ಬೆಂಗ್ಲೂರ್: ದಿನರ್ದ್ ದಿನಕ್ ಶ್ರೀಗಂಧದ ಬೇಡಿಕೆ ಹೆಚ್ಚಾವೊಂದು ಇಪ್ಪುನ ಪೊರ್ತುಡು ಖಾಸಗಿ ಜಮೀನ್ ಡ್ ಶ್ರೀಗಂಧ ಬುಲೆಪಾಯೆರೆ ಸರ್ಕಾರ ಮತ ಸಹಕಾರ ಕೊರ್ಪುಂಡು ಪಂದ್ ಸಚಿವ ಸಂಪುಟ ಸಭೆತ ಬೊಕ್ಕ ಸಚಿವೆರ್ ಡಾ. ಸುಧಾಕರ್ ಪಂಡೆರ್.
ಶ್ರೀಗಂಧಗ್ ಅಗತ್ಯ ಇಪುನ, ರಕ್ಷಣೆನ್ ಕೊರ್ಪುನ ಭರವಸೆ ಕೊರ್ತೆರ್. ಕೇರಳದ ಶ್ರೀಗಂಧ ಕಲ್ವೆರೆನ ಹಾವಳಿರ್ದ್ ರಾಜ್ಯಡ್ ಗಂಧದ ಮರಕುಲು ಕಮ್ಮಿ ಅವೊಂದು ಉಂಡು. ಅವ್ವತ್ತಂದೆ ದಕ್ಷಿಣ ಕನ್ನಡ ಜಿಲ್ಲೆಗ್ ಸಂಬಂಧ ಪಟ್ಟಿನ ಕೇರಳದ ಕಾಸ್ರೋಡುಡ್ ಮಸ್ತ್ ಶ್ರೀಗಂಧದ ಕಾರ್ಖಾನೆಲು ಉಂಡು. ಇಡೆಗ್ ಕರ್ನಾಟಕರ್ದ್ ಶ್ರೀಗಂಧ ಬರ್ಪುಂಡು ಪಂದ್ ಆರೋಪ ಉಂಡು.
ಮೆಕ್ಸಿಕೊ ಸಿಟಿ: ಮೆಕ್ಸಿಕನ್ ರಾಜ್ಯ ಆಯಿನ ಅಗ್ವಾಸ್ಕಾಲಿಯೆಂಟೆಸ್ದ ಭದ್ರತಾ ಮುಖ್ಯಸ್ಥೆರ್ ಸೇರ್ದ್ ಒಟ್ಟು 5 ಜನ ಹೆಲಿಕಾಪ್ಟರ್ರ್ದ್ ಬೂರ್ದು ತೀರ್ ಪೋಯಿನ ಘಟನೆ ನಡತ್ಂಡ್.
ಹೆಲಿಕಾಪ್ಟರ್ ನೆಲಕ್ಕ್ ಬೂರ್ದಿನ ವಿಡಿಯೋ ಸಾಮಾಜಿಕ ಜಾಲತಾಣಡ್ ವೈರಲ್ ಆವೊಂದುಂಡು.
ತುಳುನಾಡ್ದ ಪುಗರ್ತೆದ ಬ್ರಹ್ಮ ಬೈದರ್ಕಳ ಕ್ಷೇತ್ರಡ್ ಒಂಜಾಯಿನ ಕಂಕನಾಡಿ ಗರೋಡಿ ಶ್ರೀ ಬ್ರಹ್ಮ ಬೈದರ್ಕಳ ಗರಡಿ ಕ್ಷೇತ್ರದ 150 ನೇ ವರ್ಷದ ಗೌಜಿದ ಬಗೆಟ್ ಮಾರ್ಚ್ 4 – 7 ಮುಟ್ಟ ಮಹಾ ಗಣಯಾಗ, ಬ್ರಹ್ಮಕಲಶಾಭಿಷೇಕ, ನಾಗಬ್ರಹ್ಮಮಂಡಲೋಚ್ಚಯ ನಡಪರೆ ಉಂಡು.
ಕಂಕನಾಡಿ ಗರಡಿ ಕ್ಷೇತ್ರದ ಆಡಳಿತ ಮೊಕ್ತೇಸರ ಕೆ. ಚಿತ್ತರಂಜನ್ ಅಧ್ಯಕ್ಷತೆಡ್ ಐತಾರ ನಡತಿನ ಸಭೆಟ್ಟ್ ಗರಡಿ ಕ್ಷೇತ್ರದ 150 ನೇ ವರ್ಷಾಚರಣೆದ ಚರ್ಚೆ ನಡತ್ಂಡ್. ಉಚ್ಚಯದ ನಿಲೆಟ್ಟ್ 32 ನಾನಾ ಸಮಿತಿ ರಚನೆ ಮಲ್ತೆರ್. 150 ನೇ ವರ್ಷಾಚರಣೆದ ಪ್ರಧಾನ ಸಂಚಾಲಕೆರ್ ಆದ್ ಮೋಹನ್ ನೆಕ್ಕರೆಮಾರ್ ಉಜ್ಜೋಡಿ ಮೆರೆನ್ ನೇಮಕ ಮಲ್ತೆರ್.
ಗರಡಿ ಕ್ಷೇತ್ರದ ಆಡಳಿತ ಮೊಕ್ತೇಸರ ಕೆ. ಚಿತ್ತರಂಜನ್ ಪಾತೆರ್ದ್, ಕ್ಷೇತ್ರದ 150 ನೇ ಸಂಭ್ರಮಾಚರಣೆಡ್ ಪಾಲ್ ಪಡೆಯುನ ಯೋಗ ನಮಕ್ಕ್ ಮಾತ ಒದಗ್ದ್ ಬತ್ತ್ಂಡ್. ಕಾರ್ಯಕ್ರಮದ ಯಶಸ್ಸ್ಗ್ ಕ್ಷೇತ್ರದ ಭಕ್ತೆರ್ ಸೇರಿನಂಚನೆ ಮಾತೆರ್ನಾಲ ಸಕಾರ ಅಗತ್ಯ. 2023 ತ್ತ ಮಾರ್ಚ್ 4 ಕ್ಕ್ 1008 ನಾರಿಕೇಳ ಮಹಾ ಗಣಯಾಗ, ಮಾರ್ಚ್ 5 ಕ್ಕ್ ಕ್ಷೇತ್ರದ ಪರಿವಾರ ದೇವರೆಗ್ ಕಲಶಾಭಿಷೇಕ, ಮಾರ್ಚ್ 6 ಕ್ಕ್ ಬ್ರಹ್ಮಕಲಶಾಭಿಷೇಕ, ಮಾ. 7 ಕ್ಕ್ ನಾಗಬ್ರಹ್ಮ ಮಂಡಲೋತ್ಸವ ನಡಪರೆ ಉಂಡು. ಜನವರಿ 1-9 ಮುಟ್ಟ ವರ್ಷಾವಧಿ ಉಚ್ಚಯ ನಡಪರೆ ಉಂಡು ಪಂದ್ ಪಂಡೆರ್.
ಕ್ಷೇತ್ರದ ಮ್ಯಾನೇಜರ್ ಕಿಶೋರ್ ಕುಮಾರ್ ಮಜಿಲ ಬತ್ತಿನ ಬಿನ್ನೆರೆನ್ ಎದ್ಕೊನಿಯೆರ್. ಮೊಕ್ತೇಸರ ಜೆ. ದಿನೇಶ್ ಅಂಚನ್ ಸಮಿತಿದ ಬಗೆಟ್ ಮಾಹಿತಿ ಕೊರಿಯೆರ್. ಮನಪಾ ಸದಸ್ಯೆರ್ ಸಂದೀಪ್ ಗರೋಡಿ ಸೊಲ್ಮೆ ಸಂದೈತ ಮಲ್ತೆರ್. ಲೇಸ್ ಡ್ ಮಸ್ತ್ ಜನ ಬಿನ್ನೆರ್ ಇತ್ತೆರ್.
ವಾಷಿಂಗ್ಟನ್: ಮದಿಮೆದ ದಿನ ಮದಿಮಲ್-ಮದಿಮಾಯೆ ಕಾರ್ ಡ್ ಇಜ್ಜಿಂಡ ಬೇತೆ ವೈವಿಧ್ಯ ರೀತಿಡ್ ಮಂಟಪಗ್ ಬರ್ಪುನೆ ಮಾತೆರೆಗ್ಲ ಗೊತ್ತುಂಡು. ಆಂಡ ಅಮೆರಿಕಡ್ ನಡತಿನ ಒಂಜಿ ಮದಿಮೆಡ್ ಮದಿಮಯನ್ ಪುನತ ಪೆಟ್ಟಿಗೆಡ್ ದೀದ್ ದೋಸ್ತಿನಕುಲು ಮಂಟಪಗ್ ಲೆತೊಂದು ಬತ್ತಿನ ವಿಚಿತ್ರ ಘಟನೆ ನಡತ್ಂಡ್.
ಮದಿಮೆದ ಪೊಣ್ಣು ಐತ ಆದ್ ಮದಿಮಯಗ್ ಕಾತೊಂದು ಇತ್ತಲ್. ಅಲ್ಪ ಇತ್ತಿನಕುಲು ಮದಿಮೆದ ಪೊರ್ಲುನ್ ತೂವೊಂದು ಇತ್ತೆರ್. ಈ ಪೊರ್ತುಡು ಕಾರೊಂಜಿ ಅಲ್ಪ ಬತ್ತ್ ದ್ ಉಂತುಂಡು. ಕಾರ್ ದ್ ಜತ್ತಿನ ಕೆಲವೆರ್ ಪಿರವುರ್ದ್ ಪುನತ ಪೆಟ್ಟಿಗೆ ಪಿದಯಿ ದೆತ್ ದ್ ಆಯಿನ್ ಮಂಟಪಗ್ ಕನತೆರ್. ಬೊಕ್ಕ ಮದಿಮಯೆ ಪುನತ ಪೆಟ್ಟಿಗೆರ್ದ್ ಲಕ್ಕ್ ದ್ ಪಿದಯಿ ಬೈದೆ. ದೋಸ್ತಿಲೆನ ಕಿತಾಪತಿನ್ ತೂಯಿನ ಅಲ್ಪ ಇತ್ತಿನಕ್ಲೆಗ್ ಶಾಕ್ ಆತ್ಂಡ್.
ನಮ ಅಟಿಲ್ಗ್ ಗಲಸುನ ಗ್ಯಾಸ್ ಸಿಲಿಂಡರ್ದ ಮಿತ್ತ ಪೊಸ ಕ್ಯೂಆರ್ ಕೋಡ್ ಬರ್ಪುಂಡು. ಉಂದೆನ್ ಪಾಡುನೆಡ್ದಾವರ ಸಿಲಿಂಡರ್ದ ಬಗೆಟ್ ಮಾತ ರೀತಿದ ಮಾಹಿತಿ ತಿಕ್ಕುಂಡು. ಲಿಕ್ವಿಫೈಡ್ ಪೆಟ್ರೋಲಿಯಂ ಗ್ಯಾಸ್ ಸಿಲಿಂಡರ್ದ ಮಿತ್ತ್ ನನ ಭಾರೀ ಬೇಗಡೆ ಕ್ಯೂಆರ್ ಕೋಡ್ ಪಾಡಿಯರೆ ಉಂಡು ಪಂದ್ ಕೇಂದ್ರ ಪೆಟ್ರೋಲಿಯಂ ಸಚಿವೆರ್ ಹರ್ದೀಪ್ ಸಿಂಗ್ ಪುರಿ ಪಂತೆರ್.
ಕ್ಯೂಆರ್ ಕೋಡ್ ಪಾಡುನೆತ್ತ ಪ್ರಯೋಜನ ಇಂಚ ಉಂಡು.
ಪೊಸ ಸಿಲಿಂಡರ್ದ ಮಿತ್ತ್ ಕ್ಯೂಆರ್ ಕೋಡ್ನ್ ವೆಲ್ಡ್ ಮಲ್ಪುವೆರ್. ಕ್ಯೂಆರ್ ಕೋಡ್ ಮುಕೇನ ಗ್ರಾಹಕೆರ್ ಸಿಲಿಂಡರ್ ಬಗೆಟ್ ಸಂಪೂರ್ಣ ಮಾಹಿತಿ ಪಡೆಯರೆ ಸಾಧ್ಯ ಆಪುಂಡು. ಉದಾಹರಣೆಗ್ ಸಿಲಿಂಡರ್ನ್ ಒಲ್ಪ ರಿಫೀಲ್ ಮಲ್ತ್ದೆರ್, ಎಲ್ಪಿಜಿ ಸಿಲಿಂಡರ್ಗ್ ಸಂಬಂಧಪಟ್ಟಿನ ಒವ್ ಸುರಕ್ಷತಾ ಪರೀಕ್ಷೆ ಮಲ್ತ್ದೆ ಇಂಚಿನ ಮಾಹಿತಿ ಈ ಕ್ಯೂಆರ್ ಕೋಡ್ ಮುಕೇನ ತಿಕ್ಕರೆ ಉಂಡು. ಕ್ಯೂಆರ್ ಕೋಡ್ನ್ ಸಿಲಿಂಡರ್ದ ಲೇಬಲ್ ಮುಕೇನ ಅಂಟಾಯರೆ ಉಂಡು.
2022 ತ್ತ ಎಲ್ಪಿಜಿ ಸಪ್ತಾಹದ ಪೊರ್ತುಡು, ಗ್ರಾಹಕೆರ್ ಎಲ್ಪಿಜಿ ಸಿಲಿಂಡರ್ನ್ ಟ್ರ್ಯಾಕ್ ಮಲ್ಪರೆ ಸಾಧ್ಯ ಆಪಿನೆಡ್ದಾವರ ಇನಿ ಕ್ರಾಂತಿಕಾರಿ ಬದಲಾವಣೆ ಆತ್ಂಡ್ ಪಂದ್ ಕೇಂದ್ರ ಪೆಟ್ರೋಲಿಯಂ ಸಚಿವೆರ್ ಹರ್ದೀಪ್ ಸಿಂಗ್ ಪುರಿ ಪಂತೆರ್.
ಸುರುತ್ತ ಹಂತೊಡು ಕ್ಯೂಆರ್ ಕೋಡ್ ಇಪ್ಪುನ 20,000 ಎಲ್ಪಿಜಿ ಸಿಲಿಂಡರ್ನ್ ಯುಎನ್ ಕೋಡ್ ಆಧಾರಿತ ಟ್ರ್ಯಾಕ್ ಅಡಿಟ್ ಕೊರಿಯರೆ ಉಂಡು. ಉಂದು ಒಂಜಿ ಬಾರ್ಕೋಡ್ ಆತ್ಂಡ್, ಡಿಜಿಟಲ್ ಸಾಧನದ ಮುಕೇನ ಉಂದೆನ್ ಓದೊಲಿ.
ಪ್ರಧಾನಿ ನರೇಂದ್ರ ಮೋದಿ ಚಾಲನೆ ಕೊರಿನ ಮೈಸೂರ್-ಬೆಂಗ್ಲೂರ್-ಚೆನೈ ನಡುತ್ತ ವಂದೇ ಭಾರತ್ ಎಕ್ಸ್ಪ್ರೆಸ್ ರೈಲ್ಗ್ ಕಂಜಿಯೊಂಜಿ ಗುದ್ದ್ದಿನ ಘಟನೆ ತಮಿಳ್ನಾಡ್ದ ಅರಕ್ಕೋಣಂ ಕೈತಲ್ ನಡತ್ಂಡ್.
ರೈಲ್ ಬಿರ್ಸ್ಡ್ ಪೋತಿನೆಡ್ದಾವರ ಕಂಜಿ ತೀರ್ ಪೋತ್ಂಡ್. ವಂದೇ ಭಾರತ್ ರೈಲ್ ಗ್ ಕೆಲವು ಕಡೆಟ್ಟ್ ಪೆತ್ತ ಕೈಕಂಜಿಲು ತಾಂಟ್ ದ್ ತೀರ್ ಪೋಯಿನ ಘಟನೆ ಇಂಚೊಗು ಆದಿತ್ತ್ಂಡ್.
ಡೆಲ್ಲಿ: ಶ್ರದ್ಧಾ ಪನ್ಪಿನ ಪೊಣ್ಣನ್ ಕೆರ್ತಿನ ಕೇಸ್ ದ ಆರೋಪಿ ಅಫ್ತಾಬ್ ಅಮೀನ್ ಪೂನಾವಾಲಾನ್ ನ.17ಕ್ ಡೆಲ್ಲಿದ ಸಾಕೇತ್ ಕೊರ್ಟುಗು ಹಾಜರ್ ಮಲ್ದೆರ್. ಈ ಪೊರ್ತುಡು ವಕೀಲೆರ್ ಸಾಕೇತ್ ಕೋರ್ಟುಡ್ ಆರೋಪಿನ್ ಪಾಸಿಗ್ ಕೊರೊಡು ಪಂದ್ ಪ್ರತಿಭಟನೆ ಮಲ್ದೆರ್. ನೆತ್ತ ವಿಡಿಯೋ ಟ್ವೀಟರ್ ಡ್ ವೈರಲ್ ಆತ್ಂಡ್.
ವಿಡಿಯೋ ಕಾನ್ಫರೆನ್ಸ್ ಮುಖೇನ ಹಾಜರ್ ಆಯಿನ ಅಫ್ತಾಬ್ನ್ ಸಾಕೇತ್ ಕೋರ್ಟ್ 5 ದಿನ ಪೊಲೀಸ್ ಕಸ್ಟಡಿಗ್ ಒಪ್ಪದ್ಂಡ್. ಈ ಬಗೆಟ್ ಆರೋಪಿನ್ 10 ದಿನ ಕಸ್ಟಡಿಗ್ ಒಪ್ಪವೊಡು ಪಂದ್ ಡೆಲ್ಲಿ ಪೊಲೀಸೆರ್ ಬೇಡಿಕೆ ದೀದಿತ್ತೆರ್. ಬೊಕ್ಕ ಮೊಕುಲು ನಾರ್ಕೋ ಪರೀಕ್ಷೆಗ್ ಸಂದಾಯಿನ ಅರ್ಜಿದ ವಿಚಾರಣೆಲ ಕೋರ್ಟುಡು ನಡತ್ಂಡ್. ಈ ಪರೀಕ್ಷೆಗ್ ಆರೋಪಿ ಒಪ್ಪಿಗೆ ಕೊರ್ತೆರ್ ಪಂದ್ ತೆರಿದ್ ಬೈದ್ಂಡ್.
ಬೆಂಗ್ಲೂರ್: ಜೆಡಿಎಸ್ ಪಂಚರತ್ನ ರಥಯಾತ್ರೆ ಮುಳಬಾಗಿಲುದ ಕೂಡುಮಲೆರ್ದ್ ಸುಕ್ರಾರ ಸುರು ಆಯರೆ ಉಂಡು. ಮಾಜಿ ಪ್ರಧಾನಿ ಅಂಚನೆ ಜೆಡಿಎಸ್ ರಾಷ್ಟ್ರೀಯ ಅಧ್ಯಕ್ಷೆರ್ ಹೆಚ್.ಡಿ. ದೇವೇಗೌಡೆರ್ ಮಾತ ರಥಕ್ಕ್ ಪೂಜೆ ಮಲ್ತ್ದ್ ಚಾಲನೆ ಕೊರಿಯರೆ ಉಲ್ಲೆರ್.
ಮಧ್ಯಾಹ್ನ 2 ಗಂಟೆಗ್ ಮುಳಬಾಗಿಲು ಪೇಂಟೆದ ತಿರುಪತಿ ಬೈಪಾಸ್ ಮಾರ್ಗಡ್ ನಡಪುನ ಸಮಾವೇಶಡ್ ಜೆಡಿಎಸ್ ರಾಜ್ಯಾಧ್ಯಕ್ಷ ಸಿಎಂ ಇಬ್ರಾಹಿಂ, ಯುವ ಘಟಕದ ಅಧ್ಯಕ್ಷೆರ್ ನಿಖಿಲ್ ಕುಮಾರಸ್ವಾಮಿ ಸೇರ್ದ್ ಮಸ್ತ್ ಜನ ಪಾಲ್ ಪಡೆಯರೆ ಉಲ್ಲೆರ್.
ಭಾರತೀಯೆರೆಗ್ ಸೌದಿ ಅರೇಬಿಯಾ ಚೀಪೆ ಸುದ್ದಿ ಕೊರ್ತುಂಡು. ಸೌದಿ ಅರೇಬಿಯಾ ದೇಶಗ್ ಬರ್ಪಿನ ಭಾರತೀಯೆರ್ ನನ ದುಂಬುಗು ವೀಸಾಗಾದ್ ಕ್ಲಿಯರೆನ್ಸ್ ಪ್ರಮಾಣ ಪತ್ರ ಕೊರ್ಪಿನ ಅಗತ್ಯ ಇಜ್ಜಿ ಪಂದ್ ಸೌದಿ ರಾಯಭಾರ ಕಚೇರಿ ತೆರಿಪಾದ್ಂಡ್.
ಭಾರತದೊಟ್ಟುಗು ಇಪ್ಪುನ ಸಂಬಂಧನ್ ಗಟ್ಟಿ ಮಲ್ಪುನ ಭಾಗವಾದ್, ಸೌದಿ ಅರೇಬಿಯಾ ವೀಸಾಗ್ ಪೊಲೀಸ್ ಕ್ಲಿಯರೆನ್ಸ್ ರದ್ದ್ ಮಲ್ಪರೆ ಉಂಡು ಪಂದ್ ಘೋಷಿಸಾದೆರ್. ಇತ್ತೆ ಸುಮಾರ್ 20 ಲಕ್ಷ ಭಾರತೀಯೆರ್ ನಮ್ಮ ದೇಶಡ್ ಎಡ್ಡೆ ರೀತಿಡ್ ಬದ್ಕೊಂದು ಉಲ್ಲೆರ್ ಪಂದ್ ತೆರಿಪಾಯೆರ್.
ದಿಲ್ಲಿ: ಪಶ್ಚಿಮ ಬಂಗಾಳದ ಪೊಸ ರಾಜ್ಯಪಾಲೆರಾದ್ ಸಿವಿ ಆನಂದ ಬೋಸ್ ಮೆರೆನ್ ನೇಮಕ ಮಲ್ತ್ದ ಪಂದ್ ರಾಷ್ಟ್ರಪತಿ ಭವನದ ಪ್ರಕಟನೆಡ್ ತೆರಿಪಾದೆರ್.
71 ಪ್ರಾಯದ ಬೋಸ್ ಮೇರ್ ಕೇರಳದ ಕೇಡರ್ದ 1977 ಬ್ಯಾಚ್ದ ಭಾರತೀಯ ಆಡಳಿತ ಸೇವೆ ಅಧಿಕಾರಿಯಾದಿತ್ತೆರ್.
