ಸುಬ್ರಹ್ಮಣ್ಯ: ಮಹತೋಭಾರ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯಡ್ ನ.20ದಾನಿ ಚಂಪಾಷಷ್ಠಿದ ವಾರ್ಷಿಕ ಜಾತ್ರೆ ಉಚ್ಚಯ ಇಪ್ಪುನ ಲೆಕ್ಕೊಡು ಮೂಲಮೃತ್ತಿಕಾ ಪ್ರಸಾದ ದೆಪ್ಪುನ ಲೇಸ್ ನಡಪರೆ ಉಂಡು.
ಅಂಚಾದ್ ಆನಿ ಬೊಲ್ಪುರ್ದ್ ಮಧ್ಯಾಹ್ನ 2 ಗಂಟೆ ಮುಟ್ಟ ಭಕ್ತೆರೆಗ್ ದೇವೆರೆನ ದರ್ಶನ ಪಡೆಯೆರೆ ಭಕ್ತೆರೆಗ್ ಅವಕಾಶ ಇಜ್ಜಿ. 2 ಗಂಟೆರ್ದ್ ಬೊಕ್ಕ ದೇವೆರೆನ ದರ್ಶನ ಮಲ್ಪೊಲಿ ಪಂದ್ ದೇವಲ್ಯದ ಪ್ರಕಟಣೆಡ್ ತೆರಿಪಾದೆರ್.
ಪಣಂಬೂರು ಬೋರ್ಮಾಡಿ ಶ್ರೀ ಕೋಡ್ದಬ್ಬು ದೈವಸ್ಥಾನ, ಕಾಟಿಪಳ್ಳ ಮೂಲು ಡಿಸೆಂಬರ್ 3 ಬೊಕ್ಕ 4 ಕ್ಕ್ ವಾರ್ಷಿಕ ನೇಮೋಚ್ಚಯ ನಡಪರೆ ಉಂಡು.
ಡಿ.2 ತಾರೀಕ್ ಕಾಂಡೆ 10.30 ಗ್ ನವಕ ಕಲಶಾಭಿಷೇಕ ಶುದ್ಧೀಕರಣ ನಡಪರೆ ಉಂಡು. ರಾತ್ರೆ 9 ಗಂಟೆಗ್ ಲಯನ್ ಕಿಶೋರ್ ಡಿ. ಶೆಟ್ಟಿ ಕೂಟದ ಕಲಾವಿದೆರ್ ಅಭಿನಯ ಮಲ್ತಿನ ‘ಕಟೀಲ್ದಪ್ಪೆ ಉಳ್ಳಾಲ್ದಿ ‘ ತುಳು ಪೌರಾಣಿಕ ನಾಟಕ ನಡಪರೆ ಉಂಡು. ಡಿ.3 ತಾರೀಕ್ಗ್ ರಾತ್ರೆ 10.30 ಗ್ ಶ್ರೀ ಕೋಡ್ದಬ್ಬು ತನ್ನಿಮಾನಿಗ ದೈವದ ನೇಮೋಚ್ಚಯ, ಡಿ. 4 ಕ್ಕ್ ಜೋಡುಗುಳಿಗ, ಮಯೋಲಜ್ಜಿ ಬೊಕ್ಕ ಚಾಮುಂಡೇಶ್ವರ ಗುಳಿಗ, ಪಂಜುರ್ಲಿ ಅಂಚನೆ ಬಂಟ ದೈವದ ನೇಮೋಚ್ಚಯ ಆದ್ ಭಂಡಾರ ಜಪ್ಡಾಯರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ವೆಲ್ಲಿಂಗ್ಟನ್: ಭಾರತ ಅಂಚನೆ ನ್ಯೂಜಿಲೆಂಡ್ ನಡುತ್ತ 3 ಪಂತದ ಟಿ20 ಸರಣಿದ ಸುರುತ್ತ ಪಂತ ಬರ್ಸ ಬತ್ತಿನೆಡ್ದಾವರ ಕ್ಯಾನ್ಸಲ್ ಆತ್ಂಡ್.
ಬರ್ಸರ್ದಾವರ ಟಾಸ್ ಪಾಡಿಯರಲ ಸಾಧ್ಯ ಆವಂದಿನ ಪರಿಸ್ಥಿತಿ ನಿರ್ಮಾಣ ಆಯಿನ ಕಾರಣ ಪಂತೊನ್ ಕ್ಯಾನ್ಸಲ್ ಮಲ್ತೆರ್.
ಮುಲ್ಕಿ: ಮಾರ್ಗದ ನಡುಟ್ಟು ಇತ್ತಿನ ಮಾಮಲ್ಲ ಗುಂಡಿನ್ ಕಾಂಕ್ರಿಟ್ ಗಲಸ್ ದ್ ಮುಚ್ಚಿದಿನ ಮುಲ್ಕಿ ಪುನರೂರ್ದ ಯುವ ಪಡೆತ್ತ ಸೇವೆನ್ ಆ ಕೂಟದಕ್ಲೆಗ್ ಮೆಚ್ಚಿದ್ ಆಮ್ ಆದ್ಮಿ ಪಕ್ಷದ ದ.ಕ. ಜಿಲ್ಲಾ ಸಮಿತಿದಕುಲು ಗುರುವಾರ ಬಯ್ಯ ಮುಲ್ಕಿಡ್ ಮಾನಾದಿಗೆ ಮಲ್ತೆರ್.
ಮುಲ್ಕಿದ ಸುರಭಿ ಎಲೆಕ್ಟ್ರಾನಿಕ್ಸ್ ಉದ್ಯೋಗಿ ಸುಪ್ರೀತಾ ಪುನರೂರು ಏಪಲ ಇಲ್ಲಗ್ ಪೋಪಿನ ಮಾರ್ಗಡ್ ತೋಜಿದ್ ಬತ್ತಿನ ಮಾಮಲ್ಲ ಗುಂಡಿಲೆನ್ ಗುರ್ತಿಸಾದ್ ತನ್ನ ಯುವ ಪಡೆತ್ತ ಸದಸ್ಯೆರೆಗ್ ಒಟ್ಟು ಸೇರ್ಸಾದ್ ರಾತ್ರೆದ ಪೊರ್ತುಡು ಗುಂಡಿನ್ ಸಿಮೆಂಟ್ ಕಾಂಕ್ರೀಟ್ ಪಾಡ್ದ್ ಮುಚ್ಚಿದ್ ಜನಕ್ಲೆರ್ದ್ ಮೆಚ್ಚಿಗೆ ಪಡೆತೆರ್. ಮೊಕುಲು ಮಲ್ತಿನ ಬೇಲೆನ್ ಗುರ್ತಿಸಾದ್ ಆಮ್ ಆದ್ಮಿ ಪಕ್ಷದ ಮುಖಂಡೆರ್ ಸುಪ್ರೀತಾ ಬೊಕ್ಕ ಅರೆನ ಕೂಟದ ಸದಸ್ಯೆರಾಯಿನ ಸಚಿನ್, ನರೇಶ್, ರಮೇಶ್, ಐಸನ್ ಡಿಸೋಜ, ಸಂಪತ್ ಉಚ್ಚಿಲ, ಪೊಲೀಸ್ ವೀರೇಶ್ ಅಂಚನೆ ಯುವ ಪಡೆನ್ ಪ್ರೋತ್ಸಾಹ ಮಲ್ಪುನ ಜಾನ್ ಕ್ವಾಡ್ರಸ್ ಮೆರೆನ್ ಮಾನಾದಿಗೆ ಮಲ್ತ್ದ್ ಎಡ್ಡೆಪ್ಪುನು ಬಯಕಿಯೆರ್.
ಭುವನೇಶ್ವರ: ಒಡಿಶಾದ ಬೌದ್ ಜಿಲ್ಲೆದ ಬಿಲಾಸ್ಪುರ್ ಪಂಚಾಯಿತಿದ ಬದರಾಹಜುರ್ ಗ್ರಾಮದ ಪೂರ್ಣಬಾಷಿ ದೇವಲ್ಯ ತನ್ನ ಪವಾಡರ್ದೇ ಮಸ್ತ್ ಪುದರ್ ಪಡೆತ್ಂಡ್.
ಪ್ರತಿ ವರ್ಷ ಕಾರ್ತಿಕ ತಿಂಗೊಲುಡ್ ಮಸ್ತ್ ಭಕ್ತೆರ್ ಈ ದೇವಲ್ಯಗ್ ಬನ್ನಗ ದೇವರೆಗ್ ತಾರಾಯಿ ಕನಪೆರ್. ಮುಲ್ಪ ಅಚ್ಚಿರ ದಾದ ಪಂಡ ಈ ದೇವಲ್ಯಡ್ ಭಕ್ತೆರ್ ಕನತಿನ ತಾರಾಯಿ ತನ್ನಾತಿಗೆ ಪುಡಾವುಂಡು. ಸಾಮಾನ್ಯವಾದ್ ದೇವಲ್ಯಡ್ ತಾರಾಯಿನ್ ಪೂಜೆದಕುಲು ಕಲ್ಲ್ ಗ್ ಹಾಕ್ ದ್, ರಡ್ಡ್ ಭಾಗ ಮಲ್ಪುವೆರ್. ಬೊಕ್ಕ ದೇವೆರೆನ ಎದುರು ದೀದ್, ವಾಪಸ್ ಕೊರ್ಪೆರ್. ಆಂಡ, ಈ ದೇವಲ್ಯಡ್ ಇಡೀ ತಾರಾಯಿನ್ ದೇವೆರೆನ ಎದುರು ದುಂಬೇ ದೀಪೆರ್. ವಾಪಸ್ ಕೊರ್ನಗ ತಾರಾಯಿ ತನ್ನಾತಿಗೆ ಪುಡಾದ್ ಇಪ್ಪುಂಡು. ಈ ದೇವಲ್ಯಡ್ ಪೇರ್ ಅಭಿಷೇಕ, ನೀರ್ ಅಭಿಷೇಕ ಮಸ್ತ್ ಪುದರ್ ಪಡೆತ್ತ್ ಡ್, ಕರಿನ 40 ವರ್ಷಲೆರ್ದ್ ಮಸ್ತ್ ಸಂಖ್ಯೆಡ್ ಭಕ್ತೆರ್ ಇಡೆಗ್ ಭೇಟಿ ಕೊರೊಂದು ಉಲ್ಲೆರ್. ತನ್ನ ಮನಸ್ ಡ್ ಎನ್ನಿನೆನ್ ದೇವೆರ್ ಮಲ್ತ್ ಕೊರ್ಪಾವೆರ್ ಪನ್ಪುನವು ಜನಕುಲೆನ ನಂಬಿಕೆ.
ಪುತ್ತೂರ್: ಇತಿಹಾಸ ಪುಗರ್ತೆದ ಮಹತೋಭಾರ ಶ್ರೀ ಮಹಾಲಿಂಗೇಶ್ವರ ದೇವಲ್ಯಡ್ ನ.23ದಾನಿ ನಡಪರೆ ಇಪ್ಪುನ ಲಕ್ಷದೀಪ ಉಚ್ಚಯದ ಅಂಗವಾದ್ ನ.20ಕ್ ದೇವಲ್ಯದ ಜಾವಡಿಡ್ ಸ್ವಚ್ಛತೆದ ಕಜ್ಜ ನಡಪರೆ ಉಂಡು.
ಬೊಲ್ಪುಗು 7 ಗಂಟೆರ್ದ್ 8.30 ಮುಟ್ಟ ಸ್ವಚ್ಛತಾ ಕಜ್ಜ ನಡಪುಂಡು. ಬೊಕ್ಕ ಉಪಾಹಾರ ಆದ್, ಅರ್ಧ ಗಂಟೆದ ಕಾಲ ಲಕ್ಷ ದೀಪೋತ್ಸವದ ವ್ಯವಸ್ಥೆ ಬೊಕ್ಕ ಅಟ್ಟಣೆದ ತಯಾರಿದ ಬಗೆಟ್ ಇಚಾರ ವಿನಿಮಯ ಸಭೆ ನಡಪರೆ ಉಂಡು. ಈ ಕಜ್ಜೊಡು ಭಕ್ತೆರ್ ಹೆಚ್ಚದ ಸಂಖ್ಯೆಡ್ ಪಾಲ್ ಪಡೆವೊಡು ಪಂದ್ ದೇವಲ್ಯದ ವ್ಯವಸ್ಥಾಪನಾ ಸಮಿತಿ ಪ್ರಕಟಣೆ ತೆರಿಪಾದ್ಂಡ್.
ಸ್ಯಾನ್ಫ್ರಾನ್ಸಿಸ್ಕೋ: ಎಲಾನ್ ಮಸ್ಕ್ ಮುತಾಲಿಕೆದ ಟ್ವಿಟರ್ ಕಂಪೆನಿಡ್ ಇತ್ತೆ ನೂದೆರ್ದ್ ಎಚ್ಚದ ಉದ್ಯೋಗಿಲು ಸಾಮೂಹಿಕವಾದ್ ರಾಜೀನಾಮೆ ಕೊರ್ತಿನ ಬಗೆಟ್ ಕಂಪೆನಿನ್ ತಾತ್ಕಾಲಿಕವಾದ್ ಮುಚ್ಚಿದೆರ್.
ಆತೆ ಅತ್ತಂದೆ ಟ್ವಿಟರ್ಡ್ #GoodByeTwitter, #RIPTwitter, #TwitterDown ಹ್ಯಾಶ್ಟ್ಯಾಗ್ ಟ್ರೆಂಡಿಂಗ್ಡ್ ಉಂಡು. ಟ್ವಿಟರ್ ಉದ್ಯೋಗಿಲೆಗ್ ಕಂಪೆನಿಡ್ ಒರಿಯರೆ ಬಯಕುವರಾ ಪನ್ಪಿನ ಪ್ರಶ್ನೆಗ್ ಗುರುವಾರ ಮಧ್ಯಾಹ್ನ 2 ಗಂಟೆ ಮುಟ್ಟ ಅವಕಾಶ ಕೊರ್ದಿತ್ತೆರ್. ಆಂಡ, ಉದ್ಯೋಗಿಲು ಸೆಲ್ಯೂಟ್ ಇಮೋಜಿ ಕಡಪಾದ್ ರಾಜೀನಾಮೆ ಸಂದೇಶನ್ ಪೋಸ್ಟ್ ಮಲ್ತ್ದೆರ್.
ಕುಡ್ಲ: ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ನಿ. ಕುಡ್ಲ, ಕರ್ನಾಟಕ ರಾಜ್ಯ ಸಹಕಾರ ಮಹಾಮಂಡಳ ನಿಯಮಿತ ಬೆಂಗ್ಲೂರ್, ಕರ್ನಾಟಕ ರಾಜ್ಯ ಸಹಕಾರ ಮಾರಾಟ ಮಹಾಮಂಡಳ ನಿಯಮಿತ ಬೆಂಗ್ಲೂರ್ ಮೊಕುಲೆನ ಮುತಾಲಿಕೆಡ್ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲಾ ಸಹಕಾರಿ ಯೂನಿಯನ್ ನಿಯಮಿತ, ದಕ್ಷಿಣ ಕನ್ನಡ ಸಹಕಾರಿ ಹಾಲು ಉತ್ಪಾದಕೆರ್ನ ಒಕ್ಕೂಟ ನಿಯಮಿತ ಕುಡ್ಲ, ನವೋದಯ ಗ್ರಾಮ ವಿಕಾಸ ಚಾರಿಟೇಬಲ್ ಟ್ರಸ್ಟ್ ರಿ. ಕುಡ್ಲ, ಸಹಕಾರ ಇಲಾಖೆ ಅಂಚನೆ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆದ ಮಾತ ಕೃಷಿ ಪತ್ತಿನ ಸಹಕಾರ ಸಂಘಲು, ಪಟ್ಟಣ ಸಹಕಾರ ಬ್ಯಾಂಕ್ ಅಂಚನೆ ಮಾತ ಬಗೆತ್ತ ಸಹಕಾರ ಸಂಘದ ಒಟ್ಟು ಸೇರಿಗೆಡ್ 69ನೇ ಅಖಿಲ ಭಾರತ ಸಹಕಾರ ಸಪ್ತಾಹ 2022 ಲೇಸ್ ನ. 18 ಸುಕ್ರಾರ ಕಾಂಡೆ 10 ಗಂಟೆಗ್ ಕುಡ್ಲದ ಕರಾವಳಿ ಉತ್ಸವ ಮೈದಾನಡ್ ನಡತ್ಂಡ್.
ಸಹಕಾರ ಸಚಿವೆರ್ ಎಸ್.ಟಿ. ಸೋಮಶೇಖರ್ ತುಡರ್ ಅರ್ಲಾದ್ ಲೇಸ್ ಉದಿಪನ ಮಲ್ತೆರ್. ಆಯಿಬೊಕ್ಕ ಪಾತೆರಿನ ಆರ್, ರಾಜ್ಯಡ್ ಗ್ರಾಹಕೆರ್ನ ವಿಶ್ವಾಸನ್ ಒರಿಪಾವೊಂದು ಬತ್ತಿನವು ಸಹಕಾರಿ ಕ್ಷೇತ್ರದ ಪೆರ್ಮೆ ಆತ್ಂಡ್. ರಾಜ್ಯ ಸರ್ಕಾರ ಜಾರಿಗ್ ಕನತಿನ ಯಶಸ್ವಿನಿ ಯೋಜನೆ ಭಾರೀ ಪುಗರ್ತೆದ ಯೋಜನೆ ಆತ್ಂಡ್. ಇತ್ತೆ ಕುಡೊರ ಕೃಷಿಕೆರ್, ಸಹಕಾರಿಲು ಮುಖ್ಯಮಂತ್ರಿಲೆಗ್ ಮನವಿ ಮಲ್ತಿನ ಕಾರಣ ಕುಡ ಯೋಜನೆನ್ ಸಮರ್ಪಕವಾದ್ ಜಾರಿಗ್ ಕನಯರೆ ಉಂಡು. ಕುಡ್ಲಡ್ ಸಹಕಾರಿ ಕ್ಷೇತ್ರ ಏತೆತ್ತ ಮಟ್ಟ್ಗ್ ಸಾಧನೆ ಮಲ್ತ್ದ್ಂಡ್ ಪಂಡ ಅವೆಕ್ಕ್ ಮುಲ್ಪ ಸೇರಿನ ಸಹಕಾರಿಲೇ ಸಾಕ್ಷಿ ಪಂದ್ ಪಂಡೆರ್.
ಕರ್ನಾಟಕ ರಾಜ್ಯ ಸಹಕಾರ ಮಾರಾಟ ಮಹಾಮಂಡಳಿ ನಿ. ಬೆಂಗ್ಲೂರ್ ಉಂದೆತ್ತ ನಿರ್ದೇಶಕೆರ್ ದೇವಿಪ್ರಸಾದ್ ಶೆಟ್ಟಿ ಬೆಳಪು ಪಾತೆರ್ದ್, 12,800 ಕೋಟಿ ವ್ಯವಹಾರ ನಡಪಾವುನ ಮುಕೇನ ಎಸ್ಸಿಡಿಸಿಸಿ ಬ್ಯಾಂಕ್ ಸಾಧನೆ ಮಲ್ತ್ಂಡ ಅವೆಕ್ಕ್ ರಾಜೇಂದ್ರ ಕುಮಾರ್ ಅರೆನ ಕಾರ್ಯವೈಖರಿ ಕಾರಣ ಆತ್ಂಡ್. ಲಕ್ಷಾಂತರ ನವೋದಯ ಸ್ವಸಹಾಯ ಗುಂಪುಲೆನ್ ರಚನೆ ಮಲ್ತ್ದ್ ಪೊಂಜೋವುಲೆನ ಕೈಕ್ ಶಕ್ತಿ ದಿಂಜಾಯಿನ ಎಂ.ಎನ್ ಆರ್ ಮಾತೆರೆಗ್ಲಾ ಮಾದರಿ ಆದ್ ಉಲ್ಲೆರ್ ಪಂದ್ ಪಂಡೆರ್.
ಮಾನಾದಿಗೆ ಪಡೆಯೊಂದು ಪಾತೆರಿನ ಡಾ. ಎಂ. ಎನ್ ರಾಜೇಂದ್ರ ಕುಮಾರ್ “ದೇವೆರೆನ ಆಶೀವಾರ್ದರ್ದ್ ಯಾನ್ ರಡ್ಡನೇ ಸರ್ತಿ ಅಧ್ಯಕ್ಷೆಯಾದ್ ಆಯ್ಕೆ ಆತೆ. ಯಾನ್ ಈತ್ ಬುಲೆಯರೆ ಕಾರಣ ನಿಕುಲು. ನಮ್ಮ ಜಿಲ್ಲೆಗ್ ಸಹಕಾರ ರತ್ನ ಪ್ರಶಸ್ತಿ ಬತ್ತಿನವು ಕುಷಿತ್ತ ಇಚಾರ ಆತ್ಂಡ್. ಜಿಲ್ಲೆದ ಸಹಕಾರಿ ಕ್ಷೇತ್ರನ್ ಆಯ್ಕೆ ಮಲ್ತಿನೆಕ್ಕ್ ಸಚಿವೆರ್ ಬೊಕ್ಕ ಸರಕಾರಗ್ ಸೊಲ್ಮೆ ಸಂದೈತ ಮಲ್ಪುವೆ ಪಂದ್ ಪಂಡೆರ್. ಉಳ್ಳಾಲ ವಿಧಾನಸಭಾ ಕ್ಷೇತ್ರದ ಶಾಸಕೆರ್ ಯು.ಟಿ. ಖಾದರ್ ಬೊಕ್ಕ ಕುಡ್ಲ ದಕ್ಷಿಣ ಕ್ಷೇತ್ರ ಶಾಸಕೆರ್ ವೇದವ್ಯಾಸ್ ಕಾಮತ್ ಲೇಸ್ಗ್ ಎಡ್ಡೆಪ್ಪುನು ಬಯಕಿಯೆರ್.
ಕರ್ನಾಟಕ ಸರಕಾರ ರಾಜ್ಯ ಮಟ್ಟಡ್ ಕೊರ್ಪಿನ ಸಹಕಾರ ರತ್ನ ಪ್ರಶಸ್ತಿಗ್ ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆರ್ದ್ ಈ ಸರ್ತಿ 5 ಜನ ಆಯ್ಕೆ ಆತೆರ್. ದಕ್ಷಿಣಕನ್ನಡ ಜಿಲ್ಲೆರ್ದ್ ಕೊಂಕೋಡಿ ಪದ್ಮನಾಭ, ನಿತ್ಯಾನಂದ ಮುಂಡೋಡಿ ಅಂಚನೆ ದಂಬೆಕಾನ ಸದಾಶಿವ ರೈ, ಒಡಿಪು ಜಿಲ್ಲೆರ್ದ್ ಜಯಕರ ಶೆಟ್ಟಿ ಇಂದ್ರಾಳಿ ಬೊಕ್ಕ ಯಶ್ಪಾಲ್ ಸುವರ್ಣ ಮೊಕಲೆಗ್ “ಸಹಕಾರ ರತ್ನ” ಪ್ರಶಸ್ತಿನ್ ಕೊರ್ದ್ ವೇದಿಕೆಡ್ ಮಾನಾದಿಗೆ ಮಲ್ತೆರ್.
ಕಾಂಡೆ 9 ಗಂಟೆಗ್ ಸಹಕಾರ ಸಂಘ, ಸಂಸ್ಥೆಲೆನ ಪ್ರತಿನಿಧಿಲೆನ ಸಹಕಾರ ಜಾಥಾ ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ದ ಜಾಗೆರ್ದ್ ಕರಾವಳಿ ಉತ್ಸವ ಮೈದಾನ ಮುಟ್ಟ ನಡತ್ಂಡ್. ಬೇತೆ ಬೇತೆ ರೀತಿದ ಟ್ಯಾಬ್ಲೊ, ಚೆಂಡೆ, ಕೊಂಬು, ಸ್ಯಾಕ್ಸೋಫೋನ್ದೊಟ್ಟುಗು ಈ ಜಾಥಾ ನಡತ್ಂಡ್.
ಟಿ.ಜಿ. ರಾಜರಾಮ ಭಟ್ ಬತ್ತಿನ ಬಿನ್ನೆರೆನ್ ಎದ್ಕೊನಿಯೆರ್. ನಿತೀಶ್ ಶೆಟ್ಟಿ ಎಕ್ಕಾರ್ ಲೇಸ್ ಸುಧಾರಿಕೆ ಮಲ್ತೆರ್.
ಕುಡ್ಲ: ಅಂದಾಜಿ 39 ಲಕ್ಷ ರೂ. ಬಿಲೆತ್ತ ಗಾಂಜಾ ವಶ ಮಲ್ತಿನ ಪೊಲಿಸೆರ್, ಬಂಟ್ವಾಳದ ರಮೀಜ್ ರಾಜಾ ಬೊಕ್ಕ ಮಂಜೇಶ್ವರದ ಅಬ್ದುಲ್ ಹಾರಿಸ್ ಖಾದರ್ ಪನ್ಪಿನ ಆರೋಪಿಲೆನ್ ಅರೆಸ್ಟ್ ಮಲ್ದೆರ್.
ಈ ಬಗೆಟ್ ನ.18 ಶುಕ್ರಾರದಾನಿ ಮಾಧ್ಯಮಡ್ ಪೊಲೀಸ್ ಆಯುಕ್ತೆರ್ ಶಶಿಕುಮಾರ್ ಪಾತೆರ್ದ್,
ಮೊಕುಲು ರಡ್ಡ್ ಜನ ವಿಶಾಖಪಟ್ಟಣರ್ದ್ ಕೆಎಲ್ 14 ಪಿ 7775 ಸಂಖ್ಯೆದ ಎಸ್ಯುವಿಡ್ ಗಾಂಜಾ ಕನದೆರ್. ಈ ಬಗೆಟ್ ಸಿಇಎನ್ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಕೊಣಾಜೆ ಪೊಲೀಸ್ ಠಾಣಾ ವ್ಯಾಪ್ತಿದ ಮುಡಿಪು ಕಾಯಕೋಡಿಡ್ ಮೊಕ್ಲೆನ ಗಾಡಿನ್ ಉಂತಾದೆರ್. ಮೊಕುಲು ಈ ಗಾಂಜಾನ್ ಅಮಲ್ ಸೊತ್ತುದ ವ್ಯಾಪಾರಿಲೆಗ್, ಕೇರಳ, ಮಣಿಪಾಲ, ದಕ್ಷಿಣ ಕನ್ನಡ ಬೊಕ್ಕ ಉತ್ತರ ಕನ್ನಡದ ಕೆಲವು ಭಾಗದ ಗ್ರಾಹಕೆರೆಗ್ ಮಾರಿಯೆರೆ ಇತ್ತೆರ್ ಪಂದ್ ತೆರಿದ್ ಬೈದ್ಂಡ್. ಅಂಚನೆ ಸುರುತ ತನಿಖೆಡ್, ಆರೋಪಿಲು ಕಾರ್, ಮೀನ್ ದ ಗಾಡಿ ಬೊಕ್ಕ ಟ್ರಕ್ಡ್ ಮೂಜಿ-ನಾಲ್ ಸರ್ತಿ ವಿಶಾಖಪಟ್ಟಣರ್ದ್ ಗಾಂಜಾಲೆನ್ ಕನದೆರ್. ಆತೆ ಅತ್ತಂದೆ ಮೊಕ್ಲೆನ ಮಲ್ಲ ನೆಟ್ವರ್ಕ್ ಕ್ಕೆ ಉಂಡು. ನೆಟ್ ಸುಮಾರ್ ಜನ ಉಲ್ಲೆರ್ ಪಂದ್ ತೆರಿದ್ ಬೈದ್ಂಡ್. ಈ ಕೇಸ್ ಗ್ ಸಂಬಂಧ ಪಟ್ಟಿನ ಲಿಂಕ್ ನ್ ತನಿಖೆ ಮಲ್ಪುವ ಪಂದ್ ಪಂಡೆರ್.
ಚಿಕ್ಕಮಗಳೂರು: ವ್ಯಕ್ತಿಯೊರಿ ಪೊವೊಂದು ಇತ್ತಿನ ಕೆಎಸ್ ಆರ್ ಟಿಸಿ ಬಸ್ ರ್ದ್ ಲಾಗಿದ್ ಆತ್ಮಹತ್ಯೆ ಮಲ್ತೊನ್ನ ಘಟನೆ ಶಿವಮೊಗ್ಗ ಜಿಲ್ಲೆದ ಭದ್ರಾವತಿದ ವೀರಾಪುರ ಕ್ರಾಸ್ ಡ್ ನಡತ್ಂಡ್.
ಈ ಘಟನೆಡ್ ಚಿಕ್ಕಮಗಳೂರು ಜಿಲ್ಲೆದ ತರೀಕೆರೆ ತಾಲೂಕ್ ದ ಮಿಳ್ಳೆನಹಳ್ಳಿ ನಿವಾಸಿ ನಂದೀಶ್ (35) ತೀರ್ ಪೋಯಿನರ್. ಕೆಲವು ವರ್ಷೊದಿಂಚ ಮಾನಸಿಕ ಒತ್ತಡಡ್ ಬಳಲೊಂದು ಇತ್ತಿನ ಮೇರ್ ತನ್ನ ಮಾನಸಿಕ ರೋಗಗ್ ಚಿಕಿತ್ಸೆ ಪಡೆಯೆರೆ ಮೆಗ್ಗಾನ್ ಆಸ್ಪತ್ರೆಗ್ ದೋಸ್ತಿನೊಟ್ಟಿಗೆ ಬೈದೆರ್. ಅಲ್ಪ ಡಾಕ್ಟರ್ ಕೊರೊಂದು ಇತ್ತಿನ ಚಿಕಿತ್ಸೆ ಬೋರ್ಚೆ ಬೋರ್ಚಿ ಪಂದ್ ಹಟ ಮಲ್ದೆರ್. ಬೊಕ್ಕ ಆಸ್ಪತ್ರೆರ್ದ್ ಕೆಎಸ್ಆರ್ ಟಿಸಿ ಬಸ್ಸ್ ಟ್ ವಾಪಸ್ ಇಲ್ಲಲ್ ಪೊನಗ ಪೋವೊಂದು ಇತ್ತಿನ ಬಸ್ಸ್ ರ್ದ್ ಲಾಗಿದೆರ್. ಮೇರ್ ಲಾಗಿನೆನ್ ತೂದುಲ ಡ್ರೈವರ್ ಬಸ್ ಉಂತಾವಂದೆ ಪೋತೆರ್ ಪಂದ್ ತೆರಿದ್ ಬೈದ್ಂಡ್. ಮೆರೆನ ಪುನನ್ ಭದ್ರಾವತಿ ಸರ್ಕಾರಿ ಆಸ್ಪತ್ರೆಗ್ ಕೊನೊತೆರ್. ಈ ಬಗೆಟ್ ಭದ್ರಾವತಿ ಗ್ರಾಮಾಂತರ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
