಚೆ ಬೇತೆಕ್ಲೆನ ಮಿತ್ತ್ ದಾಳಿ ಮಲ್ತ್ಂಡ, ತುಚ್ಚಿಂಡ ಅವೆನ್ ತಾಂಕಿನ ಮಾಲೀಕೆರೆಗ್ 10 ಸಾರ ರೂ. ದಂಡ ಪಾಡುವ ಪಂದ್ ನೊಯ್ಡಾ ಪ್ರಾಧಿಕಾರದ ಸಿಇಒ ರಿತು ಮಹೇಶ್ವರಿ ಖಡಕ್ ವಾರ್ನಿಂಗ್ ಕೊರ್ತೆರ್. ಅಕ್ಲೆನ ಚಿಕಿತ್ಸೆದ ಕಾಸ್ಲ ಮಾಲೀಕೆರೇ ಕೊರೊಡು ಪಂದ್ ಆದೇಶ ಪಾಡ್ದೆರ್.
ಕುಡ್ಲ: ಕಾಂತಾರ ಪಿಚ್ಚರ್ ಡ್ ದೈವಾರಾಧನೆಡ್ ಇಪ್ಪುನ ಪರಿಶಿಷ್ಟ ಜಾತಿಗ್ ಸೇರಿನ ಸಮುದಾಯನ್ ಎಲ್ಯ ಮಟ್ಟಡ್ ತೋಜ್ಪಾದೆರ್. ಕೆಲವು ಕಡೆಟ್ಟ್ ಹಿಂಸೆನ್ ತೊಜಪಾದೆರ್ ಪಂದ್ ಸಮತಾ ಸೈನಿಕ ದಳತ್ತಕುಲು ಅಯಿತ್ತ ವಿರುದ್ದ ಸ್ವರ ಲಕ್ಕಾದೆರ್.
ಈ ಬಗೆಟ್ಟ್ ಕುಡ್ಲಡ್ ಸುದ್ದಿಗೋಷ್ಠಿ ಮಲ್ತ್ದ್ ರಾಜ್ಯ ಪ್ರಧಾನ ಕಾರ್ಯದರ್ಶಿ ಲೋಲಾಕ್ಷ ತೆರಿಪಾದೆರ್. ಈ ಪಿಚ್ಚರ್ಡ್ ಬೊಡ್ಚಾಂದಿನ ದೃಶ್ಯಲೆನ್ ಕಟ್ಟ್ ಮಲ್ಪೊಡು. ಅಡೆ ಮುಟ್ಟ ಪಿಚ್ಚರ್ದ ಶೋನ್ ಉಂತಾವೊಡು ಪಂದ್ ಒತ್ತಾಯ ಮಲ್ತೆರ್.
ಪಿಚ್ಚರ್ದ ಕೂಟದ ಬಗೆಟ್ ದೂರು ಇಜ್ಜಿ. ಪಿಚ್ಚರ್ಡ್ ದೈವನರ್ತಕ ಸಮುದಾಯದ ಜನಕ್ಲೆನ್ ಅವೆಟ್ಟ್ಲ ಪೊಂಜೊವುಲೆನ್ ಬೊಕ್ಕ ಜವನೆರೆನ್ ಅಪಮಾನ ಮಲ್ಪುನ ದೃಶ್ಯ ಉಂಡು. ನಮ್ಮ ಸಮುದಾಯದ ಜವನೆರೆಗ್ ಕಾಸ್, ಸಾರಯಿ ಕೊರ್ಂಡ ಒವ್ ಬೇಲೆಲ ಮಲ್ಪುವೆರ್ ಪಂದ್ ಈ ಪಿಚ್ಚರ್ಡ್ ಕೆಲ ದೃಶ್ಯ ಉಂಡು. ದೈವಾರಾಧನೆಡ್ ಮಾನವ ಹಿಂಸೆಗ್ ಅವಕಾಶ ಇಜ್ಜಿ. ಆ ಪಿಚ್ಚರ್ದ ಕೆಲ ದೃಶ್ಯಲೆಡ್ ದೈವ ನಿಂದನೆ ಆತ್ಂಡ್. ಆಂಡಲ ಈ ಪಿಚ್ಚರ್ಗ್ ಸೆನ್ಸಾರ್ ಮಂಡಳಿ ಯು/ಎ ಪ್ರಮಾಣ ಪತ್ರನ್ ಕೊರ್ತ್ಂಡ್. ಈ ಕ್ರಮ ಸರಿ ಅತ್ತ್ ಪಂದ್ ಆರ್ ಪಂತೆರ್.
ಕಾಂತಾರ ಪಿಚ್ಚರ್ಡ್ ಇಂಚಿನ ಕೆಲ ದೃಶ್ಯಲೆನ್ ಕಟ್ಟ್ ಮಲ್ಪುನ ಮುಟ್ಟ ಈ ಪಿಚ್ಚರ್ದ ಪ್ರದರ್ಶನನ್ ತಡೆಯರೆ ಜಿಲ್ಲಾ ದಂಡಾಧಿಕಾರಿ ಆಯಿನ ಜಿಲ್ಲಾಧಿಕಾರಿ ಕ್ರಮ ದೆತೊನೊಡು ಪಂದ್ ಒತ್ತಾಯ ಮಲ್ತೆರ್.
ಮಲ್ಪೆ: ಬಂದರ್ ದ ಉಲಯಿ ಕಾರ್ ಜಾರ್ದ್ ಮೀನುಗಾರೆ ಒರಿ ನೀರ್ ಡ್ ಮುರ್ಕುದು ತೀರ್ ಪೋಯಿನ ಘಟನೆ ಐತಾರ ಬೊಲ್ಪುಗು ನಡತ್ಂಡ್.
ಕಟಪಾಡಿ ಮಟ್ಟು ನಿವಾಸಿ ಸಂತೋಷ್ ತಿಂಗಳಾಯ(35) ತೀರ್ ಪೋಯಿನಾರ್. ಮೇರ್ ಜೈಬಲರಾಮ್ ಲೈ ಲ್ಯಾಂಡ್ ಬೋಟ್ ಡ್ ಪೋನಗ ಕಾರ್ ಜಾರ್ದ್ ನೀರ್ ಗ್ ಬೂರ್ದೆರ್ ಪಂದ್ ತೆರಿದ್ ಬೈದ್ಂಡ್. ಈ ಬಗೆಟ್ ಮಲ್ಪೆ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ತುಳುನಾಡ್ ದ ಧಾರ್ಮಿಕ ಆಚರಣೆದ ಹಿನ್ನೆಲೆ ಇಪ್ಪುನ ಶಿರ್ವ ನಡಿಬೊಟ್ಟು ಸೂರ್ಯ-ಚಂದ್ರ ಸಂಪ್ರದಾಯಬದ್ಧ ಜೋಡು ಕರೆ ಕಂಬುಲ ಈ ಸರ್ತಿ ಡಿಸೆಂಬರ್ ತಿಂಗೊಲ್ದ 13ದಾನಿ ನಡಪರೆ ಉಂಡು.
ಎಲ್ಲೂರು ಶ್ರೀ ವಿಶ್ವೇಶ್ವರ ದೇವಲ್ಯದ ಮಾಜಿ ಆಡಳಿತ ಮೊಕ್ತೇಸರೆರ್ ಪ್ರಫುಲ್ಲ ಶೆಟ್ಟಿ ಮೇರ್ ದೀಪ ಪೊತ್ತಾದ್ ಜೋಡು ಕರೆಕ್ ಕಾಯಿ ಹಾಕುನ ಮುಖೇನ ಕಂಬುಲನ್ ಉದಿಪನ ಮಲ್ಪುವೆರ್. ಶತಮಾನಲೆರ್ದ್ ನಡತೊಂದು ಬತ್ತಿನ ಐತಿಹಾಸಿಕ ಶಿರ್ವ ಮಹತೋಭಾರ ಶ್ರೀ ವಿಷ್ಣುಮೂರ್ತಿ ದೇವಲ್ಯಡ್ ಪೂತ್ತ ಪೂಜೆ ಆದ್, ನಾಗದೇವೆರೆಗ್ ತನು ತಂಬಿಲ ಸಮರ್ಪಣೆ ಆಯಿನ ಬೊಕ್ಕ ನಡುಬೊಟ್ಟು ಚಾವಡಿದ ದೈವ ಜುಮಾದಿನ ಪೂಜೆ ಪುರಸ್ಕಾರ ಲೇಸ್ ಸುರು ಆಪುಂಡು.
ಚಾವಡಿದ ದೈವ ಜುಮಾದಿಗ್ ಪೂಜೆ ಪುರಸ್ಕಾರ ನಡತಿನ ಬೊಕ್ಕ ಬಂಟ ಕೋಲ ಮೆರವಣಿಗೆಡ್ ಕೊಂಬು, ವಾದ್ಯ ಲೆರ್ದ್ ಇಲ್ಲದ ಎರ್ಲೆನ್ ಕಂಬುಲದ ಕಲಕ್ಕ್ ಜಪುಡಾವೆರ್. ಸುಮಾರ್ ಪಿರವುದ ಕಾಲದ ಕ್ರಮದಂಚನೆ ಕಂಬುಲ ಕೂಟ ಶಿರ್ವ ನಡಿಬೊಟ್ಟು ಇಲ್ಲದ ಎರ್ಲೆದ ಬಲಿಪುದೊಟ್ಟುಗು ಕಂಬುಲ ಸುರು ಆದ್, ಶಿರ್ವ ನಂಗೆಟ್ಟು ಇಲ್ಲದ ಎರ್ಲು ಬಲಿಪುದೊಟ್ಟಿಗೆ ಕಂಬುಲ ಮುಗಿವುಂಡು. ಶಿರ್ವ ನಡಿಬೆಟ್ಟು ಕಂಬುಲಗ್ ಇಸೇಸ ಧಾರ್ಮಿಕ ಹಿನ್ನೆಲೆ ಉಂಡು. ಶಿರ್ವದ ದೈವ ದೇವೆರೆನ ಉಚ್ಚಯಡ್ ಒಂಜೆಕ್ಕೊಂಜಿ ಸಂಬಂಧ ಉಂಡು. ಸಂಪ್ರದಾಯ ಬದ್ಧವಾದ್ ಕಂಬುಲ ನಡಪುಂಡು.
ಶಿರ್ವ ನ್ಯಾರ್ಮ ಜಾರಂದಾಯ ದೈವೊಲ್ಯಡ್ ನವೆಂಬರ್ ತಿಂಗೊಲ್ಡ್ ಚೌತಿ ಬೊಕ್ಕ ಪರ್ಬದ ಸೇವೆ ಆಯಿನ ಬೊಕ್ಕ ಕಂಬುಲ ನಡಪುನವು ಮುಲ್ಪದ ರೂಢಿ. ನಡಿಬೊಟ್ಟು ಕಂಬುಲ ನಡಪಂದೆ ಶಿರ್ವ ಶ್ರೀ ವಿಷ್ಣುಮೂರ್ತಿ ದೇವಲ್ಯಡ್ ಉಚ್ಚಯದ ಕೊಡಿ ಏರ್ರೆ ಇಜ್ಜಿ. ಕಂಬುಲದ ಬೊಕ್ಕ ಉಚ್ಚಯದ ಕೊಡಿ ಏರುಂಡು. ದೇವೆರ್ನ ಕೊಡಿ ಜಾವಾಯಿನೆತ್ತ ಬೊಕ್ಕ ಬೊಕ್ಕ ಅಂಗಾರೆ ಶಿರ್ವ ಮಹಮ್ಮಾಯಿ ಮಾರಿಗುಡಿಟ್ ಮಾರಿಪೂಜೆಗ್ ದಿನ ನೆಕ್ಕಿ ಆದ್ 2 ನೇ ಅಂಗಾರೆ ಮಾರಿಪೂಜೆ ನಡಪುಂಡು. ಅಂಚನೆ ಏನಿಕಾಲೊರ್ದು ನಡತೊಂದು ಬರ್ಪುನ ಶಿರ್ವ ನಡಿಬೊಟ್ಟು ಕಂಬುಲ 1996 ಟ್ ಶಿರ್ವ ನಡಿಬೊಟ್ಟು ರಘುರಾಮ ನಾಯ್ಕ್ ಮೆರೆನ ಮುತಾಲಿಕೆಡ್ ಸೂರ್ಯ-ಚಂದ್ರ ಜೋಡು ಕೆರೆ ಕಂಬುಲವಾದ್ ಬದಲಾಂಡ್. ಬೊಕ್ಕ ಅವಿಭಜಿತ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆದ ಕಂಬುಲ ಸಮಿತಿಡ್ ಸೇರ್ಪಡೆ ಆದ್ ದಿ.ಗಂಗೆಜಾರ್ ಕುಟ್ಟಿ ಶೆಟ್ರೆನ ಗುರ್ಕಾರ್ಮೆ ಡ್ 1996ರ್ದ್ ಸೂರ್ಯ-ಚಂದ್ರ ಜೋಡು ಕರೆ ಕಂಬುಲ ಕೂಟದ ಸುರುತ ಜೋಡುಕರೆ ಕಂಬುಲ ಶಿರ್ವಡ್ ನಡತೊಂದು ಇತ್ತ್ಂಡ್.
2014 ಟ್ ಸುಪ್ರೀಂಕೋರ್ಟ್ ದ ಆದೇಶದಂಚೆನೆ ಕಂಬುಲದ ದುಂಬುನಾನಿ ಉಂತುಂಡು. ಬೊಕ್ಕ ಕಟ್ಟ್ ಕಟ್ಟಲೆದ ಪ್ರಕಾರ ಮುಗಿಯೊಂದಿತ್ತ್ಂಡ್. ಅನಾದಿ ಕಾಲರ್ದಿಂಚಿಲ ಸಂಪ್ರದಾಯಬದ್ಧವಾದ್ ನಡತೊಂದು ಇತ್ತಿನ ಶಿರ್ವ ನಡಿಬೆಟ್ಟು ಕಂಬುಲ 1996ರ್ದ್ 2014ಮುಟ್ಟ ಕಂಬುಲ ಸಮಿತಿದ ಸೂರ್ಯ-ಚಂದ್ರ ಜೋಡು ಕರೆ ಕಂಬುಲವಾದ್ ನಡತ್ಂಡ್. 2014 ನೇ ಇಸ್ವಿರ್ದ್ ಬೊಕ್ಕ ಇಡೆ ಮುಟ್ಟ ಜೋಡು ಕರೆ ಕಂಬುಲ ಸುಮಾರ್ 45-50 ಜೋಡಿ ಎರ್ಲೆನ್ ಬೊಲ್ಪುರ್ದು ಬಯ್ಯ ಮುಟ್ಟ ಪಗೆಲ್ ಮಾತ್ರ ನಡತೊಂದು ಬರೊಂದು ಉಂಡು. ಈ ಸರ್ತಿ ಜಿಲ್ಲೆದ ಕಂಬುಲ ಸಮಿತಿ ನ.5 ಕ್ಕ್ ಶಿರ್ವ ನಡಿಬೊಟ್ಟು ಕಂಬುಲಗ್ ದಿನ ನಿಗದಿ ಆದಿತ್ತ್ಂಡ್. ಬೊಕ್ಕ ಬೇತೆ ಕಾರಣಲೆರ್ದ್ ಆ ದಿನ ಕಂಬುಲ ನಡಪಯೆರೆ ಆವಂದೆ ಡಿ.13ಕ್ ದಿನ ನೆಕ್ಕಿ ಆತ್ಂಡ್. ಶಿರ್ವ ನಡಿಬೊಟ್ಟು ಇಲ್ಲದ ಯಜಮಾನೆರ್ ದಾಮೋದರ ಚೌಟ ಮೆರೆನ ಮುತಾಲಿಕೆಡ್ ವ್ಯವಸ್ಥಾಪಕೆರ್ ಶಿರ್ವ ನಡಿಬೊಟ್ಟು ಶಶಿಧರ ಹೆಗ್ಡೆ ಮೆರೆನ ಅಂಚೆನೆ ಸಕಾಯರ್ದ್ ಕಂಬುಲನ್ ಪೊರ್ಲುಡೇ ನಡಪಾವೊಂದು ಬರೊಂದು ಉಂಡು. ಅಂಚೆನೆ ಮಧಾಹ್ನ ಅನ್ನಸಂತರ್ಪಣೆ ನಡಪುಂಡು.
T20 ವಿಶ್ವಕಪ್ 2022ತ ಚಾಂಪಿಯನ್ ಟೀಮ್ ಡ್ ಇಂಗ್ಲೆಂಡ್ ಗೆಂದ್ದ್ಂಡ್.
ಪಾಕಿಸ್ತಾನದ ಎದುರು ಫೈನಲ್ ಗೊಬ್ಬುಡು ಆಂಗ್ಲರ್, 5 ವಿಕೆಟ್ ಡ್ ಗೆಂದಿಯೆರ್. 138ರನ್ ನ್ ಗುರಿಯಾದ್ ದೀದ್ ಗೊಬ್ಬೆರೆ ಸುರು ಮಲ್ತಿನ ಇಂಗ್ಲೆಂಡ್ 19 ಓವರ್ ಡ್ 5 ವಿಕೆಟ್ ಕಲೆಯೊಂದು ಗೆಂದ್ ದ್ಂಡ್. ಬೆನ್ ಸ್ಟೋಕ್ಸ್ 52, ಜೋಸ್ ಬಟ್ಲರ್ 26, ಬ್ರೂಕ್ಸ್ 20, ಫಿಲ್ ಸಾಲ್ಟ್ 10 ರನ್ ಗಲಸಿಯೆರ್.
ಸುಳ್ಯ: ಬಿಜೆಪಿ ಯುವ ನಾಯಕೆ ಪ್ರವೀಣ್ ನೆಟ್ಟಾರ್ ನ್ ಕೇರ್ತಿನ ಕೇಸ್ ಗ್ ಸಂಬಂಧ ಪಟ್ಟಿನ ರಾಷ್ಟ್ರೀಯ ತನಿಖಾದಳ ಎಸ್ಡಿಪಿಐ ಮುಖಂಡೆರ್ ಶಾಫಿ ಬೆಳ್ಳಾರೆ ಮೆರೆನ ಬಾವೆ ಸಾಹಿದ್ ಬೆಳ್ಳಾರೆ(34)ನ್ ಅರೆಸ್ಟ್ ಮಲ್ದ್ಂಡ್.
ಸಾಹಿದ್ ಬೆಳ್ಳಾರೆ ಅರೆಸ್ಟ್ ದೊಟ್ಟಿಗೆ ಕೇಸ್ ಗ್ ಸಂಬಂಧ ಪಟ್ಟಿನಂಚ 14 ಜನ ಅರೆಸ್ಟ್ ಆತೆರ್.
ಈ ಕೇಸ್ ಗ್ ಸಂಬಂಧ ಪಟ್ಟಿನಂಚನೆ ಇಂಚಿಪ್ಪ ನಾಲ್ ಜನ ಪ್ರಮುಖ ಆರೋಪಿಲೆನ ಬಗ್ಗೆ ಮಾಹಿತಿ ಕೊರುಂಡ ನಗದು ಇನಾಮ್ ಕೊರ್ಪ ಪಂದ್ ರಾಷ್ಟ್ರೀಯ ತನಿಖಾದಳ ಘೋಷಣೆ ಮಲ್ದ್ಂಡ್.
ಕಡಂದಲೆದ ಪೂಪಾಡಿಕಲ್ಲ್ ಬಿಲ್ಲವ ಸಂಘದ ಚಾವಡಿಡ್ ಕಾಂಗ್ರೆಸ್ ಕಾರ್ಯಕರ್ತೆರೆನ ಆಪ್ತಸಮಲೋಚನೆ ಸಭೆ ನ.12 ಶನಿಯಾರ ಬಯ್ಯಗ್ 6:30ಕ್ ಮುಲ್ಕಿ, ಬೆದ್ರ ಕ್ಷೇತ್ರದ ಉಸ್ತುವಾರಿ’ ಕೆ ಪಿ ಸಿ ಸಿ ಪ್ರದಾನ ಕಾರ್ಯದರ್ಶಿ ಮಿಥುನ್ ರೈ ಮೆರೆನ ಮುತಾಲಿಕೆಡ್ ನಡತ್ಂಡ್.
ಬೊಕ್ಕ ಪಕ್ಷದ ಪ್ರಮುಖೆರಾಯಿನ ಮಾಜಿ ಶಾಸಕೆರ್ ಅಭಯಚಂದ್ರ ಜೈನ್, ವಲಯಾಧ್ಯಕ್ಷೆರ್ ವಲೇರಿಯನ್ ಸಿಕ್ವೇರಾ, ಬೊಕ್ಕ ಬೇತೆ ಕಾರ್ಯಕರ್ತೆರೆನೊಟ್ಟಿಗೆ, 2023 ವಿಧಾನ ಸಭೆ ಚುನಾವಣೆದ ತಯಾರ್ ದ ಬೂತ್ ಮಟ್ಟಡ್ ಕಾರ್ಯಕರ್ತೆರ್ ವಾ ರೀತಿಡ್ ಜಬದಾರಿನ್ ನಿಭಾಯಿಸವೊಡ್ ಪಂದ್ ಚರ್ಚೆ ಮಲ್ತೆರ್. ಈ ಪೊರ್ತುಡು ಪಾತೆರ್ದ್, ಮಾಜಿ ಸಚಿವೆರ್ ಅಭಯಚಂದ್ರ ಜೈನ್ ಬೊಕ್ಕ ಯುವ ಮುಂದಾಳು ಮಿಥುನ್ ರೈ ಮೇರ್, ಕಡಂದಲೆಡ್ ಸ್ಥಾಪನೆ ಆವರೆ ಇಪ್ಪುನ ಮಲ್ಲ ಕರೆಂಟ್ ಉಪಕೇಂದ್ರ ಬೊಕ್ಕ ಅಯಿಕ್ ಸಂಬಂಧ ಪಟ್ಟಿನ ಬಹುಪ್ರಸರಣ ಮಾರ್ಗಲೆನ್ ಜನಕ್ ತೊಂದರೆ ಆಪುಂಡಾ ಈ ಪ್ರದೇಶಡ್ ಮಲ್ಪೆರೆ ಎಂಕುಲು ಖಂಡಿತಾವಾದ್ ವಿರೋಧ ಮಲ್ಪುವ. ಜನತ ಬೊಕ್ಕ ರೈತೆರೆನ ಒಟ್ಟಿಗೆ ಎಪಲ ಎಂಕುಲು ಉಲ್ಲ ಪಂದ್ ಧೈರ್ಯ ಕೊರ್ಪುನ ಬೇಲೆ ಮಲ್ತೆರ್.
ಈ ಪೊರ್ತುಡು ಕಲ್ಲಬೆಟ್ಟು ಸೊಸೈಟಿ ಅಧ್ಯಕ್ಷೆರ್ ಸುರೇಶ್ ಕೋಟ್ಯಾನ್, ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ವಲೇರಿಯನ್ ಸಿಕ್ವೇರಾ, ಕೆಪಿಸಿಸಿ ಸದಸ್ಯೆರ್ ಚಂದ್ರಹಾಸ ಸನಿಲ್, ಕುಡ್ಲ ತಾಲೂಕ್ ಪಂಚಾಯತ್ ಮಾಜಿ ಅಧ್ಯಕ್ಷೆರ್ ಸವಿತಾ ಟಿ ಎನ್, ಬೆದ್ರ ಪುರಸಭೆ ಸದಸ್ಯೆರ್ ಪುರಂದರ ದೇವಾಡಿಗ, ನಿವೃತ್ತ ಮುಖ್ಯೋಪಾಧ್ಯಾಯೆರ್ ಟಿ ಎನ್ ಕೆಂಬಾರೆ, ಆಂಡ್ರ್ಯೂ ಡಿ’ಸೋಜ, ಕೊಡ್ಯಡ್ಕ ವಾಸುದೇವ ನಾಯಕ್ ಇತ್ತೆರ್. ಕಡಂದಲೆ ಪರಾರಿಗುತ್ತು ಕೆ.ಪಿ. ಸಂತೋಷ್ ಶೆಟ್ಟಿ ಮೆರೆನ್ ಪಾಲಡ್ಕ ವಲಯದ ಅಧ್ಯಕ್ಷೆರಾದ್ ಬೊಕ್ಕ ಕಾರ್ಯದರ್ಶಿಯಾದ್ ಗಣೇಶ್ ಆಚಾರ್ಯ ಅಲಿಮಾರ್ ಮೆರೆನ್ ಆಯ್ಕೆ ಮಲ್ಪರೆ ಆಂಡ್.
ವರದಿ: ಜಗದೀಶ್ ಪೂಜಾರಿ, ಬೆದ್ರ
ಬಂಟ್ವಾಳ: ಕಾಂತಾರ ಪಿಕ್ಚರ್ ದ ಮುಖೇನ ತುಳುನಾಡ್ ದ ದೈವಲೆನ ಮಹತ್ವ ಜಗತ್ತ್ ದ ಮತ ಕಡೆ ಪಸರೊಂದು ಇಪ್ಪುನ ಬೆರಿಕ್ಕೆ ಉಕ್ರೇನ್ ದ ಕುಟುಂಬವೊಂಜಿ ಶುಕ್ರಾರ ರಾತ್ರೆ ತುಳುನಾಡ್ ದ ಆರಾಧ್ಯ ದೈವ ಕೊರಗಜ್ಜಗ್ ಅಗೇಲ್ ಸೇವೆ ಕೊರ್ತೆರ್.
ಕರಿನ ಕೆಲವು ತಿಂಗೊಲ್ದ ಪಿರವು ಉಕ್ರೇನ್ ರ್ದ್ ಭಾರತಗ್ ಪ್ರವಾಸ ಬತ್ತ್ ದ್ ಇತ್ತಿನ ಉಕ್ರೇನ್ ದ ಪ್ರಜೆ ಆ್ಯಂಡ್ರೋ, ಬೊಡೆದಿ ಎಲೆನಾ ಬೊಕ್ಕ ಮಗೆ ಮ್ಯಾಕ್ಸಿಂ ಒಡಿಪುದ ಮಲ್ಪೆ ಕಡಲ ಬರಿಕ್ ಬತ್ತ್ ದ್ ಇತ್ತೆರ್. ಈ ಪೊರ್ತುಡು ಒಡಿಪುದ ಗೋಶಾಲೆಗ್ ಪೋದು, ಅಲ್ಪ ನಾಡಿ ತೂದು ಮರ್ದ್ ಕೊರ್ಪುನ ಭಕ್ತಿ ಭೂಷಣ್ ಪ್ರಭೂಜಿನ್ ಭೇಟಿ ಮಲ್ತ್ ದ್, ಹುಷಾರ್ ಇಜ್ಜಂದಿನ ಮಗನ ಬಗ್ಗೆ ತೆರಿಪಾದೆರ್. ಬೊಕ್ಕ ಅಲ್ಪ ಚಿಕಿತ್ಸೆ ನಡತೊಂದು ಇತ್ತ್ಂಡ್. ಬೊಕ್ಕ ಜನ್ಮಾಷ್ಟಮಿದ ಪೊರ್ತುಡು ನಡತಿನ ಕೊರಗಜ್ಜನ ಕೋಲಡ್ ಹುಷಾರ್ ಇಜ್ಜಂದಿನೆಕ್ಕ್ ಪರಿಹಾರ ಕೇನ್ದ್ ಅಜ್ಜಗ್ ಅಗೆಲ್ ಸೇವೆ ಕೊರ್ಪ ಪಂದ್ ಪರಕೆ ಪಂದ್ ಇತ್ತೆರ್. ಇತ್ತೆ ಮಗೆ ಮ್ಯಾಕ್ಸಿಂ ಗುಣ ಆಯಿನ ಬಗೆಟ್ ಅಜ್ಜನ ಪವಾಡಗ್ ಋಣಿಯಾದ್ ಈ ಕುಟುಂಬ ಕೊರಗಜ್ಜಗ್ ಅಗೆಲ್ ಸೇವೆ ಕೊರ್ತುಂಡು. ಈ ಸೇವೆ ಭಕ್ತಿಭೂಷಣ್ ದಾಸ್ ಪ್ರಭೂಜಿ, ಪದ್ಮನಾಭ ಗೋವಿನ ತೋಟ, ರಾಮಚಂದ್ರ ಮಾರಿಪಳ್ಳ, ಯಾದವ ಕೊಡಂಗೆ, ನವೀನ್ ಮಾರ್ಲ ಮೊಕ್ಲೆನ ಮುಖೇನ ಅಗೇಲ್ ಸೇವೆ ನಡತ್ಂಡ್. ಉಕ್ರೇನ್ ಕುಟುಂಬ ಇತ್ತೆ ಕುಷಿಟ್ಟೆ ಉಕ್ರೇನ್ ಗ್ ಪಿದಾಡ್ದ್ಂಡ್.
ರೇಡಿಯೋ ಮಣಿಪಾಲ್ 90.4mhz ಸಮುದಾಯ ಬಾನುಲಿಡ್ ಪುರಾಣಾಮೃತ ಪೌರಾಣಿಕ ಪಾತ್ರ ಜೀವನ ಸೂತ್ರ ಸರಣಿ ಲೇಸ್ ದ 69 ನೇ ಸಂಚಿಕೆ ನ. 12 ಶನಿಯಾರ ಬಯ್ಯಗ್ 4:15 ಪ್ರಸಾರ ಆಪುಂಡು.
ಈ ಲೇಸ್ ನ್ ಉಪನ್ಯಾಸಕೆರ್ ಮುಂಡಾಜೆ ಕುಮಾರೇಶ್ವರ ಭಟ್ ನಡಪಾದ್ ಕೊರ್ಪೆರ್. ಉಂದು ನ.13 ಕ್ ಮಧ್ಯಾಹ್ನ ಕೂಡ ಪ್ರಸಾರ ಆಪುಂಡು.
