November 2022

ದುಬೈಡ್ ಅಬುಧಾಬಿ ಕರ್ನಾಟಕ ಸಂಘದ 41ನೇ ವರ್ಷದ ಕರ್ನಾಟಕ ರಾಜ್ಯೋತ್ಸವ ಲೇಸ್

ದುಬೈ: ಸುವರ್ಣ ಕರ್ನಾಟಕ ರಾಜ್ಯೋತ್ಸವ ಪುರಸ್ಕೃತೆರ್ ಅಬುಧಾಬಿ ಕರ್ನಾಟಕ ಸಂಘದ 41 ನೇ ವರ್ಷದ ಕರ್ನಾಟಕ ರಾಜ್ಯೋತ್ಸವ ಅಬುಧಾಬಿ ಪೇಂಟೆದ ಇಂಡಿಯನ್ ಸೋಷಿಯಲ್ ಆಂಡ್ ಕಲ್ಚರಲ್ ಸೆಂಟರ್ ಚಾವಡಿಡ್ ನ.6 ಕ್ಕ್ ಭಾರೀ ಗೌಜಿಡ್ ನಡತ್ಂಡ್.
ಕರ್ನಾಟಕ ಸಂಘದ ಸದಸ್ಯೆರ್ ಕರ್ನಾಟಕದ ನಾಡಗೀತೆ ಪನ್ಪಿನ ಮುಕೇನ ಲೇಸ್ ಸುರು ಮಲ್ತೆರ್. ಯು.ಎ.ಇ ಭಾರತೀಯ ದೂತಾವಾಸದ ರಾಯಭಾರಿ ಸಂಜಯ್ ಸುಧೀರ್ ತುಡರ್ ಅರ್ಲಾದ್ ಲೇಸ್‌ನ್ ಉದಿಪನ ಮಲ್ತೆರ್.

ಈ ಪೊರ್ತುಡು ದ.ಕ.ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ವಿಜೇತೆರ್ ಸಮಾಜ ಸೇವಕೆರ್ ಮಿತ್ರಂಪಾಡಿ ಜಯರಾಮ ರೈ ಬೊಕ್ಕ ಬಿ.ಕೆ ಗಣೇಶ್ ರೈ, ವಿದುಷಿ ಸ್ವಪ್ನ ಕಿರಣ್ ಮೊಕಲೆನ್ ಲೇಸ್‌ಡ್ ಮಾನಾದಿಗೆ ಮಲ್ತೆರ್. ಮನೋಹರ ತೋನ್ಸೆ ಸಂಪಾದಕೆರ್ ಬರೆಯಿನ “ದುಬಾಯಿಡ್ ಧ್ವನಿ” ಬೂಕುನ್ ಲೇಸ್‌ಡ್ ಇತ್ತಿನ ಬಿನ್ನೆರ್ ಬುಡುಗಡೆ ಮಲ್ತೆರ್.

ಇಂಡಿಯನ್ ಸೋಷಿಯಲ್ ಆಂಡ್ ಕಲ್ಚರಲ್ ಸೆಂಟರ್ ಅಬುಧಾಬಿ ಅಧ್ಯಕ್ಷೆರ್ ಡಾ. ನಟರಾಜನ್, ಸರ್ಮೋತ್ತಮ ಶೆಟ್ಟಿ, ಇಂಡಿಯನ್ ಎಂಬೆಸಿ ಕಮ್ಯೂನಿಟಿ ಅಫೇರ್ಸ್ ಮುಖ್ಯಸ್ಥೆರ್ ರೀಶಾ ಒಬೆರಾಯ್, ಹಾಸ್ಯ ಕಲಾವಿದೆರ್ ಸುಧಾ ಬರಗೂರು ಸೇರಿನಂಚನೆ ಮಸ್ತ್ ಬಿನ್ನೆರ್ ಲೇಸ್‌ಡ್ ಇತ್ತೆರ್. ಮನೋಹರ ತೋನ್ಸೆ ಬೊಕ್ಕ ಕೃಷ್ಣ ಕುಳಾಯಿ ಲೇಸ್ ಸುಧಾರಿಕೆ ಮಲ್ತೆರ್.

ತುಳುನಾಡ್ದ ಸ್ವಾತಂತ್ರ್ಯ ಪೊರ್ಂಬಾಟಗಾರೆ ಕೆದಂಬಾಡಿ ರಾಮಯ್ಯ ಗೌಡ ಮೆರೆನ ಪೊರ್ಲಕಂಟ್ ದ ಕಂಚಿದ ಮೂರ್ತಿ ಉದಿಪನ ಮಲ್ತಿನ ಸಿಎಂ ಬಸವರಾಜ್ ಬೊಮ್ಮಾಯಿ

ಕುಡ್ಲ: ತುಳುನಾಡ್ ದ ಸ್ವಾತಂತ್ರ್ಯ ಪೊರ್ಂಬಾಟಗಾರೆ, ಸಮರವೀರೆ ಕೆದಂಬಾಡಿ ರಾಮಯ್ಯ ಗೌಡ ಮೆರೆನ ಪೊರ್ಲಕಂಟ್ ದ ಕಂಚಿದ ಮೂರ್ತಿನ್ ಸಿಎಂ ಬಸವರಾಜ್ ಬೊಮ್ಮಾಯಿ ಮೇರ್ ಸನಿಯಾರ ಕಾಂಡೆ ಕುಡ್ಲದ ಬಾವುಟಗುಡ್ಡೆ ಪಾರ್ಕ್ ಡ್ ಉದಿಪನ ಮಲ್ತೆರ್.

ಈ ಪೊರ್ತುಡು ಬಂದರು, ಮೀನುಗಾರಿಕೆ ಅಂಚನೆ ಒಳನಾಡು ಜಲಸಾರಿಗೆ ಸಚಿವೆರ್ ಎಸ್. ಅಂಗಾರ, ಉಳ್ಳಾಲ ವಿಧಾನಸಭಾ ಕ್ಷೇತ್ರದ ಶಾಸಕೆರ್ ಯು.ಟಿ.ಖಾದರ್, ಕುಡ್ಲ ದಕ್ಷಿಣ ಕ್ಷೇತ್ರದ ಶಾಸಕೆರ್ ವೇದವ್ಯಾಸ್ ಕಾಮತ್ ಸೇರಿನಂಚನೆ ಮಸ್ತ್ ಜನ ಪ್ರತಿನಿಧಿಕುಲು ಲೇಸ್‌ಡ್ ಪಾಲ್ ಪಡೆದಿತ್ತೆರ್.

ಕುಡ್ಲಗ್ ಬತ್ತಿನ ಸಿಎಂ ಬೊಮ್ಮಾಯಿ

ಕುಡ್ಲ: ಸ್ವಾತಂತ್ರ್ಯ ಪೊರ್ಂಬಾಟಗಾರೆ, ಸಮರವೀರೆ ಕೆದಂಬಾಡಿ ರಾಮಯ್ಯ ಗೌಡ ಮೆರೆನ ಕಂಚ್‌ದ ಮೂರ್ತಿ ಲೋಕಾರ್ಪಣೆ ಮಲ್ಪರೆ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಸನಿವಾರ ಬಜಪೆದ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಗ್ ಬತ್ತೆರ್.

ಈ ಪೊರ್ತುಡು ಬಂದರು, ಮೀನುಗಾರಿಕೆ ಅಂಚನೆ ಒಳನಾಡು ಜಲಸಾರಿಗೆ ಸಚಿವೆರ್ ಎಸ್. ಅಂಗಾರ ಅಂಚನೆ ಜನಪ್ರತಿನಿಧಿಲು ಅರೆನ್ ಎದ್ಕೊನಿಯೆರ್.